Ako 10
Te ʼu Aga ʼAē ʼe Fehiʼa Kiai Te ʼAtua
Koteā takotou manatu ʼo ʼuhiga mo te ʼu meʼa ʼaē ʼe ʼui e te ʼAtua ʼe kovi? (1)
Koteā te ʼu faʼahiga aga fakasino ʼaē ʼe kovi? (2)
Koteā te manatu ʼa he Kilisitiano ʼo ʼuhiga mo te loi? (3) te gaoʼi paʼaga? (3) te kaihaʼa? (3) te agamālohi? (4) te faifakalauʼakau? (5) te konahia? (6)
ʼE lava feafeaʼi ki he tahi ke ina līaki te ʼu meʼa kovi ʼaia? (7)
1. Ko te kau kaugana ʼa te ʼAtua ʼe nātou manako ki te meʼa ʼaē ʼe lelei. Kae ʼe tonu foki ke nātou ako te fehiʼa ki te meʼa ʼaē ʼe kovi. (Pesalemo 97:10) Ko tona faka ʼuhiga ke nātou tekeʼi te ʼu faʼahiga aga ʼaē ʼe fehiʼa kiai te ʼAtua. Koteā koa te ʼu faʼahiga aga ʼaia?
2. Te Folonikasio: Ko te ʼu felāveʼi fakasino ʼi muʼa ʼo te ʼohoana, te tono, te ʼu felāveʼi fakasino mo te ʼu manu, te ʼu felāveʼi fakasino mo he kāiga, pea mo te ʼu felāveʼi fakasino ʼa he tagata mo he tahi tagata pea mo he fafine mo he tahi fafine, ʼe ko he ʼu agahala mamafa fuli ʼaia ki te ʼAtua. (Levitike 18:6; Loma 1:26, 27; 1 Kolonito 6:9, 10) Kapau ko he fafine mo he tagata ʼe nā nonofo fakatahi kae mole heʼeki nā ʼohoana, ʼe tonu ke nā mavete peʼe nā ʼohoana ʼo mulimuli ki te lao.—Hepeleo 13:4.
3. Te Loi, Te Gaoʼi Paʼaga, Te Kaihaʼa: Ko Sehova ʼAtua ʼe mole feala ke loi. (Tito 1:2) Ko te hahaʼi ʼaē ʼe nātou loto ke leleiʼia nātou e te ʼAtua ʼe tonu ke nātou tekeʼi te loi. (Tāʼaga Lea 6:16-19; Kolose 3:9, 10) Ko te ʼu faʼahiga gaoʼi paʼaga fuli ʼe ko te mānumānu. Koia ʼe mole kau te kau Kilisitiano ki he faʼahiga gaoʼi paʼaga, ohage la ko te ʼu loteli, te ʼu lele hōsi, pea mo te piniko. (Efesi 5:3-5) Pea ko te kau Kilisitiano ʼe mole nātou kaihaʼa. ʼE mole tonu ke nātou totogi he koloā kae ʼe nātou ʼiloʼi lelei pe neʼe kaihaʼa peʼe nātou toʼo he ʼu meʼa kae neʼe mole nātou kole.—Ekesote 20:15; Efesi 4:28.
4. Te ʼIta, Te Agamālohi: Ko te ʼita kovi ʼe feala ke iku ki he ʼu agamālohi. (Senesi 4:5-8) Ko he tahi ʼe agamālohi ʼe mole feala ke kaumeʼa mo te ʼAtua. (Pesalemo 11:5; Tāʼaga Lea 22:24, 25) ʼE kovi te lagavaka peʼe ko te liufaki ʼo te kovi ʼaki te ʼu meʼa kovi ʼaē neʼe fai mai e ʼihi kia tatou.—Tāʼaga Lea 24:29; Loma 12:17-21.
5. Te Faitutuku Mo Te Faifakalauʼakau: Ko ʼihi ʼe nātou pāuiʼi te mālohi ʼo te ʼu laumālie moʼo faigaʼi ke fakamālōlō ʼaki te ʼu mahaki. Ko ʼihi ʼe nātou fai he ʼu faitutuku ki ʼonatou ʼu fili ke nātou mahahaki peʼe ke nātou mamate. Ko te mālohi ʼaē ʼe ina fakahoko te ʼu meʼa fuli ʼaia ʼe ko Satana. Koia ʼaē ʼe mole tonu ki te kau Kilisitiano ke nātou kau ki te ʼu meʼa ʼaia. (Teutalonome 18:9-13) Ko te nofo ōvi kia Sehova ʼe ko he puipuiʼaga lelei ʼaia ki te ʼu faitutuku ʼaē ʼe feala ke fai mai kia tatou e ʼihi.—Tāʼaga Lea 18:10.
6. Te Konahia: ʼE mole kovi te ʼinu ʼo he kiʼi moʼi vino, he piele, peʼe ko ʼihi age ʼu kava. (Pesalemo 104:15; 1 Timoteo 5:23) Kae, ko te ʼinu lahi ʼo te kava pea mo te konahia ʼe ko he ʼu meʼa ʼe kovi kia mata ʼo te ʼAtua. (1 Kolonito 5:11-13; 1 Timoteo 3:8) Ko te ʼinu kava fakavale ʼe feala ke fakatupu kovi ki tokotou maʼuli mālōlō pea mo fakamavetevete ai tokotou famili. Tahi ʼaē meʼa, kapau ʼe koutou ʼinu kava fakavale, pea ʼe feala ai ke koutou tō gafua ki he tahi ʼu fakahala.—Tāʼaga Lea 23:20, 21, 29-35.
7. Ko te hahaʼi ʼaē ʼe nātou fai te ʼu meʼa ʼaē ʼe ʼui e te ʼAtua ʼe kovi, ʼe mole nātou “maʼu anai te puleʼaga ʼo te ʼAtua.” (Kalate 5:19-21) Kapau ʼe koutou ʼoʼofa moʼoni ki te ʼAtua pea mo koutou loto ke ina leleiʼia koutou, ʼe feala ke koutou līaki te ʼu aga ʼaia. (1 Soane 5:3) Koutou ako te fehiʼa ki te ʼu meʼa ʼaē ʼe ʼui e te ʼAtua ʼe kovi. (Loma 12:9) Koutou fakatahi mo te hahaʼi ʼaē ʼe nātou maʼu he ʼu aga faka lotu. (Tāʼaga Lea 13:20) Ko he ʼu kaumeʼa Kilisitiano kua fakapotopoto ʼi te faʼahi fakalaumālie ʼe feala ke nātou tokoni moʼoni atu kia koutou. (Sake 5:14) Ia meʼa fuli, koutou falala tāfito ki te tokoni ʼa te ʼAtua ʼaki te faikole.—Filipe 4:6, 7, 13.
[Paki ʼo te pasina 20]
ʼE fehiʼa te ʼAtua ki te konahia, te kaihaʼa, te gaoʼi paʼaga, pea mo te agamālohi