Koteā ʼAē ʼe Hoko ʼi Te Mate?

Ko te mate ʼe mole tatau mo te maʼuli. Ko te mate ʼe hage ko he moe loloto. (Soane 11:11-14) Ko te kau mate ʼe mole feala ke nātou logo, mo sio, mo palalau, pea mo fakakaukauʼi he meʼa. (Tagata Tānaki 9:5, 10) Ko te lotu hala ʼe ina ʼui ko te kau mate ʼe nātou ʼolo ki he mālama fakalaumālie, ke nātou nonofo ai mo tanatou ʼu kui, kae ʼe mole akoʼi mai te faʼahi ʼaia e te Tohi-Tapu.

Ko te kau mate ʼe mole feala ke nātou tokoni mai kia tatou, pea ʼe mole feala ke nātou fai mai he ʼu meʼa kovi kia tatou. ʼE fai māhani e te hahaʼi he ʼu agaʼi fenua pe ko he ʼu sakilifisio heʼe nātou manatu ʼe leleiʼia anai e te kau mate. Kae ʼe mole leleiʼia e te ʼAtua, heʼe fakatafito te ʼu faʼahi ʼaia ki te ʼu loi ʼa Satana. Tahi ʼaē meʼa, ʼe mole feala ke leleiʼia e te kau mate, heʼe mole nātou maʼuʼuli. ʼE mole tonu ke tou matataku peʼe tou tauhi ki te kau mate. ʼE tonu ke tou atolasio pe ki te ʼAtua.—Mateo 4:10.

ʼE toe maʼuʼuli anai te kau mate. ʼE toe fakaʼala ake anai e Sehova te kau mate ʼi te palatiso kelekele. Kae ʼe hoko anai te faʼahi ʼaia ʼi te ka haʼu. (Soane 5:28, 29; Gaue 24:15) ʼE feala moʼoni ki te ʼAtua ke ina fakaʼala ake te kau mate, ohage pe ko takotou lava fakaʼala ake he tahi ʼe moe.—Maleko 5:22, 23, 41, 42.

Ko te ʼui ʼaē ʼe mole tou mamate, ʼe ko he loi neʼe faka mafola e Satana te Tevolo. ʼE fai e Satana mo tana kau temonio he ʼu meʼa ke manatu ai te hahaʼi ʼe maʼuʼuli te ʼu laumālie ʼo te kau mate, pea ʼe nātou fakatupu te ʼu mahaki pea mo te tahi ʼu fihifihia. ʼI ʼihi temi ʼe kākāʼi e Satana te hahaʼi, ʼaki he ʼu moemisi peʼe ina fakaʼasi he ʼu meʼa kia nātou. ʼE tauteaʼi e Sehova te hahaʼi ʼaē ʼe nātou fia palalau mo te kau mate.—Teutalonome 18:10-12.