Koutou Līaki Te Lotu Hala!

ʼE mole loto e Satana mo tana kau temonio ke koutou tauhi ki te ʼAtua. Ka na ko he meʼa la ʼe feala, ʼe nātou fakamaliu anai te hahaʼi fuli mai te ʼAtua. ʼE nātou fakahoko feafeaʼi te faʼahi ʼaia? ʼE nātou fakaʼaogaʼi te lotu hala. (2 Kolonito 11:13-15) ʼE ʼui ko he lotu ʼe hala mo kapau ʼe mole ina akoʼi te moʼoni ʼaē ʼe haʼu mai te Tohi-Tapu. Ko te lotu hala ʼe hage ko te falā loi, heʼe hage ʼe moʼoni, kae ʼe ko he falā loi, pea ʼe feala ke ina fakatupu he tuʼuga fihifihia kia koutou.

ʼE mole he temi ʼe feala ai kia Sehova, te ʼAtua ʼo te moʼoni, ke ina leleiʼia te lotu hala. ʼI te kei maʼuli ʼa Sesu ʼi te kele, neʼe ʼi ai te kūtuga lotu neʼe nātou fia matehi ia ia. Neʼe nātou manatu ʼe lelei tanatou faʼahiga tauhi. Neʼe nātou ʼui fēnei: “Ko tamatou Tāmai pe e tahi, ko te ʼAtua.” Neʼe tali koa e Sesu te faʼahi ʼaia? Kailoa, he neʼe ina ʼui fēnei kia nātou: “ ʼE koutou ʼōmai koutou mai takotou tāmai te Tevolo.” (Soane 8:41, 44, MN) Ia ʼaho nei, ko te tokolahi ʼo te hahaʼi ʼe nātou manatu ʼe nātou tauhi ki te ʼAtua, kae ʼi tona fakahagatonu, ʼe nātou tauhi nātou kia Satana mo tana kau temonio!—1 Kolonito 10:20.

Ohage pe ko he fuʼu ʼakau kovi ʼe ina fakatupu he ʼu fua kovi, ʼo toe feiā pe ko te lotu hala ʼe ina fakatupu he ʼu hahaʼi ʼe nātou fai he ʼu meʼa kovi. ʼE lahi te ʼu fihifihia ʼi te malamanei, ʼuhi ko te ʼu meʼa kovi ʼaē ʼe fai e te hahaʼi. ʼE maʼu ai te ʼu aga heʼeʼaoga, te fuhu, te kaihaʼa, te gaohi koviʼi ʼo te hahaʼi, te fai fakapō, pea mo te fakaʼalikiʼi. Ko te tokolahi ʼo te hahaʼi ʼaē ʼe nātou fai te ʼu meʼa kovi ʼaia, ʼe ʼi ai tanatou lotu, kae ko tanatou lotu ʼe mole ina uga nātou ke nātou fai te meʼa ʼaē ʼe lelei. ʼE hoki feala ke nātou kaumeʼa mo te ʼAtua, mo kapau ʼe nātou tuku te fai ʼo te ʼu meʼa kovi ʼaia.—Mateo 7:17, 18.

Ko te lotu hala ʼe ina akoʼi te hahaʼi ke nātou faikole ki te ʼu fakatātā. ʼE fakatotonu mai e te ʼAtua ke ʼaua naʼa tou faikole ki te ʼu fakatātā, pea ʼe tonu te fakatotonu ʼaia. ʼE koutou leleiʼia koa la mokā mole palalau atu he tahi kia koutou kae palalau ia ki tokotou paki? ʼE feala koa ke liliu ko hokotou kaumeʼa moʼoni? Kailoa! ʼE loto e Sehova ke palalau age te hahaʼi kia te ia, kae ke mole nātou palalau ki he ʼu meʼa mate, ohage ko he fakatātā pe ko he paki.—Ekesote 20:4, 5.

Ko te lotu hala ʼe ina akoʼi mai ʼe lelei te matehi ʼo te hahaʼi ʼi te ʼu temi tau. Neʼe ʼui e Sesu ko te ʼu kaumeʼa ʼo te ʼAtua, ʼe nātou feʼofani anai. ʼE mole tou matehi te hahaʼi ʼaē ʼe tou ʼoʼofa ki ai. (Soane 13:35) ʼO toe feiā aipe, ʼe kovi hatatou matehi te hahaʼi agakovi. ʼI te temi ʼaē neʼe ʼōmai ai te ʼu fili ʼo Sesu moʼo puke ʼoʼona, neʼe mole ina tuku tana ʼu tisipulo ke nātou tau moʼo puipui ia ia.—Mateo 26:51, 52.

Ko te lotu hala ʼe ina ʼui ko te kau agakovi ʼe nātou maʼuli mamahi anai ʼi te ʼifeli kakaha. Kae ʼe ʼui e te Tohi-Tapu, ko te agahala ʼe iku ki te mate. (Loma 6:23) Ko Sehova ʼe ko te ʼAtua ʼofa. Ko he ʼAtua ʼofa, ʼe ina fakamamahiʼi anai koa te hahaʼi ʼo talu ai? Kailoa! ʼI te Palatiso, ʼe ko te lotu pe anai e tahi, ko te lotu ʼaē ʼe tali e Sehova. (Apokalipesi 15:4) ʼE pulihi anai te ʼu lotu fuli ʼaē ʼe nātou mulimuli ki te ʼu loi ʼa Satana.