Kapite Hogofulu
Ko He Puleʼaga “ ʼe Mole Pulihi Anai ʼi He Temi”
1. Koteā ʼaē ʼe fakamoʼoni e te hisitolia ʼo te malamanei?
KO TE ʼu meʼa ʼaē ʼe hoko ʼi te ʼaho fuli ʼi te malamanei, ʼe ina fakahā lelei mai ʼe mole maʼuli fiafia te tagata ʼi tana fakafisi ki te pule ʼo Sehova, pea mo tana faiga ke ina puleʼi ia ia totonu. ʼE mole he puleʼaga neʼe ina foaki tatau te ʼu lelei ki te hahaʼi ʼi te malamanei. Logola kua laka ki muʼa te poto ʼa te tagata, kae neʼe mole heʼeki feala ke ina pulihi maʼa he tokotahi te mahaki pea mo fakagata te mate. Neʼe mole feala ki te ʼu puleʼaga fakatagata ke nātou pulihi te tau, te agamālohi, te fai fakapō, te aga fakahehema, peʼe ko te masiva. ʼE kei lahi te ʼu fenua ʼe puleʼi e he ʼu puleʼaga aga fefeka. (Tagata Tānaki 8:9) Ko te tekenolosia, mo te mānumānu, pea mo te mole mahino, kua tupu ai te ʼulihi ʼo te kele, mo te tai pea mo te ʼaele. ʼUhi ko te fakaʼaogaʼi kovi e te kau takitaki ia te paʼaga, kua faigataʼa ai ki te tokolahi hanatou maʼu te ʼu meʼa ʼaē ʼe ʼaoga tāfito ki tonatou maʼuli. Ko te ʼu lauʼi afe taʼu ʼo te pule ʼa te tagata, kua ina fakamoʼoni ki te ʼu palalau ʼaenī: “ ʼE ʼau ʼiloʼi lelei pe, Ê Sehova, ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.”—Selemia 10:23.
2. Koteā te puleʼaki pe e tahi ki te ʼu fihifihia ʼo te malamanei?
2 Koteā te puleʼaki ki te faʼahi ʼaia? ʼE ko te Puleʼaga ʼo te ʼAtua, ʼaē neʼe akoʼi e Sesu ki tana kau tisipulo ke nātou faikole fēnei: “Ke hoko mai tou puleʼaga. Ke fai tou finegalo ʼi te kele, ohage ko selo.” (Mateo 6:9, 10) Ia 2 Petelo 3:13, ʼe ina fakamahino ko te Puleʼaga ʼo te ʼAtua ʼaē ʼi selo ʼe ko “te ʼu lagi foʼou,” ʼaē ʼe pule anai ki “te kele foʼou,” ʼaē ko te sosiete ʼo te hahaʼi faitotonu. ʼE maʼuhiga ʼaupito te Puleʼaga ʼo te ʼAtua ʼaē ʼi selo, koia neʼe ko te tafitoʼaga ʼaia ʼo te fai faka mafola ʼa Sesu. (Mateo 4:17) Neʼe ina fakahā te tuʼulaga ʼo te faʼahi ʼaia ʼi tana fai te fakaloto mālohi ʼaenī: “Koutou haga kumi muʼa te puleʼaga pea mo tona faitotonu.”—Mateo 6:33.
3. He koʼe ʼe maʼuhiga ʼaupito ia ʼaho nei ke tou ako ke tou mahino ki te Puleʼaga ʼo te ʼAtua?
3 Ko te meʼa maʼuhiga ke fai ʼi te temi nei ko te ako ke tou mahino ki te Puleʼaga ʼo te ʼAtua, heʼe kua vave fakahoko anai e te Puleʼaga ʼaia he ʼu fetogi ʼo talu ai ʼo ʼuhiga mo te puleʼi ʼo te kele. ʼE fakakikite fēnei ia Taniela 2:44: “ ʼI te ʼu ʼaho ʼo te ʼu hau ʼaia [te ʼu puleʼaga ʼaē ʼe pule ʼi te temi nei] ko te ʼAtua ʼo te lagi ʼe ina fakatuʼu anai he puleʼaga [ʼi selo] ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi [ʼe mole toe puleʼi anai te kele e he tagata]. ʼE ina laliki anai pea mo fakagata anai te ʼu puleʼaga fuli ʼaia [ʼo totatou temi], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.” Koia ʼe fakaʼosi anai e te Puleʼaga te ʼu ʼaho fakamuli ʼaenī ʼo ina fakaʼauha te tuʼu agakovi katoa ʼaenī. ʼE mole fetogi anai e he tahi puleʼaga te Puleʼaga ʼo selo moʼo puleʼi te kele. ʼE tou loto fakafetaʼi ʼaupito heʼe kua vave hoko mai te fīmālie ʼaē ʼe tou fakaʼamu kiai.
4. ʼO ʼuhiga mo te Puleʼaga, koteā ʼaē neʼe hoko ʼi selo ʼi te taʼu 1914, pea he koʼe ʼe maʼuhiga te faʼahi ʼaia kia tatou?
4 ʼI te taʼu 1914, neʼe fakanofo hau ia Kilisito Sesu pea neʼe tuku age te fealagia ke “ ʼalu ʼo pule ʼi te lotolotoiga ʼo [tona] ʼu fili.” (Pesalemo 110:1, 2) Pea ʼi te taʼu ʼaia, neʼe toe kamata ai mo “te ʼu ʼaho fakamuli” ʼo te tuʼu agakovi ʼaenī. (2 Timoteo 3:1-5, 13) ʼI te taʼu ʼaia, neʼe toe hoko moʼoni ʼi selo te ʼu meʼa ʼaē neʼe sio fakatomuʼa kiai ia Taniela. Ko “te Matuʼa ʼo te ʼu ʼAho,” ia Sehova ʼAtua, neʼe ina foaki ki te Foha ʼo te tagata, ia Sesu Kilisito, “te pule, mo te fakaʼaliʼaliki, pea mo te puleʼaga, koteʼuhi ke tauhi kia te ia te hahaʼi, mo te ʼu fenua, pea mo te ʼu faʼahiga lea kehekehe.” Neʼe fakamatala e Taniela te meʼa ʼaē neʼe hā kia ia, ʼo ina tohi fēnei: “Ko tana pule ʼe ko he pule ʼe heʼegata anai, pea ko tona puleʼaga ʼe mole fakaʼauha anai.” (Taniela 7:13, 14) ʼAki te Puleʼaga ʼaia ʼi selo ʼaē ʼe pule ai Kilisito Sesu, ʼe faka fealagia anai e te ʼAtua ki te hahaʼi ʼaē ʼe ʼoʼofa ki te faitotonu, ke nātou maʼu te ʼu lelei fuli ʼaē neʼe ina fia foaki ki tatatou ʼu ʼuluaki mātuʼa ʼi te Palatiso.
5. Koteā te ʼu faʼahi ʼo ʼuhiga mo te Puleʼaga ʼe tou fia ʼiloʼi, pea koteā tona tupuʼaga?
5 ʼE koutou fia agatonu koa ki te Puleʼaga? Kapau koia, pea ʼe koutou fia ʼiloʼi anai te ʼu fakatuʼutuʼu pea mo te faʼahiga gāue ʼo te puleʼaga ʼaia ʼi selo. ʼE koutou fia ʼiloʼi anai te meʼa ʼaē ʼe ina fai ʼi te temi nei, mo te meʼa ʼaē ka ina fai anai ʼi te ka haʼu, pea mo te meʼa ʼaē ʼe ina toe fakamaʼua mai kia tatou. Kapau ʼe koutou vakavakaʼi lelei te agaaga ʼo te Puleʼaga, pea ʼe tuputupu anai takotou loto fakafetaʼi. Kapau ʼe koutou tali tana pule, pea ʼe faigafua anai hakotou palalau ki te hahaʼi ʼo ʼuhiga mo te ʼu meʼa taulekaleka ʼaē ka fai anai e te Puleʼaga ʼo te ʼAtua ki te hahaʼi fakalogo.—Pesalemo 48:12, 13.
Te ʼu Pule ʼo Te Puleʼaga ʼo Te ʼAtua
6. (a) Ohage ko tona ʼui e te Tohi-Tapu, ko te pule faʼitaliha ʼo ai ʼaē ʼe fakafofoga e te Puleʼaga Faka Mesianike? (b) ʼE tonu ke malave feafeaʼi kia tatou te ʼu meʼa ʼaē ʼe tou ako ʼo ʼuhiga mo te Puleʼaga?
6 Ko te ʼuluaki faʼahi ʼaē ʼe tou ako ʼo ʼuhiga mo te Puleʼaga Faka Mesianike ʼaia, ʼe ko he puleʼaga ʼe ina fakafofoga te pule faʼitaliha ʼo Sehova. Neʼe ko Sehova ʼaē neʼe ina foaki “te pule, mo te fakaʼaliʼaliki pea mo te puleʼaga” ki tona ʼAlo. ʼI te ʼosi fakanofo Hau ʼa te ʼAlo ʼo te ʼAtua, neʼe tala fēnei e te ʼu leʼo mai te lagi: “Ko te puleʼaga ʼo te malamanei kua liliu ia ko te puleʼaga ʼo totatou ʼAliki [ia Sehova ʼAtua] pea mo tana Kilisito, pea [ko Sehova] ʼe ʼafio anai ia ʼo heʼegata.” (Apokalipesi 11:15) Koia ko te ʼu meʼa fuli pe ʼaē ʼe tou tokagaʼi ʼo ʼuhiga mo te Puleʼaga ʼaia pea mo tana ʼu gāue, ʼe ina toe fakaōvi lahi age ia tatou kia Sehova. Ko te ʼu meʼa ʼe tou ako ʼe tonu ke ina fakatupu ia tatou te fia fakalogo ki tana pule ʼo talu ai.
7. He koʼe ʼe lelei tāfito kia tatou ke fakanofo e Sehova ia Sesu ko te Lua Pule?
7 Tou manatuʼi foki ko Sehova neʼe ina fakanofo ia Sesu Kilisito ʼi te hekaʼaga hau, ko te Lua Pule. Neʼe ko ia te Tufuga Faiva ʼaē neʼe fakaʼaogaʼi e te ʼAtua moʼo fakatupu te kele pea mo te tagata, koia ʼe mole he tahi ohage ko Sesu, ʼe ina ʼiloʼi lelei age te ʼu meʼa ʼaē ʼe ʼaoga kia tatou. Tahi ʼaē meʼa, talu mai te kamataʼaga ʼo te hisitolia ʼa te tagata, neʼe ina fakahā tona ‘ ʼofa ki te ʼu foha ʼo te tagata.’ (Tāʼaga Lea 8:30, 31; Kolose 1:15-17) ʼI tona ʼofa lahi ki te hahaʼi, neʼe haʼu totonu ai ki te kele, moʼo foaki tona maʼuli ko he totogi maʼa tatou. (Soane 3:16) Neʼe ina faka fealagia ke tou ʼāteaina mai te agahala pea mo te mate, pea ke feala hatatou maʼu te maʼuli heʼegata.—Mateo 20:28.
8. (a) ʼO mole hage ko te ʼu puleʼaga fakatagata, he koʼe ko te puleʼaga ʼa te ʼAtua ʼe tologa anai? (b) Koteā te pikipikiga ʼo “te tagata kaugana agatonu mo poto” pea mo te puleʼaga ʼi selo?
8 Ko te Puleʼaga ʼo te ʼAtua ʼe ko he puleʼaga ʼe tuʼu maʼu pea mo tologa. ʼE tologa koteʼuhi ko Sehova totonu ʼe mole feala ke mate. (Hapakuke 1:12) ʼO mole hage ko te ʼu pule fakatagata, ko Sesu Kilisito, ia ia ʼaē neʼe foaki ki ai e te ʼAtua te ʼuhiga hau, ʼe toe maʼuli tuputupua mo ia. (Loma 6:9; 1 Timoteo 6:15, 16) ʼE toe fakatahi anai mo Kilisito ʼi te ʼu hekaʼaga hau ʼi selo te toko 144 000, te ʼu kaugana agatonu ʼa te ʼAtua mai “te ʼu telepi kehekehe, mo te ʼu lea kehekehe, mo te ʼu hahaʼi kehekehe, pea mo te ʼu puleʼaga kehekehe.” ʼO feiā mo nātou ʼaia, ʼe nātou maʼu anai te maʼuli tuputupua. (Apokalipesi 5:9, 10; 14:1-4; 1 Kolonito 15:42-44, 53) Tokolahi ia nātou kua nātou maʼuʼuli ʼi selo, pea ko te toe ʼo nātou ʼaia kei maʼuʼuli ʼi te kele, ʼe nātou faʼufaʼu “te tagata kaugana agatonu mo poto” ia ʼaho nei, ʼe ina fakahoko agatonu te ʼu gāue ʼo te Puleʼaga ʼi te kele.—Mateo 24:45-47.
9, 10. (a) Koteā te ʼu faʼahi fakatupu maveuveu pea mo kovi ʼaē ka molehi anai e te Puleʼaga? (b) Kapau ʼe mole tou fia liliu ko he ʼu fili ʼo te Puleʼaga ʼo te ʼAtua, pea koteā te ʼu hele ʼe tonu ke tou tekeʼi?
9 Mole kei tuai, ʼi te temi ʼaē kua ina fakakatofa, ʼe fekauʼi anai e Sehova tana ʼu kautau ke nātou fakamaʼa te kele. ʼE nātou fakaʼauha anai ʼo talu ai te ʼu hahaʼi ʼaē neʼe nātou fakafisi ki tona pule, pea mo nātou fehiʼa ki te ʼu fakatuʼutuʼu ʼofa ʼaē ʼe ina fai ʼaki ia Sesu Kilisito. (2 Tesalonika 1:6-9) ʼE hoko ai anai te ʼaho ʼo Sehova, ʼaē neʼe atalitali kiai talu mai fualoa moʼo faka lākatonuʼi tona Pule ʼi te ʼAtulaulau. “Koʼeni! ʼE hoko mai te ʼaho ʼo Sehova, ʼe fakamataku ʼi te hāūhāū pea mo te ʼita lahi, . . . moʼo matehi te kau agahala ʼo te fenua.” (Isaia 13:9) “Ko te ʼaho ʼaia ʼe ko he ʼaho ʼo te hāūhāū, ko he ʼaho ʼo te mamahi pea mo te tuʼania, ko he ʼaho ʼo te afā pea mo te maumau, ko he ʼaho ʼo te pōʼuli pea mo te fakapōʼuli gaogao, ko he ʼaho ʼaoʼaoa pea mo fakapōʼuli mātolu.”—Sofonia 1:15.
10 Ko te ʼu lotu hala fuli pea mo te ʼu puleʼaga fakatagata fuli pea mo tanatou ʼu kautau, ʼaē neʼe fakaʼaogaʼi kākā nātou e te pule fakapulipuli pea mo agakovi ʼo te malamanei, ʼe molehi anai nātou ʼo talu ai. ʼE fakaʼauha anai mo nātou ʼaē ʼe nātou mulimuli ki te mālama ʼaenī, ʼo nātou tokakaga pe kia nātou, mo aga fakakākā, mo aga heʼeʼaoga. Ko Satana mo tana kau temonio, ʼi te pilisoniʼi ʼo nātou lolotoga taʼu e afe, ʼe mole nātou toe felogoi anai mo te hahaʼi ʼi te kele. ʼE puleʼi katoa anai e te Puleʼaga ʼo te ʼAtua te ʼu gāue ʼo te malamanei. ʼE ko he fakaloto fīmālie anai maʼa nātou fuli ʼaē ʼe ʼoʼofa ki te faitotonu.—Apokalipesi 18:21, 24; 19:11-16, 19-21; 20:1, 2.
Te Fakahoko ʼo Te ʼu Fakatuʼutuʼu ʼa Te Puleʼaga
11. (a) ʼE fakahoko feafeaʼi anai e te Puleʼaga Faka Mesianike ia te finegalo ʼo Sehova ʼo ʼuhiga mo te kele? (b) Koteā anai tona faka ʼuhiga te takitaki ʼo te Puleʼaga maʼa te hahaʼi ʼaē ka maʼuʼuli anai ʼi te kele?
11 ʼE fakahoko katoa anai e te Puleʼaga Faka Mesianike te ʼuluaki fakatuʼutuʼu ʼa te ʼAtua ki te kele. (Senesi 1:28; 2:8, 9, 15) ʼO aʼu mai ki te temi nei, neʼe mole feala ke lagolago te hahaʼi ki te fakatuʼutuʼu ʼaia. Kae ko “te kele ʼaē ka nofoʼi ʼi te ka haʼu,” ʼe fakalogo anai ki te Foha ʼo te tagata, ia Sesu Kilisito. Ko nātou fuli ʼaē ka hāo anai ʼi te fakamāu ʼaē ka fakahoko e Sehova ki te mālama ʼāfea ʼaenī, ʼe nātou gāue anai ʼi te logo tahi ʼi te takitaki ʼo Kilisito te Hau, ʼo nātou fiafia ʼi te fai ʼo te ʼu gāue fuli ʼaē ka ina fakatotonu age anai, ke feala ki te kele katoa ke liliu ko he palatiso. (Hepeleo 2:5-9) Ko te hahaʼi ʼe nātou fiafia anai ʼi te gāue ʼo tonatou ʼu nima, pea ʼe nātou fakaʼaogaʼi katoa anai ia te mahu ʼo te ʼu fua ʼo te kele.—Pesalemo 72:1, 7, 8, 16-19; Isaia 65:21, 22.
12. ʼE foaki feafeaʼi anai e te Puleʼaga ki tana hahaʼi fakalogo te maʼuli haohaoa ʼi te faʼahi ʼo te fakakaukau pea mo te faʼahi fakasino?
12 Neʼe fakatupu haohaoa e te ʼAtua ia Atama mo Eva, pea neʼe ina fakatuʼutuʼu ke nā fakafonu te kele ʼaki tonā hōloga, ʼaē ka nātou haohaoa anai ʼi te faʼahi ʼo te fakakaukau pea mo te faʼahi fakasino. Ko te fakatuʼutuʼu ʼaia ʼe liliu anai ko he moʼoni faka kolōlia ʼi te takitaki ʼo te Puleʼaga. ʼE tonu anai ke pulihi te ʼu fua kovi fuli ʼo te agahala, pea ko te tupuʼaga ʼaia ʼaē ʼe nofo ai ia Kilisito ʼi te tuʼulaga Hau pea mo Pelepitelo Lahi. ʼAki he loto faʼa kātaki, ʼe tokoni anai ki tana hahaʼi fakalogo ke nātou maʼu te ʼu fua lelei ʼo te sakilifisio maʼuhiga pea mo faifakalelei ʼo tona maʼuli fakatagata haohaoa.
13. Koteā te ʼu tapuakina fakasino ʼe fakahoko anai ʼaki te takitaki ʼo te Puleʼaga?
13 ʼI te takitaki ʼo te Puleʼaga ʼo te ʼAtua, ko te hahaʼi ʼaē ka nonofo ʼi te kele, ʼe nātou logoʼi anai te ʼu fua lelei ki tonatou sino. “ ʼI te temi ʼaia ʼe ava anai te ʼu mata ʼo te kau kivi, pea ʼe ava anai te ʼu taliga ʼo te kau tuli. ʼI te temi ʼaia, ko te ketu ʼe kake anai ohage he tia pea ko te ʼalelo ʼo te tagata ʼalelo mate ʼe kalaga fakafiafia anai.” (Isaia 35:5, 6) Ko te kili fefe ʼo te hahaʼi matutuʼa pea mo mahaki, ʼe liliu anai ko he kili foʼou ohage ko he kili ʼa he kiʼi tamasiʼi, pea ko te ʼu mahaki ʼaē ʼe mole hona faitoʼo, ʼe fetogi anai e he maʼuli haohaoa mai te mahaki. “Ke liliu tona kakano ʼo foʼou ake ʼi tona kei tūpulaga, ke toe liliu ki te ʼu ʼaho ʼo tona mālohi faka tūpulaga.” (Sopo 33:25) ʼE hoko mai anai he ʼaho, ʼe mole toe ʼui anai e he tahi, “ ʼE ʼau mahaki.” Koteā tona tupuʼaga? Koteʼuhi ko te hahaʼi ʼaē ʼe manavasiʼi ki te ʼAtua, ʼe nātou ʼāteaina anai mai te ʼu fua fakamataku ʼo te agahala. (Isaia 33:24; Luka 13:11-13) Ei, ko te ʼAtua “ ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.”—Apokalipesi 21:4.
14. Koteā te tahi faʼahi ʼaē ʼe ʼaoga moʼo kaku ki te maʼuli haohaoa?
14 Kae ko te maʼu ʼo te maʼuli haohaoa, ʼe mole gata pe ki he sino pea mo he ʼatamai haohaoa. ʼE toe ʼaoga foki ke kita maʼu te ʼu kalitate ʼa Sehova, koteʼuhi neʼe fakatupu tatou ‘ki te paki ʼo te ʼAtua, ke tou hoko kia te ia.’ (Senesi 1:26) ʼO ʼuhiga mo te faʼahi ʼaia, ʼe lahi anai te ʼu meʼa ʼaē ʼe tonu anai ke tou ako. ʼI te mālama foʼou, “ ʼe nofoʼi anai e te faitotonu.” Koia ohage ko tona fakakikite e Isaia, “ ʼe mahino papau ia ko te hahaʼi ʼo te kele ʼaē ʼe nofoʼi, ʼe nātou ako anai te faitotonu.” (2 Petelo 3:13; Isaia 26:9) Ko te kalitate ʼaia ʼe iku ki te tokalelei—ʼo te hahaʼi ʼo te ʼu lanu kehekehe, mo te ʼu kaumeʼa, mo te famili, pea tāfito, te tokalelei mo te ʼAtua totonu. (Pesalemo 85:10-13; Isaia 32:17) Ko nātou ʼaē ʼe nātou ako te faitotonu, ʼaki te temi ʼe nātou ʼiloʼi lelei anai te finegalo ʼo te ʼAtua ʼo ʼuhiga mo nātou. ʼI te temi ʼaē ka tauaka ai te ʼofa ʼo Sehova ʼi tonatou loto, ʼe nātou mulimuli anai ki tona ʼu ala ʼi te ʼu faʼahi fuli ʼo tonatou maʼuli. ʼE feala anai hanatou ʼui ohage ko Sesu, ‘ ʼe ʼau fai tuʼumaʼu te ʼu meʼa ʼaē ʼe leleiʼia e taku Tāmai.’ (Soane 8:29) ʼE ko he maʼuli taulekaleka anai mokā hoko te ʼu faʼahi ʼaia ki te malamanei katoa!
Te ʼu Gāue Kua ʼOsi Hoko
15. ʼAki te ʼu fehuʼi ʼo te palakalafe, koutou fakahā lelei te ʼu gāue ʼaē neʼe fai e te Puleʼaga ʼo te ʼAtua, pea koutou fakahā te ʼu meʼa ʼaē ʼe tonu ke tou fai ʼi te temi nei.
15 ʼE tou sio ki te ʼu gāue fakatalakitupua kua fakahoko e te Puleʼaga ʼo te ʼAtua pea mo tana hahaʼi fakalogo. Ko te ʼu fehuʼi pea mo te ʼu vaega ʼaē ʼe hoa mai, ʼe nātou fakamanatuʼi atu anai ʼihi ʼo te ʼu gāue ʼaia, pea mo ʼihi meʼa ʼaē ʼe feala pea mo tonu ke fai ʼi te temi nei e te hahaʼi fakalogo ʼo te Puleʼaga.
Ko ai ʼaē neʼe ʼuluaki tauʼi e te Puleʼaga, pea neʼe koteā tona fua? (Apokalipesi 12:7-10, 12)
Talu mai tona fakanofo hau, ko te kūtuga fea ʼaē ʼe tokaga ki ai ia Kilisito moʼo tānaki te ʼu hahaʼi fakaʼosi ʼo te kūtuga ʼaia? (Apokalipesi 14:1-3)
Ohage ko tona tuʼu ia Mateo 25:31-33, koteā te gāue ʼaē neʼe fakakikite e Sesu ʼe ina fai anai ʼi te ʼosi hoko ʼo te mamahi lahi?
Koteā te ʼuluaki gāue ʼaē ʼe fai ʼi te temi nei? Ko ai ʼaē ʼe kau kiai? (Pesalemo 110:3; Mateo 24:14; Apokalipesi 14:6, 7)
He koʼe neʼe mole feala ki te ʼu fili politike pea mo faka lotu, ke nātou fakagata te gāue fai faka mafola? (Sakalia 4:6; Gaue 5:38, 39)
Koteā te ʼu fetogi kua hoko ki te maʼuli ʼo nātou ʼaē ʼe fakalogo ki te takitaki ʼo te Puleʼaga? (Isaia 2:4; 1 Kolonito 6:9-11)
Ko He Puleʼaga ʼe Tuʼu Ia Taʼu e Afe
16. (a) Ko temi e fia ʼaē ka nofo hau ai anai ia Kilisito? (b) Koteā te ʼu gāue fakaofoofo ʼaē ka hoko anai ʼi te lolotoga pea ʼi te hili ʼo te temi ʼaia?
16 ʼI te ʼosi lī ʼa Satana pea mo tana kau temonio ki te vanu, ko Sesu Kilisito pea mo tana toko 144 000 kau maʼu tofiʼa, ʼe nātou nofo hau anai pea mo pelepitelo lolotoga taʼu e afe. (Apokalipesi 20:6) Lolotoga te temi ʼaia, ʼe liliu anai te malamanei ʼo haohaoa, pea mo pulihi anai ʼo talu ai te agahala pea mo te mate ʼaē neʼe tupu mai ia Atama. ʼI te hili ʼo Te ʼAfio Hau ia Taʼu e Afe, ʼi te kua ʼosi fakahoko lelei e Sesu tona tuʼulaga Hau pea mo Pelepitelo Faka Mesianike, ʼe “ina fakatoʼo anai te puleʼaga” ki tana Tāmai, “ke liliu te ʼAtua ko meʼa fuape maʼa te hahaʼi fuape.” (1 Kolonito 15:24-28) ʼI te temi ʼaia, ʼe tuku ake anai ia Satana lolotoga he kiʼi temi nounou, ke ina ʼahiʼahiʼi te hahaʼi ʼaē kua hāofaki, ʼo ʼuhiga mo tanatou lagolago ki te pule faʼitaliha ʼa Sehova ʼi te ʼatulaulau. ʼI te hili ʼo te ʼahiʼahi fakaʼosi ʼaia, ʼe fakaʼauha anai e Sehova ia Satana pea mo te kau agatuʼu ʼaē neʼe nātou lagolago kia ia. (Apokalipesi 20:7-10) Ko nātou ʼaē ka nātou lagolago anai ki te pule faʼitaliha ʼa Sehova—tona fealagia ke pule—kua nātou fakahā moʼoni anai tanatou agatonu kia te ia. Pea ʼe nātou maʼu anai te ʼu felogoi moʼoni mo Sehova, koteʼuhi ʼe ina tali anai ia nātou ko tona ʼu foha pea mo ʼofafine, pea tahi ʼaē ʼe ina foaki age anai te fakagafua ke nātou maʼuʼuli ʼo heʼegata.—Loma 8:21.
17. (a) ʼI te fakaʼosi ʼo te ʼu taʼu e afe, koteā ʼaē ka hoko anai ki te Puleʼaga? (b) ʼE mahino feafeaʼi te ʼui ʼaē ko te Puleʼaga “ ʼe mole pulihi anai ʼi he temi”?
17 ʼOsi ʼaia, pea fetogi anai te tuʼulaga ʼa Sesu pea mo te toko 144 000 ʼo ʼuhiga mo te kele. Koteā anai tanatou ʼu gāue? ʼE mole fakahā mai e te Tohi-Tapu. Kae kapau ʼe tou lagolago agatonu ki te pule faʼitaliha ʼo Sehova, pea ʼe tou maʼuʼuli anai ʼi te fakaʼosi ʼo te Pule Hau ia Taʼu e Afe moʼo sio ki te ʼu gāue ka tuku age anai e Sehova kia nātou, pea mo tona ʼatulaulau taulekaleka. Kae ko te pule ʼa Kilisito ia taʼu e afe, “ ʼe hoholo anai ʼo aʼu ki he ʼu temi ʼe mole hona gataʼaga,” pea ko tona Puleʼaga, “ ʼe mole pulihi anai.” (Taniela 7:14) ʼO feafeaʼi? ʼUluaki, ʼe ko Sehova anai te Pule, koia ʼe mole foaki anai te tuʼulaga pule ki te ʼu hahaʼi takitaki ʼe kehe tanatou ʼu fakatuʼutuʼu. Tahi ʼaē meʼa, ko te Puleʼaga “ ʼe mole pulihi anai ʼi he temi” koteʼuhi ko te ʼu meʼa ʼaē neʼe ina fakahoko ʼe tologa anai ʼo talu ai. (Taniela 2:44) Pea ko te Pelepitelo pea mo Hau Faka Mesianike, pea mo nātou ʼaē ka kaugā takitaki anai mo ia, ʼe faka maʼuhigaʼi anai ia nātou ʼo talu ai ʼuhi ko tanatou tauhi agatonu kia Sehova.
Fakamanatu
• He koʼe ko te Puleʼaga ʼo te ʼAtua ʼe ko te puleʼaki pe ʼaia e tahi maʼa te ʼu fihifihia ʼo te malamanei? Ko te temi fea ʼaē neʼe kamata ʼafio ai te Hau ʼo te Puleʼaga ʼo te ʼAtua?
• Koteā ʼaē ʼe malave tāfito kia koutou ʼo ʼuhiga mo te Puleʼaga, pea mo te ʼu gāue ʼaē ka ina fakahoko anai?
• Koteā te ʼu gāue ʼo te Puleʼaga kua tou lava sio kiai, pea ʼe tou kau feafeaʼi ki te ʼu gāue ʼo te Puleʼaga ʼaia?
[Paki ʼo te pasina 93]
ʼI te takitaki ʼo te Puleʼaga ʼo te ʼAtua, ko te hahaʼi fuli ʼe nātou ako anai te faitotonu