Kua Nātou Fakatuʼutuʼu Moʼo Fai ʼo Te Finegalo ʼo Sehova
Kāpite 15
Te ʼu Fua Lelei ʼo Te Fakalogo Ki Te Fakatuʼutuʼu ʼa Te ʼAtua ʼo ʼUhiga Mo Te Pule
KAPAU ʼe tou loto ke fakatuʼutuʼu tātou moʼo fai ia te finegalo ʼo Sehova, pea ʼe tonu ke tou fakalogo ki te ʼAtua, te Tuʼi ʼAliki ʼo te ʼAtulaulau. ʼE toe maʼua foki ke tou fakalogo ki te pule ʼo tona ʼAlo ʼi te kōkelekāsio. Pea ʼe toe maʼuhiga ke tou mulimuli ki te tahi ʼu pelesepeto ʼo ʼuhiga mo te pule ʼi te tahi ʼu faʼahi ʼo totatou maʼuli. ʼE tou maʼu fuli anai he ʼu fua lelei ʼi te fakalogo ʼaia ki te ʼu fakatuʼutuʼu ʼa te ʼAtua ʼo ʼuhiga mo te pule.
Ko te fakalogo ʼaē ʼa te tagata ki tona pule neʼe kamata ʼi te ʼōloto ʼo Eteni. ʼE tou maʼu te faʼahi ʼaia ʼi te ʼu fakatotonu ʼaē ʼa te ʼAtua iā Senesi 1:28 pea mo 2:16, 17. Ko te ʼu manu neʼe tonu ke natou fakalogo ki te tagata, pea ko Atama mo Eva neʼe tonu ke nā fakalogo ki te finegalo ʼo te ʼAtua pea mo tona pule. ʼI tanatou fakalogo ki te pule fakaʼatua ʼaia, neʼe natou maʼu ai te tokalelei pea mo te fakatokatoka. Ko te pelesepeto ʼo ʼuhiga mo te pule neʼe fakahā lelei ki muli age, iā 1 Kolonito 11:3 (Tauhi Foou). Neʼe tohi fēnei e te ʼapositolo ko Paulo: “E au loto ke koutou iloi: ko te pule o te tagata fuape e ko Kilisito; pea ko te pule o te fafine e ko te tagata; pea ko te pule o Kilisito e ko te Atua.” Koia ʼe fakahā ai ko te hahaʼi fuli ʼe natou fakalogo ki honatou pule, gata pē kiā Sehova.
Iā ʼaho nei, tokolahi te hahaʼi ʼe mole natou tali peʼe mole natou mulimuli ki te fakatuʼutuʼu ʼaia ʼo ʼuhiga mo te pule. Koteā tona tupuʼaga? Neʼe hoko te fihifihia ʼi Eteni, ʼi te filifili e te ʼu mātuʼa ʼo te mālamanei ʼaki tonā loto faʼitaliha, ke mole nā fakalogo ki te pule ʼa te ʼAtua ʼi te ʼatulaulau. (Sen. 3:4, 5) Kae neʼe mole nā maʼu ai he ʼāteaina ʼe lahi age. Kae neʼe nā liliu ʼo fakalogo ki te ʼāselo agakovi, ia Satana te Tēvolo. ʼI te ʼuluaki agatuʼu ʼaia, neʼe mamaʼo ai te mālamanei mai te ʼAtua. (Kol. 1:21) Koia, iā ʼaho nei, ʼe tokolahi te hahaʼi ʼi te mālamanei ʼe natou fakalogo ki te mālohi ʼo te agakovi.—1 Soa. 5:19.
ʼI tatatou ʼiloʼi te moʼoni ʼo te Folafola ʼa te ʼAtua pea mo mulimuli kiai, ʼe mole kei tou fakalogo kiā Satana. ʼI tatatou foaki totatou maʼuli pea mo tou papitema, ʼe mole tou tali koa lā ke liliu ia Sehova ko te Pule Māʼoluga ʼo totatou maʼuli? ʼE mole tou manatu tahi koa lā ohagē ko te Hau agatonu ko Tavite, ʼaē neʼe ina ʼui ko Sehova ʼe “pule kiā meʼa fuli”? (1 Fkma. 29:11) ʼE mahino ia neʼe tou tali te ʼu faʼahi ʼaia. ʼE tou fakamoʼoni fēnei ʼaki he agavaivai: “Ko Sehova ʼe ʼAtua. Ko ia ʼaē neʼe ina fakatupu tātou, kae mole ko tātou totonu pē. Ko tātou ko tana hahaʼi pea ko te ʼu ovi ʼo tana gāueʼaga.” (Pes. 100:3) ʼE tou fakamoʼoni ki te māʼoluga ʼo Sehova pea ʼe tāu mo ia ke tou fakalogo kātoa kiā te ia, he neʼe ina fakatupu ia meʼa fuli pē. (Fakh. 4:11) ʼI totatou ʼuhiga kau minisi ʼo te ʼAtua moʼoni, ʼe tou mulimuli iā Sesu Kilisito, ʼaē neʼe ina tuku he faʼifaʼitaki haohaoa ʼo te fakalogo ki te ʼAtua.
Koteā ʼaē neʼe ako e Sesu ʼaki te ʼu meʼa ʼaē neʼe ina kātakiʼi ʼi tana maʼuli ʼi te kele? ʼE tali fēnei iā Hepeleo 5:8, Tauhi Foou: “Logope, nee ko te Alo, nee ina ako te fakalogo i te u mamahi nee ina tali.” ʼE moʼoni, neʼe fakalogo tuʼumaʼu pē ia Sesu ki tana Tamai ʼaē ʼe ʼi selō, māʼiapē lā ʼi te mamahi. Tahi ʼaē meʼa, neʼe mole ina fai he meʼa ʼaki tona loto faʼitaliha; neʼe mole palalau ia mai iā ia totonu pē, peʼe ina kumi ke faka kolōliaʼi ia ia. (Soa. 5:19, 30; 6:38; 7:16-18) Lolotoga tona minisitelio, neʼe fiafia ʼi te fai ʼo te finegalo ʼo tana Tamai, tatau aipē pe neʼe fakafeagai ʼihi kiā te ia pea mo fakatagaʼi ia ia. (Soa. 15:20) Neʼe fakalogo ia Sesu ki te ʼAtua ʼo ina ‘fakamālaloʼi ifo ia ia’ ʼo aʼu ai ki tona “mate ʼi he pou fakamamahi.” ʼAki tana fakalogo kātoa ʼaia kiā Sehova, ʼe maʼu ai te ʼu fua lelei kehekehe: neʼe haofaki te mālamanei ʼo talu ai, neʼe hikihiki ia ia; pea neʼe fakakolōliaʼi ai tana Tamai.—Filp. 2:5-11; Hep. 5:9.
TE ʼU FAʼAHI ʼAĒ ʼE TONU KE TOU FAKALOGO AI KI TE FAKATUʼUTUʼU ʼA TE ʼATUA ʼO ʼUHIGA MO TE PULE
Mai tona ʼaluʼaga ʼaē ko Sehova te Tuʼi ʼAliki ʼo te ʼAtulaulau, ʼe tonu ai ke tou fakalogo kātoa kiā te ia. (Isa. 33:22) Ko he vakaʼi fakanounou ʼo totatou maʼuli ʼi te ʼaho fuli ʼi totatou ʼuhiga kau ʼatolasio kua tou foaki totatou maʼuli kiā Sehova, ʼe tonu ke hā lelei ai tatatou fakalogo kiā te ia. ʼI tatatou fakamuʼamuʼa te ʼAtua ʼi totatou maʼuli, mo tou fai tona finegalo, ʼe ina fakahā mai ai te ala ʼaē ʼe lelei. (Pes. 16:8) ʼE tou hao mai te ʼu tuʼuga tuʼania pea mo te ʼu lotomamahi ʼaē ʼe hoko kiā nātou ʼaē ʼe mole fia fakalogo ki te pule faʼitaliha ʼa Sehova. Ko totatou Fili, te Tēvolo, ʼe ina kumi tuʼumaʼu pē ke tou tō ki tana ʼu hele pea ke ina kai tātou. ʼE tou hao anai mai iā ia ʼaia ʼaē ʼe agakovi mo kapau ʼe tou fakafeagai kiā ia pea mo tou fakamālaloʼi ifo ia tātou iā muʼa ʼo Sehova ʼo tou fakalogo ʼaki he lotolelei.—Mat. 6:10, 13; 1 Pet. 5:6-9.
Ko tatatou fakalogo ʼaē ki te ʼAtua ʼe toe malave foki ki tatatou ʼu felōgoi mo ʼihi atu, ʼo tou felōgoi lelei age ai mo nātou. ʼE tou hao ai mai te ʼu faigataʼaʼia ʼaē ʼe hoko kiā nātou ʼaē ʼe natou maʼu te loto fia faʼifaʼitaliha ʼo te mālamanei. ʼI tatatou fakalogo ʼaē kiā Sehova ʼAtua, ʼe tou maʼu ai he nofo ʼohoana pea mo he maʼuli faka fāmili fiafia pea ʼe toe lelei age ia tatatou ʼu felōgoi mo totatou ʼu kaugā gāue pea mo totatou ʼu pātolō. ʼE tou fakalogo ki te ʼu lao pea mo tou maʼu ai he leʼo ʼo loto ʼe lelei ʼo ʼuhiga mo tatatou aga ki te ʼu puleʼaga faka tagata. Pea ʼe tou maʼu ai hotatou ʼu kaumeʼa lelei, ʼaē ko totatou ʼu tehina Kilisitiano.
ʼI te kōkelekāsio, ʼe tou fakamoʼoni ki te pule ʼa Kilisito pea mo te pule ʼaē neʼe ina foaki ki te kalasi ʼo te tagata kaugana agatonu mo poto. ʼE malave te fakalogo ʼaia ki te aga ʼaē ʼe tou fefakahāʼaki. Ko te fakalogo ki te fakatuʼutuʼu ʼa te ʼAtua ʼi te kōkelekāsio, ʼe ina uga ai tātou ke tou fakalogo ki te Folafola ʼa te ʼAtua ʼi te ʼu faʼahi fuli ʼo tatatou tauhi. ʼE kau ki te faʼahi ʼaia tatatou minisitelio, te kau ki te ʼu fono pea mo te fai ʼo he ʼu tali, tatatou ʼu felōgoi mo te kau tagata ʼāfea pea mo te lagolago ʼaē ki te ʼu fakatuʼutuʼu ʼaē ʼe fai e te kautahi ʼa te ʼAtua.—Mat. 24:45-47; 28:19, 20; Hep. 10:24, 25; 13:7, 17.
Kā tou fakalogo ki te ʼAtua pea ʼe maʼu ai te tokalelei, te fīmālie pea mo te fakatokatoka ʼi te kōkelekāsio. ʼE fakahā te ʼu kalitātē fakaofoofo ʼo Sehova e te hahaʼi ʼaē ʼe fakalogo kiā te ia, ʼaē ʼe natou faʼufaʼu te sōsiete ʼe logo tahi. (1 Ko. 14:33, 40) Ko te ʼu meʼa ʼaē neʼe tou sio kiai pea mo hoko kiā tātou ʼi te kautahi ʼa Sehova, ʼe natou uga ai tātou ke tou fai te ʼu palalau ʼaē neʼe fai e Tavite, te kaugana ʼa te ʼAtua. ʼI tana sio ki te kehekehe ʼo te ʼu kaugana ʼa Sehova pea mo te kau agakovi, ʼaē ʼe natou laupisiʼi tonatou mālohi pea mo tonatou ʼu koloa, neʼe tala fakafiafia fēnei e Tavite: “Fiafia te hahaʼi ʼaē ko tonatou ʼAtua ko Sehova!”—Pes. 144:15.
ʼI te nofo ʼohoana pea mo te fāmili, “ko te pule o te fafine e ko te tagata.” Pea ko te tagata ʼe fakalogo kiā Kilisito, pea ko te Pule ʼo Kilisito ʼe ko te ʼAtua. (1 Ko. 11:3, Tauhi Foou) ʼE tonu ke fakalogo te ʼu fafine ʼohoana ki ʼonatou ʼohoana, pea fakalogo te fānau ki tanatou ʼu mātuʼa. (Efe. 5:22-24; 6:1) Kapau ʼe mulimuli iā nātou ʼo te fāmili ki te pelesepeto ʼaia ʼo ʼuhiga mo te pule, pea ʼe maʼu ai te tokalelei.
ʼE tonu ai ke fakahoko e te tagata ʼohoana tana pule ʼaki te ʼofa, ʼo ina faʼifaʼitakiʼi ia Kilisito. (Efe. 5:25-29) Kapau ko he tagata ʼohoana ʼe mole aga fefeka ʼi tana fakahoko tana pule, pea ʼe fiafia tona ʼohoana pea mo tana fānau ʼi te fakalogo kiā ia. Ko te fafine ʼohoana ʼe ko he tokoni, ko he faka kātoa ʼo tona ʼohoana. (Sen. 2:18) Kapau ʼe lagolago pea mo fakaʼapaʼapa te fafine ki tona ʼohoana ʼaki he faʼa kātaki, pea ʼe leleiʼia anai ia ia e tona ʼohoana pea ʼe faka kolōliaʼi ai te ʼAtua. (1 Pet. 3:1-4) Kā mulimuli te ʼu tagata ʼohoana pea mo te ʼu fafine ʼohoana ki te tokoni ʼa te Tohi-Tapu ʼo ʼuhiga mo te pule, pea ʼe natou tuku ai he faʼifaʼitaki ki tanatou fānau, ʼo ʼuhiga mo te fakalogo ʼaē ki te ʼAtua.
Ko tatatou fakalogo ki te ʼAtua ʼe toe malave foki ki tatatou manatu ʼo ʼuhiga mo “te ʼu pule māʼoluga,” ʼaē “ ʼe natou tahi tuʼu ʼi tona tuʼulaga ʼuhi pē ko te ʼAtua”. (Loma 13:1-7) ʼI tanatou fakaʼapaʼapa ki te ʼu lao, ʼe totogi e te kau Kilisitiano te ʼu tukuhau; ʼe natou liufaki “te ʼu meʼa ʼa Sesale kiā Sesale, kae ko te ʼu meʼa ʼa te ʼAtua ki te ʼAtua.” (Mat. 22:21) ʼE tou fakalogo ai ki te ʼu pule ʼaē neʼe fakatuʼu, gata pē mokā ʼe kole mai ke tou fakalogo ki he ʼu meʼa ʼe fakafeagai ki te lao faitotonu ʼa Sehova. ʼE feala ai ke tou faiga mālohi moʼo fakahoko ia te gāue maʼuhiga ʼaē ko te faka mafola ʼo te logo lelei ʼo te Puleʼaga ʼo te ʼAtua ʼaē kua fakatuʼu.—Mko. 13:10; Gāue 5:29.
ʼE faiga e te kau Kilisitiano ke lelei tanatou ʼu felōgoi mo tonatou ʼu pātolō, koia ʼe natou mulimuli lelei ai ki te ʼu pelesepeto ʼo te Tohi-Tapu. Tatau aipē pe feala ke faigataʼa ʼi ʼihi temi, kae ʼe natou faiga ke natou tokalelei mo te hahaʼi fuli pē. ʼI tonatou fale gāue, ʼe natou agatonu pea mo tāu mo te falala. (Loma 12:18; 1 Pet. 2:18) Koia, ʼe mole natou fihi ai mo he tahi, peʼe natou fai he meʼa ʼe hoha ai tonatou leʼo ʼo loto ʼaē neʼe akoʼi ʼaki te Tohi-Tapu.
Ko te fakalogo ʼaē ki te fakatuʼutuʼu ʼa te ʼAtua ʼo ʼuhiga mo te pule, ʼe malave ki te ʼu faʼahi fuli ʼo totatou maʼuli. ʼAki te ʼu mata ʼo te tui, ʼe tou sio ai ki te ʼaho ʼaē kā fakalogo ai anai te mālamanei kiā Sehova ʼAtua. (1 Ko. 15:27, 28) ʼE tapuakina lahi anai nātou ʼaē kā natou tali te pule ʼa te Tuʼi ʼAliki ko Sehova, ʼo natou fakalogo kiā te ia ʼo talu ai!