ʼE Ko Te Fakatuʼutuʼu Koa ʼAia ʼa Te ʼAtua?
KA KOUTOU lau he sulunale, peʼe koutou sioʼi te televisio, peʼe koutou fakalogo ki te lātio,ʼe koutou maʼu ai anai he ʼu tuʼuga logo ʼo ʼuhiga mo te agamālohi, mo te tau, pea mo te fai fakapō. ʼO hilifaki kiai, ʼe ʼi ai mo te ʼu meʼa ʼaē ʼe koutou tuʼania kiai. E lagi koutou tau mo he lotomamahi, ʼuhi ko te mahaki peʼe ko he tahi kua mate kae neʼe koutou ʼofa ai. Lagi ʼe malave kiā koutou ohage ko tona malave ki te tagata agalelei ko Sopo, ʼaē neʼe ina ʼui kua “maʼuli mamahi ʼaupito.”—Sopo 10:15.
Koutou fai te ʼu fehuʼi ʼaenī:
ʼE ko te gataʼaga pe koa ʼaia ʼo te fakatuʼutuʼu ʼa te ʼAtua ʼo ʼuhiga mo au pea mo te malamanei?
ʼE au lava maʼu ʼifea he tokoni ki taku ʼu fihifihia ʼaia?
ʼE tou lava ʼamanaki koa ki he tokalelei ʼi te kele?
ʼE tuku mai ʼi te Tohi-Tapu te ʼu tali totonu ki te ʼu fehuʼi ʼaia.
ʼE AKOʼI MAI ʼI TE TOHI-TAPU, ʼE FAKAHOKO ANAI E TE ʼATUA IA TE ʼU FETOGI ʼAENĪ KI TE KELE.
“ ʼE ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lauga, he mamahi.”—Apokalipesi 21:4, MN
“Ko te ketu ʼe kake anai ohage he tia.”—Isaia 35:6
“ ʼE ava anai te ʼu mata ʼo te kau kivi.”—Isaia 35:5
“Ko nātou fuli ʼaē ʼe nonofo ʼi te ʼu falemaka fakamanatu . . . ʼe nātou hū mai anai ki tuʼa.”—Soane 5:28, 29, MN
“ ʼE mole he tahi ʼe ina ʼui anai: ‘ ʼE au mahaki.’ ”—Isaia 33:24
“ ʼE mahu anai te pulapula ʼi te kele.”—Pesalemo 72:16
KE ʼAOGA KIĀ KOUTOU IA TE ʼU AKONAKI ʼA TE TOHI-TAPU
ʼAua naʼa koutou manatu ko te ʼu meʼa ʼaē neʼe fakahā atu ʼi muʼa atu, ʼe ko he ʼu fakaʼamu pe ia. Koteʼuhi neʼe fakapapau mai e te ʼAtua ʼe ina fakahoko anai te ʼu faʼahi ʼaia, pea ʼe fakamahino mai e te Tohi-Tapu tona faʼahiga fakahoko.
Ko te koloāʼaga ʼo te Tohi-Tapu, heʼe ina foaki mai te puleʼaki ke tou maʼuli fiafia moʼoni ʼi te temi nei. Ko tokotou ʼu fihifihia pea mo takotou ʼu tuʼania ʼi te faʼahi ʼo te paʼaga, peʼe ko he ʼu fihifihia faka famili, peʼe ko hokotou ʼu mahaki, peʼe ko te mate ʼa he tahi neʼe koutou ʼofa ai, ʼe lava tokoni atu ia te Tohi-Tapu ke koutou maʼu puleʼaki ki te ʼu fihifihia ʼaia ia ʼaho nei, pea ʼe ina lava foaki atu he faka fīmālie heʼe maʼu ai te ʼu tali ki te ʼu fehuʼi ʼaenī:
He koʼe ʼe tou maʼuli mamahi?
E feafeaʼi hatatou ʼutakiʼi te ʼu faigataʼaʼia ʼo te maʼuli?
Koteā ʼaē ʼe tonu ke tou fai ke maʼuli fiafia age totatou famili?
Koteā ʼaē ʼe hoko kiā tatou mokā tou mamate?
ʼE tou toe sisio anai koa ki te kau mate ʼaē neʼe tou ʼoʼofa ai?
E feafeaʼi hatatou ʼiloʼi papau ko te ʼAtua ʼe ina fakahoko anai tana ʼu fakapapau ki te ka haʼu?
Ko takotou lau ia te tohi ʼaenī, ʼe hā mai ai ʼe koutou fia ʼiloʼi te ʼu meʼa ʼaē ʼe akoʼi mai ʼi te Tohi-Tapu. ʼE tokoni atu anai te tohi ʼaenī. Koutou fakatokagaʼi ko te ʼu palakalafe ʼe ʼi ai tonatou ʼu fehuʼi ʼi te lalo pasina. Ko te lauʼi miliona hahaʼi mokā nātou fai palalau mo te kau Fakamoʼoni ʼa Sehova ki te Tohi-Tapu, ʼe nātou mulimuli ki te faʼahiga fai ʼaia, ʼo te ʼu fehuʼi pea mo te ʼu tali. ʼE mātou fakaʼamu ke koutou fai mo koutou ia te faʼahi ʼaia, pea ʼofa pe ke tapuakinaʼi koutou e te ʼAtua, ʼi takotou maʼu te fiafia ʼi te ʼu meʼa ʼaē ʼe akoʼi moʼoni mai ʼi te Tohi-Tapu.