Te ʼu Moʼoni ʼo Te Puleʼaga​—ʼE Ina Foaki Ia Te Meʼa Kai Fakalaumalie

FAKAKAUKAUʼI age muʼa ʼe ke fai he ako, pea ʼe ke tokagaʼi te fiafia ʼo ia ʼae ʼe ako ʼi tana mahino ki te vaega Tohi-Tapu ʼae neʼe hoki kotou lau fakatahi. ʼE ina fehuʼi fenei atu: “Ko tona fakaʼuhiga, ʼe akoʼi mai ʼi te Tohi-Tapu ʼe feala ke tou maʼuʼuli ʼo heʼe gata ʼi te Palatiso, ʼi te kele?” ʼE ui fenei e ia ʼae ʼe kaugā gaue mo koe: “ ʼE ke manatuʼi pe kotea ʼae ʼe ui ʼi te vaega?” ʼE punamaʼuli ia ia ʼae ʼe ako, pea ina ui fenei atu: “Ko taku hoki logo ʼae ki te manatu ʼaia!” Pea ʼe ke manatuʼi ai neʼe toe feia ʼana palalau kua hili ki ai ni vahaʼa, ʼi tana hoki logo ʼae ko te huafa ʼo te ʼAtua ʼe ko Sehova.

Neʼe hoko te ʼu aluʼaga ʼaia ki te tokolahi ʼo te ʼu kaugana ʼa te ʼAtua. Neʼe lagi toe feia mo koe? ʼAki te ʼu aluʼaga ʼaia, ʼe tou mahino ai ki te maʼuhiga ʼo te meʼa ʼofa ʼae neʼe foaki mai: ia te ʼatamai malama ʼo ʼuhiga mo te moʼoni. Fakakaukauʼi age muʼa ia te manatu ʼaeni: Neʼe ke maʼu feafeaʼi te meʼa ʼofa ʼaia? ʼE tou vakaʼi anai te fehuʼi ʼaia ʼi te Faʼahi 1 ʼaeni. ʼE tou tui anai ʼe moʼoni ia te Puleʼaga ʼo te ʼAtua ʼaki tatatou vakaʼi te mahino mamalie ʼa te hahaʼi ʼa te ʼAtua ki te ʼu moʼoni fakalaumalie. Lolotoga taʼu ʼe teau, neʼe tokaga fakalelei ia Sesu Kilisito, te Hau ʼo te Puleʼaga, ke akoʼi ia te moʼoni ki te hahaʼi ʼa te ʼAtua.