ʼUluaki Palalau

ʼE fakafaigafua e te tohi Vaega Ki Te Maʼuli Fakakilisitiano tau kumi he ʼu vaega mo he ʼu fakamatala ʼo te Tohi-Tapu ʼe tokoni anai ki tau tauʼi ʼou fihifihia kehekehe. ʼE toe tokoni atu te tohi ke ke maʼu te ʼu vaega ʼae ʼe ʼaoga moʼo fakalotomalohiʼi ʼihi pea mo tokoni ke natou toʼo he ʼu tonu ʼe vikiʼi ai ia Sehova. ʼE ʼaoga pe anai ke ke maʼu te manatu ʼae ʼe ʼaoga, pea ke muliʼi te ʼu vaega pea mo te ʼu palalau nounou ki te ʼu fakamatala ʼo te Tohi-Tapu. (Vakaʼi te ʼa takai “ ʼE Feafeaʼi Te Fakaʼaogaʼi ʼo Te Tohi ʼAeni.”) ʼE ke tokagaʼi vave anai te ʼaoga ʼaupito ʼo te ʼu tokoni pea mo te fakalotofimalie ʼae mai te Folafola ʼa te ʼAtua. ʼE ke toe maʼu anai mo ni koloa ke ke vaevae mo ʼihi, ohage la ni vaega fakalotomalohi ʼe tokoni ki te tauʼi ʼo te ʼu fihifihia, pea mo ni tokoni ʼaoga kia natou.

ʼE Feafeaʼi Te Fakaʼaogaʼi ʼo Te Tohi ʼAeni

Fakaʼaogaʼi te kumiʼaga ke ke maʼu he manatu, peʼe ke vakaʼi te ʼu manatu tafito. ʼE vaevae te tohi Vaega Ki Te Maʼuli Fakakilisitiano ʼi ni manatu tafito ʼe fitu: Aga, Faigataʼaʼia, Famili, Kalitate, Kokelekasio, Maʼuli Fakalaumalie, pea mo Maʼuli ʼo Te ʼAho Fuli. ʼE fakahoahoa ʼi te ʼu manatu tafito ʼaia te tahi ʼu manatu ʼe ʼaoga anai ki ʼau fekumi. Filifili he manatu tafito, pea ke vakaʼi te ʼu manatu ʼae ʼi ai. Kae kapau ʼe mole ke iloʼi pe ko te manatu tafito fea ʼae ʼe ke maʼu ai tau manatu, filifili Fuli pea ke vakaʼi te ʼu manatu fuli ʼo kaku ki tau maʼu te manatu ʼae ʼe ke kumi. ʼI te ʼu manatu tafito takitahi, ʼe ke maʼu ai te ʼu falasisi ʼe tohi matolu. Ko ʼihi ko ni manatu, ko ʼihi ko ni fehuʼi. Lau te ʼu vaega ʼae ʼe tohi matolu ʼae ʼe hoa atu ki te ʼu falasisi ʼaia, pea mo fakakaukauʼi lelei peʼe lagolago feafeaʼi ki te manatu peʼe tali feafeaʼi ki te fehuʼi. ʼI ʼihi aluʼaga, ke tokoni kia koe, ʼe vaevae he manatu ki ni tahi ʼatu ʼu manatu. Pea tahi, ko ʼihi vaega ʼe tohi ai “Vakaʼi mo.” ʼE toe maʼu ʼi te ʼu vaega ʼaia te ʼu manatu ʼe alu tahi mo te manatu. ʼE toe maʼu ai te ʼu “Faʼifaʼitaki Fakatohi-tapu,” mo te falasisi ʼo ʼuhiga mo he manatu maʼuhiga peʼe ko he ako ʼi te vaega. Lau te vaega mo fakaʼaogaʼi te falasisi ʼaia ʼi tau metitasio.

ʼE mole maʼu ʼi te tohi ʼaeni te ʼu vaega fuli ʼae ʼo ʼuhiga mo he manatu. Kae ʼe ko he kamataʼaga lelei ʼo ni fekumi. (Taa 2:1-6) Fakaʼaogaʼi te ʼu nota ʼo te Tohi-Tapu Fakaliliu ʼo Te Malama Foʼou moʼo fakaloloto he manatu. Toe fakaʼaogaʼi te tohi Kumiʼaga Tohi ʼa Te Kau Fakamoʼoni ʼa Sehova ke ke mahino ki te fakaʼuhiga ʼo te vaega mo tona maʼuliʼi. Tokaga ʼo akoʼi te ʼu fakamahino fakamuli ʼo vakaʼi tafito te ʼu tohi Fakatohi-tapu ʼae neʼe ta fakamuli mai.

Koia fakaʼaoga lahi te tohi Vaega Ki Te Maʼuli Fakakilisitiano ke ke maʼu ai te ʼu koloa ʼo ʼuhiga mo te poto, te ʼatamai malama ʼi te Tohi-Tapu. Ka ke fakaʼaogaʼi lahi pea ʼe ke iloʼi papau anai “ko te folafola ʼa te ʼAtua ʼe maʼuli pea mo malohi.”—Hep 4:12.