Oketopeli

ʼI ʼihi temi ʼe faigataʼa koa kia koe hau fakalogo? Neʼe toe feia pe mo te Hau ko Tavite. Koia, neʼe ina kole fenei ai ki te ʼAtua: “Fakatupu ia au te fia fakalogo kia te koe.” (Pes. 51:12) Logo la neʼe ʼofa Tavite ia Sehova, kae neʼe faigataʼa ʼi ʼihi temi hana fakalogo. Pea ʼe tou mahino fuli ki ai. Kotea tona tupuʼaga? ʼUluaki, he neʼe tou tutupu ake ʼaki te mole fia fakalogo. Lua, ʼe fakaneke tuʼumaʼu tatou e Satana ke tou agatuʼu kia Sehova, ohage pe ko ia. (2 Ko. 11:3) Pea tolu ʼi te temi nei, ʼe tou sio ki te agatuʼu ʼa te hahaʼi tokolahi, pea “ko te faʼahiga manatu ʼaia ʼe gaue ʼi te temi nei ʼi te ʼu foha ʼo te talagataʼa.” (Efe. 2:2) Koia ʼe tonu ai ke tou tauʼi malohi totatou ʼuhiga agahala pea mo tekeʼi te ʼu fakaneke ʼo tatou e Satana mo tona malama ke tou talagataʼa. ʼE maʼua ai ke tou faiga fakamalotoloto ke tou fakalogo kia Sehova pea mo natou ʼae neʼe ina foaki ki ai te pule. w23.10 6 ¶1

Kotea te ako ʼe tou maʼu mai te fakaliliu fakamilakulo e Sesu te vai ko he vino? ʼE tou ako ai te agavaivai. Neʼe mole vikiʼi e Sesu ia ia totonu ʼi tana fai te milakulo ʼaia. ʼI tona fakahagatonu, neʼe mole he temi neʼe ina vikiʼi ai ia ia totonu ʼo ʼuhiga mo he gaue neʼe ina fai. Kae neʼe agavaivai ia Sesu pea neʼe ina fakakololiaʼi mo fakamaʼuhigaʼi tuʼumaʼu pe tana Tamai. (Soa. 5:​19, 30; 8:28) Kapau ʼe tou hage ko Sesu ʼo agavaivai, ʼe mole tou laupisi anai ʼo ʼuhiga mo he ʼu gaue ʼe tou fai. ʼAua naʼa tou laupisiʼi ia tatou totonu, kae tou laupisiʼi totatou ʼAtua fakatalakitupua ʼae ʼe tou tauhi ki ai. (Sel. 9:​23, 24) Tou foaki kia te ia te kololia ʼae ʼe tuha mo ia. ʼE mole feala anai ke tou fakahoko he aluʼaga moka mole tokoni mai ia Sehova. (1 Ko. 1:​26-31) Ka tou agavaivai, ʼe mole tou vikiʼi anai ia tatou totonu ʼuhi ko te ʼu meʼa lelei neʼe tou fai maʼa ʼihi. ʼE tou fiafia ʼi tatatou iloʼi ʼe tokagaʼi e Sehova te ʼu meʼa ʼae ʼe tou fai pea ʼe maʼuhiga kia te ia. (Vakaʼi mo Mateo 6:​2-4; Hep. 13:16) ʼE mahino papau ia, ʼe fiafia ia Sehova moka tou faʼifaʼitakiʼi ia Sesu, ʼo tou agavaivai.—1 Pet. 5:6. w23.04 4 ¶9; 5 ¶11-12

ʼAki te takitaki ʼa te laumalie maʼoniʼoni, neʼe fakalotomalohiʼi e te apositolo ko Paulo te kau Kilisitiano ke natou kumi te ʼu meʼa ʼae ʼe lelei ki ʼihi. ʼE feafeaʼi hatatou mulimuli ki te tokoni ʼaia ʼi ʼatatou fono? ʼE feala ke tou manatuʼi ʼe toe fia tali pe la mo ʼihi, ohage pe ko tatou. Fakakaukauʼi te aluʼaga ʼaeni: Ka ke faipalalau mo ʼou kaumeʼa, ʼe ko koe pe koa ʼae ʼe palalau tuʼumaʼu? Kailoa. ʼE ke tuku age he faigamalie ke natou palalau he ʼe ke loto ke natou fakaha tanatou manatu. ʼE toe feia pe ʼi te ʼu fono, ʼe tou tuku anai he faigamalie ki ʼihi ke natou fai ni tali. Ko te tahi faʼahiga fai moʼo fakalotomalohiʼi ʼotatou tehina mo tuagaʼane, ko tatatou tuku age he faigamalie ke fakaha tanatou tui. (1 Ko. 10:24) ʼE feala ke tou fai he ʼu tali ʼe nounou, he ʼe feʼauga anai te temi ke fai ai e ʼihi hanatou tali. Pea tahi, tatau aipe pe ʼe nounou tau tali, tokaga naʼa lahi fau te ʼu manatu. Kapau ʼe lahi fau te ʼu manatu, pea kotea anai ka tali e natou ʼae? w23.04 22-23 ¶11-13

ʼE maʼuhiga ke tou tokoni ki ʼihi, tafito la ʼaki tatatou faifakamafola. ʼE tonu ke tou fakapotopoto moka tou faifakamafola. ʼE kehekehe te ʼu faʼahi ʼae ʼe tui ki ai te hahaʼi, mo tonatou haʼuʼaga, ʼo feia mo tonatou agaʼi fenua. Neʼe mulimuli te apositolo ko Paulo ki te aluʼaga ʼo te hahaʼi, pea ʼe feala ke tou faʼifaʼitakiʼi tana faʼahiga fai. Neʼe hinoʼi ia ia e Sesu ko “te apositolo neʼe fekauʼi ki te ʼu puleʼaga kehekehe.” (Loma 11:13) Koia, neʼe felaveʼi ai mo ni hahaʼi Sutea, Keleka, ni hahaʼi popoto, ni hahaʼi neʼe mole loko iloa, mo ʼihi neʼe gaue ʼi te ʼu puleʼaga taki, pea mo ni hau. Ke malave tana faifakamafola ki te ʼu hahaʼi kehekehe ʼaia, neʼe liliu ia Paulo “ko meʼa fuli maʼa te hahaʼi kehekehe.” (1 Ko. 9:​19-22) Neʼe ina tokagaʼi tonatou agaʼi fenua, tonatou haʼuʼaga pea mo te ʼu meʼa ʼae neʼe natou tui ki ai. Pea neʼe mulimuli leva ki te ʼu faʼahi ʼaia moka neʼe palalau kia natou ke tupu ai hanatou fia iloʼi ia te moʼoni. ʼE toe fua lelei anai tatatou minisitelio moka tou fakapotopoto, ʼo tou fakakaukauʼi he ʼu palalau ʼe mulimuli pe anai ki te ʼu meʼa ʼae ʼe ʼaoga ki te hahaʼi. w23.07 23 ¶11-12

Ko he tahi ʼe agamalū ʼe malohi ia kae ʼe mole fula. ʼE moʼoni ʼe malohi ia ia ʼae ʼe mole ita moka hoko he aluʼaga faigataʼa. ʼE kau te agamalū ki “te fua ʼo te laumalie.” (Kal. 5:​22, 23) Ko te kupu Fakakeleka ʼae neʼe fakaliliu ʼaki te kupu “agamalū” neʼe fakaʼaogaʼi ʼi ʼihi temi moʼo palalau ki he hosi vao neʼe fakalalata. Fakakaukauʼi muʼa koe he hosi vao ʼe liliu ko he hosi kua fakalalata. ʼE kei malohi pe kae kua agalelei. Pea kia tatou tagata, ʼe feafeaʼi hatatou malolohi pea mo agamalū? ʼE mole feala ʼaki pe totatou malohi. ʼE tonu ke tou kole kia Sehova tona laumalie maʼoniʼoni pea ke tokoni mai ke tou liliu ʼo agamalū. Tokolahi te kau Fakamoʼoni ʼa Sehova kua natou agamalū. Ka fakafeagai he tahi kia natou, ʼe natou tali ʼaki he agamalū. Pea ʼe tokagaʼi e ʼihi tanatou agalelei ʼaia.—2 Tim. 2:​24, 25. w23.09 15 ¶3

ʼI te meʼa fakaofoofo ʼae neʼe ha ki te apositolo ko Soane, neʼe sio ki te ʼu tagata ʼafeā ʼe toko 24 ʼi te lagi, ʼe natou tauhi kia Sehova. Neʼe natou fakavikiviki kia Sehova, ʼo natou ui ʼe tuha mo ia ke ina maʼu “te kololia, mo te fakaʼapaʼapa pea mo te malohi.” (Apk. 4:​10, 11) ʼE toe lahi foki te fakavikiviki mo te fakakololia e te ʼu ʼaselo agatonu ia Sehova. ʼE natou fakatahi mo ia ʼi selo pea kua natou iloʼi lelei ia ia. ʼE natou sio ki ʼona kalitate ʼi te ʼu gaue fuli ʼe ina fai. Pea ʼi tanatou mamata ki te ʼu gaue ʼae ʼe ina fai, ʼe uga ai natou ke natou fakavikiviki kia te ia. (Sopo 38:​4-7) ʼE tou toe fia fakavikiviki mo tatou kia Sehova ʼi ʼatatou faikole, ʼo tou fakaha age pe koʼe ʼe tou ʼoʼofa mo fakaʼapaʼapa kia te ia. Ka ke lau mo ako te Tohi-Tapu, faiga ke ke maʼu he ʼu kalitate ʼo Sehova ʼe ke leleiʼia. (Sopo 37:23; Loma 11:33) Pea ke fakaha age leva kia te ia pe koʼe ʼe ke leleiʼia ʼona kalitate ʼaia. ʼE feala ke tou toe fakavikiviki kia Sehova ʼuhi ko tana tokoni mai ʼae kia tatou pea ki te ʼu tehina mo tuagaʼane fakalaumalie. ʼE tokaga mo puipui tuʼumaʼu tatou.—1 Sam. 2:​1, 2. w23.05 3-4 ¶6-7

ʼI te taʼu 1919, ko Papiloni Lahi neʼe mole kei ina puleʼi te hahaʼi ʼa te ʼAtua. ʼI te taʼu ʼaia, neʼe fakanofo “te tagata faifekau agatonu mo poto” ʼi tona temi totonu, moʼo fakatalitali te hahaʼi fakamalotoloto ʼi “te Ala ʼo Te Maʼoniʼoni” ʼae neʼe hoki avahi age pe. (Mat. 24:​45-47; Esa. 35:8) ʼE fakafetaʼi ki te ʼu gaue neʼe fai e ʼihi ʼi muʼa atu ki te ala ʼaia, he neʼe feala ai kia natou ʼae neʼe kamata haʼele ai ke natou mahino lelei age ki te fakatuʼutuʼu ʼa Sehova. (Taag. 4:18) Neʼe toe feala foki ke fakaalu tahi tonatou maʼuli mo te ʼu lao ʼa Sehova. Kae neʼe mole fakamaʼua e Sehova ki ʼana kaugana ke natou foimo fai atu aipe te ʼu fetogi ʼi tanatou aga mo tanatou tauhi. Neʼe ina fakamaʼa mamalie tana hahaʼi. ʼE tou fiafia lahi moka tou fai anai te ʼu meʼa fuli ʼae ka fiafia ai Sehova! ʼE tonu ke fai tuʼumaʼu ni gaue ke lelei ai te ʼu ala. ʼO toe feia pe, talu mai te taʼu 1919, kei hoko atu pe te ʼu gaue ʼae ʼe fai ki “te Ala ʼo Te Maʼoniʼoni” ke lelei tuʼumaʼu. ʼE feala ai ki he hahaʼi ʼe kaugamalie age ke natou mavae mai Papiloni Lahi. w23.05 17 ¶15; 19 ¶16

Ko te Kolesi Pule ʼae ʼe natou akoako te ʼu tehina ʼae ʼe tokoni ki te ʼu komite ʼo te Kolesi Pule. Ko te ʼu tehina tokoni ʼaia kua natou maʼumaʼua ʼi te ʼu gaue ʼa te kautahi. Koia ʼe teuteuʼi ai natou ke natou hoko atu te gaue ʼae ke natou taupau te ʼu ovi ʼa Kilisito. ʼI muʼa ʼo te fakaʼosi ʼo te mamahi lahi, ʼi te kua hake fuli ʼa te kau fakanofo ki selo, ʼe hoko atu pe te tauhi maʼa ʼi te kele ʼuhi ko te takitaki ʼa Sesu Kilisito. ʼE tou iloʼi ʼi te temi ʼaia, ʼe ʼohofi anai tatou e Koke ʼo Makoke ʼae ʼe fakaʼuhiga ki he fakatahitahi ʼo he ʼu puleʼaga. (Esk. 38:​18-20) Kae ko te ʼohofi nounou ʼaia ʼe to noa anai. ʼE mole feala anai ke ina taʼofi te tauhi ʼa te hahaʼi ʼa te ʼAtua kia Sehova. ʼEi, ʼe haofaki anai e Sehova tana hahaʼi. ʼI te meʼa ʼae neʼe ha kia Soane, neʼe sio ai te apositolo ki te “toe hahaʼi tokolahi” mai te tahi ʼu ovi ʼa Kilisito. Pea neʼe ui e Soane ko te “toe hahaʼi tokolahi” ʼaia ʼe ʼomai “mai te toe mamahi lahi.” (Fkha. 7:​9, 14) Koia, ʼe tou tui papau ai ʼe haofaki anai natou e Sehova! w24.02 5-6 ¶13-14

Kotea ʼae ʼe feala ke tou fai ke tou maʼu te laumalie maʼoniʼoni? Tou kole ki te ʼAtua ke ina foaki mai, tou ako tana Folafola ʼae neʼe tohi ʼaki te takitaki ʼo te laumalie, pea tou lagolago ki tana kautahi ʼae ʼe takitaki e te laumalie maʼoniʼoni. Ka tou fai feia, ʼe tou maʼu ai anai “te fua ʼo te laumalie.” (Kal. 5:​22, 23) ʼE foaki e te ʼAtua tona laumalie kia natou pe ʼae ʼe maʼa ʼanatou manatu mo tanatou aga. ʼE mole hoko atu anai tana foaki mai tona laumalie mo kapau ʼe tou maʼu he ʼu manatu heʼe maʼa ʼo tou fakahoko ai he ʼu aga ʼe kovi. (1 Tes. 4:​7, 8) Ke tou maʼu tuʼumaʼu pe tona laumalie, ʼe tonu foki ke mole tou “meʼa noaʼi te ʼu lea fakapolofeta.” (1 Tes. 5:20) ʼI te vaega ʼaeni, ko te ʼu lea fakapolofeta ʼe fakaʼuhiga ki te ʼu logo ʼae ʼe foaki mai e te ʼAtua ʼaki tona laumalie maʼoniʼoni. ʼE kau ki ai te ʼu lea fakapolofeta ʼo ʼuhiga mo te ʼaho ʼo Sehova pea mo te maʼuhiga ʼo te ʼu temi ʼae ʼe tou maʼuʼuli ai. ʼE tou tekeʼi te manatu ʼae ʼe kei mamaʼo atu ia Alamaketone pea ʼe mole hoko mai anai ʼi totatou temi. Kae ʼe tou taupau te manatu ʼae ke tou haga fai te aga ʼae ʼe lelei pea mo ‘he ʼu gaue ʼe ha ai tatatou pipiki ki te ʼAtua.’—2 Pet. 3:​11, 12. w23.06 12 ¶13-14

Kotea ʼae ʼe tonu ke tou fai moka ha fakafokifa mai he pāki kovi? ʼE tonu ke tou foimo sio kehe. ʼE tou fai anai te faʼahi ʼaia moka tou manatuʼi ko ʼatatou felogoi mo Sehova ʼe maʼuhiga ʼaupito age. Kae maʼia mo he ʼu pāki ʼe lagi mole kovi kae ʼe feala ke fakatupu ia tatou he ʼu manatu heʼe ʼaoga. He koʼe ʼe mole tonu ke tou sioʼi te ʼu taʼi pāki ʼaia? He ʼe mole tou loto pe la ke tupu ʼi totatou loto he holi ke tou fai he aga heʼe ʼaoga. (Mat. 5:​28, 29) ʼE ui e David, ʼae ʼe tagata ʼafeā ʼi Thaïlande: “ ʼE au fai kia au totonu te fehuʼi ʼaeni: ‘Maʼia pe mole ko he ʼu pāki kovi, kae ʼe fiafia anai koa Sehova moka au hoko atu te sioʼi ʼo te ʼu pāki ʼaia?’ Ka au fakakaukau feia, ʼe tokoni mai ke au aga fakapotopoto.” ʼE tou aga fakapotopoto anai moka tou manavasiʼi peʼe matataku naʼa tou fai he aga ʼe lotomamahi ai ia Sehova. Ko te manavasiʼi ki te ʼAtua ʼe “ko te kamataʼaga [peʼe ko te fakatafitoʼaga ʼaia] ʼo te poto.” w23.06 23 ¶12-13

ʼE lagi fakaʼuhiga te ʼu “koga fale taupotu” ki ʼatatou kokelekasio. Lolotoga te mamahi lahi, ʼe fakapapau e Sehova ʼe ina puipui anai tatou mo kapau ʼe tou haga tauhi kia te ia fakatahi mo ʼotatou tehina mo tuagaʼane. Koia, ʼe mole tou faiga pe ʼi te temi nei ke tou katakiʼi ʼotatou tehina mo tuagaʼane, kae ʼe tonu ke tou ʼoʼofa mamahi ia natou. ʼE feala ai ke haofaki tatou. ʼE ko he temi faigataʼa maʼa te hahaʼi fuli moka hoko anai “te ʼaho lahi ʼo Sehova!” (Sofo. 1:​14, 15) ʼE toe tau anai te hahaʼi ʼa Sehova mo he ʼu faigataʼaʼia. Kae kapau ʼe tou teuteu nei, ʼe mole tou matataku anai pea ʼe feala anai ke tou tokoni ki ʼihi. ʼE tou faʼa kataki moka tou tau anai mo he ʼu fihifihia. Ka mamahi anai ʼotatou tehina mo tuagaʼane, ʼe tou manavaʼofa anai kia natou ʼo foaki te ʼu meʼa ʼae ʼe ʼaoga kia natou. Pea kapau ʼe tou ako ʼi te temi nei ke tou ʼoʼofa ki ʼotatou tehina mo tuagaʼane, ʼe tou fakaha anai tatatou ʼofa kia natou ʼi te ka haʼu. ʼE fakapale anai tatou e Sehova ʼo ina foaki mai te maʼuli heʼe gata ʼi he malama ʼe mole tou toe manatuʼi ai anai te ʼu mamahi fuli.—Esa. 65:17. w23.07 7 ¶16-17

ʼE tou lau ʼi ʼihi vaega Tohi-Tapu ko ni tagata agatonu ʼo te temi muʼa neʼe natou malolohi. Kae neʼe mole natou maʼu tuʼumaʼu te malohi ʼaia. Ohage ko te Hau ko Tavite, ʼi ʼihi temi neʼe malohi “ohage ko he moʼuga” kae ʼi ʼihi temi leva “neʼe mataku.” (Pes. 30:7) Pea neʼe foaki e te laumalie ʼa te ʼAtua kia Samisoni he toe malohi. Kae neʼe ina ui ka hala te laumalie ʼa te ʼAtua, “ ʼe liliu ia ʼo vaivai ohage pe ko te tagata fuli.” (Tfm. 14:​5, 6; 16:17) Koia, neʼe malolohi te ʼu tagata agatonu ʼaia ʼuhi pe he neʼe foaki e Sehova kia natou te malohi. Neʼe fakaha lelei e te apositolo ko Paulo neʼe toe ʼaoga mo ia ke falala ki te malohi ʼae ʼe foaki e Sehova. (2 Ko. 12:​9, 10) Neʼe tau ia ia mo ni mahaki. (Kal. 4:​13, 14) ʼI ʼihi temi neʼe toe faigataʼa kia ia tana fai te meʼa ʼae ʼe lelei. (Loma 7:​18, 19) Pea neʼe toe tuʼania mo mataku ʼo ʼuhiga mo te ʼu meʼa ʼae ka hoko kia ia. Kae ʼi te temi ʼae neʼe vaivai ai ia Paulo, neʼe liliu ʼo malohi. Kotea ʼae neʼe tokoni ki ai? Neʼe foaki e Sehova kia Paulo te malohi ʼae neʼe ʼaoga kia ia ke ina lava ʼutakiʼi ʼona faigataʼaʼia. w23.10 12 ¶1-2

Kapau ʼe ke tauʼi te manatu ʼae ʼe mole hou ʼuhiga, ke ke manatuʼi ʼe ko Sehova totonu ʼae neʼe ina taki mai koe kia te ia. (Soa. 6:44) ʼE sio ia ki te meʼa ʼae ʼe lelei ia koe kae lagi ʼe mole ke iloʼi koe pea ʼe ina iloʼi lelei ia koe. (2 Klk. 6:30) Koia ke ke tui kia te ia moka ʼe ina ui atu ʼe ke maʼuhiga kia te ia. (1 Soa. 3:​19, 20) ʼE tukugakoviʼi e ʼihi ia natou totonu ʼo natou manatu ki te meʼa ʼae neʼe natou fai ʼi muʼa ʼo tanatou iloʼi ia te moʼoni. (1 Pet. 4:3) Pea ʼe ʼi ai pe la mo he ʼu tehina mo tuagaʼane ʼe natou tauʼi honatou ʼu vaivaiʼaga. Kae feafeaʼi kia koe? ʼE tauteaʼi koa koe e tou loto? Kapau koia, manatuʼi ʼe mole ko koe pe, neʼe ʼi ai ʼihi kaugana ʼa Sehova neʼe natou toe logoʼi pe te fahaʼi ʼaia. Ohage la, neʼe ui e te apositolo ko Paulo ko he tagata fakaʼofaʼofa moka ʼe manatu ki ʼona vaivaiʼaga. (Loma 7:24) ʼE moʼoni, neʼe fakahemala ki ʼana agahala pea mo papitema. Kae neʼe ina ui ʼe ko ia “ ʼae ʼe veliveli ʼosi ʼi te kau apositolo” pea ʼe “kovi age” ia ʼi te kau agahala.—1 Ko. 15:9; 1 Tim. 1:15. w24.03 27 ¶5-6

Koʼeni he ako ʼe feala ke tou taʼofi mai te tonu ʼae ʼe kovi neʼe fai e te Hau ko Seoasi: ʼE maʼuhiga ke tou filifili he ʼu kaumeʼa ʼe natou uga anai tatou ke tou fai he ʼu meʼa ʼe lelei, ko he ʼu kaumeʼa ʼe natou ʼoʼofa ia Sehova pea mo fia fakafiafiaʼi tona loto. ʼE toe lelei foki moka ʼe mole tou taʼiake tatau. Neʼe veliveli age ia Seoasi ia Seosata. Kae neʼe nā kaumeʼa lelei. Fai te ʼu fehuʼi ʼaeni ʼo ʼuhiga mo ʼou kaumeʼa: “ ʼE natou tokoni mai koa ke malohi taku tui kia Sehova? ʼE natou faiga koa ke natou fakalogo kia te ia pea mo natou fakalotomalohiʼi au ke au toe fai feia mo au? ʼE natou leleiʼia koa te palalau ʼo ʼuhiga mo Sehova pea mo te ʼu manatu neʼe natou ako ʼi te Tohi-Tapu? ʼE natou ui mai pe koa te meʼa ʼae ʼe au fia logo ki ai peʼe natou foaki mai he ʼu tokoni ʼe ʼaoga moʼoni kia au?” (Taag. 27:​5, 6, 17) ʼI tona fakahagatonu, kapau ʼe mole ʼoʼofa ʼou kaumeʼa ia Sehova, ʼe lelei age ke mole ke kaumeʼa mo natou. Kae kapau ʼe natou ʼoʼofa ia te ia, fakatahi tuʼumaʼu mo natou, he ʼe ko ʼou kaumeʼa lelei ʼaia.—Taag. 13:20. w23.09 9-10 ¶6-7

Ko te ʼu kupu ʼaia ʼe lua Alefa mo Omeka, ʼe ko te ʼu mataʼi tohi ʼuluaki pea mo fakaʼosi ʼo te ʼalafapeti Fakakeleka. Koia, ko te ui ʼae e Sehova “ko au te Kamataʼaga pea mo te Fakaʼosiʼaga” ʼe ina fakaha ai, ka ina kamata he gaue pea ʼe tokaga anai ke hoko katoa ʼi tona fakaʼosi. Hili te fakatupu e Sehova ia Atama mo Eva, neʼe ina ui age kia naua: “Kolua fanaunau pea mo liliu ʼo hahaʼi, kolua fakahahaʼi pea mo puleʼi te kele.” (Sen. 1:28) ʼI tana fakaha ʼaia tana fakatuʼutuʼu ʼi te kamataʼaga, neʼe hage pe neʼe ui e Sehova “Alefa.” ʼE hoko mai anai te temi ʼae ka fonu ai te kele ko te ʼu fanau ʼa Atama mo Eva, ʼe natou haohaoa pea mo fakalogo ki te ʼAtua. ʼE natou fakaliliu anai te kele ko he Palatiso. ʼI te temi ʼaia, ʼe kua kaku anai tana fakatuʼutuʼu ki tona fakaʼosiʼaga, pea ʼe hage anai ʼe ui e Sehova “Omeka.” ʼI te ʼosi fakatupu e Sehova “te lagi, mo te kele pea mo te ʼu meʼa fuli ʼae ʼi ai” neʼe ina fai leva ni palalau ʼe ha ai ʼe hoko moʼoni anai tana fakapapau. Neʼe ina tuku te fitu ʼaho ke hoko ai tana fakatuʼutuʼu ʼo ʼuhiga mo te hahaʼi pea mo te kele. Pea ʼi te fakaʼosi ʼo te fitu ʼaho, kua fakahoko katoa ai leva tana fakatuʼutuʼu.—Sen. 2:​1-3. w23.11 5 ¶13-14

Neʼe mahina fa te faifagona faigataʼa ʼa te kau Sutea mai Papiloni ki Iselaele, kae neʼe fakapapau e Sehova ʼe ina toʼo kehe anai te ʼu aluʼaga ʼae neʼe feala ke taʼofi ai tanatou toe liliu ʼaia ki tonatou fenua. Neʼe iloʼi e te kau Sutea agatonu ko te ʼu tapuakina ka natou maʼu moka natou toe liliu ki Iselaele ʼe laka maumau age ʼi te ʼu sakilifisio ka natou fai. Pea ko te tapuakina lahi ka natou maʼu ʼe pipiki ki tanatou tauhi. Neʼe mole pe la he fale lotu maʼa te tauhi ʼae kia Sehova ʼi Papiloni. Neʼe mole he ʼaletale ke feala ke momoli ai e te kau Iselaele te ʼu sakilifisio ʼae neʼe fakamaʼua ʼi te Lao ʼa Moisese, pea neʼe mole ni pelepitelo moʼo momoli te ʼu sakilifisio ʼaia. Pea tahi ʼae, neʼe kaugamalie age te kau pagani ʼi te hahaʼi ʼa Sehova, pea neʼe mole fakaʼapaʼapa te kau pagani ʼaia kia Sehova mo ʼana lao. Koia, ko te toko lauʼi afe Sutea ʼae neʼe ʼoʼofa ki te ʼAtua, neʼe natou fakaʼamu la ke natou toe liliu ki tonatou fenua ʼo fakatuʼu te tauhi maʼa. w23.05 14-15 ¶3-4

Kapau ʼe tou fia maʼuʼuli ohage ko “he ʼu fanau ʼo te malama” ʼe ʼaoga mai te tokoni ʼo te laumalie maʼoniʼoni ʼo te ʼAtua. Kotea tona tupuʼaga? Koteʼuhi ʼe faigataʼa te nofo maʼa ʼi te malama heʼe maʼa ʼaeni. (1 Tes. 4:​3-5, 7, 8) ʼE feala ke tokoni mai te laumalie maʼoniʼoni ke tou liʼaki te faʼahiga manatu ʼo te malamanei. ʼE kau ai te filosofia pea mo te ʼu manatu ʼae ʼe fakafeagai ki te ʼu manatu ʼa te ʼAtua. ʼE toe tokoni mai ke tou fakaha ia “te ʼu agalelei fuli, mo te faitotonu.” (Efe. 5:9) Ko te tahi fealagia ʼe feala ke tou maʼu ai te laumalie maʼoniʼoni ʼe ko te faikole. Neʼe ui e Sesu ‘ ʼe foaki anai e Sehova ia te laumalie maʼoniʼoni kia natou ʼae ʼe natou kole age.’ (Luka 11:13) ʼE feala ke tou toe maʼu ia te laumalie maʼoniʼoni moka tou fakavikiviki kia Sehova ʼi ʼatatou fono. (Efe. 5:​19, 20) ʼE tokoni lelei mai te laumalie maʼoniʼoni ʼa te ʼAtua ke tou maʼu ia he faʼahiga maʼuli ʼe ina leleiʼia. w24.03 23-24 ¶13-15

ʼE ʼaoga koa kia koutou te kataki fualoa? Kapau koia, kotou faikole. ʼE kau te kataki fualoa ki te fua ʼo te laumalie maʼoniʼoni. (Kal. 5:​22, 23) Koia ʼe tonu ai ke tou kole kia Sehova ke ina foaki mai tona laumalie maʼoniʼoni pea ke tokoni mai ke tou maʼu te fua ʼo te laumalie maʼoniʼoni. Ka tou to mo he aluʼaga ʼe faigataʼa ai tatatou kataki fualoa, tou “haga kole” te laumalie maʼoniʼoni ke tou maʼu te kalitate ʼaia. (Luka 11:13) ʼE toe feala pe ke tou kole kia Sehova ke tokoni mai ke tou manatu ohage ko ia. Hili tatatou faikole, ʼe tou faiga anai ke tou kataki fualoa ʼi te ʼaho fuli. Ka lahi tatatou kole ke tou maʼu te kataki fualoa pea mo tou fakaha te kalitate ʼaia, ʼe tauaka anai ʼi totatou loto pea ʼe iloga anai ʼi totatou maʼuli. ʼE toe ʼaoga ke tou metitasio ki ni hahaʼi ʼi te Tohi-Tapu neʼe kataki fualoa. ʼE palalau ʼi te Tohi-Tapu ki ni hahaʼi tokolahi neʼe kataki fualoa. Kapau ʼe tou metitasio ki tanatou faʼifaʼitaki, ʼe tou iloʼi ai pe ʼe feafeaʼi hatatou kataki fualoa. w23.08 22 ¶10-11

Neʼe foaki e Sesu ki te apositolo ko Petelo he fakamoʼoni ʼe tokoni anai ia Sehova kia ia. Hili tona fakatuʼuake, neʼe fai e Sesu he milakulo, ʼo toe fakafealagia kia Petelo mo te tahi ʼu apositolo ke natou maʼu he tuʼuga ika. (Soa. 21:​4-6) ʼE mahino ia, ʼaki te milakulo ʼaia, neʼe mole toe hoha ai ia Petelo he ʼe tokaga anai ia Sehova ke ina foaki te ʼu meʼa ʼae ʼe ʼaoga kia ia. Neʼe lagi manatuʼi ai e Petelo te ui ʼae ʼa Sesu ʼe foaki anai e Sehova te ʼu meʼa ʼae ʼe ʼaoga kia natou ʼae ʼe natou “haga fakamuʼamuʼa ia te Puleʼaga.” (Mat. 6:33) Neʼe uga ai ia Petelo ke ina fakamuʼamuʼa tana minisitelio ʼi tana gaue ʼae ko te gelu. ʼI te Penikosite ʼo te taʼu 33 neʼe faifakamafola ʼaki he lototoʼa pea neʼe tali ai e te toko lauʼi afe ia te logo lelei. (Gaue 2:​14, 37-41) Ki muli age, neʼe tokoni ki te kau Samalitana mo natou ʼae neʼe mole Sutea ke natou ako ke natou iloʼi ia Kilisito pea mo mulimuli ia te ia. (Gaue 8:​14-17; 10:​44-48) ʼE mahino ia neʼe fakaʼaogaʼi e Sehova ia Petelo ke ina taki mai te faʼahiga hahaʼi kehekehe ki te kokelekasio. w23.09 20 ¶1; 23 ¶11

Hili taʼu ʼe lua ʼi te ʼosi maumauʼi e te kau Papiloni ia Selusalemi, ko Nepukanesa, te Hau ʼo Papiloni, neʼe hoha ʼaupito, he neʼe sio ʼi tana moemisi ki he fakatata maʼoluga. Neʼe ina fakatotonu ke matehi tana ʼu tagata popoto fuli, ʼo kau ai ia Taniela, mo kapau ʼe mole natou fakaha mo fakamahino age tana moemisi. (Tan. 2:​3-5) Neʼe tonu ke foimo fai e Taniela he tonu, naʼa tamateʼi te tokolahi. “Neʼe alu ai ia Taniela ki te hau ʼo kole ki ai ke ina tuku age he temi ke ina fakamahino age te moemisi.” (Tan. 2:16) ʼI te aluʼaga ʼaia, neʼe fakaha ai e Taniela tana lototoʼa mo tana tui. ʼE mole fakaha mai ʼi te Tohi-Tapu neʼe kua fakamahino e Taniela ʼi muʼa atu he ʼu moemisi. Neʼe ina kole age ki ʼona kaumeʼa ke natou “faikole ki te ʼAtua ʼo te lagi ke ʼofa ʼo fakaha age kia natou te meʼa fakalilo ʼaia.” (Tan. 2:18) Neʼe tali e Sehova ki ʼanatou faikole. Neʼe feala, ʼaki te tokoni ʼa Sehova, ke fakamahino e Taniela te moemisi ʼa Nepukanesa. Neʼe haofaki ai te maʼuli ʼo Taniela pea mo ʼona kaumeʼa. w23.08 3 ¶4

Manatuʼi te ʼu fua lelei moka ʼe ke kataki fualoa. Ka tou kataki fualoa, ʼe lahi age tatatou fiafia pea ʼe mole tou iita. ʼI te agamahani, ʼe toe fua lelei ki totatou maʼuli fakasino ʼo feia mo tatatou fakakaukau. ʼE lelei age ʼatatou felogoi mo te hahaʼi. ʼE tou taupau te logo tahi ʼi te kokelekasio. Kapau ʼe mole tou iita vave moka fai e he tahi he meʼa ʼe mole tou leleiʼia, ʼe mole hoko ai anai he tokakovi. (Pes. 37:​8, kiʼi nota; Taag. 14:29) Pea ko te faʼahi ʼae ʼe maʼuhiga age, ʼe tou faʼifaʼitakiʼi tatatou Tamai ʼae ʼi selo pea ʼe tou fakaovi kia te ia. ʼEi, ʼe fua lelei kia tatou fuli moka ʼe tou kataki fualoa. ʼE mole faigafua tuʼumaʼu tatatou fakaha te kalitate ʼaia. Kae ʼaki te tokoni ʼa Sehova, ʼe feala anai ke tou haga fakaha te kataki fualoa. Pea ʼi tatatou atalitali ʼae ki te malama foʼou, ʼe feala ke tou tui papau ʼe “sio ia Sehova kia natou ʼae ʼe manavasiʼi kia te ia, ia natou ʼae ʼe falala [peʼe atalitali] ki tona ʼofa agatonu.” (Pes. 33:18) Koia, tou fakatotonu ke tou fakaha tuʼumaʼu te kataki fualoa. w23.08 22 ¶7; 25 ¶16-17

ʼE fakaha lelei e Sakopo, tatau aipe pe ʼe ui e he tagata ʼe tui ki te ʼAtua, kae ʼe mole ha ia ʼi ʼana gaue. (Sakp. 2:​1-5, 9) ʼE toe palalau ia Sakopo ki he tahi ʼe sio ki he tehina peʼe ko he tuagaʼane ʼe mole hona meʼa laofi peʼe ko hana meʼa kai kae ʼe mole tokoni ia ki ai. Tatau aipe pe ʼe ina ui ʼe tui ki te ʼAtua, kae ʼe mole ha ʼi ʼana gaue. (Sakp. 2:​14-16) Neʼe fakaʼaogaʼi e Sakopo te faʼifaʼitaki ʼa Laape he neʼe tui ki te ʼAtua pea neʼe ina fakaha ʼi ʼana gaue. (Sakp. 2:​25, 26) Neʼe logo ia Laape ki te ʼu gaue ʼae neʼe fai e Sehova pea neʼe ina iloʼi ai ʼe nofo mo te kau Iselaele. (Sos. 2:​9-11) Neʼe ina fakaha tana tui kia te ia ʼaki tana ʼu gaue: neʼe ina fakanono te ʼu tagata Iselaele ʼe toko lua, ʼae neʼe ʼomai ʼo vakaʼi fakafufu te fenua, ke mole matehi ai naua. Neʼe faitotonu ai ia Laape ia muʼa ʼo te ʼAtua, ohage pe ko Apalahamo, logo la neʼe ko he fafine heʼe haohaoa pea neʼe mole ko he Iselaele. ʼE ha ʼi tana faʼifaʼitaki ia te maʼuhiga ʼae ke fakaha te tui ʼaki ni gaue. w23.12 5-6 ¶12-13

ʼI totatou ʼuhiga Kilisitiano, ʼe mole tou fia mahino pe ki te ʼu akonaki tafito ʼo te Tohi-Tapu. Kae ʼaki te tokoni ʼa te laumalie maʼoniʼoni ʼa te ʼAtua, ʼe tou toe loto foki ke tou ako “mo te ʼu meʼa loloto ʼo ʼuhiga mo te ʼAtua.” (1 Ko. 2:​9, 10) He koʼe ʼe mole ke fakatuʼutuʼu ke fai hau ʼu fekumi lolotoga tau ako tokotahi ke lahi age ai tau fakaovi kia Sehova? Ohage la ʼe feala ke ke fai hau ʼu fekumi ʼo ʼuhiga mo tana fakaha ia tona ʼofa ki ʼana kaugana ʼi te temi muʼa. ʼE ke tui papau ai anai ʼe toe ʼofa Sehova ia koe. Peʼe feala ke ke vakaʼi te ʼu fakatuʼutuʼu ʼae neʼe fai ʼi te tauhi ʼae ʼa Iselaele ʼi te temi muʼa. Pea ke fakatatau mo tatatou faʼahiga tauhi ʼae ia ʼaho nei kia Sehova. Peʼe lagi feala ke ke ako te ʼu lea fakapolofeta ʼae neʼe fakahoko e Sesu lolotoga tona maʼuli mo tana minisitelio ʼi te kele. ʼE ke fiafia lahi anai moka ke ako te ʼu manatu ʼaia pea ʼe ʼaoga atu anai te Kumiʼaga Tohi ʼa Te Kau Fakamoʼoni ʼa Sehova. Ko tau ako loloto ʼaia te Tohi-Tapu ʼe liliu ai tau tui ʼo malohi pea ʼe tokoni atu anai ke ke “maʼu ai . . . te ʼatamai malama ʼo ʼuhiga mo te ʼAtua.”—Taag. 2:​4, 5. w23.10 18-19 ¶3-5

Ko te kupu “mamahi” ʼae neʼe fakaʼaogaʼi e te apositolo ko Petelo ko tona fakaʼuhiga “folahi.” Pea ʼi te lua koga ʼo te vaega ʼe ha ai te meʼa ʼae ʼe hoko moka tou feʼofamamahiʼaki. ʼE tou ʼuʼufi ai te ʼu agahala ʼo ʼotatou tehina. ʼE hage ko he laupapa ʼe pūpū. ʼE tou folahi anai he kie ki te laupapa. Pea ʼe mole tou ʼuʼufi pe anai he pu ʼe tahi peʼe lua, kae ko te laupapa katoa. ʼO toe feia pe, kapau ʼe tou ʼofa mamahi ki ʼotatou tehina mo tuagaʼane, ʼe mole tou “ ʼuʼufi” pe anai, peʼe fakamolemole, he hala ʼe tahi peʼe lua, kae ko “he ʼu tuʼuga agahala.” Ka malohi totatou ʼofa ki ʼotatou tehina mo tuagaʼane, ʼe feala anai ke tou fakamolemole ʼanatou hala, tatau aipe moka ʼi ʼihi temi ʼe faigataʼa tona fai. (Kol. 3:13) Pea ka tou fakamolemole ki ʼotatou tehina, ʼe ha ai ʼe kei malohi totatou ʼofa pea ʼe tou fia fakafiafiaʼi ia Sehova. w23.11 11-12 ¶13-15

ʼI tona taʼu 16, neʼe kamata fai e te Hau ko Sosiasi he ʼu gaue moʼo toe gaohi te fale lotu. Neʼe maʼu ai leva “te tohi ʼo te Lao ʼa Sehova ʼae neʼe foaki ʼaki ia Moisese.” ʼI te logo ʼa te hau ki te lau ʼo te Lao, neʼe ina fai atu aipe he ʼu fetogi ke mulimuli ki te meʼa ʼae neʼe tohi ʼi ai. (2 Klk. 34:​14, 19-21) ʼE ke fia lau koa te Tohi-Tapu ʼi te ʼaho fuli? Kapau kua ke kamata fai, pea ʼe ke leleiʼia koa tau lautohi? Kotea ʼae ʼe tokoni atu ke ke manatuʼi te ʼu vaega ʼae ʼe feala ke ʼaoga atu? ʼI tona taʼu 39, neʼe fai e Sosiasi he hala pea neʼe mate ai. Neʼe mole ina kumi ke ina iloʼi te manatu ʼa Sehova, kae neʼe falala pe kia ia. (2 Klk. 35:​20-25) Kotea te ako maʼa tatou? Pe ʼe kei tou tupulaga peʼe kua tou matuʼa, peʼe kua fualoa tatatou ako te Tohi-Tapu peʼe kailoa, ʼe tonu ke tou kumi tuʼumaʼu ke tou iloʼi te manatu ʼa Sehova. ʼE tonu ai ke tou kole tana takitaki. Tou ako tana Folafola pea mo tou kumi tokoni ki te ʼu tehina mo tuagaʼane kua fotufotuʼa. ʼE tokoni mai anai ke mole tou fai ni hala ʼe mamafa pea ʼe tou fiafia lahi anai.—Sakp. 1:25. w23.09 12 ¶15-16

ʼE lahi te ʼu fafine ʼe palalau ki ai te Tohi-Tapu neʼe natou ʼoʼofa mo tauhi kia Sehova. Neʼe natou “lotololomi ʼi te ʼu aluʼaga fuli” pea mo “agatonu ʼi te ʼu meʼa fuli.” (1 Tim. 3:11) Pea ʼe toe feala foki ke maʼu e te ʼu tuagaʼane ʼi tanatou kokelekasio he ʼu fafine Kilisitiano kua fotufotuʼa ʼi te faʼahi fakalaumalie ke natou faʼifaʼitakiʼi. ʼU tuagaʼane kei finemui, he koʼe ʼe mole kotou kumi he ʼu tuagaʼane kua fotufotuʼa ʼi te faʼahi fakalaumalie ke kotou faʼifaʼitakiʼi? Tokagaʼi ʼonatou kalitate pea mo fakakaukauʼi pe ʼe feafeaʼi hakotou maʼu mo koutou te ʼu kalitate ʼaia. Ko te agavaivai ʼe ko he kalitate maʼuhiga ʼo he tahi kua fotufotuʼa ʼi te faʼahi fakalaumalie. Ko he fafine agavaivai, ʼe ina maʼu he ʼu felogoi lelei mo Sehova pea mo ʼihi. Ohage la, ko he fafine ʼe ʼofa ia Sehova ʼe agavaivai ʼo mulimuli ki te fakatotonu ʼae ʼe tuʼu ia 1 Kolonito 11:3. ʼE fakaha ai e Sehova pe neʼe ina foaki kia ai te pule ʼi te kokelekasio mo te famili. w23.12 18-19 ¶3-5

ʼE kole e Sehova ki te tagata ke ʼofa ki tona ʼohoana, mo tokaga ki te ʼu meʼa ʼae ʼe ʼaoga kia ia, mo liliu ko hona kaumeʼa lelei pea mo tokoni ke malohi ʼana felogoi mo Sehova. ʼE tokoni atu anai ke ke fakahoko lelei tou ʼuhiga tagata ʼohoana pea mo pule famili. ʼEi, ko tau fakaʼaogaʼi ʼou fealagia fakakaukau, mo tau fakaʼapaʼapa ki te hahaʼi fafine pea mo tau tuha ʼae mo te falala, ʼe tokoni anai ki tokolua maʼuli fakataumatuʼa. Kapau ʼe ke fia maʼu hau ʼu fanau, ʼe ke fia fakahoko lelei te maʼua ʼaia. Kotea ʼae ʼe ke ako mai te faʼifaʼitaki ʼa Sehova? (Efe. 6:4) Ohage la, neʼe logo ia Sesu ki te ui age e tana Tamai ʼe ʼofa pea mo fiafia ia ia. (Mat. 3:17) ʼE tokaga anai he tamai ke ina ui ki ʼana fanau ʼe ʼofa ia natou. ʼE fakamalo age moka natou fai he ʼu gaue lelei. ʼE faʼifaʼitakiʼi e he tamai ia Sehova moka tokoni ki ʼana fanau ke natou liliu ʼo fotufotuʼa ʼi te faʼahi fakalaumalie. ʼE feala hau teuteu nei ki te ʼu maʼua ʼaia ʼaki tau fakaha tou ʼofa ki tou famili mo te ʼu tehina mo tuagaʼane pea mo ke tokaga lelei kia natou. Pea ke ke mahani ʼi te ui age ʼe ke ʼofa ia natou pea ʼe natou maʼuhiga kia koe.—Soa. 15:9. w23.12 28-29 ¶17-18

ʼE tou tau fuli mo te ʼu faigataʼaʼia pea mo te ʼu mahaki. Pea tahi ʼe fakafeagai mo fakatagaʼi tatou ʼe te hahaʼi ʼae ʼe natou fehihiʼa ki te kau fakamoʼoni ʼa Sehova. ʼE mole taʼofi ʼe Sehova te ʼu faigataʼaʼia ʼaia kae ʼe ina fakapapau ʼe tokoni mai anai. (Esa. 41:10) Pea ʼaki tana tokoni ʼe tou taupau te fiafia, mo fai ni tonu ʼe lelei pea mo nonofo agatonu maʼia te ʼu faigataʼaʼia ʼaupito. ʼE fakapapau mai e Sehova ʼe ina foaki mai “te tokalelei ʼo te ʼAtua” ʼae ʼe ui ʼi te Tohi-Tapu. (Flp. 4:​6, 7) ʼE fakaʼuhiga te kupu ʼaia ki te tokalelei ʼae ʼe tou logoʼi moka tou felogoi lelei mo Sehova. Ko te tokalelei ʼaia “ ʼe maʼoluga age ʼi te ʼu ʼatamai fuli,” pea ʼe taulekaleka age ʼi te ʼu meʼa fuli ʼae ʼe tou fakakaukauʼi. Neʼe ke logoʼi koa te tokalelei ʼi tau ʼosi faikole fakamalotoloto ʼae kia Sehova? Ko te tokalelei ʼaia ʼo te ʼAtua. w24.01 20 ¶2; 21 ¶4

Ko tanatou ʼofa ʼae ki te ʼAtua, ʼe uga ai te ʼu kaugana agatonu ke natou vikiʼi tona huafa mo he loto katoa. Neʼe mahino ia te Hau ko Tavite ko te vikiʼi te huafa ʼo Sehova, ʼe hage pe ʼe ina vikiʼi ia Sehova totonu. ʼE ʼi ai te pikipikiga tafito ʼo te huafa ʼo Sehova mo tona ʼuhiga totonu. ʼE tou manatuʼi ai ʼona kalitate taulekaleka pea mo ʼana gaue fakaofoofo. Neʼe iloʼi e Tavite te taputapu ʼo te huafa ʼo tana Tamai pea neʼe ina fia vikiʼi mo ‘tona loto katoa.’ Neʼe toe manatu feia pe mo te kau Levite. Neʼe natou ui ʼaki he agavaivai, ko ʼanatou fakavikiviki ʼe mole feʼauga ke natou fakaha te maʼoluga ʼo te maʼoniʼoni ʼae ʼe tuha mo te huafa ʼo Sehova. (Nee. 9:5) ʼE mahino ia, ko tanatou fakavikiviki ʼaia mo he agavaivai neʼe fiafia lahi ai ia Sehova. w24.02 9 ¶6

Kapau neʼe mole ke lava fakahoko tau fakatuʼutuʼu he neʼe mole fakapotopoto, pea ʼe mole liʼaki anai koe e Sehova. (2 Ko. 8:12) Ke ke ako mai te ʼu temi ʼae neʼe mole feala ai hau fakahoko tau fakatuʼutuʼu. Manatuʼi te ʼu fakatuʼutuʼu ʼae kua ke fakahoko. ʼE ui ʼi te Tohi-Tapu “ ʼe mole heʼe faitotonu te ʼAtua ke ina galoʼi takotou gaue.” (Hep. 6:10) Pea ʼe mole tonu ke tou toe galoʼi mo tatou. Fakakaukauʼi te ʼu fakatuʼutuʼu ʼae kua ke fakahoko: kua ke maʼu ni felogoi mo Sehova, peʼe kua ke palalau ki te hahaʼi ʼo ʼuhiga mo ia, peʼe kua ke papitema. Kapau ʼi te temi muʼa neʼe ke tuputupu ʼo ke lava fakahoko ʼau fakatuʼutuʼu fakalaumalie, ʼe feala koa ke hoko atu tau tuputupu ke ke fakahoko te fakatuʼutuʼu ʼae ʼe ke faiga ki ai ʼi te temi nei? ʼAki te tokoni ʼa Sehova, ʼe ke lava fakahoko tau fakatuʼutuʼu. ʼO toe feia pe mo koe, tokagaʼi tuʼumaʼu te ʼu aluʼaga ʼae ʼe tokoni atu ai Sehova, pea ʼe ke fiafia anai ʼi tau haga faiga ʼae ke ke fakahoko ʼau fakatuʼutuʼu. (2 Ko. 4:7) Kapau ʼe mole ke tuku ʼau faiga, ʼe ke maʼu anai ni tapuakina ʼe lahi age.—Kal. 6:9. w23.05 31 ¶16-18

Neʼe fakaha e Sehova ia tona fiafia kia natou ʼae ʼe ʼofa ai. Neʼe tuʼa lua ia tana ui ko Sesu ʼe ko tona ʼAlo Tona ʼofaina ʼae ʼe fiafia ai. (Mat. 3:17; 17:5) ʼE ke loto koa ke ui atu e Sehova ʼe fiafia ʼo ʼuhiga mo koe? ʼE mole palalau fakahagatonu atu ia Sehova kae ʼe ina fakaʼaogaʼi ia tana Folafola. ʼE feala ke ke ‘logo’ ki hana ui atu ʼe fiafia ʼo ʼuhiga mo koe moka ke lau te ʼu palalau neʼe fai e Sesu ʼi te ʼu Evaselio. Ko te agaaga ʼo Sesu neʼe ko te ʼata lelei pe ʼaia ʼo tana Tamai. Neʼe tuʼa lahi te ui e Sesu ki ʼana tisipulo agatonu mo heʼe haohaoa ʼe fiafia ʼo ʼuhiga mo natou. Ka ke lau ʼana palalau pea ʼe feala hau fakakaukauʼi ʼe ko Sehova pe ʼae ʼe ina fai atu te ʼu palalau ʼaia kia koe. (Soa. 15:​9, 15) Kae ʼe mole fakaʼuhiga leva ka ke tau mo ni ʼahiʼahi, pea ʼe mole kei fiafia ia Sehova ʼo ʼuhiga mo koe. Kae ʼe ko he faigamalie ʼaia ke ke fakaha ʼe ke ʼofa pea mo falala kia te ia.—Sakp. 1:12. w24.03 28 ¶10-11