Papitema “ ʼi Te Huafa ʼo Te”
KO TE ako ʼo te ʼu takaiga pepa ʼāfea ʼe lauʼi afe neʼe maʼu ʼi te ʼone ʼo Esipito ʼi te kamataʼaga ʼo te sēkulō ʼaenī, neʼe fakamālamaʼi ʼo ʼuhiga mo te ʼu Tohi Faka Keleka Faka Kilisitiano ʼo te Tohi-Tapu. ʼI te fakatokagaʼi ʼo te faʼahiga fakaʼaoga ʼaē ʼo ʼihi ʼu kupu, ʼe toe maʼu aipe he mahino lelei ʼo ʼuhiga mo te ʼu kupu pe ʼaia ʼi tanatou Tohi-Tapu ʼanatou.
Ohage la neʼe fakaʼaoga e Sesu te talanoa ʼaē “ ʼaki te huafa ʼo te”, ʼi tana fakatotonu neʼe ina fai ki tana kau tisipulo ʼi muʼa ʼo tana hake ki selo: “Koutou ʼolo pea mo koutou fai he kau tisipulo ʼi te ʼu hahaʼi ʼo te ʼu fenua fuli, ʼo koutou papitemaʼi ʼaki te huafa ʼo te Tāmai pea mo te ʼAlo pea mo te laumālie maʼoniʼoni.” Koteā te ʼuhiga ʼo te palalau ʼa Sesu? — Mateo 28:19.
Ko te talanoa ʼaē “ ʼaki te huafa ʼo te,” peʼe “ ʼi te huafa ʼo te” (Kingdom Interlinear) ʼi te ʼu tohi fakamālama neʼe maʼu e te kau tagata popoto, ʼe fakaʼaogaʼi moʼo “totogi he tahi pe”. Ko te polofesea teolosia ko Adolf Deissmann neʼe ina ʼui ko te takaiga pepa ʼaia, “ko te manatu tāfito ʼaē ʼo ʼuhiga mo te ʼu talanoa ko te papitema ʼi te huafa ʼo te ʼAliki, peʼe tui ki te huafa ʼo te ʼAlo ʼo te ʼAtua, ko tona faka ʼuhiga ʼo te papitema ʼaia peʼe ko te tui ʼaia, kua fakalogo ia ki te ʼAtua peʼe ki te ʼAlo ʼo te ʼAtua”. — Ko te ʼu tohi faka italike ʼa Deissmann.
Pea tahi foki ʼaē, neʼe ko te talanoa feiā ʼaē neʼe toe fakaʼaoga e te kau Sutea ʼi te temi ʼo Sesu, ohage ko tona fakamatala ʼi te tikisionalio (Theological Dictionary of the New Testament): “Ko te silikosisioʼi ʼo te poloselite neʼe fai (...) ‘ ʼaki te huafa ʼo te poloselite’, ke tali foki ʼi te lotu ʼa te kau Sutea. Ko te silikosisio ʼaia neʼe fakatuʼu (...) ‘ ʼaki te huafa ʼo te fuakava’, ke tali foki ia ki te fuakava.” ʼAki te meʼa ʼaia, kua maʼu te felogoi ʼa te kau Sutea mo nātou ʼaē ʼe mole Sutea ʼaē kua liliu ko te kau poloselite ʼi te taki ʼa te fuakava.
Koia ki te kilisitiano, ko te papitema ʼe pipiki ki te vāhaʼa lelei mo Sehova ʼAtua, mo tona ʼAlo ko Sesu Kilisito, pea mo te laumālie maʼoniʼoni. ʼE ina ʼiloʼi tana ʼu faʼahiga pule kehekehe ʼi tona faʼahiga maʼuli foʼou ʼaia. Tou vakaʼi takitokotahi ia te moʼoni ʼo te ʼu talanoa ʼaia e tolu.
ʼAki te fakamoʼoni ʼaē ki te fai pule ʼa te ʼAtua, ʼe tou fakaōvi kia ia pea mo tou maʼu ai te felogoi lelei mo Ia (Hepeleo 12:9; Sake 4:7, 8). ʼE tou liliu ko te meʼa ʼa te ʼAtua ko hana kaugana, he neʼe totogi tatou e te sakilifisio faitotogi ʼo Sesu Kilisito (1 Kolonito 3:23; 6:20). Neʼe ʼui pe la e te ʼapositolo ko Paulo ʼi te ʼuluaki sēkulō ko te kau kilisitiano kua fakalogo kia Sesu Kilisito, he neʼe mole nātou maʼu te moʼoni mai he faʼahiga tagata (1 Kolonito 1:12, 13; 7:23; vakaʼi ia Mateo 16:24). Ko te papitema ʼaē ʼaki te huafa ʼo te ʼAlo ʼe fakamaʼua he fakamoʼoni ki te meʼa ʼaenī, ke tali ia Sesu ohage “ko te ala, pea mo te moʼoni, pea mo te maʼuli”. — Soane 14:6.
Ko te laumālie maʼoniʼoni ʼe toe maʼuhiga tāfito foki, ke tou maʼu he felogoi lelei mo Sehova pea mo Sesu Kilisito. ʼAki te papitema ʼi te huafa ʼo te laumālie maʼoniʼoni ʼe tou fakamoʼoni ai te gāue ʼa te laumālie ʼo te ʼAtua ʼo ʼuhiga mo tatatou felogoi mo te ʼAtua. ʼE tou fakalogo ki tana taki ia tatou, ʼo mole tou talagataʼa ki tana taki, ke tou tāʼofi tana gāue ʼaē ia tatou (Efesi 4:30; 1 Tesalonika 5:19). Ko te natula ʼo te laumālie ʼe mole ina fakatupu he fihifihia ʼo ʼuhiga mo tona fakaʼaogaʼi peʼe mo tona faka ʼuhiga, ohage ko te fakaʼaogaʼi ʼaē “ ʼi te huafa ʼo te fuakava” ʼaē neʼe fai ʼi te lotu ʼa te kau Sutea.
Koia, ʼi te temi ʼaē ʼe tou fakapapau ai ke tou gāue maʼa Sehova pea mo tou fia papitema, ʼe tonu ke tou fakakaukauʼi ʼi te faikole, ia te maʼuhiga ʼaē ʼo tatatou felogoi ʼaenī. ʼE fakamaʼua foki te faʼahi ʼaia ki he maʼuliʼi ʼo te finegalo ʼo te ʼAtua, pea ko te meʼa ʼaia neʼe fai e Sesu Kilisito feiā aipe mo tana foaki te totogi, pea ko he meʼa ʼe fealagia ke hoko ʼaki te laumālie maʼoniʼoni ʼa te ʼAtua ohage ko tana taki ʼaē te ʼu kaugana ʼa te ʼAtua ʼi te ʼofa pea mo te logo tahi faka malamanei.