Ohage He ʼu Fuaʼi ʼApo Aulo

KO TE ʼU FUAʼI ʼAPO—ʼe matalelei ki te sio pea ʼe toe hifo lelei! ʼE fakaʼaogaʼi e te Tohi-Tapu te fuaʼi ʼakau matamatalelei ʼaia ki te fakatatau, ʼi tana ʼui ʼaē: “Ohage he ʼu fuaʼi ʼapo aulo ʼi he pa siliva neʼe togi, ʼo feiā mo he palalau ʼe fai ʼi tona lakaga tonu.” (Tāʼaga Lea 25:11) Koteā te faka ʼuhiga ʼo te palalau ʼaia?

ʼE feala ke fakahā e te “ ʼu fuaʼi ʼapo aulo ʼi he pa siliva neʼe togi” he faʼahiga meʼa neʼe togi, ohage ko he pa siliva neʼe togi ʼaki he fuaʼi ʼakau ʼi ai. Koteʼuhi ko te ʼu ʼuluaki vaega ʼo te kapite ʼaenī ʼe talanoa ki te fakaōviōvi ki te hau, ko te vaega ʼaenī ʼe feala ke faka ʼuhiga ki he ʼu meʼa ʼofa ʼe foaki ki he pule—ko he meʼa fakateuteu ʼe aulo, ʼe hage he ʼu fuaʼi ʼapo ʼe hili ʼi te ʼu pa siliva. (Tāʼaga Lea 25:6, 7) ʼE mahino ia ko he meʼa matalelei!

ʼE ʼi ai te matalelei feiā ʼi te ʼu palalau ʼaē ʼe tāu, mo fakaʼapaʼapa, pea mo fai ʼi tona lakaga tonu, peʼe puʼaki peʼe tohi. ʼE nātou matamatalelei, mo fakaloto mālohi, pea mo ʼaoga ʼi te ʼu tuʼuga ʼaluʼaga. Kae tāfito te ʼu palalau ʼaē ʼe haʼu mai te ʼAtua ʼe nātou matalelei ohage “he ʼu fuaʼi ʼapo aulo ʼi he pa siliva neʼe togi.”

Ohage ko tona fakatā e te palalau fakapotopoto ʼa te Hau ko Salomone ia Tāʼaga Lea 25:11, neʼe ina “kumi ke ina maʼu te ʼu palalau matamatalelei pea mo te faʼahiga tohi ʼo te ʼu kupu tonu ʼo te moʼoni.” (Tagata Tānaki 12:10; Tāʼaga Lea 25:1) Hili te ʼu sēkulō ki muli mai, neʼe tohi fēnei e te ʼapositolo ko Paulo: “Ko te Folafola fuli ʼe haʼu mai te ʼAtua pea ʼe ʼaoga.” (2 Timoteo 3:16) ʼIo, ʼe maʼu e te Tohi-Tapu te ʼu tokoni ʼaoga, mo te ʼu lea faka polofeta, pea mo te ʼu palalau fakatā, pea mo te ʼu moʼoni ʼe māʼoluga age ia ʼi te ʼu gāue ʼa te ʼu tufuga faiva. Kae, ko ʼaē ʼe ina maʼu te agapoto mai te Folafola ʼa te ʼAtua, te Tohi-Tapu, ʼe ina maʼu he koloā ʼe mole feala ke ʼi ai hona totogi pea ʼe feala hana fakafiafia ki te ʼamanaki ʼo te maʼuli heʼegata.—Tāʼaga Lea 4:7-9; Soane 17:3.