Ko He Afiafi Ke Manatuʼi

ʼI Te ʼaho maʼuhiga kua hili kiai te taʼu e 3 500 tupu, neʼe fakatotonu e Sehova ki te kau Iselaele ʼaē neʼe haʼisia ʼi Esipito ke nātou matehi he akeno pea mo liligi tona toto ki te ʼu tafa ʼo te ʼu matapā pea mo te ʼu fuga matapā ʼo tonatou ʼu ʼapi. ʼI te afiafi ʼaia, neʼe fakalaka te ʼaselo ʼa te ʼAtua ʼi te ʼu ʼapi ʼaē neʼe fakaʼiloga, kae neʼe ina matehi pe te ʼu foha ʼuluaki tupu ʼi te ʼu ʼapi ʼo te kau Esipito fuli. Neʼe ʼāteaina ai te kau Iselaele. Talu mai ai, ʼi te taʼu fuli ʼi te ʼaho ʼaia, ʼe faka maʼuhiga e te kau Sutea te Pāsikate.

Hili pe ʼaia te fai e Sesu Kilisito tana Pāsikate fakaʼosi mo tana ʼu ʼapositolo, neʼe ina fakatuʼu te taumafa ʼe ina fakamanatuʼi anai tona mate faka sakilifisio. Neʼe ina fakatoʼo te pane ki tana ʼu ʼapositolo agatonu pea mo ina ʼui fēnei: “Koutou toʼo, ʼo kai. He ko te meʼa ʼaenī ʼe ina fakatātā toku sino.” Pea neʼe ina foaki age te ipu vino pea mo ina ʼui fēnei: “Koutou ʼiʼinu fuli kiai; heʼe ko te meʼa ʼaenī ʼe ina fakatātā toku ‘taʼataʼa ʼo te fuakava,’ ʼaē ʼe tonu ke liligi maʼa te tokolahi ʼo ʼuhiga mo te fakamolemole ʼo te ʼu agahala.” Neʼe toe ʼui fēnei e Sesu: “Koutou haga fai te meʼa ʼaenī mo fakamanatu kia te ʼau.” (Mateo 26:26-28; Luka 22:19, 20) Neʼe fakatotonu ai e Sesu ki tana ʼu tisipulo ke nātou haga fakamanatu tona mate.

ʼE fakaafe koutou e te kau Fakamoʼoni ʼa Sehova ke koutou fakatahi mo nātou ki te Fakamanatu ʼo te mate ʼo Sesu. ʼE feala hakotou kau kiai ʼi te Fale ʼo te Puleʼaga ʼe ōvi ki tokotou ʼapi. Koutou vakaʼi mo te kau Fakamoʼoni ʼo tokotou koga meʼa tona faiʼaga totonu pea te hola ʼaē ʼe fai ai. Ko te ʼaho ki te fakamanatu ʼi te taʼu 1994, ko te Moeaki ʼaho 26 ʼo Malesio, pea ko te pane mo te vino ʼe feʼāveʼaki anai ʼi te ʼosi tō ʼo te laʼā.