Koutou Falala Kia Sehova Ki Te Fakahoko ʼo Tana Fakatuʼutuʼu
“ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.”—Pesalemo 37:29.
1. Koteā te fakatuʼutuʼu ʼa Sehova ʼo ʼuhiga mo te tagata pea mo te kele ʼaenī?
ʼI TE temi ʼaē neʼe fakatupu ai e Sehova tatatou ʼu ʼuluaki mātuʼa, ia Atama mo Eva, neʼe ina fakatupu nāua haohaoa. Pea neʼe ina fakatupu nāua ke fealagia hanā maʼuʼuli ʼo heʼegata ʼi te kele—mo kapau neʼe nā talagafua ki tana ʼu lao. (Senesi 1:26, 27; 2:17) Pea tahi ʼaē, neʼe haga te ʼAtua ʼo tuku ia nāua ki te ʼu koga meʼa faka palatiso. (Senesi 2:8, 9) Neʼe ʼui fēnei e Sehova kia nāua: “Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi.” (Senesi 1:28) Koia, neʼe feala ai ke mafola tanā hākoga ki te kele katoa, pea ko te kele neʼe feala ai ke liliu ko he palatiso ʼe fonu ai te hahaʼi haohaoa pea mo fiafia! Neʼe ko he kamataʼaga lelei ia ki te tagata! “Neʼe sio ai te ʼAtua kia meʼa fuli neʼe ina fai pea koʼeni ko te meʼa ʼaia neʼe lelei ʼaupito.”—Senesi 1:31.
2. Koteā te ʼu fehuʼi ʼe malaga ʼi te agaaga ʼo te ʼu meʼa fakatagata?
2 Kae, ko te faʼahiga maʼuli ʼa te tagata ʼi te ʼu taʼu ʼe lauʼi afe kua hili ʼe mole tatau ia mo te fakatuʼutuʼu ʼuluaki ʼa te ʼAtua. Ko te tagata ʼe mamaʼo ia ʼi te maʼuli haohaoa pea ʼe mole pe fiafia ia. Ko te ʼu ʼaluʼaga ʼo te malamanei neʼe fakatuʼatuʼania, pea ohage ko tana fakakikite, kua ʼāʼāsili age ia ʼo fakamataku ʼi totatou temi. (2 Timoteo 3:1-5, 13) Koia, ʼe lava feafeaʼi hatatou falala ʼaē kua vave hoko pe anai te fakatuʼutuʼu ʼa te ʼAtua ʼo ʼuhiga mo te tagata? ʼE kei hoholo fualoa atu koa te ʼu temi ʼaki te ʼu ʼaluʼaga fakatuʼatuʼania ʼaenī ʼe hoko?
Koteā ʼAē Neʼe Ina Fakatupu Te Kovi?
3. He koʼe koa neʼe mole fakagata atu aipe e Sehova te agatuʼu ʼa te tagata?
3 Ko nātou ʼaē ʼe nātou maʼu te ʼatamai mālama ʼo te Folafola ʼa te ʼAtua ʼe nātou ʼiloʼi te tupuʼaga ʼo te fakagafua e te ʼAtua te ʼu ʼaluʼaga kovi ʼaia ʼi te kele. ʼE nātou toe ʼiloʼi foki te meʼa ʼaē ka ina fai anai ki te ʼu ʼaluʼaga ʼaia. ʼI te Tohi-Tapu, neʼe nātou ako, ko ʼatatou ʼu ʼuluaki mātuʼa neʼe nā fakaʼaogaʼi kovi te loto faʼitaliha ʼaē neʼe foaki e te ʼAtua ki te tagata. (Vakaʼi ia 1 Petelo 2:16.) Neʼe nā fili hala te ala ʼo te faʼifaʼitaliha mai te ʼAtua. (Senesi, ʼu kapite 2 pea mo te 3) Neʼe lagaʼi e tanā agatuʼu te ʼu fehuʼi maʼuhiga ʼaupito ohage la: ʼE tau koa mo te Tuʼi ʼo te ʼAtulaulau ke ina puleʼi te tagata? ʼE lelei age koa tana pule ʼaē kia nātou? ʼE feala koa ke lava lelei te takitaki ʼa te tagata ʼo ʼāteaina mai te fakasiosio ʼa te ʼAtua? Ko tona faʼahiga fai pe e tahi ke tou maʼu te ʼu tali ʼaē ki te ʼu fehuʼi ʼaia ko te tuku ke fakalaka he ʼu sēkulō ki te takitaki ʼa te tagata. ʼE fakahā anai e te ʼu ikuʼaga peʼe lava lelei koa te takitaki ʼa te tagata ʼo ʼāteaina mai tona Tupuʼaga.
4, 5. (a) Neʼe koteā te ikuʼaga ʼo te haga ʼa te tagata ʼo līaki te pule ʼa te ʼAtua? (b) Koteā koa te meʼa neʼe fakamoʼoni e te temi kua hili pea ʼe kua ʼiloʼi papau?
4 ʼI te temi ʼaē neʼe līaki ai e Atama mo Eva te ʼAtua, neʼe mole kei nā haga taupau ia nāua ʼi te maʼuli haohaoa. ʼI te mole kei ʼi ai ʼo te lagolago ʼaia, neʼe hifo ai te ʼuhiga ʼo nāua. Ko te meʼa neʼe hoko, neʼe mole kei nā haohaoa, kua nā matutuʼa, pea fakaʼosi tonā maʼuli ʼaki te mate. ʼI tatatou tupu, ko ʼatatou ʼu ʼuluaki mātuʼa neʼe nā tuku ki tonā hākoga fuli te ʼu agaaga kovi fuli, ʼo kau ai mo tatou. (Loma 5:12) Pea koteā te ʼui ʼo ʼuhiga mo te fua ʼo te takitaki ʼa te tagata lolotoga te ʼu taʼu e afe? Neʼe ko he malaʼia ia, ohage pe ko tana fakahā tonu e te Tagata Tānaki 8:9: “Ko te tagata ʼe ina puleʼi pe te tagata ki tona tuʼutāmaki.”
5 Neʼe fakahā e te temi ʼaē kua fakalaka ʼe mole pe lava takitaki e te tagata te ʼu meʼa ʼo maui mālie, ʼi hana ʼāteaina mai tona Tupuʼaga. Neʼe tala fēnei e te tagata faitohi ʼo te Tohi-Tapu ko Selemia: “ ʼE ʼau ʼiloʼi pe, ê Sehova, ko te tagata ʼaē neʼe toʼo mai te kele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.”—Selemia 10:23; Teutalonome 32:4, 5; Tagata Tānaki 7:29.
ʼE Mole Fetogi Te Fakatuʼutuʼu ʼa Te ʼAtua
6, 7. (a) Neʼe fetogi koa e te ʼu taʼu e afe ʼo te hisitolia te fakatuʼutuʼu ʼa Sehova? (b) Koteā ʼaē ʼe fakapipiki mai ki te fakatuʼutuʼu ʼa Sehova?
6 Ko te ʼu taʼu ʼe lauʼi afe ʼo te hisitolia ʼa te tagata—ʼaia ʼe fonu ai te agakovi mo te mamahi—neʼe ina fetogi koa te fakatuʼutuʼu ʼa te ʼAtua? ʼE tala fēnei tana Folafola: “Koʼeni te meʼa ʼaē neʼe ʼui e Sehova, ia Ia ʼaē neʼe ina fakatupu te lagi, ʼaē neʼe ina faʼufaʼu te kele pea mo ina fakatupu, ia ia ʼaē neʼe ina fakatuʼu ʼo mālohi, ia ia ʼaē neʼe mole ina fakatupu noa, neʼe ina faʼu ke nofoʼi.” (Isaia 45:18) Koia neʼe faʼu e te ʼAtua te kele ke nofoʼi e te tagata, pea ʼe kei tuʼu maʼu aipe ʼi te fakatuʼutuʼu ʼaia.
7 Neʼe mole gata pe te haga ʼa Sehova ʼo fakatupu te kele ke nofoʼi, kae neʼe ina toe fakatuʼutuʼu foki ke liliu ko he palatiso ke fakafiafia ai he hahaʼi haohaoa pea mo fiafia. Koia ʼaē neʼe fakakikite ai te Tohi-Tapu ʼe ʼi ai anai “te kele foʼou,” ko he sosiete fakatagata foʼou, “ ʼe tonu ke nofo ai te faitotonu.” (2 Petelo 3:13) Pea ia Fakahā 21:4, ʼe ʼui mai e te Folafola ʼa te ʼAtua, ʼi tona mālama foʼou, “ ʼe ina holoholoʼi anai te ʼu loʼimata fuli pe ʼi ʼonatou mata [ʼo te hahaʼi], pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi.” Ko te ʼu tupuʼaga ʼaia ʼo te fealagia kia Sesu ke talanoa ki te mālama foʼou ʼi te temi ka haʼu ʼi te kele ohage ko he “Palatiso.”—Luka 23:43.
8. He koʼe ʼe feala ke tou ʼiloʼi papau ʼe fakahoko anai e Sehova tana fakatuʼutuʼu?
8 Koteʼuhi ko Sehova ʼe ko te Tupuʼaga ʼo te ʼatulaulau ʼe katoa tona mālohi pea mo tona poto, ʼe mole feala ki he tahi ke ina tāʼofi tana fakatuʼutuʼu. “Ko Sehova ʼo te kautau neʼe ina fakapapau, ʼo ʼui maʼana: ‘ ʼIo, ohage ko taku manatu, ʼe hoko anai ia; pea ohage ko taku tokoni, koʼena te meʼa ka hoko anai.’ ” (Isaia 14:24) Koia, ʼi te temi ʼaē neʼe ʼui ai e te ʼAtua ʼe ina fakaliliu anai te kele ʼaenī ko he palatiso ʼe nofoʼi e te hahaʼi haohaoa, ko tona faka ʼuhiga ʼe hoko anai ia. Neʼe ʼui fēnei e Sesu: “Manuʼia ia nātou ʼaē ʼe aga mālū, heʼe nātou maʼu anai te kele.” (Mateo 5:5; vakaʼi mo Pesalemo 37:29.) ʼE feala ke tou falala ki te fakahoko ʼo te fakapapau ʼaia. ʼI tona fakahagatonu, ʼe feala ke tou fakatafito totatou maʼuli ki te potu ʼaia.
Neʼe Nātou Falala Kia Sehova
9. Koteā ʼaē neʼe fai e Apalahamo ʼe hā ʼaki mai ai tana falala ʼaē kia Sehova?
9 ʼI te hisitolia, tokolahi te hahaʼi ʼaē neʼe nātou manavasiʼi ki te ʼAtua neʼe nātou fakatafito tonatou maʼuli ki te fakatuʼutuʼu ʼa te ʼAtua ʼo ʼuhiga mo te kele. Logope neʼe siʼisiʼi tonatou ʼatamai mālama, neʼe nātou falala ki te ʼAtua pea neʼe nātou faʼufaʼu tonatou maʼuli ki te fai ʼo tona finegalo. Ohage la, neʼe ʼi ai ia Apalahamo ʼaē neʼe maʼuli ʼi te ʼu taʼu e lua afe ʼi muʼa ʼo te haʼu ʼa Sesu ki te kele—ʼi he temi fualoa ʼi muʼa atu ʼo te kamata tohi ʼo te Tohi-Tapu. Neʼe falala ia kia Sehova ʼo ʼuhiga mo te fakahoko ʼo tana ʼu fakapapau. ʼE mahino ia, neʼe ina ako te ʼiloʼi ʼo te Tupuʼaga mai tana kui agatonu ʼaē ko Semi, ʼaē neʼe akoʼi e Noe. ʼI te temi ʼaē neʼe fakatotonu ai e te ʼAtua kia Apalahamo ke mavae mai te kolo ʼo Ule ʼa te kau Kalitia ʼaē koloaʼia ʼo ʼalu ki te fenua ʼo Kanaane ʼaē neʼe mole māhani kiai pea mo faka tuʼutāmaki, neʼe ʼiloʼi e te pateliaka ʼaia neʼe feala hana falala kia Sehova, pea koia neʼe ʼalu ai. (Hepeleo 11:8) Ki muli mai, neʼe ʼui fēnei age e Sehova: “ ʼE ʼau fakaliliu koe ko he puleʼaga lahi.”—Senesi 12:2.
10, 11. He koʼe neʼe tehiʼi pe ke mōlagaʼi e Apalahamo tona foha ʼulu tokotahi, ia Isaake?
10 Koteā te meʼa neʼe hoko kia Apalahamo ʼi te ʼosi tupu ʼa Isaake? Neʼe fakahā e Sehova kia Apalahamo ko tona hākoga ʼe hifo mai anai ia Isaake, ʼo liliu anai ko he puleʼaga lahi. (Senesi 21:12) Kae, neʼe hage ia neʼe mole ʼi ai he logo tahi ʼi te temi ʼaē neʼe ʼui ai e Sehova kia Apalahamo, ohage ko he ʼahiʼahiʼi ʼo tana tui, ke ina sakilifisioʼi tona foha ko Isaake. (Senesi 22:2) Kae, ʼaki te falala katoa kia Sehova, neʼe fai e Apalahamo te ʼu fakatuʼutuʼu moʼo fakahoko te faʼahi ʼaia, hoko ai mo tana toʼo te hele moʼo matehi ʼo tona foha. ʼI te moʼi lakaga ʼaia, neʼe fekauʼi ifo e te ʼAtua te ʼaselo moʼo tāʼofi ia Apalahamo.—Senesi 22:9-14.
11 He koʼe neʼe talagafua feiā ia Apalahamo? ʼE fakahā fēnei e Hepeleo 11:17-19: “ ʼAki te tui, ko Apalahamo, ʼaē neʼe ʼahiʼahiʼi, neʼe ina mōlagaʼi ia Isaake, pea ko te tagata ʼaē neʼe ina tali leleiʼi te ʼu fakapapau neʼe tehiʼi ke ina mōlagaʼi [tona foha] ʼulu tokotahi, ia ia ʼaē neʼe ʼui: ‘Ko te meʼa ʼe fakahigoaʼi anai ko “tou hākoga” ʼe hifo mai anai ia Isaake.’ Kae neʼe manatu ia ko te ʼAtua ʼe feala ke ina toe fakatuʼuake ia ia mai te mate; pea neʼe ina maʼu ia ia mai te potu ʼaia, pea neʼe ko he fakatā ia.” ʼE toe tala feiā pe ia Loma 4:20, 21: “ ʼUhi ko te fakapapau ʼa te ʼAtua, [ko Apalahamo] neʼe mole lotolotolua ʼi he siʼisiʼi ʼo tana tui, . . . neʼe mahino papau ia kia ia ko te meʼa ʼaē neʼe fakapapau [e te ʼAtua] ʼe toe feala pe foki hana fai.”
12. Neʼe feafeaʼi te fakapale ʼa Apalahamo ʼuhi ko tana tui?
12 ʼUhi ko tana tui, neʼe mole gata pe te fakapale ʼo Apalahamo ʼaki te hāofaki ʼo Isaake pea mo te hifo mai ia ia he “puleʼaga lahi,” kae neʼe ʼi ai tona tahi ʼaluʼaga. Neʼe ʼui fēnei e te ʼAtua kia Apalahamo: “ ʼUhi ko tou hāko ʼe tapuakina moʼoni ai anai te ʼatu puleʼaga fuli pe ʼo te kele, koteʼuhi he neʼe ke fakalogo ki toku leʼo.” (Senesi 22:18) ʼO feafeaʼi? Ko te Hau ʼo te Puleʼaga ʼa te ʼAtua ʼi selo ʼe haʼu anai ʼi te hōloga ʼo Apalahamo. ʼE laliki anai e te Puleʼaga ʼaia te mālama agakovi ʼaenī ʼe puleʼi e Satana. (Taniela 2:44; Loma 16:20; Fakahā 19:11-21) Pea, ʼi he kele kua fakamaʼa pea mo puleʼi e te Puleʼaga, ʼe fakatupu anai te Palatiso ʼi te malamanei katoa, pea ko te hahaʼi ʼaē mai te ʼatu “puleʼaga fuli” ʼe nātou fai te finegalo ʼa te ʼAtua ʼe nātou fakafiafia anai ʼi he maʼuli haohaoa pea mo heʼegata. (1 Soane 2:15-17) Pea logope te siʼisiʼi ʼo te ʼatamai mālama ʼaē neʼe maʼu e Apalahamo ʼo ʼuhiga mo te Puleʼaga, neʼe falala ia ki te ʼAtua pea neʼe sio ia ki tona fakatuʼu.—Hepeleo 11:10.
13, 14. He koʼe neʼe falala ia Sopo ki te ʼAtua?
13 Hili kiai te ʼu taʼu ʼe lauʼi teau, neʼe ʼi ai ia Sopo, ʼaē neʼe lagi maʼuli ʼi te vaha ʼo te 17 sēkulō pea mo te 16 sēkulō ʼi muʼa ʼo totatou temi, ʼi te koga meʼa ʼaē ko Alapi ʼo te temi nei. Neʼe maʼuli ai ʼi muʼa ʼo te kamata tohi ʼo te Tohi-Tapu. Ko Sopo “neʼe ko he tagata neʼe haohaoa pea neʼe faitotonu, pea neʼe manavasiʼi ki te ʼAtua pea mo fakamamaʼo mai te kovi.” (Sopo 1:1) ʼI te temi ʼaē neʼe haga ai ia Satana ʼo fakamamahiʼi ia Sopo ʼaki te mahaki fakalialia pea mo logo kovi, ko te tagata agatonu ʼaia “neʼe mole ina fai he palalau agahala e tahi” lolotoga tona ʼahiʼahiʼi. (Sopo 2:10, The New English Bible) Ko Sopo neʼe falala ki te ʼAtua. Logope neʼe mole ina ʼiloʼi te tupuʼaga ʼo tana maʼuli mamahi feiā, neʼe ina fakatafito tona maʼuli ki te ʼAtua pea mo Tana ʼu fakapapau.
14 Neʼe ʼiloʼi e Sopo, tatau aipe mokā mate, neʼe feala ki te ʼAtua hana toe fakatuʼuake ia ia ki te maʼuli ʼi he ʼaho. Neʼe ina fakahā te ʼamanaki ʼaia ʼi tana ʼui ʼaē kia Sehova ʼAtua: “Â! Ka neʼe ke fakanono ʼau ʼi te Seole [te faitoka], . . . ka neʼe ke tuku mai kia te ʼau he tuʼakoi pea ke manatuʼi leva ʼau! Kapau ʼe mate he tagata mālohi, ʼe feala koa hana toe tuʼuake? . . . ʼE ke pāui anai pea ʼe ʼau tali atu anai.” (Sopo 14:13-15) Logope tana mamahi, neʼe fakahā e Sopo tana tui ʼaē ki te pule faʼitaliha ʼa Sehova, ʼi tana ʼui fēnei: “ ʼO aʼu ki toku mate, ʼe mole ʼau toe tuku anai taku agatonu!”—Sopo 27:5.
15. Neʼe fakahā feafeaʼi e Tavite tana falala ʼaē ki te fakatuʼutuʼu ʼa Sehova?
15 Hili te sēkulō e ono kia Sopo pea e lagi ko taʼu e afe ʼi muʼa ʼo te haʼu ʼa Sesu, neʼe fakahā e Tavite tana falala ʼaē ki he mālama foʼou. Neʼe ina ʼui fēnei ʼi te ʼu pesalemo: “Ko nātou ʼaē ʼe falala kia Sehova ʼe nātou maʼu anai te kele. Pea ʼe kei toe siʼisiʼi pe te temi, pea pulihi anai te tagata agakovi . . . Kae ko te kau agavaivai ʼe nātou maʼu anai te kele, pea ʼe nātou fiafia anai ʼi te tokalelei ʼaupito. ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.” ʼUhi ko tana ʼamanaki ʼaē ʼe tuʼu maʼu, neʼe fakaloto mālohiʼi fēnei e Tavite: “Falala kia Sehova . . . Pea tahi ʼaē meʼa, fakafiafia ia Sehova, pea ʼe ina foaki atu anai te ʼu kole ʼo tou loto.”—Pesalemo 37:3, 4, 9-11, 29.
16. Neʼe koteā te ʼamanaki neʼe maʼu e ‘te toe ʼao ʼo te kau fakamoʼoni’?
16 Lolotoga te ʼu sēkulō, neʼe maʼu e te ʼu tagata mo te ʼu fafine te ʼamanaki ʼaia ʼo te maʼuli heʼegata ʼi te kele. ʼIo, neʼe nātou faʼufaʼu ‘te toe ʼao ʼo te kau fakamoʼoni’ ʼaē neʼe nātou fakatafito fakahagatonu tonatou maʼuli ki te ʼu fakapapau ʼa Sehova. Tokolahi ʼo te kau fakamoʼoni ʼa Sehova ʼo te temi ʼāfea neʼe fakatagaʼi pea mo matehi ʼuhi ko tanatou tui, “ke nātou kaku ki he fakatuʼuake ʼe lelei age.” ʼO feafeaʼi? ʼI te mālama foʼou, ʼe fakapale anai nātou e te ʼAtua ki he fakatuʼuake ʼe lelei age pea ʼaki te ʼamanaki ʼaē ʼo te maʼuli heʼegata.—Soane 5:28, 29; Hepeleo 11:35; 12:1.
ʼE Falala Te Kau Fakamoʼoni Faka Kilisitiano Ki Te ʼAtua
17. Neʼe feafeaʼi te falala mālohi ʼa te kau Kilisitiano ʼo te ʼuluaki sēkulō kia Sehova?
17 ʼI te ʼuluaki sēkulō ʼo totatou temi, neʼe fakahā e Sehova ki te kokelekasio faka Kilisitiano, ʼaē neʼe hoki fakatuʼu age pe, ʼihi ʼu fakamatalatala ʼo ʼuhiga mo tona Puleʼaga pea mo tana puleʼi ʼaē te kele. Ohage la ko te faʼahi ʼaenī, ko tona laumālie neʼe ina uga te ʼapositolo ko Soane ke ina tohi te hahaʼi ʼo nātou ʼaē ʼe fakatahi mo Sesu Kilisito ʼi te Puleʼaga ʼi selo ʼaē ko te toko 144 000 anai. Ko nātou ʼaia ko te kau kaugana agatonu ʼa te ʼAtua “neʼe totogi mai te lotolotoiga ʼo te malamanei.” (Fakahā 7:4; 14:1-4) ʼE nātou pule anai ki te kele “ohage he ʼu hau” mo Kilisito ʼi selo. (Fakahā 20:4-6) Ko te kau Kilisitiano ʼaia ʼo te ʼuluaki sēkulō neʼe nātou falala mālohi ki tana fakatuʼutuʼu ʼo ʼuhiga mo te Puleʼaga ʼi selo feiā mo te kele ʼo aʼu ai mo te lava e nātou ke nātou mamate ʼuhi ko tanatou tui. Tokolahi ia nātou neʼe nātou aʼu ki te faʼahi ʼaia.
18. E feafeaʼi te faʼifaʼitaki ʼa te kau Fakamoʼoni ʼa Sehova ʼo te temi nei ki te hahaʼi ʼo te temi ʼāfea ʼaē neʼe tui tahi mo nātou?
18 ʼI te temi nei, teitei ko te toko nima miliona ʼe nātou maʼu te taʼi falala ʼaia ki te ʼAtua ohage pe ko tana fai e te hahaʼi neʼe tui tahi mo nātou neʼe maʼuʼuli ʼi te ʼu sēkulō ʼi muʼa atu. Ko te kau Fakamoʼoni ʼaia ʼo te temi nei ʼe nātou toe fakatafito foki tonatou maʼuli ki te ʼu fakapapau ʼa te ʼAtua. Kua nātou foaki tonatou maʼuli kia te ia pea ʼe nātou maʼu te Tohi-Tapu katoa moʼo fakamālohiʼi ʼo tanatou tui. (2 Timoteo 3:14-17) Ko te kau Fakamoʼoni ʼaia ʼo te temi nei ʼe nātou faʼifaʼitakiʼi te kau tisipulo ʼo Sesu ʼo te ʼuluaki sēkulō ʼaē neʼe nātou tala, ʼe nātou “fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.” (Gāue 5:29) ʼI te sēkulō ʼaenī tokolahi ʼi te kau Fakamoʼoni ʼaia neʼe kovi te fakatagaʼi ʼo nātou. Ko ʼihi neʼe matehi ʼuhi ko tanatou tui. Ko ʼihi neʼe mamate mahahaki, peʼe mamate ʼi he tuʼutāmaki, peʼe mamate matutuʼa. Kae, ohage pe ko te kau fakamoʼoni agatonu ʼo te ʼu temi ʼāfea, ʼe nātou falala aipe ki te ʼAtua koteʼuhi ʼe nātou ʼiloʼi ʼe ina toe fakatuʼu anai nātou ʼi tona mālama foʼou ʼaki te toe fakatuʼuake.—Soane 5:28, 29; Gāue 24:15; Fakahā 20:12, 13.
19, 20. Koteā te meʼa ʼe tou fakamoʼoni kiai ʼo ʼuhiga mo te lea faka polofeta ʼaē ki totatou temi?
19 ʼE mahino lelei ki te kau Fakamoʼoni ʼa Sehova ko te toʼo ʼo nātou mai te ʼu puleʼaga fuli ki he foʼi famili fakatautehina faka malamanei neʼe kua fualoa te fakakikite ʼi te ʼu lea faka polofeta faka Tohi-Tapu. (Isaia 2:2-4; Fakahā 7:4, 9-17) Pea neʼe fakatotonu e Sehova ke nātou kau ki te gāue faka mafola ʼi te malamanei katoa moʼo fakatahiʼi mai ki tona ʼofa pea mo tana puipui ʼihi hahaʼi ʼe nātou agatonu. (Tāʼaga Lea 18:10; Mateo 24:14; Loma 10:13) Ko nātou fuli ʼaia ʼe nātou tuku tanatou falala katoa kia Sehova, ʼo nātou ʼiloʼi kua vave pe anai tana fakakaku ki tona mālama foʼou fakatalakitupua.—Vakaʼi ia 1 Kolonito 15:58; Hepeleo 6:10.
20 ʼE fakahā e te ʼu lea faka polofeta, kua tuʼu nei te mālama ʼa Satana ʼi tona ʼu ʼaho fakamuli kua lau kiai te ʼu taʼu e 80, koteʼuhi talu mai te taʼu maʼuhiga ʼaē ʼo te 1914. Ko te mālama ʼaenī kua fakaōvi ki tona fakaʼosi. (Loma 16:20; 2 Kolonito 4:4; 2 Timoteo 3:1-5) Koia ʼaē ʼe lotomālohi pea mo fakamalotoloto te kau Fakamoʼoni ʼa Sehova, koteʼuhi ʼe nātou mahino kua vave hoko pe te pule katoa ʼa te Puleʼaga ʼa te ʼAtua ki te ʼu meʼa ʼa te tagata. ʼAki tana fakakaku ʼaē te mālama agakovi ʼaenī ki tona gataʼaga pea mo fakaiku ki tona mālama foʼou faitotonu, ʼe molehi anai e te ʼAtua te ʼaluʼaga kovi ʼe maʼu ʼi te kele lolotoga te ʼu sēkulō fualoa.—Tāʼaga Lea 2:21, 22.
21. He koʼe ʼe feala ke tou fakafiafia ʼo mole tou tokagaʼi te ʼu fihifihia ʼo temi nei?
21 Pea, lolotoga he temi heʼegata, ʼe tokaga anai te ʼAtua kia tatou ʼaki hana tuku ifo he ʼu tapuakina ʼe puli ai te ʼu mamahi neʼe tau mo tatou ʼi te temi kua hili. ʼE lahi anai he ʼu tuʼuga meʼa ka hoko kia tatou ʼi te mālama foʼou ʼe puli ai anai te ʼu mamahi ʼāfea ʼi totatou ʼatamai. Ko he meʼa fakaloto mālohi te ʼiloʼi ʼaē ko Sehova ʼe ina ‘folahi anai tona nima pea ina fafaga anai te loto ʼo te meʼa maʼuli fuli pe.’—Pesalemo 145:16; Isaia 65:17, 18.
22. He koʼe ʼe tonu ke tou tuku tatatou falala kia Sehova?
22 ʼI te mālama foʼou, ʼe sio anai te hahaʼi ki te fakahoko ʼo Loma 8:21: “Ko te meʼa maʼuli fuli ʼe faka ʼāteaina foki anai mai te popūla ʼo te ʼu meʼa ʼaē ʼe kovi moʼo maʼu te ʼāteaina faka kolōlia ʼo te ʼu fānau ʼa te ʼAtua.” ʼE nātou sisio anai ki te fakahoko ʼo te faikole ʼaē neʼe akoʼi e Sesu ki tana ʼu tisipulo: “Ke hoko mai tou puleʼaga! Ke fai tou finegalo ʼi te kele, ohage ko selo!” (Mateo 6:10) Koia koutou tuku takotou falala katoa kia Sehova ʼuhi ko tana fakapapau ʼaenī ʼe mole feala ke hala: “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.”—Pesalemo 37:29.
ʼE Feafeaʼi Anai Hakotou Tali?
◻ Koteā te fakatuʼutuʼu ʼa Sehova ʼo ʼuhiga mo te tagata pea mo te kele ʼaenī?
◻ He koʼe koa neʼe fakagafua e te ʼAtua te ʼu ʼaluʼaga kovi ʼi te kele?
◻ Neʼe fakahā feafeaʼi e te hahaʼi agatonu ʼo te temi ʼāfea tanatou falala ʼaē kia Sehova?
◻ He koʼe ʼe falala te kau kaugana ʼa te ʼAtua ʼo te temi nei kia Sehova?
[Paki ʼo te pasina 16]
Neʼe fakatupu e te ʼAtua te tagata ke maʼuli ʼo heʼegata ʼo fakafiafia ʼi he palatiso ʼi te kele
[Paki ʼo te pasina 18]
Ko Apalahamo neʼe ina tuku tana falala ki te fealagia ʼaē ʼa Sehova ʼo ʼuhiga mo te toe fakatuʼuake ʼa te kau mate