“Koutou Fakamālohiʼi Tokotou Loto”
“ ʼE ʼaoga ke koutou faʼa kātaki, ke feala ʼi takotou ʼosi fai te finegalo ʼo te ʼAtua, ke koutou maʼu te fakahoko ʼo te fakapapau.”—Hepeleo 10:36.
1, 2. (a) Koteā ʼaē neʼe hoko ki ʼihi Kilisitiano ʼi te ʼuluaki sēkulō? (b) He koʼe ʼe vaivai gafua te tui?
ʼI TE ʼu tagata fuli ʼaē neʼe nātou tohi te Tohi-Tapu, ʼe ko te ʼapositolo ko Paulo ʼaē neʼe lahi tāfito tana talanoa ki te tui. Pea neʼe tau talanoa foki kia nātou ʼaē neʼe fakavaivai tanatou tui pe neʼe mole kei nātou tui. Ohage la, ko Imeneo pea mo Alikisio, neʼe nā kau ia nātou ʼaē “neʼe malemo tanatou tui.” (1 Timoteo 1:19, 20) Neʼe līaki e Temasi ia Paulo koteʼuhi “neʼe manako ia ki te tuʼu ʼo te ʼu faʼahiga meʼa [ʼo tona temi].” (2 Timoteo 4:10) Ko ʼihi neʼe nātou “fakafisi ki te tui” ʼuhi ko tanatou ʼu aga ʼaē neʼe fakafeagai ki te Lotu Faka Kilisitiano. Neʼe kākāʼi ʼihi e te ʼu manatu loi pea neʼe nātou “hēhē mai te tui.”—1 Timoteo 5:8; 6:20, 21.
2 Koteā te tupuʼaga ʼo te vaivai ʼaia ʼo te tui ʼa te kau Kilisitiano fakanofo ʼaia? Tou manatuʼi, “ko te tui ʼe ko he ʼamanaki moʼoni ki he ʼu meʼa ʼe tou ʼamanaki kiai, ko te fakamoʼoni lelei ʼo te ʼu moʼoni logope la ʼe mole tou sio kiai.” (Hepeleo 11:1) ʼE tou tui ki he ʼu meʼa ʼe mole feala hatatou sio mata kiai. ʼE mole ʼaoga kia tatou te tui mo kapau ʼe feala hatatou sio ki he meʼa. ʼE faigafua age hakita kumi ia te ʼu koloā fakamālama ʼaē ʼe kita sio kiai, ʼi hakita kumi te ʼu koloā fakalaumālie ʼaē ʼe mole kita sio kiai. (Mateo 19:21, 22) ʼE lahi te ʼu meʼa ʼaē ʼe tou sio kiai—ohage ko “te holi ki te kakano pea mo te holi ʼo te ʼu mata”—ʼe matalelei ki totatou kakano agahala pea ʼe feala ke nātou fakavaivai tatatou tui.—1 Soane 2:16.
3. Koteā te faʼahiga tui ʼaē ʼe tonu ke maʼu e te kau Kilisitiano?
3 Kae ʼe ʼui fēnei e Paulo, “ko ʼaē ʼe fakaōvi ki te ʼAtua ʼe tonu ke tui ʼe maʼuli, pea ʼe liliu ko ia ʼaē ʼe ina fakapale ia nātou ʼaē ʼe nātou kumi moʼoni ia te ia.” Neʼe feiā te tui ʼa Moisese. Neʼe “sio maʼu ia ki te totogi ʼo te fakapale” pea neʼe “nofo mālohi ohage neʼe sio kia Ia ʼaē ʼe fakapulipuli.” (Hepeleo 11:6, 24, 26, 27) ʼE ʼaoga ki te kau Kilisitiano te taʼi tui ʼaia. Ohage ko tona fakahā e te ʼuluaki alatike, ko Apalahamo neʼe ko he faʼifaʼitaki lelei ʼi te faʼahi ʼaia.
Ko Te Faʼifaʼitaki ʼo Te Tui ʼa Apalahamo
4. Koteā te ʼu fetogi ʼaē neʼe fai e Apalahamo ʼi tona maʼuli ʼuhi ko tana tui?
4 Neʼe nofo ia Apalahamo ʼi Ule ʼi te temi ʼaē neʼe fakapapauʼi age e te ʼAtua, ʼe liliu anai ko te tāmai ʼo he hākoga ʼe ina foaki anai he ʼu tapuakina maʼa te ʼu hahaʼi ʼo te ʼu puleʼaga fuli pe. (Senesi 12:1-3; Gāue 7:2, 3) ʼUhi ko te fakapapau ʼaia, neʼe fakalogo ia Apalahamo kia Sehova, ʼo ʼuluaki mavae ki Halane pea ki muli age, ki Kanaane. ʼI tana tau kiai, neʼe fakapapauʼi age e Sehova kia ia, ʼe Ina foaki anai te fenua ki te hākoga ʼo Apalahamo. (Senesi 12:7; Nehemia 9:7, 8) Kae ko te teitei katoa ʼo te ʼu meʼa ʼaē neʼe fakapapauʼi age e Sehova, neʼe tonu ke fakahoko ʼi te ʼosi mate ʼa Apalahamo. Ohage la, neʼe mole maʼu e Apalahamo hona kele ʼi Kanaane—gata pe ki te ʼana ʼo Makepela, ʼaē neʼe ina totogi ke fakaʼaogaʼi ko he tānuma. (Senesi 23:1-20) Kae neʼe tui ki te folafola ʼa Sehova. Pea ko te meʼa ʼaē neʼe maʼuhiga tāfito, neʼe ko tana tui ki “te kolo ʼaē ʼe ʼi ai tona ʼu fakatafito moʼoni, ʼaē ko tona tufuga pea mo tona tupuʼaga ʼe ko te ʼAtua.” (Hepeleo 11:10) Ko te taʼi tui ʼaia neʼe ko he tokoni kia ia lolotoga tona maʼuli katoa.
5, 6. Neʼe ʼahiʼahiʼi feafeaʼi te tui ʼa Apalahamo ʼo ʼuhiga mo te fakapapau ʼa Sehova?
5 ʼE hā tāfito te tui ʼaia ʼi te fakapapau age ʼaē ʼe liliu anai te hākoga ʼo Apalahamo ko he puleʼaga lahi. Ke hoko te faʼahi ʼaia, neʼe maʼua ke ʼi ai he foha ʼo Apalahamo, pea neʼe fualoa tana talitali ke hoko te tapuakina ʼaia. ʼE mole tou ʼiloʼi pe neʼe taʼu fia ʼi tana ʼuluaki logo ki te fakapapau ʼa te ʼAtua, kae ʼi te temi ʼaē neʼe ʼalu ai ki Halane, neʼe mole heʼeki foaki age e Sehova hana tamasiʼi. (Senesi 11:30) Neʼe nofo fualoa ʼi Halane, ʼo feala ai ke ina ‘tānaki he ʼu koloā pea mo he ʼu nefesi,’ pea ʼi tana ʼalu leva ki Kanaane, neʼe kua taʼu 75 pea ko Sala neʼe kua taʼu 65. Kae neʼe mole heʼeki maʼu hanā tama. (Senesi 12:4, 5) ʼI te kua taʼu 70 tupu ʼa Sala, neʼe ina manatu ai ʼe kua finematuʼa fau pea ʼe mole feala anai hana maʼu fānau pea mo Apalahamo. Koia, ʼo mulimuli ki te agaʼi fenua ʼo te temi ʼaia, neʼe ina foaki kia Apalahamo tana fafine kaugana ko Akale, ʼo ina maʼu ai tana tama. Kae neʼe mole ko te tamasiʼi ʼaia ʼaē neʼe fakapapauʼi age kia nāua. Ki muli age, neʼe kapu ia Akale pea mo tona tamasiʼi ko Isimaele. Kae ʼi te hūfaki ʼo nāua e Apalahamo, neʼe fakapapau ai e Sehova ʼe ina tapuakiʼi anai ia Isimaele.—Senesi 16:1-4, 10; 17:15, 16, 18-20; 21:8-21.
6 ʼI te temi ʼaē neʼe fakakatofa ai e te ʼAtua—kae kua fualoa ʼaupito ki muʼa atu tanā ʼuluaki logo ki te fakapapau ʼa te ʼAtua—neʼe maʼu e Apalahamo ʼaē neʼe kua taʼu 100 pea mo Sala ʼaē neʼe kua taʼu 90 tanā kiʼi tamasiʼi tagata, ko Isaake. ʼI meʼa fakaofoofo leva kia nāua! Ki te taumatuʼa matutuʼa ʼaia, neʼe hage kua fakatuʼuake tonā ʼu sino “ ʼaē neʼe mate” he neʼe nā maʼu tanā kiʼi toe. (Loma 4:19-21) Neʼe loaloaga tanā talitali, kae ʼi te fakahoko ʼo te fakapapau, neʼe nā maʼu tona ʼu fua lelei.
7. Koteā te pikipikiga ʼo te tui pea mo te faʼa kātaki?
7 Ko te faʼifaʼitaki ʼa Apalahamo ʼe ina fakamanatuʼi mai kia tatou, ko te tui ʼe mole ko he meʼa ʼe tonu ke tou maʼuliʼi faka temi pe. Neʼe fakapipiki e Paulo te tui ki te faʼa kātaki, pea neʼe ina tohi fēnei: “ ʼE ʼaoga ke koutou faʼa kātaki, ke feala ʼi takotou ʼosi fai te finegalo ʼo te ʼAtua, ke koutou maʼu te fakahoko ʼo te fakapapau. . . . ʼE mole tou kau kia nātou ʼaē ʼe holomuli ki te fakaʼauha, kae kia nātou ʼaē ʼe tui ki te fakamaʼuli ʼo te nefesi.” (Hepeleo 10:36-39) Ko te tokolahi neʼe fualoa tanatou talitali ke hoko te ʼu meʼa ʼaē neʼe fakapapauʼi age kia nātou. Ko ʼihi neʼe nātou talitali lolotoga tonatou maʼuli katoa. Ko tanatou tui mālohi neʼe lagolago kia nātou. Pea ohage ko Apalahamo, ʼe nātou maʼu moʼoni anai tonatou fakapale ʼi te temi ʼaē kua fakakatofa kiai e Sehova.—Hapakuke 2:3.
Tou Fakalogo Ki Te ʼAtua
8. ʼE tou fakalogo feafeaʼi ki te ʼAtua ia ʼaho nei, pea he koʼe ʼe fakamālohiʼi ai tatatou tui?
8 ʼE ʼi ai te ʼu faʼahi e fā neʼe nātou fakamālohiʼi te tui ʼa Apalahamo, pea ko te ʼu faʼahi ʼaia ʼe toe feala foki ke tokoni kia tatou. ʼUluaki, neʼe ina fakahā tana ‘tui ʼaē ʼe maʼuli te ʼAtua’ he neʼe fakalogo ʼi te temi ʼaē neʼe palalau ai Sehova. Koia, neʼe kehe ia mo te kau Sutea ʼo te temi ʼo Selemia, he neʼe nātou tui kia Sehova kae mole nātou tui ki tana ʼu folafola. (Selemia 44:15-19) Ia ʼaho nei, ʼe palalau mai ia Sehova kia tatou ʼaki te Tohi-Tapu, tana Folafola ʼaē neʼe tohi ʼaki te laumālie, pea neʼe ʼui e Petelo ʼe hage ia “ko he mālama ʼe mū ʼi he faʼahi fakapōʼuli . . . ʼi ʼokotou loto.” (2 Petelo 1:19) Ka tou lau fakalelei te Tohi-Tapu, pea ʼe “fafaga tatou ʼaki te ʼu folafola ʼo te tui.” (1 Timoteo 4:6; Loma 10:17) Tahi ʼaē meʼa, ʼi te ʼu ʼaho fakaʼosi ʼaenī, “ko te tagata kaugana agatonu mo poto” ʼe ina tufa te “meʼa kai ʼi tona temi totonu,” pea ʼe ko he takitaki ʼaia ke tou maʼuliʼi te ʼu pelesepeto faka Tohi-Tapu pea mo tou mahino ki te ʼu lea faka polofeta ʼa te Tohi-Tapu. (Mateo 24:45-47) ʼE maʼuhiga ʼaupito tatatou fakalogo kia Sehova ʼaki te ʼu faʼahi ʼaia, ke mālohi ai tatatou tui.
9. Koteā te ʼu meʼa ʼaē ka hoko mo kapau ʼe tou tui moʼoni ki te ʼamanaki faka Kilisitiano?
9 Ko te tui ʼa Apalahamo, neʼe ʼi ai tona pikipikiga mo tana ʼamanaki. “Neʼe tui ʼo fakatafito ki tana ʼamanaki, ke liliu ia ko te tāmai ʼo he ʼu puleʼaga lahi.” (Loma 4:18) ʼE ko te lua faʼahi ʼaia ʼaē ʼe feala ke tokoni mai kia tatou. ʼE mole tonu ke galo kia tatou, ko Sehova ʼe “ko ia ʼaē ʼe ina fakapale ia nātou ʼaē ʼe nātou kumi moʼoni ia te ia.” Neʼe ʼui fēnei e te ʼapositolo ko Paulo: “ ʼE tou gāue kinakina pea mo faiga mālohi, he neʼe tou tuku tatatou ʼamanaki ki he ʼAtua maʼuli.” (1 Timoteo 4:10) Kapau ʼe tou tui moʼoni ki te ʼamanaki faka Kilisitiano ʼaē ʼe tou maʼu, pea ʼe hā anai tatatou tui ʼi totatou maʼuli katoa, ohage ko te meʼa ʼaē neʼe fai e Apalahamo.
Tou Palalau Mo Te ʼAtua
10. Koteā te faʼahiga faikole ʼaē ʼe feala ke mālohi ai tatatou tui?
10 Neʼe palalau ia Apalahamo mo te ʼAtua, pea neʼe ko te tolu faʼahi ʼaia ʼaē neʼe mālohi ai tana tui. Ia ʼaho nei, ʼe feala mo tatou ke tou palalau mo Sehova, ʼo tou fakaʼaogaʼi te fealagia ʼaē ke tou faikole ʼo momoli ʼaki ia Sesu Kilisito. (Soane 14:6; Efesi 6:18) ʼI tana ʼosi fakamatala te lea fakatātā neʼe hā ai te maʼuhiga ʼo te faikole tuʼumaʼu, neʼe fai ai e Sesu te fehuʼi ʼaenī: “Ka haʼu anai te Foha ʼo te tagata, ʼe ina maʼu moʼoni anai koa te tui ʼi te kele?” (Luka 18:8) Ko he faikole ʼe ina fakamālohiʼi takita tui, ʼe mole ko he meʼa ʼe mole kita fakakaukauʼi, peʼe ko he meʼa ʼe kita lau liuliuga pe, kae ʼe ʼi ai tona ʼuhiga moʼoni. Ohage la, ʼe maʼuhiga ʼaupito ke tou faikole ʼaki totatou loto katoa mokā tonu ke tou fai he ʼu tonu maʼuhiga peʼe tou lotohoha ʼaupito.—Luka 6:12, 13; 22:41-44.
11. (a) Neʼe fakamālohiʼi feafeaʼi ia Apalahamo ʼi tana avahi tona loto ki te ʼAtua? (b) Koteā ʼaē ʼe feala ke tou ako ʼi te ʼu meʼa ʼaē neʼe hoko kia Apalahamo?
11 ʼI te fakahaʼuhaʼu ʼa Apalahamo ʼo matuʼa, pea ʼi te mole heʼeki foaki age kia ia e Sehova te hāko ʼaē neʼe ina fakapapauʼi age, neʼe palalau ia ki te ʼAtua ʼo ʼuhiga mo te meʼa ʼaē neʼe hoha kiai. Neʼe toe fai age e Sehova tana fakapapau. Neʼe koteā tona fua? “Neʼe tui [ia Apalahamo] kia Sehova; pea neʼe lau te faʼahi ʼaia kia ia ko he faitotonu.” ʼOsi ʼaia, pea neʼe fai e Sehova he fakaʼiloga moʼo fakamoʼoni ki te meʼa ʼaē neʼe ina fakapapau ki ai. (Senesi 15:1-18) Kapau ʼe tou avahi totatou loto kia Sehova ʼi te faikole, mo tou tali te ʼu fakapapau ʼaē ʼe fai mai e Sehova ʼi tana Folafola te Tohi-Tapu, mo tou fakalogo kia te ia ʼaki te tui, pea ʼe toe fakamālohiʼi foki anai e Sehova tatatou tui.—Mateo 21:22; Suta 20, 21.
12, 13. (a) Neʼe tapuakina feafeaʼi ia Apalahamo ʼi tana mulimuli ki te takitaki ʼa Sehova? (b) Koteā te ʼu fakamatala ʼaē ʼe feala ke mālohi ai tatatou tui?
12 Ko te fā faʼahi ʼaē neʼe mālohi ai te tui ʼa Apalahamo, neʼe ko te lagolago ʼa Sehova kia ia ʼi te ʼu temi ʼaē neʼe mulimuli ai ki te takitaki ʼa te ʼAtua. ʼI te ʼalu ʼa Apalahamo moʼo hāofaki ia Lote mai te ʼu hau ʼaē neʼe nātou ʼohofiʼi ia ia, neʼe foaki age kia ia e Sehova te mālo. (Senesi 14:16, 20) ʼI te nofo faka temi ʼa Apalahamo ohage ko he matāpule ʼi te fenua ʼaē neʼe ʼamanaki maʼu e tona hākoga, neʼe tapuakina ia ia e Sehova ʼi te faʼahi fakasino. (Vakaʼi ia Senesi 14:21-23.) Neʼe takitaki e Sehova tana tagata kaugana ke ina maʼu he ʼohoana lelei maʼa Isaake. (Senesi 24:10-27) Ei, “neʼe tapuakina e Sehova ia Apalahamo ia meʼa fuli.” (Senesi 24:1) ʼI te mālohi ʼo tana tui pea mo te lelei ʼo tana felogoi mo Sehova ʼAtua, neʼe fakahigoaʼi ia ia e Sehova ko “[tona] kaumeʼa.”—Isaia 41:8; Sake 2:23.
13 ʼE feala koa ke tou maʼu he tui mālohi feiā ia ʼaho nei? Ei. Kapau ʼe tou ʼahiʼahiʼi ia Sehova ohage ko Apalahamo, ʼo tou fakalogo ki tana ʼu fakatotonu, pea ʼe ina tapuakina anai tatou, pea ʼe toe ʼāsili mālohi anai tatatou tui. Ohage la, kapau ʼe tou fakasiosio fakanounou te Tānaki Gāue ʼo te Taʼu 1998, ʼe hā ai ko te tokolahi neʼe nātou maʼu te ʼu tapuakina taulekaleka he neʼe nātou fakalogo ki te fakatotonu ʼaē ke nātou faka mafola te logo lelei.—Maleko 13:10.
Ko He ʼu Logo ʼe Hā Ai Te Tui Ia ʼAho Nei
14. Neʼe tapuakina feafeaʼi e Sehova te tufa ʼo Te ʼu Logo ʼo Te Puleʼaga N° 35?
14 ʼI ʼOketopeli ʼo te taʼu 1997, neʼe fua lelei ʼaupito te gāue ʼaē neʼe fai moʼo tufa ʼo Te ʼu Logo ʼo Te Puleʼaga N° 35 ʼi te malamanei katoa, he neʼe fakamalotoloto pea mo lotomālohi te toko lauʼi miliona kau Fakamoʼoni ʼa Sehova. Ohage la ko te meʼa ʼaē neʼe hoko ʼi Ghana. Ko te teitei 2 500 000 kiʼi pepa lotu feiā neʼe tufa ia lea e fā, pea ko te meʼa ʼaē neʼe hoko, ko teitei hahaʼi e 2 000 neʼe nātou kole ke fai hanatou ako Tohi-Tapu. ʼI Chypre, ko te ʼu Fakamoʼoni e toko lua neʼe nā lolotoga tufa Te ʼu Logo ʼo Te Puleʼaga, pea neʼe nā fakatokagaʼi te patele neʼe ina muliʼi nāua. Hili kiai he kiʼi temi, pea nā foaki age kia ia hana kiʼi pepa lotu ʼo Te ʼu Logo ʼo Te Puleʼaga. Neʼe kua ʼi ai tana kiʼi pepa pea neʼe ina ʼui fēnei: “Neʼe ʼau ōfo ʼaupito ʼi te logo ʼaē ʼe tuʼu ai, pea neʼe ʼau fia fakamālo ki te hahaʼi ʼaē neʼe nātou tohi te kiʼi pepa ʼaia.” ʼI Danemark, neʼe tufa te ʼu pepa lotu ʼo Te ʼu Logo ʼo Te Puleʼaga e 1 500 000, pea neʼe ʼi ai tona ʼu fua lelei. Ko te fafine ʼe tau felogoi mo te hahaʼi ʼi tana gāue, neʼe ina ʼui fēnei: “ ʼE maʼu ʼi te kiʼi pepa ʼaia he logo maʼa te hahaʼi fuli. ʼE mahino gafua, pea ʼe ina uga tatou ke tou fia ʼiloʼi he tahi ʼu meʼa. ʼE ko te meʼa ʼaia ʼaē neʼe ʼaoga kia tatou fuli!”
15. Koteā te ʼu fakamatala ʼaē ʼe hā ai, neʼe tapuakina e Sehova te ʼu faiga ʼaē ke faka mafola ki te hahaʼi ʼi te ʼu potu fuli pe?
15 ʼI te taʼu 1998, neʼe faiga e te kau Fakamoʼoni ʼa Sehova ke nātou faka mafola ki te hahaʼi, ʼo mole fai pe ʼi te ʼu ʼapi, kae neʼe nātou fai ʼi te ʼu potu fuli pe. ʼI Côte dʼIvoire, ko te taumatuʼa misionea neʼe nā ʼaʼahi ia vaka e 322 neʼe tau ʼi te ʼuafu. Neʼe nā tufa te ʼu tohi e 247, mo te ʼu nusipepa e 2 284, mo te ʼu kaupepa e 500, pea mo te ʼu pepa lotu ʼe lauʼi teau, pea mo he ʼu foʼi fime viteo ki te hahaʼi folau vaka ke nātou sioʼi ʼi tanatou lolotoga folau. ʼI Kanata, neʼe ʼalu te Fakamoʼoni ʼa Sehova ki te fale gaohi motokā. Neʼe fia logo te patolo, pea neʼe nofo ai te tēhina lolotoga hola e fā vaelua, logope la neʼe feala tana fai faka mafola kia ia lolotoga hola pe e tahi ʼuhi ko te maʼumaʼua ʼo te patolo. Moʼo fakaʼosi, neʼe nā fakatuʼutuʼu ke fai tana ako ʼi te hola hogofulu afiafi. Kae ʼi ʼihi temi, neʼe hoki kamata te ako ʼi te māʼupō pea neʼe ʼosi ʼi te hola lua uhu. Neʼe faigataʼa te fai ʼo te ako ʼi he ʼu lakaga feiā, kae neʼe maʼu tona ʼu fua lelei. Neʼe fakatotonu e te tagata ʼaia ke māpunu tona fale gaohi motokā ʼi te ʼAhotapu ke feala hana kau ki te ʼu fono. Mole tuai, pea ko ia mo tona famili neʼe nātou tuputupu lelei ʼi te faʼahi fakalaumālie.
16. Koteā te ʼu fakamatala ʼaē ʼe hā ai, ko te kaupepa Fakamaʼua pea mo te tohi Te ’Atamai Mālama ʼe lelei ʼaupito moʼo faka mafola ki te hahaʼi pea mo akoʼi ʼo nātou?
16 Ko te kaupepa Koteā ʼAē ʼe Fakamaʼua Mai e Te ʼAtua Kia Tatou? pea mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata ʼe kei maʼuhiga ʼaupito ʼi te gāue faka mafola pea mo te fai ʼo te ʼu ako. ʼI Italia, ko te taupoʼou neʼe talitali ki te ka, pea neʼe ina toʼo te kiʼi pepa lotu ʼo Te ʼu Logo ʼo Te Puleʼaga. ʼI te ʼaho ake, neʼe fai palalau mo te tahi Fakamoʼoni ʼa Sehova pea neʼe ina toʼo tana kaupepa Fakamaʼua. ʼOsi ʼaia, pea neʼe fai tana ako Tohi-Tapu ʼi te ʼaho fuli ʼi te taliʼaga ka lolotoga minuta e 10 peʼe 15. Hili kiai te māhina katoa mo te vaelua, pea neʼe ina fakatotonu ke mavae ʼi te fale taupoʼou, ke liliu kiō ia ʼi Kuatemala ʼo hoko atu ai tana ako. ʼI Malawi, ko te fafine ʼe higoa ko Lobina, neʼe ʼalu tuʼumaʼu ʼo misa, pea neʼe mole fiafia ʼi te kamata ako ʼo tana ʼu taʼahine te Tohi-Tapu mo te kau Fakamoʼoni ʼa Sehova. Kae mokā feala, pea neʼe faka mafola e te ʼu taʼahine ʼaia te ʼu moʼoni faka Tohi-Tapu ki tanatou faʼe. ʼI Sūnio ʼo te taʼu 1997, neʼe sio Lobina ki te tohi Te ʼAtamai Mālama pea neʼe ina tokagaʼi te ʼu kupu “Te ʼAtamai Mālama ʼAē ʼe Ina Taki.” ʼI Sūlio, neʼe ina tali ke fai hana ako faka Tohi-Tapu. ʼI ʼAukusito, neʼe kau ki te fakatahi faka tisitilike pea neʼe fakalogo fakalelei ki te polokalama katoa. ʼI te fakaʼosi ʼo te māhina ʼaia, neʼe mavae ʼi tona ʼēkelesia pea neʼe liliu ko te kaugā fagona. Neʼe papitema ʼi Novepeli ʼo te taʼu 1997.
17, 18. Neʼe tokoni feafeaʼi te ʼu foʼi fime viteo ʼa te Sosiete ke “sio” te hahaʼi ki he ʼu meʼa fakalaumālie?
17 Ko te ʼu foʼi fime ʼa te Sosiete neʼe ko he tokoni ki te tokolahi ke nātou “siosio” ki he ʼu meʼa fakalaumālie. ʼI Molisi, neʼe mavae te tagata ʼi tona ʼēkelesia he neʼe mole maʼu ai te logo tahi. Ko te tēhina misionea neʼe ina fakahā age kia ia te logo tahi ʼa te kau Fakamoʼoni ʼa Sehova, ʼo ina fakaʼaogaʼi te foʼi fime viteo Unis grâce à lʼenseignement divin. Neʼe ōfo ai te tagata, pea neʼe ina ʼui fēnei: “Ko koutou kau Fakamoʼoni ʼa Sehova, kua koutou nonofo koutou ʼi te palatiso!” Neʼe ina tali ke fai hana ako faka Tohi-Tapu. Ko te tuagaʼane ʼi Saponia neʼe ina fakahā ki tona ʼohoana ʼaē neʼe mole tui te foʼi fime viteo Les Témoins de Jéhovah — Un nom, une organisation, pea neʼe tupu ai tana fia ako te Tohi-Tapu. ʼI tana ʼosi sioʼi te foʼi fime viteo Unis grâce à lʼenseignement divin, neʼe fia liliu ko te Fakamoʼoni ʼa Sehova. Ko te ʼu fime viteo ʼaē ʼe koga tolu La Bible : un livre historique et prophétique, neʼe ko he tokoni kia ia ke ina maʼuliʼi te ʼu pelesepeto faka Tohi-Tapu. Moʼo fakaʼosi, ʼaki te foʼi fime viteo La fermeté des Témoins de Jéhovah face à la persécution nazie, neʼe mahino ai kia ia ʼe fakamālohiʼi e Sehova Tana hahaʼi ke feala hanatou kātakiʼi te ʼu fakafeagai ʼa Satana. Neʼe papitema te tagata ʼaia ʼi ʼOketopeli 1997.
18 ʼE ko he ʼu faʼifaʼitaki pe ʼaia ʼo te ʼu tuʼuga fakamatala fakafiafia ʼaē neʼe hoko ʼi te taʼu ʼaenī kua ʼosi. ʼE hā mai ai, ʼe maʼuli te tui ʼa te kau Fakamoʼoni ʼa Sehova, pea ʼe fakamālohiʼi e Sehova te tui ʼaia ʼo ina tapuakina tanatou gāue.—Sake 2:17.
Tou Maʼuliʼi Te Tui Ia ʼAho Nei
19. (a) He koʼe e lelei age totatou ʼaluʼaga ʼi te ʼaluʼaga ʼo Apalahamo? (b) Neʼe tokofia ia nātou ʼaē neʼe nātou maʼopoʼopo ʼi te taʼu ʼaenī kua hili moʼo fakamanatuʼi te mate faka sakilifisio ʼa Sesu? (c) Ko te ʼu fenua fea ʼaē neʼe makehe ai te kaugamālie ʼa te hahaʼi ʼaē neʼe kau ʼi te Fakamanatu? (Vakaʼi te lisi ʼi te pasina 12 ki te 15.)
19 Ia ʼaho nei, ʼe lahi te ʼu faʼahi ʼe lelei age ai totatou ʼaluʼaga ʼi te ʼaluʼaga ʼaē neʼe nofo ai ia Apalahamo. Kua tou ʼiloʼi neʼe fakahoko e Sehova te ʼu fakapapau fuli ʼaē neʼe ina fai kia Apalahamo. Neʼe maʼu moʼoni e te hākoga ʼo Apalahamo te fenua ʼo Kanaane, pea neʼe nātou liliu moʼoni ko he puleʼaga lahi. (1 Hau 4:20; Hepeleo 11:12) Tahi ʼaē meʼa, hili taʼu e 1 971 ʼi te ʼosi mavae ʼa Apalahamo mai Halane, ko he tahi ʼi tona hākoga, ia Sesu, neʼe papitemaʼi ʼi te vai e Soane Patita pea neʼe papitemaʼi ia ia ʼi te laumālie maʼoniʼoni e Sehova totonu, ke liliu ko te Mesia, ko te Hāko moʼoni ʼaia ʼa Apalahamo ʼi hona ʼaluʼaga fakalaumālie. (Mateo 3:16, 17; Kalate 3:16) ʼI te ʼaho 14 ʼo Nisani ʼo te taʼu 33 ʼo totatou temi, neʼe foaki e Sesu tona maʼuli ko he totogi maʼa nātou fuli ʼaē ka tui anai kia ia. (Mateo 20:28; Soane 3:16) ʼAki ia ia, neʼe kua feala ke maʼu e te toko lauʼi miliona hahaʼi he ʼu tapuakina. ʼI te taʼu ʼaenī kua hili, ko te toko 13 896 312 neʼe maʼopoʼopo ʼi te ʼaho 14 ʼo Nisani, ke nātou fakamanatuʼi te meʼa ʼofa taulekaleka ʼaia. Neʼe ko he fakavikiviki ʼaia kia Sehova, ia Ia ʼaē ʼe Ina Fakahoko tana ʼu fakapapau!
20, 21. ʼI te ʼuluaki sēkulō, neʼe tapuakina feafeaʼi te hahaʼi ʼo te ʼu puleʼaga fuli ʼaki te Hāko ʼo Apalahamo, pea ʼe tapuakina feafeaʼi nātou ia ʼaho nei?
20 ʼI te ʼuluaki sēkulō, ko te tokolahi mai te ʼu puleʼaga kehekehe—ʼo kamata ʼaki te kau Iselaelite moʼoni—neʼe nātou tui ki te Hāko ʼaia ʼo Apalahamo, pea neʼe nātou liliu ko he ʼu foha fakanofo ʼo te ʼAtua, ʼo nātou kau ki te “Iselaele [foʼou pea mo fakalaumālie] ʼa te ʼAtua.” (Kalate 3:26-29; 6:16; Gāue 3:25, 26) Neʼe nātou ʼamanaki mālohi ki te maʼuli fakalaumālie pea mo tuputupua ʼaē ʼi selo, ʼi tonatou ʼuhiga kaugā pule ʼi te Puleʼaga ʼo te ʼAtua. Neʼe tonu ke maʼu te tapuakina ʼaia e te kiʼi toko 144 000 pe, pea kua tokosiʼi pe ia nātou ʼaē ʼe kei toe. (Fakahā 5:9, 10; 7:4) ʼI te taʼu ʼaenī kua hili, ko te toko 8 756 neʼe nātou fakahā tanatou tui ʼaē ʼe nātou kau ia nātou ʼaia, ʼo nātou kai ki te pane pea mo ʼinu te vino ʼi te lolotoga ʼo te Fakamanatu.
21 Ko te teitei katoa ʼo te kau Fakamoʼoni ʼa Sehova ia ʼaho nei, ʼe nātou kau ʼi te “toe hahaʼi tokolahi” ʼaē neʼe fakakikite ia Fakahā 7:9-17. Mai tona ʼuhiga ʼaē ʼe tapuakina nātou e Sesu, koia ʼe nātou ʼamanaki ki te maʼuli heʼegata ʼi te palatiso ʼi te kele. (Fakahā 21:3-5) Ko te toko 5 888 650 ʼaē neʼe nātou kau ki te gāue faka mafola ʼo te taʼu 1998, ʼe nātou fakamoʼoni ki te kaugamālie ʼo te toe hahaʼi tokolahi ʼaia. Neʼe ko he meʼa fakafiafia hakita sio ki te ʼu fenua ko Lusia pea mo Ukraine ʼaē kua fakalaka ai te kau fai faka mafola ʼi te toko 100 000. Neʼe toe fakaofoofo foki mo te tānaki gāue ʼo Amelika ʼaē neʼe maʼu ai te toko 1 040 283 kau fai faka mafola ʼi ʼAukusito! Ko fenua ʼaia pe e tolu ʼi te ʼu fenua e 19 ʼaē neʼe maʼu ai te toko 100 000 tupu kau fai faka mafola ʼi te taʼu ʼaenī kua hili.
Kua Vave Fakahoko Tatatou ʼAmanaki
22, 23. (a) He koʼe ʼe tonu ke tou fakamālohiʼi totatou loto ia ʼaho nei? (b) ʼE lava feafeaʼi hatatou faʼifaʼitaki kia Apalahamo, ka mole ki te hahaʼi heʼe tui ʼaē neʼe talanoa ki ai ia Paulo?
22 Ko nātou ʼaē neʼe nātou kau ʼi te ʼAho Fakamanatu, neʼe fakamanatuʼi age kia nātou kua lahi te ʼu fakapapau ʼa Sehova ʼaē kua hoko. ʼI te taʼu 1914, neʼe fakanofo Hau Sesu ʼi te Puleʼaga ʼo selo ʼa te ʼAtua, ʼo kamata ai tana ʼi henī ʼi te mālohi ʼo tana Puleʼaga. (Mateo 24:3; Fakahā 11:15) Ei, kua nofo hau te Hāko ʼo Apalahamo ʼi selo! Neʼe ʼui fēnei e Sake ki te kau Kilisitiano ʼo tona temi: “Koutou faʼa kātaki; koutou fakamālohiʼi ʼokotou loto, he kua ōvi mai te ʼi henī ʼo te ʼAliki.” (Sake 5:8) Kua hoko moʼoni nei te ʼi henī ʼa Sesu! ʼE ko he ʼu tupuʼaga lelei ʼaia ke tou fakamālohiʼi totatou loto!
23 ʼOfa pe ke fakafoʼou tuʼumaʼu tatatou falala ki te ʼu fakapapau ʼa te ʼAtua ʼaki tatatou ako tuʼumaʼu te Tohi-Tapu pea mo tatatou faikole fakamalotoloto. ʼOfa pe ke tou maʼu tuʼumaʼu te ʼu tapuakina ʼa Sehova ʼi tatatou fakalogo ki tana Folafola. Kapau ʼe tou fai te faʼahi ʼaia, pea ʼe tou hage anai ko Apalahamo, ka mole tou hage ko nātou ʼaē neʼe talanoa ki ai ia Paulo ʼaē neʼe vaivai pea mo mate tanatou tui. ʼE mole he meʼa ʼe feala ke ina fakamamaʼo tatou mai tatatou tui maʼoniʼoni. (Suta 20) ʼE tou faikole, ke hoko moʼoni te faʼahi ʼaia ki te ʼu kaugana fuli ʼa Sehova lolotoga te taʼu 1999 ʼaenī, pea mo talu ai.
ʼE Koutou ʼIloʼi Koa?
◻ ʼE feala feafeaʼi hatatou fakalogo ki te ʼAtua ia ʼaho nei?
◻ Koteā te ʼu fua lelei ʼaē ʼe tou maʼu mokā tou faikole fakamalotoloto ki te ʼAtua?
◻ Kapau ʼe tou fakalogo kia Sehova ʼo mulimuli ki tana takitaki, pea ʼe fakamālohiʼi feafeaʼi anai tatatou tui?
◻ Koteā te ʼu puani ʼaē neʼe koutou leleiʼia tāfito ʼi te Tānaki Gāue ʼo te taʼu ʼaenī kua hili (ʼi te pasina 12 ki te 15)?
[Tānaki ʼo te taʼu gāue, pasina 12-15]
1999 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA
(Vakaʼi te nusipepa)
[Paki ʼo te pasina 16]
Kapau ʼe tou fakalogo ki te Folafola ʼa Sehova, pea ʼe toe mālohi anai tatatou falala ki tana ʼu fakapapau
[Paki ʼo te pasina 18]
ʼE fakamālohiʼi tatatou tui mokā tou kau ki te minisitelio