ʼE Maʼuhiga Age Ia ʼi Te ʼu Feo

ʼE ōfo te hahaʼi mamata ʼaē ʼe nātou fakaʼāʼāsili age, ʼi te ʼu fakahāhā ohage ko te meʼa ʼaenī ʼe maʼu ʼi te ʼu tai ʼo te Tai Kula.

Ko te ʼu ika ʼe mole feala hona lau e lanu kehekehe pea mo te faʼahiga meʼa kehekehe ʼe ōfo ai te hahaʼi uku ʼo te ʼu tai tāsilo. Kae koutou fakatokagaʼi ʼi te ʼu tafa ʼo te ika e lanu kehekehe ʼaē ʼe tou sio kiai, ʼe ʼi ai te fakahāhā ʼo ʼihi meʼa matamatalelei ʼo te lalo tai, ʼo kau ai te ʼu feo e lanu gigila.

ʼE maʼu te ʼu feo matamatalelei ʼaki te ʼu agaaga kehekehe pea mo te lanu kehekehe. Ohage pe ko te meʼa ʼaē ʼe feala ke koutou fakakaukauʼi, māʼia mo te ʼu temi ʼāfea ko te ʼu kogaʼi feo matamatalelei neʼe maʼuhiga ʼaupito tona totogi. Ko te hahaʼi tufuga neʼe nātou faʼu ʼaki te ʼu feo he ʼu meʼa fakateuteu matalelei, pea ko te hahaʼi faitohi ʼo te Tohi-Tapu neʼe nātou fakatahiʼi te ʼu feo mo te aulo, pea mo te siliva, pea mo te ʼu maka gigila. (Tāʼaga Lea 3:14, 15; Esekiele 27:16) Kae ʼe tokoni mai kia tatou te ʼu hahaʼi faitohi ʼaia ke tou sio mamaʼo atu ʼi te matamatalelei pea mo te ʼuhiga tonu ʼo te ʼu feo.

Neʼe nātou fakahāhā ʼe ʼi ai te ʼu meʼa ʼe maʼuhiga age ia pea ʼe tonu ke tou tokaga lelei kiai ohage ko he koloā. Ko he fafine ʼohoana ʼe lelei pea mo mafai ʼe kau ʼi te faʼahiga ʼaia, koteʼuhi ʼe tou lau fēnei: “Ko he fafine ʼe mafai ko ai ʼaē ʼe feala ke ina maʼu? Ko tona maʼuhiga ʼe laka maumau ia ʼi ʼaē ʼo te ʼu feo.” (Tāʼaga Lea 31:10) Ko koutou ko he tagata ʼohoana? Koutou toe sioʼi te ʼu feo matalelei ʼaupito ʼaenī, pea mo koutou fakakaukauʼi age ki te faʼahiga fakaʼapaʼapa ʼe koutou fakahā ki tokotou ʼohoana ohage ko te faʼahi ʼe tau mo ia.

Peʼe ko tatou ko ni ʼu tagata peʼe ko ni ʼu fafine, peʼe ʼohoana peʼe selipatea, ko he fakasiosio ʼo he ʼu feo matamatalelei ʼe tonu anai ke tokoni kia tatou ke tou mahino ki te maʼuhiga age ʼo te fakapotopoto, mo te sio mamaʼo, pea mo te ʼatamai mālama faka lotu. ʼE ʼui fēnei e te Folafola ʼa te ʼAtua: “Manuʼia te tagata ʼaē neʼe ina maʼu te poto, pea mo te tagata ʼaē ʼe ina maʼu te fakasiosio tonu, heʼe ko te maʼu ʼo te ʼu faʼahi ʼaia ohage ko he totogi ʼe maʼuhiga age ia ʼi te maʼu ʼo te paʼaga ohage ko he totogi, pea ko tona maʼu ʼo te ʼu faʼahi ʼaia ʼe maʼuhiga age ia ʼi te aulo. ʼE maʼuhiga age ia ʼi te ʼu feo faka mātaga, pea ko tau ʼatu ʼu koloā ʼe mole tatau nātou mo ia.”—Tāʼaga Lea 3:13-15; 8:11.

Koia peʼe tou sio ʼi hatatou uku peʼe ʼi te ʼu paki, ʼe tonu ke tuku mai e te feo ʼo te Tai Kula he matalelei pea mo he meʼa ʼo ʼuhiga mo he fakakaukau ʼaoga.