ʼE Foaki Katoa Atu Koa e Te Lotu Te ʼu Meʼa ʼAē ʼe ʼAoga Kia Koutou?
KO TE ʼaele, te vai, te meʼa kai, ʼo feiā mo te fakamaluʼaga—ʼi te manatu ʼa te tokolahi ko te ʼu meʼa ʼaia ʼe ʼaoga ki te tagata. Kapau ʼe mole koutou maʼu te ʼu meʼa ʼaia, ʼe feala ke koutou mamate. Kae, kua fualoa atu, neʼe fakatokagaʼi e te tagata takitaki ʼo Iselaele ko Moisese te tahi meʼa ʼe ʼaoga ki te tagata, ko he meʼa ʼe maʼuhiga age ia ʼi te meʼa kai peʼe ko te vai. Neʼe tala e Moisese: “ ʼE mole tonu ke maʼuli te tagata ʼaki pe te pane, kae ʼe maʼuli te tagata ʼaki te folafola fuli pe ʼaē ʼe haʼu mai te gutu ʼo Sehova.”—Teutalonome 8:3.
ʼAki te ʼu palalau loloto ʼaia, neʼe fakahā e Moisese te maʼuhiga ʼo te foaki mai ʼo te ʼu meʼa ʼaē ʼe ʼaoga ʼi te faʼahi faka lotu peʼe ko te faʼahi fakalaumālie. Neʼe ina fakahā ai ko totatou maʼuli ʼe fakalogo ki te maʼu ʼo te ʼu meʼa ʼaia! Lolotoga te ʼu taʼu e 40 ʼaē neʼe nonofo ai te kau Iselaele ʼi te toafa, neʼe nātou maʼuliʼi ʼaki pe te ‘folafola ʼaē ʼe haʼu mai te gutu ʼo Sehova.’ Neʼe nātou hāo mai te faʼahi neʼe feala ke nātou tuʼutāmaki ai. ʼI te fakatotonu ʼa te ʼAtua, neʼe tō faka milakulo mai lagi te meʼa kai neʼe higoaʼi ko te mane. Mo te vai neʼe mapuna mai te maka moʼo fakafimālieʼi ʼo tonatou fia ʼinu. Kae ko te ʼAtua neʼe lahi age tana tokoni ʼi te foaki age pe ʼaē ʼo te ʼu meʼa neʼe ʼaoga ʼi te faʼahi fakasino. Neʼe tala e Moisese: “Ohage pe ko te fakatotonu e he tāmai tona foha, ko Sehova tokotou ʼAtua neʼe ina fakatotonuʼi koutou.”—Teutalonome 8:4, 5; Ekesote 16:31, 32; 17:5, 6.
Neʼe mole tukunoa te kau Iselaele ke nātou faʼifaʼitaliha ʼo ʼuhiga mo te fakafuafua ʼo te meʼa ʼaē ʼe lelei peʼe ko te meʼa ʼaē ʼe kovi, pe ko te ʼu aga ʼaē ʼe tonu ke nātou fai peʼe ko te faʼahi faka lotu. Neʼe ko te ʼAtua totonu ʼaē neʼe ina taki nātou. Neʼe ina foaki age kia nātou te Lao faka Moisese, ko he lao fakaofoofo neʼe ina fakahāhā lelei ai te meʼa kai ʼaē ʼe ʼaoga, te ʼu fakatuʼutuʼu tāfito ʼo ʼuhiga mo te fakamaʼa, pea mo te aga ʼaē ʼe tonu ke fai feiā aipe ki te ʼu fakatuʼutuʼu faka lotu. Koia neʼe lagolago te ʼAtua kia Iselaele ʼo ina fakafimālie tonatou faʼahi fakasino mo tonatou faʼahi fakalaumālie. Neʼe nātou maʼuʼuli ʼaki ‘te ʼu folafola ʼaē ʼe haʼu mai te gutu ʼo Sehova.’
Koia la ʼaē neʼe kehekehe ʼaupito ai ia Iselaele mo ʼihi age ʼu fenua. ʼI te temi ʼo Moisese ko Esipito ʼaē neʼe ko te pule mālohi faka malamanei. Neʼe mālohi ai te tauhi faka lotu. ʼE ʼui fēnei e te tohi (World Book Encyclopedia): “Neʼe tui te kau Esipito ʼo te temi muʼa ki te ʼu ʼatua kehekehe (te ʼu ʼatua pea mo te ʼu fineʼaliki) ʼe ʼi ai honatou mālohi ki te ʼu faʼahiga meʼa kehekehe pea mo te ʼu gāue fuli ʼa te tagata. Koia neʼe lahi ai tanatou tauhi ki te ʼu ʼatua. . . . ʼI te ʼu kolo fuli ʼo Esipito, neʼe tauhi te hahaʼi ki ʼonatou ʼu ʼatua totonu ʼonatou, ʼo kau kiai mo te ʼu ʼatua tāfito ʼo te fenua.”
Ko te faʼahiga tauhi ʼaia ki te ʼu ʼatua neʼe ina foaki katoa age koa ki te kau Esipito te ʼu meʼa ʼaē ʼe ʼaoga ʼi te faʼahi fakalaumālie? Kailoa. Neʼe liliu ia Esipito ko he fenua neʼe fonu ai te hoʼi mataku pea mo te ʼu aga heʼeʼaoga ʼi te ʼu felāveʼi fakasino. ʼO mamaʼo te kau Esipito mo te maʼuli fīmālie pea mo mālōlō, kae nātou tau mo te “ ʼu mahaki kovi.” (Teutalonome 7:15) ʼE mole fakapuna’maʼuli, te manukinuki ʼa te Tohi-Tapu ki te ʼu ʼatua ʼo Esipito, ʼo ʼui maʼana ko nātou ko te “ ʼu tamapua heʼemaʼa.”—Esekiele 20:7, 8.
ʼE tatau pe mo te meʼa ʼe hoko ia ʼaho nei. Tokolahi ʼe ia nātou he faʼahiga tui faka lotu; kae tokosiʼi ia nātou ʼaia ʼe nātou maʼu te aga faka lotu. Koia, ʼe hā mai ai, neʼe mole lavaʼi e te lotu katoa te foaki ʼo te ʼu meʼa ʼaē ʼe ʼaoga ki te malamanei. Neʼe feala koa ke hoko te ʼu faigataʼaʼia ʼo te tau, te fakapulepule, te hoge, pea mo te masiva ia ʼaho nei mo ka na pau ʼe maʼuliʼi moʼoni e te hahaʼi “te ʼu folafola fuli pe ʼaē ʼe haʼu mai te gutu ʼo Sehova”? Kailoa ia! Tatau aipe, peʼe faiga te tokosiʼi ke fetogi tanatou lotu. He koʼe, ʼe mole fia palalau ʼihi ki te lotu peʼe ko te tokagaʼi ʼo he ʼu manatu foʼou ʼo te lotu!
Ohage la, ko he tagata ʼi Kana, ʼi te Potu Hihifo ʼo Afelika, neʼe ʼui maʼana ki te minisi Kilisitiano: “ ʼE ʼau tui neʼe hā totonu mai te ʼAtua kia mātou hahaʼi ʼo Afelika, ʼaki ʼomātou ʼu patele tagata mo fafine, ohage pe ko tana hā totonu ʼaē ki te kau Sutea ʼaki te ʼu polofeta. ʼI meʼa fakaʼofaʼofa leva te mole kei ʼiloʼi e ʼihi ia mātou kau Afelika ʼomātou ʼu patele totonu kae nātou tokagaʼi te akonaki ʼa Sesu, ʼa Mahometa, pea mo ʼihi age.”
ʼI te ʼu talatisio ʼo Afelika, ko te Lotu Faka Kilisitiano ʼe sioʼi ohage ko te lotu ʼa te kau papālagi—neʼe ʼaumai ki Afelika ʼo lahi age te mamahi neʼe ina fai ʼi te ʼu meʼa ʼaē ʼe lelei. Kae ko te taʼi manatu ʼaia ʼe tokoni anai koa kia koutou peʼe ina tāʼofi takotou faiga ʼaē ke koutou maʼu te ʼu meʼa fakalaumālie ʼaē ʼe ʼaoga kia koutou? ʼE ʼui fēnei e te tāʼaga lea faka afelika: “ ʼE mole ke ʼai ʼou nima e lua ki te ipu meʼa kai ʼuhi pe heʼe ke fia kai.” Ko te taʼi kai ʼaia ʼe mole ko he aga fakaʼapaʼapa pea ʼe mole fakapotopoto—tāfito la mo kapau ʼe mole koutou ʼiloʼi te meʼa ʼaē ʼi loto ʼo te ipu! Kae, tokolahi ʼe nātou fili tanatou lotu, ʼo mole fakatafito ki he fakasiosio loloto, kae ʼe fakatafito ia ki te meʼa ʼi te loto peʼe ko te talatisio faka famili.
Ko te tauhi ʼaē ka ina foaki atu te ʼu meʼa fakalaumālie ʼe ʼaoga kia koutou ko “he tauhi taputapu ʼaki te fakaʼaogaʼi ʼo tokotou ʼatamai.” (Loma 12:1) Ko te fili ʼo he tauhi ʼe tonu ko he faʼahi neʼe kua fakamahino ko he fili fakapotopoto. Koia, tou sivisivi te ikuʼaga ʼo te fili ʼo he lotu ʼi te faʼahi ʼo te kau Afelika. Kae, ko te meʼa ʼaē ka hoa mai ʼe ʼaoga anai ki te hahaʼi lautohi ʼi te potu fuli pe.
[Paki ʼo te pasina 3]
Neʼe fakahā e Moisese te maʼuhiga ʼo te foaki mai ʼo te ʼu meʼa fakalaumālie ʼaē ʼe ʼaoga kia tatou
[Paki ʼo te pasina 4]
ʼAki te ʼu fakamatala ʼo te ʼu meʼa neʼe hoko ʼi Afelika e te ʼu misionea ʼo te Keletiate neʼe tupu ai te māpunuʼi ʼo te fakakaukau ʼa ʼihi ki te Tohi-Tapu