ʼE Maʼuhiga Koa Takotou Faʼahiga Tauhi?

ʼI TE fetapā ʼi te kiʼi kolo ʼo Afelika. Mai te mafa mole faʼa mamaʼo neʼe feala ke logoʼi te logoaʼa mālohi ʼo te tā nafa, te hiva, pea mo te ʼu pasipasi fakafiafia. Kae ko te faʼahi ʼaia ʼe mole ko he faʼahiga meʼa faka sosiale. Ko te tauhi faka talatisio ʼa te kau Afelika. Kae, ko te ʼu logoaʼa ʼe fakatauʼaki fai, mo te ʼu leʼo fakalāluvale ʼe haʼu mai te ʼēkelesia charismatique ʼe ōvi mai kiai. ʼI te koga meʼa ʼaia ko te kau atolasio ʼaē kua puli tonatou ʼatamai ʼe nātou fakahoko te “ ʼu fakamālōlō” pea mo palalau ʼi te ʼatu ʼu lea. ʼI te tahi potu taupotu ʼo te kolo ʼe ʼi ai te tahi age kautahi. Ko te leʼolahi ʼo he tagata takitaki mahometa ʼe ina pāui te hahaʼi ʼaē ʼe atolasio kia mahometa ki te faikole.

ʼIo, ʼe lahi te ʼu faʼahi kehekehe ʼo te tauhi faka lotu ʼi te ʼu kolo ʼo Afelika. Neʼe fiafia te ʼu taʼiake ʼa te kau Afelika ʼi tanatou mulimuli ʼaē ki tanatou ʼu talatisio faka lotu. Kae neʼe ʼōmai leva te ʼu misionea ʼo te Keletiate, ʼo muli mai ia nātou te ʼu solia ʼo te ʼu fenua kehekehe ʼo te Eulopa, pea ʼo nātou faigaʼi mālohi ke liliu fuli te hahaʼi ki te “Lotu Faka Kilisitiano”—ʼo fetogi foki mo ʼonatou higoa.

Koteā koa te meʼa neʼe hoko ai? Neʼe tupu ai he lotu ʼe ina fakatahiʼi te ʼu talatisio ʼo te tui pea mo te ʼu aga māhani ʼo Afelika mo te ʼu tui faka lotu ʼaē neʼe fakaulu age ki te fenua. ʼO kaku mai pe ki te ʼaho nei tokolahi te kau “Kilisitiano” ʼe nātou fakaʼaogaʼi pe te ʼu meʼa taupau pea mo te ʼu meʼa hāofaki ʼonatou. Kae, ko te ʼu misionea ʼo te Keletiate neʼe lahi ʼaupito tanatou maʼuliʼi hala te Lotu Faka Kilisitiano moʼoni, pea neʼe nātou fakatupu ai te fehiʼa. Ko te meʼa neʼe hoko, ko te tui gataʼa ʼa ʼihi kau Afelika ki te Tohi-Tapu, ia ʼaho nei, ʼe tupu mai te kau misionea ʼaia.

Kae, ʼe kei lahi pe foki te ʼu faʼahiga maʼuliʼi ʼo te “Lotu Faka Kilisitiano.” ʼI te ʼu taʼu ʼaenī ko te ʼu kūtuga ʼo te lotu charismatique neʼe nātou liliu ʼo logona; ko te ʼu ʼēkelesia ʼaē ʼe nātou fai te ʼu fakamālōlō ʼaki te tui kua mafola ʼaupito. Neʼe fakamahino e te fafine tā sulunale ʼi te nusipepa, te tupuʼaga ʼo te fia fai ki te ʼu ʼēkelesia ʼaia ʼaki tana ʼui ʼaē ‘ko te manatu tāfito ʼa te lotu ʼa te kau Afelika ʼe ko he manatu ʼe ʼaoga takimuʼa ki te tagata. ʼI te manatu ʼa te kau Afelika, ʼe tonu ke foaki fakahagatonu e te lotu te ʼu meʼa fakamālama moʼo fakafimālieʼi ʼo te maʼuli ʼo te tagata. Pea, ki te tagata Afelika ʼaē ʼe tui ʼe ʼaoga te ʼu hahaʼi faifakalauʼakau ki te ʼu faʼahi fuli, ʼo mulimuli ki te faʼahi ʼaia ko te ʼu fakamālōlō ʼaē ʼe hoko ʼaki te tui ʼi te ʼu ʼēkelesia ʼe ʼalutahi mo te ʼu fakamaʼua ʼo tona ʼuhiga totonu.’ Kae, tokolahi te ʼu ʼēkelesia charismatiques ʼe tuʼu ohage ko ni ʼu matani gāue.

Ia ʼaho nei, ʼe tou maʼu te ʼu magaʼi lotu ʼe fakalaka ʼi te 6 000 ʼi Afelika. E lagi neʼe koutou ʼui ko te ʼu lotu pea mo te ʼu magaʼi lotu ʼaia ʼe nātou nonofo mo te kalavi ʼo te hāofaki. Kae ko te fehuʼi tāfito, Koteā koa te manatu ʼa te ʼAtua?

ʼE ʼi Ai Koa He Lotu ʼe Leleiʼia e Te ʼAtua?

ʼE mahino papau ia, ko te Tupuʼaga ʼo te ʼatulaulau ʼe mole ina tukunoaʼi tatou ʼo mole ina foaki mai he takitaki ʼi te faʼahi ʼaia. (Amosi 3:7; Gāue 17:26, 27) Pea ko te fakapotopoto ʼe ina fakahā mai ko te takitaki fakaʼatua ʼe fakatafito ki te Tohi-Tapu. Kailoa, ko te Tohi-Tapu ʼe mole, ohage ko te ʼui e ʼihi kau Afelika, ko te tohi ʼa te kau papālagi. Koia, ʼe mole he tagata—kili ʼuli peʼe kili hina—ʼe feala ke ina ʼui ʼa ia te Tohi-Tapu. “Ko te Tohi-Tapu katoa ʼe haʼu mai te ʼAtua,” ko te ʼui ʼaia ia 2 Timoteo 3:16. Ko te ʼu moʼoni ʼo te Tohi-Tapu, te ʼu akonaki fakapotopoto, kua ʼāfea ʼaupito, mo tana hāo mai te ʼu faigataʼaʼia mālohi neʼe tau mo ia, ko te totonu ʼo tana ʼu lea faka polofeta katoa kua mafola ʼi te malamanei—ko te ʼu fakamoʼoni ʼaia ʼe hā lelei mai ai tana haʼu mai te ʼAtua.

Koteā koa ʼaē ʼe akoʼi mai e te tohi ʼaia kia tatou? Ko he manatu tāfito ʼe ina fakahā mai kia tatou ko te “ ʼAtua moʼoni pe e tahi.” (Soane 17:3) Kapau la koia ʼaia, e feafeaʼi koa te maʼu ʼo te moʼoni ʼi te ʼu lotu fuli? ʼE mole ʼi ai koa la he ʼu lotu ʼe fefakafeagaiʼaki mokā ʼe nātou talanoa ki te ʼuhiga pea mo te natula ʼo te ʼAtua? Neʼe talanoa te tagata faitohi ʼo te Tohi-Tapu ko Sake ki te “tauhi maʼa pea mo moʼoni.” (Sake 1:27, Today’s English Version) Kapau ʼe ʼaoga ke ʼiloʼi ia te lotu moʼoni, ʼe hā mai ai ʼe ʼi ai foki mo te lotu hala. Ko te manatu ʼaenī ʼe fakafeagai ki te ʼui ʼaē ko te ʼu lotu fuli ʼe ko he ʼu ala kehekehe pe ia ke nātou fakaōvi ai ki te ʼAtua.

Te ʼu Fakatuʼutuʼu ʼa Te Tupuʼaga ʼo ʼUhiga Mo Te Tauhi

Koteā koa te ala moʼoni moʼo tauhi ki te ʼAtua? ʼE akoʼi mai e te Tohi-Tapu ko te tauhi moʼoni ʼe fakatafito ki te ʼatamai mālama totonu. Neʼe ʼui fēnei e te polofeta lahi ko Sesu Kilisito ki te fafine Samalita: “ ʼE koutou atolasio, koutou, ki te meʼa ʼaē ʼe mole koutou ʼiloʼi.” (Soane 4:22) E lagi, ʼe koutou fia ʼiloʼi foki mo koutou te moʼoni? Neʼe akoʼi atu koa kia koutou ko te ʼAtua Māfimāfi ʼe ʼi ai tona huafa, ko Sehova? (Pesalemo 83:18) ʼE koutou ʼiloʼi koa pe koteā tana ʼu fakatuʼutuʼu ʼo ʼuhiga mo te tagata pea mo te kele? (Mateo 6:9, 10; Efesi 1:9, 10; 3:11) ʼE foaki atu koa e takotou lotu he ʼamanaki moʼoni ʼo ʼuhiga mo he ʼapogipogi fakatalakitupua? Pea kapau la ʼe koutou ʼui ko koutou ko te kau Kilisitiano, ʼe feala koa hakotou fakamahino takotou tui ʼaki te Tohi-Tapu, peʼe ko he tauhi pe ia neʼe tuku atu kia koutou kae neʼe mole heʼeki koutou sivisivi fakalelei?

Kapau ʼe koutou sio ifo ʼe mole koutou maʼu ia te ʼatamai mālama totonu, ʼe feala hakotou maʼu te faʼahi ʼaia ʼaki he ako ʼo te Folafola ʼa te ʼAtua, ia te Tohi-Tapu. ʼE loto te ʼAtua ke fakamāmāhani tana hahaʼi atolasio moʼoni mo te ʼu akonaki Taputapu ʼo te Tohi ʼaia. Ko he faʼahi ʼe maʼuhiga age, ʼe ina uga ia nātou ke nātou maʼuliʼi te ʼu akonaki ʼaia ʼi tonatou maʼuli. Ko tatatou aga ʼe feala ke tatau mo te manatu neʼe talanoa kiai te pesalemo ʼi tana ʼui ʼaē: “Ko tau folafola ʼe ko he mālama taki ʼo toku vaʼe, pea ʼe ko he mālama ki toku ala.” (Pesalemo 119:105) E feafeaʼi koa te tokoni ʼa takotou lotu kia koutou ke koutou ʼiloʼi pea mo mahino ki te Tohi-Tapu?

Tahi ʼaē meʼa maʼuhiga ʼo te tauhi moʼoni, ko te tui kia Sesu Kilisito, mole gata ʼaki pe heʼe ko te polofeta lahi kae ʼuhi ko te ʼAlo ʼulu tokotahi ʼa te ʼAtua. ʼE fakahā fakalelei mai e te Tohi-Tapu ko Sesu ko “te Meʼa Gāue tāfito ʼaia ʼo te maʼuli.” (Gāue 3:15; 4:12) Tokolahi ʼe nātou ʼui ʼe nātou tui kia Sesu, kae e feafeaʼi moʼoni koa tanatou tui? Ko te tui moʼoni kia Kilisito ʼe hā ʼaki mai te fagono ʼaē ki tana ʼu fakatotonu. Neʼe fakaloto mālohiʼi e te ʼAtua te faʼahi ʼaenī ʼi tana ʼui ʼaē: “Ko ia nei ko toku ʼAlo, ʼofaina; koutou fagono ki ai.” (Maleko 9:7) Koia ko te kau atolasio moʼoni ʼe nātou faigaʼi ke nātou haʼele fakalelei ʼi te ʼu ala ʼo Sesu. (1 Petelo 2:21) Ko he faʼahi ʼe nātou fai, ʼe nātou kau ki te gāue faka mafola ʼaē neʼe ina kamata fai. (Mateo 4:17; 10:5-7) ʼE fakaloto mālohiʼi koa koutou e takotou lotu ke koutou kau takitokotahi ki te gāue ʼaia?

ʼE fakamaʼua e te tauhi moʼoni ia te ʼofa. ʼE fakahāhā ia Sehova ʼAtua ko ia ko te ʼAtua ʼofa, pea neʼe tala e Sesu ki tana ʼu tisipulo ʼe ʼiloa anai nātou mokā ʼe maʼu ia nātou te ʼofa. (Soane 13:34, 35; 1 Soane 4:8) ʼAki te ʼu lauʼi afe miliona hahaʼi ʼaē ʼe ʼui maʼa nātou ia ʼaho nei ko nātou ko te kau Kilisitiano, ʼe mole kua lahi ʼaupito koa la te ʼofa? ‘Kae, ʼi tona fakahagatonu ʼe lahi ʼaupito te ʼu koga meʼa ʼe mole ʼi ai te ʼofa. Ko te ʼu tau neʼe nātou pulihi te toko miliona hahaʼi ʼi te sēkulō pe ʼaenī. Ko te fakapō pea mo te agamālohi ʼe hoholo pe tona tuputupu. Koia koutou fai te fehuʼi ʼaenī, ‘Ka na pau la neʼe kau fuli te hahaʼi ʼi taku lotu, ʼe liliu koa te malamanei ko he koga meʼa ʼe lahi ʼaupito ai te ʼofa?’

Koia, ʼe fakahā mai e te Tohi-Tapu ko te kau atolasio moʼoni ʼe tonu ke nātou fakamamaʼo mai te malamanei ʼaē ʼe mole ina ʼiloʼi te ʼAtua. ʼI te fili e te ʼAtua te kau Iselaele ʼi te temi muʼa ʼo tuku kehe moʼo taupau ʼo te tauhi maʼa, neʼe ina fakatokagaʼi tana hahaʼi ke ʼaua naʼa nātou fakatahi mo te ʼu ʼatu puleʼaga aga fakalialia ʼi ʼonatou ʼu tafaʼaki. (Teutalonome 7:1-6) Ia Soane 17:16, neʼe toe ʼui fēnei e Kilisito Sesu ki tana ʼu tisipulo: “ ʼE mole nātou kau ʼi te malamanei, ohage ko ʼau ʼe mole ʼau kau ʼi te malamanei.” Ko te kau atolasio moʼoni ʼa te ʼAtua ʼe mole nātou fai politike, mo te ʼu aga heʼeʼaoga, pea mo te tuʼu gaohi koloā mānumānu, peʼe ko te kau ki te ʼu filosofia ʼaē ʼe nātou fakalainoaʼi te ʼAtua. (Soane 18:36; 1 Soane 2:15-17) ʼE nātou fakalogo ki te fakatotonu ʼaē neʼe fakahā ia Loma 12:2: “ ʼAua naʼa koutou toe faʼifaʼitaki ki te ʼu faʼahiga meʼa ʼo te tuʼu ʼaenī.” Ko te faʼahi koa la ʼaia ʼe fakaloto mālohiʼi atu e takotou lotu ke koutou fai?

Ko He Tokoni ʼe ʼAoga

ʼIo, ko takotou tauhi ʼe maʼuhiga koa ia ki te ʼAtua. ʼO ʼuhiga mo te faʼahi ʼaia, ko te lotu moʼoni pe e tahi. (Efesi 4:4-6) Ko tatatou palalau fakanounou neʼe talanoa pe ki he ʼu puani tāfito ʼo te akonaki ʼo te Tohi-Tapu. He koʼe koa ʼe mole tou faiga ke lahi ʼaupito te ʼu puani ʼe tou akoʼi?

Kapau ʼe mole tokaga takotou lotu ʼo akoʼi koutou, ʼe feala ke tokoni te kau Fakamoʼoni ʼa Sehova kia koutou ʼi te faʼahi ʼaia. ʼE nātou ʼiloa ʼi te malamanei ʼi tanatou gāue mālohi moʼo fai ʼo he ʼu ako faka Tohi-Tapu. ʼE nātou ʼiloʼi ko tonatou maʼua ko te tokoni ki te hahaʼi ʼo te ʼu lanu fuli pea mo te ʼu lotu kehekehe ke nātou maʼu he mālama loloto ʼo ʼuhiga mo te Tohi-Tapu. (Tāʼaga Lea 2:1-6) ʼE nātou tā te ʼu kumiʼaga faka Tohi-Tapu.a Pea, ʼe feala pe anai tanatou ʼolo atu ki tokotou ʼapi ʼo fai hakotou ako faka Tohi-Tapu ʼe mole totogi. Ko te toko miliona hahaʼi ʼi te malamanei ʼi te temi nei ʼe nātou maʼu te fua lelei ʼo te polokalama ako faka Tohi-Tapu ʼaia. He koʼe koa ʼe mole koutou fai te faʼahi ʼaia? ʼIo, ʼe ʼaoga takotou fai te faʼahi ʼaia koteʼuhi ʼe maʼuhiga moʼoni takotou faʼahiga tauhi.

[Nota ʼi te lalo pasina]

[Paki ʼo te pasina 5]

Neʼe lahi ʼaupito te maʼuliʼi hala e te ʼu misionea ʼo te Keletiate ia te Lotu Faka Kilisitiano moʼoni

[Paki ʼo te pasina 5]

Tokolahi te ʼu ʼēkelesia ‘charismatiques’ ʼe ko he ʼu matani gāue

[Paki ʼo te pasina 6]

Ko te tui kia Sesu ʼe ko te faʼahi maʼuhiga ʼaia ʼo te tauhi moʼoni

[Paki ʼo te pasina 7]

Ko te kau Fakamoʼoni ʼa Sehova ʼe nātou tokoni ki te ʼu lauʼi miliona hahaʼi ke nātou maʼu te ʼatamai mālama totonu ʼaki he ʼu ako faka Tohi-Tapu ʼe mole totogi