Kapite 22

E feafeai te iloi ote lotu mooni?

1. Koai ae nee ina tapau te lotu mooni ite uluaki sekulo?

E FAIGAFUA aupito te iloi o natou ae e natou taupau te lotu mooni ite uluaki sekulo. Nee kote u tisipulo ia a Kilisito. Nee natou kau fuli ite kautahi faka kilisitiano ae pe e tahi ote temi aia. Koai ite temi nei eina taupau te lotu mooni?

2. E feafeai te iloi o natou ae e natou taupau te lotu mooni?

² Nee ui maa Sesu: “I tonatou u fua e koutou iloi ai anai ia natou. (. . .) Kote fuuakau lelei fulipe eina fai te u fuai akau taulekaleka, kae kote fuuakau popo fulipe eina fai te u fuai akau kovi (. . .). Ko tonatou u fua ae e koutou iloi ai anai iate hahai aia.” (Mateo 7:16-20). Kotea te u fuai akau mauhiga ae e maua ke fai ete kau tauhi mooni ate Atua? Kotea ae e tonu ke natou lolotoga tona fai?

TE TAPUHA OTE HUAFA OTE ATUA

3, 4. a) Kotea ae nee uluaki kole mua e Sesu i tana fai kole? b) Nee tapuha feafeai e Sesu te huafa ote Atua?

³ Kote kau tauhi mooni ate Atua e alu tahi tanatou u gaue mote kole aeni nee ako e Sesu ki tana u tisipulo. E kamata fenei: “Ko tamatou Tamai ei selo, ke tapuha tou huafa!” Kote tahi ia faka liliu eina ui fenei: “Ke iloi te maonioni o tou huafa.” (Mateo 6:9, Kote Tauhi Foou ite faka falani mahani). Kotea tona faka uhiga te tapuha ote huafa ote Atua? Nee tapuha feafeai e Sesu te huafa aia?

⁴ Ite kole nee ina fai ki tana Tamai, nee ui fenei e Sesu: “Nee au faka ilo tou huafa kite hahai ae nee ke foaki mai kia teau ite lotolotoiga ote malamanei.” (Soane 17:6). Io, ko Sesu nee ina faka ilo kite hahai fuli te huafa ote Atua, ae ko Sehova. Nee ina faka aoga tuumaupe te huafa aia. Nee ina iloi kote faka tuutuu ate Atua ke faka kololia tona huafa ite kele katoa; koia nee ina tuku mai ai te faifaitaki kia tatou oina kalagai pea mo tapuha te huafa aia.—Soane 12:28; Isaia 12:4, 5.

5. a) E hai feafeai te kokelekasio faka kilisitiano kite huafa ote Atua? b) Kotea ae e tonu ke tou fai ke tou mauli ai?

⁵ E fakaha ete Tohi-Tapu kote tuu ote kokelekasio faka kilisitiano mooni e hai ia kite huafa ote Atua. E ui maa te apositolo ko Petelo kote Atua nee ina “fulihi tana tokaga kite u puleaga ke too mai ai he hahai moo tona huafa”. (Gaue 15:14.) Koia, kote hahai ate Atua e maua ke natou tapuha tona huafa pea mo faka ilo ite kele katoa. Tahi, kote fakamauli o kita e faka logo kite iloi ote huafa aia, koteuhi e ui ite Tohi-Tapu, “ko ae ia e paui kite huafa o Sehova e fakamauli anai ia”.—Loma 10:13, 14.

6. a) E tapuha koa ete u Ekelesia te huafa ote Atua? b) Eiai koa he Ekelesia e faka mooni kite huafa ote Atua?

⁶ Koai, ite temi nei, eina tapuha te huafa ote Atua pea mo ina faka ilo ite kele katoa? Kote tokolahi ote u Ekelesia e natou situa kite faka aoga ote huafa o Sehova. Ko ihi kua natou pulihi osi i tanatou u Tohi. Kapau e koutou palalau tuumau kia Sehova i okotou vaefale, kote lotu fea ae ka faka kau anai koutou kiai? E kote hahai pe ia e tahi e makehe age i tanatou mulimuli kite faifaitaki kia Sesu ite potu aia. Kote tafito o tonatou mauli kote tauhi kite Atua pea mo faka mooni ki tona huafa, o hage ko tona fai ae e Sesu. Koia kote hahai aia kua natou too te higoa faka tohi-tapu ae kote “Kau faka mooni a Sehova”.—Isaia 43:10-12.

TE KALAGAI OTE PULEAGA OTE ATUA

7. Nee fakaha feafeai e Sesu te mauhiga ote Puleaga ote Atua?

⁷ I tana kole, nee faka tokagai e Sesu te mauhiga ote Puleaga ote Atua. O ina ui ke kole fenei: “Ke haele mai tou puleaga!” (Mateo 6:10). Tuumaupe, nee faka tokaga tafito e Sesu kite Puleaga kohe faitoope aia e tahi ote u mamahi ote tagata. Ko tana u apositolo mo ia totonu nee natou logologo te Puleaga “ite kolo fulipe” mote “fale fulipe”. (Luka 8:1; Gaue 5:42; 20:20.) Kote Puleaga ote Atua nee kote talanoa tafito aia ote logo mote ako ae nee natou faka mafola.

8. Maa Sesu, kote logo tafito fea ae ka faka mafola anai e tana kau tisipulo mooni ite u “aho fakamuli”?

⁸ Kae a ite aho nei, kotea te akonaki tafito ate kautahi ate Atua? I tana faka kikite kite u “aho fakamuli”, nee ui maa Sesu: “Kote logo lelei aeni ote puleaga e faka mafola anai ite kele katoa, moo faka mooni kite u puleaga katoa; pea hoki hoko mai ai leva mote faka osi.” (Mateo 24:14). Koia, kote Puleaga e kote logo tafito aia.

9. Koai ite temi nei eina faka mafola te logo ote Puleaga?

⁹ Ka hau he tahi ki tou matapa o palalau atu kite Puleaga ote Atua kohe falala agape aia e tahi ote tagata, kote lotu fea ae eke tuku kiai te tagata aia? Ihe tuku kehe pe ote kau Faka mooni a Sehova, koai he tahi age nee palalau atu kia koe kite Puleaga ote Atua? Kote hahai ote u tahi magai lotu, e tokolahi ia natou e mole natou iloi pela pe kotea te Puleaga aia. Kae kote Puleaga foki ote Atua e maua keina uei te malamanei. Kote polofeta ko Taniela nee ina faka kikite kote Puleaga aia eina ’laliki anai pea mo faka gata te atu puleaga fulipe kae koia tokotahipe anai ka ina pulei te kele’.—Taniela 2:44.

TE FAKA APAAPA KITE FOLAFOLA ATE ATUA

10. Nee fakaha feafeai e Sesu tana faka apaapa kite Folafola ate Atua?

¹⁰ Kote tahi faka iloga e iloga mai ai te hahai ae e natou taupau te lotu mooni ko tanatou aga o uhiga mote Tohi-Tapu. Ite temi fulipe nee fakaha ai e Sesu tana faka apaapa lahi kite Tohi-Tapu. Nee tua lahi tana talanoa kite Tohi-Tapu kohe pule maoluga ia (Mateo 4:4, 7, 10; 19:4-6). Nee ina toe faka mooni foki te lahi o tana faka apaapa kite Tohi-Tapu o mulimuli ki tona u pelesepeto. Nee mole ina faka malaloi te Tohi-Tapu, ka nee faka lakahalai e Sesu ia natou ae nee mole alu tahi anatou u akonaki mo ae ote Tohi-Tapu pea mo natou faigai tona faka noai aki tanatou u akonaki a natou.—Maleko 7:9-13.

11. Kotea te aga tuumau ate u Ekelesia kite Folafola ate Atua?

¹¹ Kae feafeai te u Ekelesia ae e natou lau ko natou kote u kilisitiano, e natou fakaha koa e natou faka apaapa lahi kite Tohi-Tapu? Kote tokolahi ote kau takitaki lotu o natou e mole natou tui kite u faka matala faka tohi-tapu ae o uhiga mote agahala a Atama, kite tulivio, mo ihi atu. E natou lau kote tagata nee mole fakatupu totonu ete Atua, kae nee kote fua ia ote evolisio. E feia koa he faka loto malohii ote faka apaapa kite Folafola ate Atua? Ko ihi o natou e natou lau kote u felavei faka sino ka heeki ohoana e mole kovi, pea maia mote momoe ahe tagata mohe tahi tagata pee kohe fafine mohe tahi fafine pee kohe ohoana moni fafine e lua pee tolu e feala pe ia kohe u mea e lelei. Kote u tai tonu koa aia e feala koa ke tupu ai he haga ate hahai kite Tohi-Tapu moo takitaki o natou? Kailoa, e mole natou mulimuli kite faifaitaki aga ae kote Alo ote Atua mo tana u apositolo.—Mateo 15:18, 19; Loma 1:24-27.

12. a) He koe kote tauhi lotu ate tokolahi ote hahai tui ae e natou mau te Tohi-Tapu e mole lelei ia ete Atua? b) Kapau eiai he hahai lotu e natou iloi lelei mo fai pe te mea ae e kovi kae tali lelei pe natou i tonatou Ekelesia, kotea te ui kiai?

¹² Eiai te u hahai tui e natou mau te Tohi-Tapu pea e natou ako, kae ko tonatou mauli e ha mai ai ia e mole natou mulimuli ki ai. Koeni te tala ate Tohi-Tapu o uhiga mo natou: “I mua ote hahai e natou tala e natou iloi te Atua, kae e natou fakafisi kiai aki anatou u aga.” (Tito 1:16; II Timoteo 3:5). Kapau eiai he u hahai tui e natou kau ite u gaoi paaga, pee natou inu faka valevale te kava, mo ihi atu mea, kae tali leleii pe natou i tonatou Ekelesia, pea e kote ekelesia aia e mole faka mooni kiai te Atua.—I Kolonito 5:11-13.

13. Kotea te tonu mauhiga ae e maua ke fai moka e kita sio kote u akonaki ote Ekelesia ae e kita kau ai e mole alu tahi mo ae ote Tohi-Tapu?

¹³ Kapau nee koutou ako te u kapite aena i mua pea mo sivisivi te u kogai tohi-tapu ae e tuu ai, pea e kua koutou ako koutou te u akonaki tafito ote Folafola ate Atua. Kae feafeai leva mo kapau kote u akonaki o tokotou Ekelesia e mole alutahi mo ae ote Folafola ate Atua? Kote fehui e mauhiga aupito. E maua ke fai he tonu: pee kote tali ote mooni ae ote Tohi-Tapu, pee ko tona liaki kae taupau te u akonaki ae e mole hau mai ai. Kae kote fai ote tonu aia e faka logo kia koutou. Koutou faka kaukaui lelei te fehui, koteuhi kote tonu ae ka koutou fai anai e faka logo kiai tokotou tuulaga ae ia mua ote Atua pea mote faka fealagia o koutou kite mauli heegata ite palatiso kelekele.

E NATOU FAKA MAMAO MAI TE MALAMANEI

14. a) Kotea te tahi mea ae e kehe ai te lotu mooni? b)He koe e mauhiga aupito ke mulimuli te hahai ae e atolasio mooni kite tonu aia?

¹⁴ Kote tahi faahi ae e kehe ai te hahai ae e natou taupau te lotu mooni kote mea aeni, o hage ko tona tala e Sesu: “e mole natou kau ite malamanei”. (Soane 17:14.) Ko tona faka uhiga, kote hahai ae e atolasio mooni kite Atua e natou faka mamao mai te malama kovi aeni pea mo tona u mea. Ko Sesu nee mole fia liliu ia kohe pule faka politike (Soane 6:15). Ka kita manatui ko Satana te Tevolo ae e pule ite malamanei, e mahino ai leva kia kita te mauhiga aupito ae o takita faka mamao mai ai (Soane 12:31; II Kolonito 4:4). Kote mamafa aupito ote potu aia e ha mai ite tala faka tohi-tapu aeni: “Ko ae ia e fia kaumea mote malamanei e faka tuutuu ia kohe fili ote Atua.”—Sake 4:4.

15. a) Kote u Ekelesia ae e kotou iloi e natou faka mamao mooni koa mai te malamanei? b) E kotou iloi he lotu e mole kau ite malamanei?

¹⁵ Kote u Ekelesia ae e kotou iloi e natou mulimuli koa kite tonu aia? E feala koa ke tou lau kote kau takitaki lotu mo anatou hahai faka logo “e mole natou kau ite malamanei”? Pee malohi osi tanatou kau kite u mea ate malamanei, ki tona nasionalisi, ki tana politike mo tana u tau kite u tuulaga? E molepe he uhiga ote fakaha atu o tona tali, koteuhi kote u gaue ate u Ekelesia ite u faahi aia kua iloi lelei. E toe faigafuape mote sivisivi ote u gaue ate kau Faka mooni a Sehova; e koutou iloi ai tanatou mulimuli mooni kite u faifaitaki a Kilisito pea mo tana u uluaki tisipulo o natou faka mamao mai te malamanei, mai tana u fai politike, mo tona u ala agakovi mo faka lialia, pea mo tana aga malohi.—I Soane 2:15-17.

E NATOU FEOFAOFANI

16. Kotea te fakailoga ae e iloga kehe ai te u tisipulo mooni a Kilisito?

¹⁶ Kote faka iloga ae e kehe aupito ai te u tisipulo mooni a Kilisito kote ofa ae eia natou. Nee ui e Sesu: “Kote mea aeni e iloi ai koutou ete hahai fuli ko aku tisipulo: mo kapau e koutou feofaofani.” (Soane 13:35). Kote u lotu ae e koutou iloi e natou mau koa te faka iloga kehe aia? O hagela, moka faka alualu te u talaga ate u puleaga o faka osiosi kite tau kotea te mea enatou fai?

17. Kote u Ekelesia pea mo tonatou u hahai e ha mai koa e natou feofaofani aki ia natou?

¹⁷ E koutou iloi lelei pe te mea ae e hoko mahani. Ite faka totonu ate u pule ote malama aeni, kote hahai ote u Ekelesia kehekehe e olo o matematehi te tahi u hahai lotu ote tahi u puleaga. E fe tamatei akipe iate hahai katolika, te hahai polotesita pea mote hahai mahometa. I takotou faka kaukau kote aga koa aia e alutahi mote Folafola faka atua pea mo ha mai ai te laumalie ote Atua?—I Soane 3:10-12.

18. E feofaofani aki koa te kau Faka mooni a Sehova?

¹⁸ Kae feofaofani aki koa te kau Faka mooni a Sehova? E mole natou faifaitaki kite u lotu ote malama aeni. E mole natou fetamatei aki pea mo loi o ui fenei: “Eau ofa ite Atua”, pea mo fehiape ki onatou u tehina ote tahi u fenua, u telepi pee u lanu kehe age (I Soane 4:20, 21). Kae e natou toe fakaha foki te ofa ite tahi atu u potu. O feafeai? I tonatou vahaa mo onatou u vaefale pea mo tanatou faigai te tokoni kite hahai fulipe ke natou iloi te Atua.—Kalate 6:10.

KOTE LOTU MOONIPE E TAHI

19. He koe ia e totonu pea e faka tohi-tapu ia te lau ae e kote lotu moonipe e tahi?

¹⁹ Kote totonu, e mauape keiaipe he lotu mooni e tahi. Kote mea aia e alu tahi ia mote ui ae kote Atua mooni e kote Atua, “mole ote maveuveu, kae ote tokalelei”. (I Kolonito 14:33.) Tahila, e kote “tui e tahi”, ko tona tala aia ete Tohi-Tapu (Efese 4:5). Koai koa, ite temi nei, te kau atolasio mooni ate Atua?

20. a) Ite mahino mai ote u mea fuli, koai ae e hinoi ete tohi aeni kote kau atolasio mooni aia a Sehova ite temi nei? b) E koutou alu ite tonu aia? Kotea te puleaki lelei ae e kita feiloi aki lelei ai mote kau Faka mooni a Sehova?

²⁰ E matou tali faka vilivili: kote kau Faka mooni a Sehova. Ke koutou tui kiai, e tonupe ke kotou feiloi aki mo natou. Ko tona lelei ke koutou olo o sisio ite u fakatahi ae e fai i tonatou u Fale ote Puleaga. Kapaula kote taupau ote lotu mooni eina foaki mai nei he fiafia pea mo ina taki kite mauli heegata ite palatiso kelekele, e mole koala aoga ia ke kita kataki o fai te mea aia (Teutalonome 30:19, 20)? E matou faka loto malohii atu koutou kiai mote loto katoa. Koutou kamata atu ite aho nei.

[Paki ʼo te pasina 185]

Kapau eke palalau kihe tahi o uhiga mo Sehova pea mo tona Puleaga, kote lotu fea ae ka ina iloi ai anai eke kau ai?

[Paki ʼo te pasina 186]

E kita faka apaapa koa kite Folafola ate Atua mo kapau e mole kita mulimuli kita kiai?

[Paki ʼo te pasina 188, 189]

Ko Sesu nee mole fia liliu ia kohe pule faka politike

[Paki ʼo te pasina 190]

E faka afe atu koutou mote loto katoa ke koutou olo o sisio ite u fakatahi ate kau Faka mooni a Sehova