ʼE Maʼuhiga Koa Kia Koutou Te Tohi-Tapu?
KUA hili kiai ia taʼu e 200, neʼe tupu ia Mary Jones ʼi Llanfihangel, ko he kolo mamaʼo Gallois ʼe ōvi ki te mata fenua ʼo te Arctique. Ko tana ʼu mātuʼa neʼe ko he ʼu hahaʼi māsisiva ʼe faʼu kie—neʼe lahi fau tonā māsisiva ʼo mole feala ai hanā totogi hanā Tohi-Tapu. Kae, neʼe nā fakahū ki te loto ʼo tanā taʼahine te ʼofa ʼaē ki te ʼAtua ʼaki tanā fakamatala age te ʼu hisitolia ʼaē tuʼu ʼi te Tohi-Tapu pea mo fakaliuliuga age te ʼu talanoa ʼaē ʼa te Tohi-Tapu neʼe kei nā manatuʼi. Neʼe tau lau e Mary te Tohi-Tapu faka Gallois ʼo tonatou vāhaʼa fale pea neʼe ina kamata tatānaki te kiʼi falā neʼe ina maʼu, ko tana lotomālohi ʼaē ke ina totogi hana Tohi-Tapu.
ʼI te taʼu 1800, ʼi te taʼu 16 ʼo Mary, neʼe ina logoʼi te ʼui ʼaē ʼe fakatau te ʼu Tohi-Tapu faka Gallois ʼi te kiʼi kolo veliveli ʼo Bala ʼe tuʼu ia kilometa e 40 ʼi te kolo ʼaē ʼe nofo ai. ʼAki he lotomālohi, neʼe ina fakatotonu ʼi tona loto ke ʼalu ki te kolo ʼaia. Pea neʼe ʼalu ai, ʼo ʼalu kiliʼi vaʼe ʼi te ʼu kiʼi moʼuga. Kae ʼi te temi ʼaē neʼe tau atu ai, neʼe kua ʼosi totogi fuli te ʼu tohi. Neʼe toe ʼiloʼi ai foki e Mary ko te falā ʼaē neʼe ina tānaki neʼe mole feʼauga ia.
Neʼe malave ki te loto ʼo te patele ʼo te koga meʼa ʼaia te mālama pea mo te ʼofa ʼaē ʼa Mary ki te Tohi-Tapu. ʼI tana sio ʼaē ki te maligi ʼo tona ʼu loʼimata tupu mai tana lotovaivai ʼaē ʼi te hili ʼo te ʼu faiga fuli ʼaē neʼe ina fai, neʼe ina foaki fakaʼofa age tana tohi, ʼo ina ʼui fēnei: “Lau fakalelei te tohi, ʼo ke ako fakatepitepi te tohi ʼaia, taupau fakalelei te ʼu kupu maʼoniʼoni ʼi tou ʼatamai, pea ke ke maʼuli ʼo mulimuli ki tana ʼu akonaki.”
Ki muli age neʼe fakamatala te hisitolia ʼaia ʼi te fono ʼa te Komite ʼo Te Sosiete Faka Lotu ʼo Lonitoni. ʼI ai neʼe fai te fakatuʼutuʼu ke tufa ni ʼu fakaliliu ʼo te Tohi-Tapu ʼo mole gata pe ki te hahaʼi ʼo te Pays de Galles kae ki te malamanei katoa. ʼAki te kiʼi meʼa noa pe ʼaia, neʼe tupu ʼaki ai te ʼu ʼuluaki sosiete faka Tohi-Tapu ʼo te 19 sēkulō. Ki muli age, neʼe lahi te ʼu hiki faka Tohi-Tapu neʼe kamata tā ʼi te ʼu lea kehekehe.
Ia ʼaho nei, ko te Watch Tower Bible and Tract Society, ʼaē neʼe fakatuʼu ʼi te taʼu 1884, ʼe ina tā te ʼu Tohi-Tapu pea mo te ʼu tohi ʼe tokoni ki te ako ʼaē ʼo te Tohi-Tapu ʼi te ʼu lea e 200 tupu. ʼI te malamanei katoa, neʼe ina tufa te ʼu hiki faka Tohi-Tapu e 72 miliona ʼo te Les Saintes Ecritures—Traduction du monde nouveau ʼi te faʼahiga palalau ʼo totatou temi. Neʼe fakaliliu mai te faka Hepeleo pea mo te faka Keleka ʼo te temi muʼa, pea ko te Traduction du monde nouveau ʼe kua maʼu katoa nei peʼe fakakoga ʼi te ʼu lea e 18 pea ʼe kei lolotoga fakaliliu nei ki te tahi age ʼu lea e 12.
ʼI te kua feala nei ki te tokolahi ke nātou maʼu gafua ia te Tohi-Tapu, koteā takotou manatu ki te faʼahi ʼaia? ʼE maʼuhiga koa kia koutou te Tohi-Tapu? ʼE ʼi ai koa hakotou Tohi-Tapu ʼe koutou leleiʼia pea mo lau?
[Haʼuʼaga ʼo te paki pasina 3]
From the book The story of Mary Jones and Her Bible