Apalahamo—Neʼe Tanu ʼi Henī, Kae ʼe Kei Maʼuli?
Lolotoga te ʼu sēkulō, neʼe fagona mai te kau Sutea, mo te kau Mahometa, pea mo te kau Kilisitiano ki te koga meʼa ʼaenī.
ʼE feala ke koutou ʼaʼahi te koga meʼa ʼaia ʼi te kolo ʼāfea ʼo Hepelone, ʼi te potu toga ʼo Selusalemi. Ko te koga meʼa ʼaia ʼe fakahigoaʼi ko Haram el-Khalil pea ko te Faitoka ʼaia ʼa te kau Pateliaka. ʼIo, kua tali e te tokolahi ko te koga meʼa ʼaia ko te tānuma ʼa te ʼu pateliaka ko Apalahamo, mo Isaake, pea mo Sakopo, ʼo feiā mo ʼonatou ʼu ʼohoana ko Sala, Lepeka, pea mo Lea.
Koutou manatuʼi foki ʼi te Tohi-Tapu ʼi te mate ʼo tona ʼohoana ʼofaina ko Sala, neʼe totogi e Apalahamo te tānuma, ko te ʼana pea mo te moʼi kele ʼi Makepela, ʼe ōvi ʼi Hepelone. (Senesi 23:2-20) Ki muli age, neʼe tanu mo Apalahamo ʼi ai, ʼo feiā mo ʼihi hahaʼi ʼo tona famili. Hili te ʼu sēkulō kiai, ʼi te ʼu tafa ʼo te tānuma ʼāfea, neʼe laga e Helote Lahi te toe fale ʼaki te temi neʼe fetogi pea mo fakalahi e nātou ʼaē neʼe nātou puleʼi, ʼo fakahā ai te faʼahiga meʼa neʼe nātou tui kiai.
ʼI te hūʼaga, ʼe koutou sio ki te ʼu cenotaphs e ono (ko te ʼu maka fakamanatu peʼe ko te ʼu falemaka gaʼasi). ʼE fakahā e te kiʼi paki te falemaka ʼo Isaake, te foha ʼo Apalahamo. ʼI ai, ʼe ʼi ai te ʼu luo ʼi te kele, neʼe fakaʼaogaʼi moʼo kaku ki te meʼa ʼaē ʼi lalo. Neʼe maʼu e te ʼu hahaʼi ʼaē ʼe nātou kumi meʼa te ʼu koga fale neʼe lagi maʼu ai te ʼu tuʼuga hui ʼāfea.
E feafeaʼi ki ʼaē ʼa Apalahamo? Kapau neʼe tanu ʼi he ʼana ʼi te temi nei ʼi te lalo koga meʼa ʼaia, kua fualoa tana mate, ʼe mole koa la moʼoni? Tokolahi te hahaʼi mamata ʼe nātou ʼio anai kiai. Kae neʼe ʼui e te polofeta ʼe lahi age ia Apalahamo, ʼi he faʼahiga ʼaluʼaga, ko Apalahamo ʼe kei maʼuli. ʼO feafeaʼi? Pea koteā ʼe hilifaki e te meʼa ʼaia ki takotou tui?
Koutou lau te alatike “Ko Te ʼu Hahaʼi Kua Mamate Neʼe Koutou ʼOʼofa Mamahi Ki Ai—E ʼIfea Koa Ia Nātou?” (Pasina 3) ʼE ina fakahā te faka ʼuhiga ʼo te ʼui ʼaē e te polofeta lahi ʼaia ko Apalahamo ʼe kei maʼuli, ʼaē ko he logo ʼe feala ke lahi tona ʼuhiga kia koutou pea mo tokotou famili.