Ko He ’Ēkelesia Kua Maveuveu—E Feafeaʼi Tona Kovi?

“OHAGE ko he foʼi famili, ʼe maʼuli ʼi he loto fale ʼāfea kua maumau pea ko tona kaupā ʼaē ʼe haga ki muʼa neʼe tō fakafokifā, ʼe hage pe ʼe logoaʼa ʼi te ʼu koga fale fuli—ʼaki te tā ʼo te lali ko te fānau ʼa Sesu ʼe nātou kalaga ʼo fakahaga ki te kau homosexuels Anglo-Catholiques ʼaē ʼe teu ki tonatou ʼu kofu ʼuli silika matalelei.”—The Sunday Times, Lonitoni, ʼaho 11 ʼo ʼApelili 1993.

Ko te famili ʼaia ʼe ko te ’Ēkelesia Pilitania. ʼE logoaʼa ia ʼo ʼuhiga mo te fakagafua ʼaē ʼo te fakanofo patele ʼo te hahaʼi fafine. Ko te fakatā ʼaē neʼe fakamatala ʼi te ʼuluaki palakalafe ki ʼoluga atu neʼe fai moʼo fakahā ia te mole kei logo tahi ʼa te Keletiate katoa. Ko te ikuʼaga tāfito ʼo te fakafisi ʼaē ʼa te kau pateliaka ʼo te ’Ēkelesia Orthodoxe pea mo te tuʼi tapu ki te fakanofo patele ʼa te hahaʼi fafine, ohage ko tona fakaʼosi e te nusipepa, “kua ʼāsili faigataʼa age te fakahoko ʼo te misi ʼaē ke fakatahiʼi ia faʼahi fuli ʼo te Keletiate.”

E Feafeaʼi Koa Te Maveuveu ʼa Te ’Ēkelesia?

Kapau ʼe tou lau ia Mateo 7:21, neʼe ʼui e Sesu Kilisito, ʼe ʼui anai e te tokolahi ʼe nātou tui kia te ia ko te ʼAliki kae mole ‘nātou fai anai te finegalo ʼo tana Tāmai.’ ʼE ʼui fēnei e te nusipepa (Maclean): “Ko te kau lautohi ʼo Mateo ʼaē ʼe nātou kumi te maʼuli, ʼe feala anai pe ke mole tukugakoviʼi ki tanatou faihala ʼaē ki te ʼuhiga tonu ʼo te finegalo ʼo te ʼAtua, ʼi te kehekehe ʼaē ʼo te manatu ʼa te kau Kilisitiano pea mo tonatou ʼu ʼēkelesia ki te fehuʼi ʼaia.” ʼO mulimuli ki te manatu ʼa te kau Kanata, “ ʼe lahi te ʼu faʼahiga akonaki pea mo te ʼu gāue ʼa te kau Kilisitiano ʼo Kanata ʼi he lotu pe e tahi ia nātou ʼaē ʼe lotu kehekehe.”

ʼO mulimuli pe ki tona sivisivi mai, ko te toko 91 ki te teau ʼi te kau Katolika ʼe nātou tali ia te fakaʼaogaʼi ʼaē ʼo te ʼu meʼa ke mole maʼu ai he fānau tatau aipe pe mole tali e tonatou ʼu ʼēkelesia te faʼahi ʼaia; ko te toko 78 ki te teau ʼe nātou manatu ʼe tonu ke fakagafua te fakanofo patele ʼa te hahaʼi fafine; pea ko te toko 41 ki te teau ʼe nātou tali te fakatō fatu heʼe mulimuli pe “ki te ʼu ʼaluʼaga.” ʼE ʼui e te nusipepa (Maclean), ko te mole logo tahi ʼa te ʼu lotu kehekehe ʼo ʼuhiga mo te ʼu “tuʼuga fehuʼi faka teolosia, ʼe ina fakaʼāsili age te pulinoa ʼo te mālohi ʼo te ʼu ʼēkelesia.”

Ko Te ʼu Lao ʼe Kehekehe Pe Tonatou Faka ʼUhiga

ʼO ʼuhiga mo te aga ʼaē ʼe tonu ke fai, ʼe ʼi ai te ʼu lao ʼe kehekehe pe tonatou faka ʼuhiga ki te hahaʼi, ko te ʼu lao ʼaia ʼe mulimuli pe ki te ʼu ʼaluʼaga ʼe hoko pea mo tona ʼu faʼahiga hahaʼi. ʼE toe ʼi ai pe foki la mo te ʼu lao ʼe fakafeagai ki te ʼu aga ʼaia ʼaē ʼe tonu ke fai. Ko ʼihi ʼe nātou ʼui ʼe nātou lagolago ki te ʼu pelesepeto ʼo te Tohi-Tapu, kae ko ʼihi ʼe nātou manukinuki nātou ki te ʼu pelesepeto ʼaia. Ohage la, ko te fakatapu ʼaē neʼe fai ʼi te ’Ēkelesia Métropolitaine ʼo Toronto ki te ʼu fafine e lua ʼe faiʼakau, neʼe ʼalutahi koa mo te finegalo ʼo te ʼAtua? ʼE mahino ia ko te foʼi toko lua ʼaē neʼe fakatapuʼi neʼe nā ʼui pe ko te finegalo ia ʼaia ʼo te ʼAtua. Neʼe nā ʼui fēnei, “ ʼE ma fia fai he toʼotoʼoga ke hā ki te hahaʼi pea mo te ʼAtua tomā feʼofaʼaki.”

Ko te tagata ʼe faitohi ʼi te sulunale neʼe ina feʼekeʼaki pe neʼe lava feafeaʼi ki te “ ʼēpikopō Katolika ʼaē neʼe fai age ki ai te ʼu tuʼuga lāuga, hana fekauʼi ni ʼu patele ʼe aga fakalialia ki te tamaliki ki te tahi age ʼēkelesia ʼaē ʼe feala aipe ke nātou felāveʼi mo ni ʼu tamaliki ʼe hahaʼi age.” ʼE ʼui e te patele ko Andrew Greeley, mai te toko 2 000 ki te toko 4 000 patele, lagi neʼe nātou fakaʼalikiʼi te kau tūpulaga e toko 100 000 e taʼu 16, ʼo tautau fai pe foki ki niʼihi age ʼu tamaliki ʼe veliveli age tonatou ʼu taʼu.

Ko he ʼēkelesia ʼe mole logo tahi ʼe ina fakatupu pe te ʼu hahaʼi ʼe mole logo tahi. ʼI te ʼu fenua Balkans, ko te kau “Kilisitiano” Serbes pea mo te kau Croates ʼe nātou ʼui ʼe kau ia Kilisito mo nātou ʼi tanatou tau ʼaē ki te “faitotonu.” Tokolahi ʼe nātou tau te ʼu koluse ʼi te tau, ko te tahi neʼe ina “tuku tuʼumaʼu ʼi tona gutu te koluse ʼi te temi ʼaē neʼe mālohi ʼaupito ai te tau.”

“Ke ʼAua Naʼa ʼi Ai He ʼu Maveuveu Ia Koutou”

Ko te Tohi-Tapu ʼe ina tuku ʼihi ʼu fehuʼi ke sivisivi pe e te leʼo ʼo loto, kae mole tonu anai ke ina faka fealagia he taʼi maveuveu feiā. ʼE fakahā fakalelei e te ʼapositolo ko Paulo, ʼo fēnei: “ ʼE tonu anai ke koutou palalau ʼaki he logo tahi fakalelei, pea . . . ke ʼaua naʼa ʼi ai he ʼu maveuveu ia koutou.”—1 Kolonito 1:10; Efesi 4:15, 16.

Ko te vakaʼi fakalelei ʼo te “Lotu Faka Kilisitiano” ʼaē kua hili kiai taʼu e lua afe ʼi te ʼosi tohi e te ʼapositolo ko Paulo ʼo te ʼu palalau ʼaia, ʼe malaga ʼaki te ʼu fehuʼi maʼuhiga. He koʼe koa ʼe maveuveu feiā te kau “Kilisitiano”? Ko he taʼi ʼēkelesia maveuveu feiā, ʼe feala koa ke tuʼu maʼu? ʼE mole feala anai koa ia ʼi he temi ke maʼu he logo tahi ʼi te Keletiate? ʼE talanoa anai te alatike ka hoa mai ki te ʼu fehuʼi ʼaia.

[Paki ʼo te pasina 3]

Ko te fakafeagai ʼa te kau patele ʼo ʼuhiga mo te fakatō fatu

[Haʼuʼaga ʼo te paki]

Cover and above: Eleftherios/Sipa Press