“ ʼE Ko Te Aga La ʼAia ʼe Tonu Ke Maʼu e Te Kau Kilisitiano Moʼoni”

ʼI TANA tohi (Arbeit macht tot—Eine Jugend in Auschwitz) ʼo te taʼu 1990, ko Tibor Wohl neʼe hāo mai Auschwitz ʼe ina fakamatala te fai palalau neʼe ina logoʼi ʼo ʼuhiga mo te ʼu tagata pilisoni e lua. Ko te tahi, ko te Otilisia, neʼe ina ʼui ko ia “ ʼe mole tui.” Kae, neʼe ina vikiʼi te kau pilisoni ʼaē neʼe ʼi ai tonatou fakaʼiloga huʼa lotuma—ko te kau Ako ʼo te Tohi-Tapu, neʼe ko te higoa ʼaia ʼo te kau Fakamoʼoni ʼa Sehova ʼi te ʼā fakamamahi.

“Neʼe mole nātou kau ki te tau,” ʼe ko te ʼui ʼaia ʼa te Otilisia ki tona kaumeʼa. “Neʼe nātou leleiʼia age ke matehi nātou ʼi hanatou matehi ʼo he tahi age. ʼI taku manatu ʼe ko te aga ʼaia ʼaē neʼe tonu ke fai e te kau Kilisitiano moʼoni. ʼE ʼau fia fakamatala te meʼa neʼe hoko ʼi taku nofo ʼaē mo nātou. Neʼe mātou nofo fakatahi mo te kau Sutea pea mo te kau Ako ʼo te Tohi-Tapu ʼi te tahi faʼahi ʼo te ʼā fakamamahi ʼo Stutthof. ʼI te ʼu ʼaho ʼaia ko te kau Ako ʼo te Tohi-Tapu neʼe nātou gāue kinakina ʼosi, ʼi tuʼa ʼi te momoko. Neʼe mole mātou mahino pe neʼe feafeaʼi tanatou hāo mai ai. Neʼe nātou ʼui neʼe ko Sehova ʼaē neʼe ina foaki age kia nātou te mālohi. Neʼe ʼaoga kia nātou tanatou ʼu moʼi pane, koteʼuhi neʼe nātou pakupapaku. Kae ʼe koteā ʼaē neʼe nātou fai? Neʼe nātou fakamāʼopoʼopo fuli tanatou ʼu moʼi pane, neʼe nātou vaelua mo tonatou ʼu tēhina ʼi te faʼahi fakalaumālie, ʼaē mai ʼihi ʼu ʼā fakamamahi neʼe pakupapaku. Pea neʼe nātou tali ia nātou ʼo nātou fekita. ʼI muʼa ʼo tanatou kakai, neʼe nātou faikole, pea neʼe ʼasi ʼi ʼonatou ʼu fofoga tanatou fiafia. Neʼe nātou ʼui neʼe mole kei ʼi ai he tahi neʼe pakupaku. Koia la ʼaē, koutou sio, koʼeni te meʼa neʼe ʼau manatu pe ʼi toku loto, ‘Ko nātou ko te kau Kilisitiano moʼoni.’ Neʼe nātou hage pe ko te meʼa ʼaē neʼe ʼau manatu tuʼumaʼu kiai ʼo ʼuhiga mo te kau Kilisitiano, ʼe tonu ke nātou feiā. ʼE ko he meʼa lelei anai te foaki ki he ʼu kaumeʼa pakupaku te taʼi tali kāiga ʼi henī ʼi Auschwitz!”