Ko Te ʼu Famili Agatonu ʼe Nātou Fakahaʼele Vave Te Tuputupu ʼi Sri Lanka

NEʼE ʼiloa ʼaki te higoa ʼaē ko Ceylan ʼo aʼu ki te taʼu 1972, ko Sri Lanka ko te motu matalelei pea ko te ʼu kauvai ʼo tona ʼu matatai ʼe tuʼu ai te ʼu fuʼu pālema, te ʼu moʼuga, pea mo te ʼu kiʼi toafa. ʼI te ʼu koga meʼa māʼoluga ʼaia, ko te Moʼuga ʼo Adam, ʼaē ʼe meta 2 243, ʼe ko he koga meʼa taputapu ʼo te ʼu lotu lalahi e fā.a ʼE ōvi kiai te World’s End, ʼe ko he potu māʼoluga ʼe tuʼu ai te mato maka ʼe meta 1 500. ʼE foaki e te koga meʼa ʼaia he mamata fakaofoofo ʼe lahi age ʼo te fenua ʼo Sri Lanka.

Ko te toko 18 miliona hahaʼi ʼi Sri Lanka ʼe nātou vaevae te fenua matalelei. Talu mai te nima sēkulō ʼo totatou temi, neʼe fakahahaʼi te motu e te ʼu hahaʼi Initia-Eulopa mai te potu tokelau ʼo Initia. Ko nātou ko te kau Cinghalais, pea ʼe nātou faʼufaʼu nei ko te toko 75 ki te teau ʼo te hahaʼi ʼaē ʼe maʼuʼuli ai. Kae, ʼi te lagi kamata ʼo te 12 sēkulō, neʼe ʼohofi te fenua e te kau Tamils mai te potu toga ʼo Initia; ʼe nātou maʼuʼuli nei ʼi te potu tokelau pea mo te potu hahake ʼo te motu. Ko te kau Potukalia, mo te kau Holani, pea mo te kau Pilitania neʼe nātou toe fai pe foki mo tanatou fakaʼiloga ʼi te temi ʼaē neʼe hoko ai te ʼohofi ʼo te fenua e te ʼu hahaʼi kehe. ʼO hilifaki kiai, ko te hahaʼi faifakatau koloā ʼi te tai ʼaē mai te ʼu motu lalahi ko Alapi pea mo Malesia neʼe nātou ʼōmai ʼo nonofo mo te hahaʼi ʼo te fenua. ʼE toe ʼi ai pe foki te ʼu kūtuga mai te Eulopa, te kau Parsis, mo te kau Siaina, pea mo ʼihi age.

ʼO mole gata pe ki te fefioʼaki ʼaē ʼo te ʼu lanu, ko te lea pea mo te lotu ʼi Sri Lanka ʼe hā ai te kehekehe ʼo te fenua. Ko te ʼu lea tāfito ʼaē ʼi te motu ko te Cinghalais, te Tamil, pea mo te Fakapilitānia. Tokolahi te kau Sri Lanka ʼe teitei pe ke nātou palalau te ʼu lea e lua ʼi te ʼu lea ʼaia e tolu. Ko te ʼu haʼuʼaga kehekehe fakafenua ʼe toe maʼuhiga foki ʼi te lotu ʼa te hahaʼi. Tokolahi te kau Cinghalais ʼe nātou Putisi, kae tokolahi ʼi te kau Tamils ʼe nātou Inituisi. Ko nātou ʼaē ʼe nātou fakakaugā ki te kau Alape peʼe ko te kau Malais ʼe nātou mulimuli ki te Lotu Faka Iselame, pea ko nātou ʼaē ʼe fakakaugā ki te ʼu hahaʼi ʼo Eulopa, ʼi te agamāhani ʼe nātou kau ki te ʼu ʼēkelesia ʼo te Keletiate, Katolika pea mo Polotesita.

Felāveʼi Mo Te Gāue ʼe Faigataʼa

Ko te ʼu meʼa fuli ʼaia neʼe ko te ʼu meʼa faigataʼa ki te kau Fakamoʼoni ʼa Sehova ʼi Sri Lanka. Ko nātou ʼaia neʼe nātou gāue kinakina moʼo faka mafola te fakatotonu ʼaenī ʼa Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa.” (Mateo 24:14) ʼAki te lahi ʼaē ʼo te ʼu lea, neʼe feala pe ki te kau fai faka mafola ʼo te logo lelei ke nātou palalau ki te kau Putisi, te kau Inituisi, mo te hahaʼi ʼo te ʼu ʼēkelesia ʼo te Keletiate, ʼo toe feiā aipe kia nātou ʼaē ʼe mole tui ki te ʼAtua,—kia nātou fuli ʼaia ʼi he ʼu kiʼi hola veliveli pe ʼi te fai faka mafola.

Ke lelei te fakahoko ʼaē ʼo tanatou minisitelio, ko te kau fai faka mafola neʼe tonu ke nātou toʼo te ʼu nusipepa ʼo Te Tule Leʼo pea mo te Réveillez-vous! pea mo ʼihi tohi faka Tohi-Tapu ʼi te lea Tamil, Cinghalais, ʼi te lea Fakapilitānia. Ko nātou ʼaē neʼe mālolohi ke nātou toʼo he kavega mamafa neʼe nātou toe toʼo aipe mo te ʼu Tohi-Tapu ʼi te ʼu lea ʼaia. Mole heʼeki fualoa, neʼe fiafia ʼaupito te kau fai faka mafola ʼi tanatou maʼu ʼaē ʼo te ʼu kaupepa lalahi ʼE Tokaga Moʼoni Koa Te ʼAtua Kia Tatou? pea mo te kaupepa Nos problèmes—Qui nous aidera à les résoudre? pea mo te kiʼi pepa lotu ʼE Hāo Anai Koa Te Mālama ʼAenī? ʼaē neʼe tā ʼi te moʼi temi pe e tahi ʼi te ʼu lea e tolu. ʼO faka ʼuhiga te faʼahi ʼaia ko he ʼu meʼa gāue ʼe lahi age ki te minisitelio.

Neʼe gāue kinakina te kau Fakamoʼoni talu mai te taʼu 1912, ʼi te temi ʼaē neʼe fai e Charles Taze Russell tana ʼaʼahi fakanounou ki Ceylan, ʼi te temi ʼaē neʼe kei pelesita ai ʼi te Association international des Étudiants de la Bible. Kae neʼe ʼamanaki ki he tuputupu maʼuhiga ʼaki te ʼōmai ʼaē ʼo te kau maʼu pepa ʼo te Faleako Faka Tohi-Tapu ʼo Kalaate ʼo te Watchtower ʼi te taʼu 1947. Talu mai ai, neʼe fiafia te kau fai faka mafola ʼo Sri Lanka ʼi te ʼu fua lelei ʼo tanatou gāue fai faka mafola. ʼI te taʼu 1994, ko te kau fai faka mafola e toko 1 866 ʼo te Puleʼaga neʼe fakafuafua ko tanatou ʼu ako faka Tohi-Tapu e 2 551 neʼe fai ʼi te māhina fuli. Pea ki te toko 6 930 ʼaē neʼe kau ki te ʼaho ʼo te Fakamanatu ʼo te mate ʼa Sesu neʼe teitei tuʼa fā te laka ʼo tona hahaʼi ʼi te kau fai faka mafola ʼo te ʼu kokelekasio fuli ʼaē ʼi Sri Lanka. ʼI tapuakina fakaofoofo leva!

Mokā fakatatau mo te tahi age ʼu motu, ʼe hage mai ia ko te tuputupu ʼaē ʼi Sri Lanka ʼe māmālie pe ia. Ko tona tupuʼaga, ko te ʼu felogoi lelei ʼa te ʼu famili. Kae, ko te faʼahi ʼaia ʼe feala ke ʼi ai hona ʼu fua lelei. ʼI te temi ʼaē neʼe hū ai te ofisie ʼo te kautau Loma ki te moʼoni, neʼe tali e tona famili te moʼoni. (Gāue 10:1, 2, 24, 44) ʼE toe talanoa foki te tohi ʼo Gāue ki ʼihi ʼu famili Kilisitiano mālohi, ʼo kau ai te famili ʼo Litia, ʼo Crispus, pea mo te tagata leʼo pilisoni ʼo Paulo mo Silasi.—Gāue 16:14, 15, 32-34; 18:8.

Koia, ko te ʼu felogoi lelei faka famili ʼe feala ke liliu ʼo lelei ʼi te faʼahi ʼaē ʼe ʼi ai he fakatuʼutuʼu lelei pea mo faʼa kātaki ʼi te agatonu. ʼI tana manatuʼi ʼaē te ʼu palalau ia Isaia 60:22, ʼe ʼui fēnei e Ray Matthews, ko te misionea mai fualoa: “Kua ʼiloga ia ko Sehova ʼe ina fakahaʼele nei te ʼu meʼa ki muʼa ʼi tona temi tonu, ʼo mole ina fakahoko te faʼahi ʼaia ʼaki pe he ʼu tagata takitokotahi kae ʼe ina toe fakahoko ʼaki te ʼu famili foki.”

Ko Te Fakatuʼutuʼu ʼe Lelei ʼa Te Famili ʼe Ina Foaki Te Fakavikiviki

ʼE mahino papau ia ʼe ʼi ai ni ʼu taʼi famili agatonu feiā ʼi Sri Lanka ia ʼaho nei. Ohage la, ʼe ʼi ai te fakatuʼutuʼu lelei ʼa te famili Sinnappa ʼaē ʼe maʼuli ʼi Kotahena, ko te faʼahi ʼo Colombo, te kolo lahi ʼo Sri Lanka. Logope te mole faʼa fualoa ʼo te mate ʼo te pule ʼo te famili, ia Marian, ko tona ʼohoana, ia Annamma, pea mo te toko 12 ʼi tanā ʼu tamaliki ʼaē e 15, ʼaē mai te taʼu 13 ki te taʼu 33, ʼe nātou haga tauhi aipe kia Sehova ohage ko he famili. ʼI te temi ʼaē ʼe tohi ai te alatike, ko te toko valu ʼi te fānau kua papitema, pea ko te toko tolu ia nātou ʼe kau ʼi te minisitelio katoa, ʼo nātou gāue ohage ko ni ʼu pionie katoa. Ko te toko tolu ʼe nātou tautau toʼo te pionie vaeluaʼi temi. Ko te toko fā ʼi te fānau ʼaē kei tūpulaga ʼe ko te kau kaugā fagona. Pea tahi ʼaē meʼa, ko te ʼu mokopuna e toko fā, logope la ʼe kei nātou veliveli, ʼe nātou ako te Tohi-Tapu pea mo kau ki te ʼu fono faka Kilisitiano ʼi te Kokelekasio ʼo te Potu Tokelau ʼo Colombo ʼa te kau Fakamoʼoni ʼa Sehova.

Neʼe ʼuluaki logo ia Annamma ki te logo lelei ʼo te Puleʼaga ʼi te taʼu 1978 ʼi tana toʼo Te Tule Leʼo. Neʼe kamata te ako faka Tohi-Tapu, pea ʼi tana ʼosi akoʼi fuli te tohi faka Tohi-Tapu ʼaē ko te La vérité qui conduit à la vie éternelle, neʼe foaki ai leva e Annamma tona maʼuli kia Sehova pea neʼe papitema, ʼo ina tuku ai te faʼifaʼitakiʼaga ki te tokolahi ʼo tona famili.

Ohage ko te tagata solia ko Kolonelio, neʼe fai e Annamma he fakatuʼutuʼu lelei ʼi tona famili. ʼE manatuʼi e Annamma: “Neʼe mātou fai te ʼu fakatuʼutuʼu ʼo ʼuhiga mo te ʼu fono faka Kilisitiano pea mo te ʼu fakatahi—ʼo mole mātou talanoa ki te ako. Neʼe faigataʼa te maʼu ʼo he ʼu mutuʼi meʼa, kae ʼaki te tapuakina ʼa Sehova neʼe feala pe ke mātou fai he ʼu mutuʼi meʼa foʼou ki te ʼu fakatahi fuli. Ko te famili katoa neʼe ʼolo kua teu lelei pea mo makokona—pea neʼe nātou mata malimali.”

ʼE manatuʼi e te ʼu fānau tanatou fakatuʼutuʼu faka famili ʼaki te ʼofa. Moʼo tokoni ki te famili katoa ke kau ki te ʼu fono faka Kilisitiano, ʼi te agamāhani neʼe foaki kia nātou ʼaē kua lalahi he ʼu maʼua makehe. Ohage la, ko Mangala ʼaē neʼe fai fō, pea ko Winnifreda ʼaē neʼe ina fai te fakamolemole. ʼE ʼui fēnei e Winnifreda, ʼaē neʼe toe tokoni pe foki ki te teuteuʼi ʼo nātou ʼaē kei veliveli: “Ko te ʼu fānau fuli neʼe maʼa ʼi tanatou mavae mai fale.”

Neʼe toe fai pe foki he fakatuʼutuʼu lelei ʼo ʼuhiga mo te meʼa kai fakalaumālie. ʼE manatuʼi e te taʼahine ko Pushpam, ʼi te temi nei ko te pionie katoa, ʼo fēnei: “ ʼI te ʼaho fuli, neʼe fiafia tamatou famili ʼi tana fai fakatahi te lautohi ʼo te Tohi-Tapu pea mo toe vakaʼi te vaega faka Tohi-Tapu ʼo te ʼaho.” ʼE toe ʼui fēnei e Annamma: “Ko te ʼu fānau takitokotahi neʼe nātou maʼu tanatou Tohi-Tapu, Te Tule Leʼo, pea mo ʼihi ʼu tohi faka Tohi-Tapu. ʼE ʼau fakalogo lelei ki tanatou ʼu tali fuli ʼi te ʼu fono. Mokā mātou tau ki fale, ʼe ʼau toe fakaloto mālohiʼi nātou pea mo fakatonutonuʼi mo kapau ʼe ʼau fakafuafua ʼe ko he meʼa ʼe ʼaoga kia nātou. ʼI te pōʼuli ʼe mātou faikole fakatahi moʼo fakaʼosi ʼo te ʼaho.”

Ko te ʼu fānau lalahi neʼe ko te ʼu tokoni maʼuhiga kia Annamma moʼo foaki he ako faka Kilisitiano lelei ki te famili katoa. Kae ko te fakamaʼua lahi ʼo tanatou fakatuʼutuʼu neʼe mole ina tāʼofi tanatou holi ʼaē ke nātou vaevae te logo lelei ʼi tuʼa atu ʼo tonatou loto fale. Ko nātou ʼaia mokā fakatahiʼi tanatou ʼu ako, ʼe nātou fai te ʼu ako faka Tohi-Tapu e 57 ʼi te ʼu ʼapi mo te hahaʼi ʼo tonatou vāhaʼa fale. ʼE ʼui fēnei e Rajan te ʼohoana ʼo te taʼahine ʼa Annamma: “ ʼE takitaki e te famili te ʼu ako Tohi-Tapu ʼe tuputupu. ʼE kua ʼosi maʼu e toku ʼohoana, ia Pushpam, te pilivilesio ʼaē ʼo te sio ki te tahi ʼo tana kau ako ʼe ina foaki tona maʼuli kia Sehova.”

ʼE ko he meʼa fakapuna’maʼuli ki te hahaʼi ʼi Kotahena ʼi te temi ʼaē neʼe mavae ai te foʼi famili ʼi te ’Ēkelesia Katolika Loma. Logope te mole ʼaʼahi tuʼa tahi e te patele te famili moʼo mahino ki te tupuʼaga ʼo tanatou mavae mai te ʼēkelesia, neʼe ina fehuʼi age ki te hahaʼi tui ʼo te ʼēkelesia ke nātou fai he kumi. Neʼe lahi ai te ʼu fai palalau, tāfito la ʼo ʼuhiga mo te akonaki ʼo te Tahitolu. Neʼe falala tuʼumaʼu pe ia Annamma kia Sehova pea mo te Tohi-Tapu moʼo taupau tana tui. Ko te vaega ʼaē neʼe ina leleiʼia ki te ʼu fai palalau ʼaia ko te vaega ʼo Soane 17:3.

Neʼe fakahā lelei e te famili Sinnappa ko he fai ʼo he fakatuʼutuʼu lelei pea mo faiga tuʼumaʼu ʼe feala ke maʼu ai he ʼu fua ʼe lelei. ʼAki tanatou ʼu faiga mālohi, ʼe tuputupu te taʼiake foʼou ʼo te kau fai faka mafola ʼo te Puleʼaga, ko nātou fuli ʼe nātou fakavikiviki kia Sehova.

Ko Te Fakafeagai ʼe Ina Fakatahiʼi Te Famili ʼi Te Tauhi Moʼoni

ʼO mole faʼa mamaʼo mo te ʼapi ʼo te famili Sinnappa, ko te famili Ratnam ʼe nonofo ʼi Narhenpitya ko te tahi kolo ʼo Colombo. Mo nātou pe foki ʼi muʼa atu neʼe ko te ʼu Katolika Loma. ʼI te taʼu 1982, ko te ʼu Fakamoʼoni ʼaē neʼe kau ki te gāue faka minisitelio ʼaē ʼi te ʼu ʼapi, neʼe nātou felāveʼi mo Balendran, ko te ʼohoana ʼo Fatima, ko te taʼahine ʼuluaki ʼo te famili Ratnam. Neʼe kamata ai te ako Tohi-Tapu mo te famili katoa. Mole fualoa kiai ko tanā ʼu fānau e toko tolu neʼe nātou fehuʼi age ki te faʼe ʼo tanatou matuʼa, ia Ignasiamal ʼo ʼuhiga mo te huafa ʼo te ʼAtua. ʼI tanatou fakahā age ko “Sehova,” neʼe nātou lagaʼi ʼi te loto ʼo tanatou kui fafine hana fia mahino ʼo ʼuhiga mo te faʼahi ʼaia, pea neʼe kamata ai leva te ako Tohi-Tapu mo ia. Ki muli age, ko tana ʼu taʼahine e lua, ia Jeevakala pea mo Stella, neʼe kau mo nāua ki te ako, pea ʼi te taʼu 1988 neʼe nātou papitema toko tolu.

Lolotoga te temi ʼaia, ko Balendran pea mo Fatima neʼe nā vaevae te moʼoni ki te tahi tēhina ʼo Fatima, ko Mallika, pea mo tona ʼohoana, ia Yoganathan. ʼI te taʼu 1987 ko te taumatuʼa ʼaia neʼe nā papitema, pea neʼe nā fakatuputupu ʼi te loto ʼo tanā ʼu tamaliki e toko lua ia te ʼofa lahi kia Sehova. Ki muli age ko Pushpam, te tahi kiʼi tēhina ʼo Fatima, neʼe haʼu ki te moʼoni. Neʼe ina foaki tona maʼuli pea neʼe papitema ʼi te taʼu 1990. ʼI Tokio, ko tona ʼohoana, ia Eka, neʼe gāue ʼi te kokelekasio lea fakapilitānia, pea neʼe tokoni ia Pushpam ki tana tama veliveli, ia Alfred, ke tuputupu ʼi te ala ʼa Sehova.

ʼO aʼu ki te temi nei, ko te toko fā ʼi te ʼu tamaliki e toko hogofulu ʼo te famili Ratnam neʼe nātou kau ki te tauhi moʼoni. Meʼa fakafiafia foki, ko te tahi ʼu tamaliki ʼe toko tolu ʼe nātou tuputupu lelei ʼi tanatou ako Tohi-Tapu. ʼI te ʼu mokopuna ʼaia e toko 11, ko te taʼahine e tahi, ia Pradeepa, ʼe kua papitema. Ko te ʼu tamaliki e toko fitu ʼi te kau tūpulaga ʼaia ʼe akoʼi tuʼumaʼu nātou ʼi tanatou ako faka famili. ʼO hilifaki ki te ʼu meʼa ʼaē ʼi muʼa atu, ko te ʼu ako Tohi-Tapu e 24 neʼe fai mo te ʼu hahaʼi ʼaē neʼe fia logo ʼo te vāhaʼa fale.

Ko nātou fuli ʼaia neʼe mole faigafua tanatou liliu ko te kau Fakamoʼoni ʼa Sehova. ʼI te kamataʼaga, neʼe ʼi ai te fakafeagai ʼo te famili. Ko te tāmai, ia Muthupillai Ratnam, pea mo te ʼu tēhina lalahi neʼe nātou fakafeagai mālohi ki te kau ʼaē ʼa he tahi ʼi tonatou famili ki te ʼu fono ʼi te Fale ʼo te Puleʼaga peʼe ko te kau ki te gāue fai faka mafola. Logope la ʼaē neʼe faka ʼuhigaʼi te fakafeagai ʼaia ohage ko he puipui ʼo tonatou famili, ʼe ʼui fēnei e Muthupillai: “Neʼe ʼau foaki toku maʼuli ki te ʼu ‘sagato’ pea neʼe mole ʼau leleiʼia te mavae ʼaē ʼo taku famili mai te ’Ēkelesia Katolika.” Kae, ʼi te temi nei, ʼe fakamoʼoni ia, ko nātou ia ʼaē ʼe nātou lolotoga atolasioʼi te ʼAtua moʼoni ʼuhi he feala ke sio ki te ʼu lelei ʼaē ʼe nātou maʼu mai tanatou tui.

Ohage la, ʼi te tahi lakaga neʼe faigaʼi e te pule Putisi ke ina fakamavae nātou mai tona kele, ʼaki hana fakaʼaogaʼi ʼo ni ʼu meʼa fakatemonio. Neʼe haʼu ʼi te tahi po pea neʼe ina ʼatakai te ʼapi ʼaki te ʼu fuaʼi ʼakau ʼaē neʼe fakakākā. Neʼe matataku ʼaupito te hahaʼi ʼo tonatou vāhaʼa fale, pea neʼe nātou ʼamanaki ʼe hoko he meʼa ʼe kovi ki te famili Ratnam. Kae, ʼi te temi ʼaē neʼe maʼu ai e Ignasiamal te ʼu meʼa ʼaia, ko ia pea mo te ʼu tamaliki neʼe nātou tae te ʼu fuaʼi ʼakau ʼo mole nātou matataku peʼe mo tekelili—pea neʼe mole hoko pe la he meʼa ʼe kovi kia nātou. Ko tanatou lototoʼa ʼaia neʼe liliu ia ko he fakamoʼoni ki te kolo, ʼo tupu ai te fakaʼapaʼapa lahi ʼo te hahaʼi kia nātou. Neʼe kamata ai e Stella te ʼu ako faka Tohi-Tapu e lua ʼi te ʼu famili ʼe feōvi pe mo nātou. ʼI te fakaloto mālohi ia ia ʼaki te meʼa ʼaē neʼe hoko, neʼe tali e Nazeera, te ʼohoana ʼo te foha Ratnam, he ako faka Tohi-Tapu.

ʼI tana manatuʼi te ʼu tapuakina lahi ʼaē neʼe maʼu e tona famili, neʼe fakatokagaʼi e Ignasiamal te meʼa ʼaenī: “ ʼE ʼau fiafia ʼaupito ki taku sio ʼaē ki te tuputupu fakalaumālie ʼi te famili. Neʼe tapuakina mātou e Sehova ʼuhi he kua siʼisiʼi te fakafeagai, pea ko te logo tahi ʼo tomatou famili neʼe tuputupu.”

Neʼe liliu ko he toe tapuakina lahi te ʼu famili lalahi ʼaia. Neʼe fakatahi mo nātou te ʼu kiʼi famili veliveli, mo te ʼu loto fale ʼaē ʼe hala tāmai peʼe ko te faʼe, pea mo te kau Kilisitiano takitokotahi ʼaē ʼe nātou faiga fakamalotoloto ke nātou fakahaʼele ki muʼa te faka mafola ʼo te logo lelei ʼo te Puleʼaga ʼi te “motu matalelei,” ohage ko te faka ʼuhiga ʼo te higoa ʼo Sri Lanka. ʼO fakatahi mo tonatou ʼu kaumeʼa Kilisitiano ʼi te malamanei, ʼe fakatalitali te kau Fakamoʼoni ʼo Sri Lanka ki te fakatuʼu ʼaē ʼo te Palatiso, ʼaē ʼe feala pe ʼi te temi nei ke tou fakakaukauʼi ʼi totatou ʼatamai, mokā tou mamata ki te ʼu tai pea mo te ʼu moʼuga matalelei ʼo Sri Lanka.

[Nota ʼi te lalo pasina]

[Paki ʼo te pasina 24, 25]

Tokolahi ʼi Sri Lanka ʼe nātou tali te fai faka mafola pea mo te ako faka Kilisitiano