Ko Te Fakafīmālie Ki Te Kau Mātea

ʼE KO he fakapō ia ʼe fakalialia ʼaupito neʼe fai e te tagata—te toʼotoʼoga ʼaē ʼo te sakilifisioʼi ʼo te ʼu tamaliki. Ko ʼihi ʼe mole nātou faka tui ko te taʼi aga fakalialia ʼaia neʼe hoko moʼoni. Kae ko te fakaʼiloga ʼaia ʼo te tauhi Phénicienne neʼe fakamoʼoni ʼaki te lahi ʼo te ʼu meʼa ʼaē neʼe maʼu ʼi te ako faka alekeoloke.

Ko te ʼu tamaliki ʼo te ʼu famili ʼaē neʼe lelei tanatou ʼu aga ʼaē ʼi tonatou maʼuli, neʼe sakilifisioʼi ʼi te afi maʼa te ʼu ʼatua ko Tanit pea mo Baal-Hammon. ʼI Carthage ko te ʼu vikitima kei tūpulaga neʼe tutu moʼo sakilifisioʼi ki te fakatātā bronze ko Kronos. ʼE ʼui e te tagata fai hisitolia ko Diodore ʼo Sicile ʼi te ʼuluaki sēkulō ʼo totatou temi, ko te ʼu kāiga ʼo te tamasiʼi neʼe mole fakagafua kia nātou ke nātou kekē. Lagi ʼi tanatou manatu ko te ʼu fetāgihi ʼe nātou fakasiʼisiʼi anai te maʼuhiga ʼo te sakilifisio.

ʼI te lolotoga ʼo te tahi temi, ko te toʼotoʼoga feiā neʼe hoko ʼo ōvi age ki Selusalemi ʼi te Tofeti ʼāfea. Neʼe tonu ki te kau atolasio ʼaē neʼe nonofo ai ke nātou memeʼe pea mo tā te ʼu nafa ke ʼaua naʼa logoʼi te ʼu kekē ʼa te ʼu tamaliki ʼi te temi ʼaē neʼe lī ai nātou ki te fatu kakaha ʼo Moleke.—Selemia 7:31.

Neʼe hake ʼi te loto ʼo Sehova te toe ʼita lahi kia nātou ʼaē ʼe mole nātou tokagaʼi te mamahi ʼo ʼihi. (Vakaʼi ia Tāʼaga Lea 21:13.) ʼUhi ko ia ko te ʼAtua ʼe manavaʼofa ki te ʼu tamaliki, ʼe mahino papau ia ʼi te “toe fakatuʼuake mai te mate ʼo te kau faitotonu pea mo te kau heʼe faitotonu” ʼe kau ai anai te ʼu tamaliki ʼaia.—Gāue 24:15; Ekesote 22:22-24.