Kei Koutou Manatuʼi Koa?

Neʼe koutou leleiʼia koa takotou lau te ʼu alatike fakamuli ʼo Te Tule Leʼo? Kapau koia, ʼe koutou leleiʼia anai he toe fakamanatuʼi ʼo te ʼu puani ʼaenī:

▫ ʼE feala koa ke maʼu te moʼoni ʼo ʼuhiga mo te lotu?

Neʼe ʼui fēnei e Sesu Kilisito: “ ʼE koutou ʼiloʼi anai te moʼoni, pea ko te moʼoni ʼe ina faka ʼāteaina anai koutou.” (Soane 8:32) Neʼe fakatokagaʼi mai e Sesu ʼe feala ke tou maʼu te moʼoni, kae neʼe ina fakahā mai ʼe tonu ke tou maʼu ia te moʼoni ʼi tatatou tauhi ki te ʼAtua. Neʼe ina ʼui fēnei ki te fafine Samalitana: “ ʼE atolasio anai ia te kau atolasio moʼoni ki te Tāmai ʼaki te laumālie pea mo te moʼoni.” (Soane 4:23)—15/04, pasina 5.

▫ Neʼe ko ai ia te tagata ʼaē ko Robert Estienne, pea koteā te fakaʼiloga neʼe ina tuku?

Ko Robert Estienne neʼe ko te tagata tā tohi pea neʼe maʼuli ia ʼi te 16 sēkulō. Neʼe ina tuku katoa tona maʼuli ki te tā ʼo te Tohi-Tapu pea neʼe faiga pe ke ina fakahā te ʼu kupu ʼo te Tohi-Tapu ohage ko tona tohi ʼuluaki. Ko tana fakatuʼutuʼu moʼo vaevae ʼo te ʼu tohi ʼo te Tohi-Tapu ʼaki te ʼu vaega kua fakaʼiloga ʼaki te ʼu numelo ʼe ko he faʼahiga fai ʼaia ʼe fakaʼaogaʼi ʼi te temi nei ʼi te malamanei katoa.—15/04, te ʼu pasina 10, 14.

▫ E feafeaʼi hakotou maʼu he ʼu fua lelei ʼi te lau ʼo te Tohi-Tapu ʼi te ʼaho fuli?

Ko te Tohi-Tapu ʼe ʼi ai tona tahi ʼuhiga kia tatou, pea ko te ʼu lea faka polofeta ʼo ʼuhiga mo te ʼu ʼaho fakamuli ʼe ʼāsili maʼuhiga kia tatou he kua tou mālama ki te meʼa ʼaē neʼe tou sio kiai, mo logo kiai, pea mo hoko kia tatou. ʼI tatatou māhani lelei mo te ʼu meʼa ʼaē neʼe hoko kia tatou ʼi totatou maʼuli pea mo tatatou felāveʼi ʼaē mo te ʼu faigataʼaʼia, ʼe tou leleiʼia ʼaupito te tokoni ʼa te Tohi-Tapu. (Tāʼaga Lea 4:18)—01/05, pasina 15.

▫ ʼE lava feafeaʼi he toe manatuʼi ʼo te ʼu vaega ʼo te Tohi-Tapu?

Kapau ʼe koutou lau te Tohi-Tapu, koutou fakaʼiloga te ʼu koga tohi ʼaē ʼe koutou fia tāʼofi, peʼe koutou hiki ki he laupepa pea koutou hilihili ki he faʼahi ʼe koutou sio anai kiai ʼi te ʼaho fuli pe. Koutou fakamanatuʼi te ʼu vaega ʼaia, koutou metitasioʼi pea mo koutou fakaʼaogaʼi. ʼAua naʼa koutou faiga ke koutou taupau fakaʼatamai he ʼu tuʼuga vaega ʼi he temi pe e tahi, lagi ʼe lelei age peʼe ko he vaega e tahi peʼe lua ʼi te vāhaʼa fuli.—01/05, te ʼu pasina 16, 17.

▫ Koteā te tahi fakamatala neʼe hilifaki e Luka ʼi tana Evaselio ʼe mole talanoa kiai te ʼu tagata faitohi Evaselio ʼaē?

Logope la e lahi te ʼu meʼa ʼaē ʼe talanoa kiai ia Luka ʼe tatau mo te ʼu fakamatala ʼa Mateo, ko te 59 ki te teau ʼo te ʼu meʼa ʼaē ʼe ina fakamatala ʼe mole maʼu ʼi te ʼu Evaselio ʼaē. Neʼe fakamatala e Luka te ʼu milakulo e ono ʼi tana tohi, pea neʼe lahi age te ʼu lea fakatātā ʼa Sesu neʼe talanoa ia kiai, kae neʼe mole fakamatala e te kau tagata faitohi Evaselio ʼaē.—15/05, pasina 12.

▫ Koteā te ʼu faka mālamagia fakaofoofo ʼo ʼuhiga mo te moʼoni neʼe fakahā ʼi te taʼu 1935?

ʼI te taʼu ʼaia neʼe mahino ki te hahaʼi ʼa Sehova ko te toe hahaʼi tokolahi ʼaē ʼe talanoa kiai ia Fakahā 7:9, 14, neʼe mole ko he lua kalasi ia ʼe ʼalu ki selo, kae ʼe faka ʼuhiga kia nātou ʼaē ʼe nātou ʼamanaki ke nātou maʼuʼuli ʼi te kele. (Soane 10:16)—15/05, pasina 20.

▫ Ko te ʼu ʼaluʼaga feafeaʼi ʼi totatou maʼuli ʼe feala ai ke tou fakafimālieʼi ia nātou ʼaē ʼe lotomamahi?

Ke koutou fagono. Koutou fakafimālieʼi ia nātou. Ke koutou foaki tokotou temi. Koutou fai he fakatuʼutuʼu mo kapau ʼe ʼaoga. Koutou faitohi peʼe ko he kate ʼe fakaloto fīmālie. Koutou faikole mo nātou. (Sake 5:16) Koutou haga tokoniʼi aipe ia nātou.—01/06, te ʼu pasina 13, 14.

▫ Koteā te meʼa ʼe feala ke fai e ni ʼu tēhina pea mo ni ʼu tuagaʼane ʼi te faʼahi fakalaumālie moʼo tokoniʼi ia nātou ʼaē ʼe maʼuʼuli ʼi te ʼu famili ʼe mavetevete ʼi te faʼahi ʼo te lotu ke nātou lotoʼutaki?

Koutou fai tuʼumaʼu he ʼu palalau ʼe fakaloto mālohi, ʼe lelei, pea mo he ʼu lea ʼe fakaloto fīmālie kia nātou. (1 Tesalonika 5:14) ʼE malave te faʼahi ʼaia kia nātou ohage ko he fakafimālie ki ʼonatou ʼu ʼatamai pea mo ʼonatou ʼu sino. ʼI te temi ʼaē ʼe ʼaoga ai pea mo mata feʼauga, koutou manatuʼi ia nātou ʼi ʼakotou ʼu gāue faka teokalatike pea mo te ʼu temi fakafiafia. Koutou manatuʼi ia nātou ʼi ʼakotou ʼu faikole. (Loma 1:9; Efesi 1:16)—01/06, pasina 29.

▫ Ko te ʼu fakapale feafeaʼi ʼaē ʼe maʼu ʼi te loto faʼa kātaki mo kapau ʼe tou kau ʼi te fai faka mafola?

ʼE tokoni te loto faʼa kātaki ki te kau fai faka mafola ʼo te Puleʼaga ke nātou kātakiʼi te mole tokagaʼi ʼaē ʼo nātou peʼe ko te fakafeagai. ʼI tanatou mole fetalanoaʼaki mo te hahaʼi ʼitaʼita ʼaē ʼe felāveʼi mo nātou ʼi te gāue faka mafola, ko te kau minisi ʼaē ʼe nātou faʼa kātaki ʼe nātou fai anai he tali ʼe mālū peʼe nātou mavae fakavilivili, ʼo nātou taupau maʼu pe te tokalelei pea mo te fiafia. (Mateo 10:12, 13) Pea tahi ʼaē meʼa, ʼe tali anai e te hahaʼi ʼaē ʼe hage he ʼu ōvi te logo ʼo te Puleʼaga.—15/06, pasina 9.

▫ He koʼe ʼe maʼuhiga ke ʼiloʼi te moʼoni ʼo te Tohi-Tapu?

Ko te ʼiloʼi ʼo te moʼoni ʼe ina faka ʼāteaina tatou mai te ʼu loi, te ʼu fakapapau loi, pea mo te ʼu gāue fakatemonio. Pea ka tou maʼuliʼi, ʼe fakaloto mālohiʼi tatou e te moʼoni ke tou ʼutaki tatatou ʼu faigataʼaʼia pea ʼe ina foaki mai kia tatou te ʼamanaki, ʼe ina faka fealagia kia tatou ke tou nofo agatonu ʼi te ʼu faigataʼaʼia.—01/07, pasina 8.

▫ Koteā te maʼua ʼuluaki neʼe fai e te kokelekasio faka Kilisitiano fakanofo, ia ia ʼaē neʼe ina fetogi te Iselaele ʼi te kakano?

Ko te pilivilesio ʼaē ko te fagonogono ia te māʼoluga ʼo Sehova ʼi te lotolotoiga ʼo te ʼu puleʼaga. (Isaia 43:21; 1 Petelo 2:9)—01/07, pasina 19.

▫ Koteā ʼaē ʼe hā ʼaki mai ʼi te ʼu palalau ʼa te ʼapositolo ko Petelo ʼo ʼuhiga mo te haga ʼaē ʼa te tagata ʼo ‘tuku te fakaʼapaʼapa’ ki tona ʼohoana? (1 Petelo 3:7)

Ko te tagata ʼohoana ʼaē ʼe ina faka maʼuhigaʼi tona ʼohoana, ʼe mole tonu ia ke ina fakalainoaʼi peʼe ke ina fakamālaloʼi ia ia. Kae, ʼe ina fakahā ʼaki tana ʼu palalau pea mo tana ʼu aga—ʼi he temi e nā ʼāteaina toko lua pe peʼe nā nofo ʼi he lotolotoiga ʼo he kaugamālie—ʼe ina faka maʼuhigaʼi ia ia. (Tāʼaga Lea 31:10-31)—15/07, pasina 19.

▫ He koʼe ʼe matatonu te ʼui ʼaē ko he agaʼofa, mokā fakamavae he tahi ʼi te kokelekasio faka Kilisitiano ʼe mole fia fakahemala?

Ko te fakamavae ʼe ko he fakahā ʼaia ʼo te ʼofa ʼaē kia Sehova pea mo tana ʼu ala. (Pesalemo 97:10) ʼE fakahā ʼaki ai te ʼofa ʼaē kia nātou ʼe nātou haga nofo ʼi te ala faitotonu heʼe ko te fakatuʼutuʼu ʼaia ʼe ina toʼo ʼi te lotolotoiga ʼo nātou he tahi ʼe feala ke ina fakahalaʼi nātou; ʼe ina toe puipui te maʼa ʼo te kokelekasio. (1 Kolonito 5:1-13)—15/07, pasina 25.

▫ ʼE lava feafeaʼi ia ʼaho nei ke ʼiloʼi ia “te tagata kaugana agatonu mo poto,” ʼaē neʼe talanoa kiai ia Sesu ia Mateo 24:45-47?

ʼE ʼiloʼi te tagata kaugana ʼaia ʼaki te gāue ʼaē ʼe ina fai moʼo tufa te ʼu tohi faka Tohi-Tapu, ʼaki te faiako pea mo te faka mafola ʼo te “logo lelei ʼo te puleʼaga,” pea ʼaki tanatou pipiki maʼu ki te Folafola ʼa te ʼAtua, ia te Tohi-Tapu. (Mateo 24:14; 28:19, 20)—01/08, pasina 16.