‘ ʼIo, Kanapaula Neʼe Tatau Te Hahaʼi Fuli Mo Nātou!’

Ko te talanoa ʼaia ʼa te tagata fai sulunale ʼi Luxembourg ʼi te sulunale ʼaenī Letzebuerger Journal. Ko ai koa ʼaē neʼe talanoa ia kiai?

Neʼe ʼalu ia ki Polonia ʼo kau ki te toʼotoʼoga ʼo te 50 fakamanatu ʼo te faka ʼāteaina ʼaē mai Auschwitz pea neʼe ina tokagaʼi neʼe ʼi ai te kūtuga neʼe lahi tonatou fakamamahiʼi, ka neʼe mole fai pe la he talanoa ʼo ʼuhiga mo nātou. ʼI tana sulunale ʼaē ʼo te ʼaho 2 ʼo Fepualio 1995, neʼe ina fakahāhā ko te kūtuga ʼaia ko te kau Fakamoʼoni ʼa Sehova pea neʼe ina tohi fēnei: “Neʼe mole feala ke nātou fakafisi ki tanatou tui logope la te lahi ʼaē ʼo tonatou tūʼa peʼe ko tonatou ʼave ʼaē ki te lotoʼā fakamamahi, pe ko tonatou gaohi koviʼi ʼo pupunu nātou ʼo mole foaki age hanatou meʼa kai peʼe ko tonatou tuku ke mamate pakupaku peʼe ko tonatou matehi ʼaki te toki peʼe ko te tuʼusi ʼo tonatou ulu.” Neʼe hoko atu tana palalau: “Māʼiape la mo te ʼu tagata leʼo SS agamālohi neʼe nātou punamaʼuli ʼi te lototoʼa ʼaē ʼo te kau Fakamoʼoni ʼa Sehova ʼi te temi ʼaē neʼe ʼave ai nātou ʼo matematehi.”

Neʼe mole fia mate faka maletile te kau Fakamoʼoni ʼa Sehova. Kae, ohage ko te kau Kilisitiano ʼo te ʼuluaki sēkulō, ko te toko lauʼi afe ia nātou neʼe lelei age pe kia nātou honatou matehi ʼi hanatou fakamālaloʼi te ʼu pelesepeto faka Kilisitiano. Ko te faʼahiga tui ʼaia neʼe fakaʼiloga ai tonatou kehe ʼaē ʼi te ʼu temi fakapōʼuli ʼo te puleʼaga Nasi.

Neʼe fakaʼosi fēnei e te tagata fai sulunale: “ ʼIo, ka na pau la neʼe tatau te hahaʼi fuli mo te kau Fakamoʼoni ʼa Sehova!” Kanapaula neʼe nātou tatau, neʼe mole feala anai ke hoko te lua tau faka malamanei.