Ko Te Kau Faka Mafola ʼo Te Puleʼaga ʼe Nātou Fakamatala

ʼE Fakatagaʼi Anai Te Kau Kilisitiano Moʼoni

TALU mai te ʼu ʼaho ʼo Apele, ko te tokolahi ʼi te kau kaugana ʼa Sehova neʼe nātou kātakiʼi te fakataga faka lotu. (Luka 11:49-51) Pea ʼe mole fakapunamaʼuli ia, koteʼuhi ʼe fakatokagaʼi fēnei e te Tohi-Tapu ko “nātou fuli ʼaē ʼe fia maʼuli ʼaki te aga faka lotu ʼi te lototahi mo Kilisito Sesu ʼe toe fakatagaʼi anai mo nātou”! (2 Timoteo 3:12) Koia, ia ʼaho nei ʼi te ʼu fenua e 25 tupu, ʼe tapuʼi ai te kau Fakamoʼoni ʼa Sehova pea ʼe nātou kātakiʼi te fakataga. ʼI te tahi ʼu fenua, logope la te fakamoʼoni ʼaē ʼo tanatou gāue e te puleʼaga, neʼe toe felāveʼi te kau Fakamoʼoni mo te fakafeagai—ʼi ʼihi temi ko te agamālohi—ko te fakafeagai ʼe haʼu mai te hahaʼi ʼe tauhi fakavale ki tanatou lotu.

ʼI he fenua neʼe mole gata pe ʼi te tapuʼi ʼo te gāue ʼa te kau Fakamoʼoni ʼa Sehova kae neʼe toe fakatagaʼi foki nātou e te hahaʼi ʼaē ʼe lotu, ko te toko 12 000 tupu kau faka mafola ʼo te logo lelei ʼe hoholo atu pe tanatou gāue mālohi, ʼo nātou ako te Tohi-Tapu mo te hahaʼi e toko 15 000 tupu. ʼE mahino ia, ko tanatou gāue fai faka mafola neʼe fai fakafūfū. ʼI te agamāhani, ʼe nātou fai tanatou ʼu fono faka Kilisitiano ʼi te ʼu ʼapi ʼo te kau Fakamoʼoni, pea ʼe nātou tokakaga mokā nātou fakaafe ni hahaʼi ʼe fia logo ki te moʼoni ki te ʼu taʼi fono ʼaia.

Mole heʼeki faʼa fualoa te tali lelei e te puleʼaga ia te kau Fakamoʼoni, pea ʼi te temi ʼaenī ʼe lahi ai tanatou fakahoko ʼo tanatou gāue mole kei nātou felāveʼi mo he fakafeagai fakamālohi. Kae, neʼe fakaʼaogaʼi e te ʼu faʼahiga kūtuga lotu kehekehe tonatou mālohi moʼo fakaneke ʼo te fihifihia.

ʼI te tahi kolo, ko te ʼu hahaʼi lotokovi e toko 200 ʼe tauhi fakavale ki tanatou lotu, neʼe nātou ʼolo ki te ʼapi ʼaē ʼe fakatahitahi ai te toko 50 kau Fakamoʼoni ʼa Sehova ʼo fai ai tanatou fono. Ko ʼihi ʼi te kaugamālie ʼaia neʼe nātou toʼo te ʼu maka pea neʼe nātou kalagaʼi te ʼu kupusiga palalau faka lotu. ʼE hā lelei ʼi tanatou fakatuʼutuʼu neʼe nātou faiga ke nātou ʼohofi te kau Fakamoʼoni pea mo nātou maumauʼi te ʼapi. Neʼe lagi lamalama e te kau takitaki lotu te ʼaluʼaga ʼo te fono ʼi he temi pea mo nātou fakatalitali ki te temi faigamālie moʼo ʼohofi ai te kau Fakamoʼoni. ʼI te temi pe ʼaē neʼe nātou hūfi ai te ʼapi mo te kaku mai ʼo te ʼu polisi e toko 15 pea neʼe nātou fakatotonu age ke nātou mavetevete. Neʼe ko he meʼa fakapunamaʼuli ki te kau Fakamoʼoni, koteʼuhi neʼe mole he tahi ia nātou neʼe maʼu hona temi ke ina pāui te kau polisi.

Kae, ʼi te tahi ʼu temi, neʼe iku lelei te ʼu faiga ʼaē ʼa te kau fili. Tokolahi te kau Fakamoʼoni neʼe fakamāuʼi pea neʼe fakatūʼa nātou ke pilisoniʼi. ʼI te tahi fakamāu ʼo nātou neʼe talitali te telepinale ʼi te ʼu taʼu e fualoa, pea ʼe mahalo pe neʼe mole kei tokagaʼi e te ʼu tuʼi fakamāu te meʼa ʼaia. Kae, ʼaki te fakaneke ʼaē e te kau takitaki lotu ʼo te kolo ʼaia, neʼe toe ʼave te faʼahi ʼaia ki te telepinale, pea neʼe fakatūʼa ai te kau Fakamoʼoni ʼo nātou ʼave ʼo pilisoniʼi.

ʼI te tahi koga meʼa ko te kūtuga kau Fakamoʼoni neʼe nātou fakatahitahi ki te ʼapi moʼo fakamanatu ʼo te taumafa ʼo te ʼAliki. ʼI te afiafi pe ʼaia, neʼe tokolahi te kau polisi neʼe nātou tāʼofi te pule ʼo te ʼapi pea mo te tagata ʼāfea ʼaē neʼe ina fai te fono. ʼI te fale polisi, neʼe kovi ʼosi tonā haha. Ko te fakafehuʼi fakamālohi neʼe fai kia nāua ʼi te temi loaloaga. Ko te tahi ia nāua neʼe ina ʼutaki tona fakamamahiʼi ʼi tona ai ki te vai momoko.

He koʼe koa neʼe fakahoko e te polisi te ʼohofi ʼaia? Neʼe ko he tahi pe ʼaia meʼa neʼe fakaneke e te kūtuga ʼe tauhi fakavale ki tanatou lotu pea neʼe lagolago kiai te kau takitaki lotu ʼo te kolo. Ki muli age neʼe fakahā e te pule ʼo te kau polisi neʼe mole ina fakagafua ke nātou fai te meʼa ʼaia. Neʼe fai ai te fai fakalelei, pea neʼe akonakiʼi ia nātou ʼaē neʼe kau ki te haha ʼo te ʼu Fakamoʼoni ʼa Sehova.

ʼI te malamanei katoa ʼe haga faka mafola aipe te kau Fakamoʼoni ʼa Sehova te logo lelei ʼo te Puleʼaga ʼo te ʼAtua, logope la te fakafeagai mālohi. ʼE nātou mulimuli ki te tokoni ʼaenī ʼa Sesu: “Koʼeni ʼe ʼau fekauʼi koutou ohage he ʼu ōvi ʼi he lotolotoiga ʼo he faga lupo; koia ke koutou fakaʼeteʼete ohage he ʼu gata, ka ke koutou maʼa ohage ni lupe hina.”—Mateo 10:16.

[Paki ʼo te pasina 31]

Ko Apele ʼaē neʼe ʼuluaki fakatagaʼi