Ko He Ako ʼe Tou Maʼu Mai Te ʼu Manulele Pea Mo Te ʼu Fisiʼi Teu

KOTEĀ koa te meʼa ʼe tautau tuʼaniaʼi e te hahaʼi ia ʼaho nei? Ki te tokolahi, ko te maʼu ʼo te falā ʼaē ʼe feʼauga moʼo totogi ʼo te meʼa kai ʼa te famili peʼe ko te lava hikihiki ʼo tonatou faʼahiga maʼuli.

Ko te holi ʼaē ke feʼauga he falā moʼo taupau ʼo kita peʼe ko tokita famili neʼe ko te meʼa tāfito foki ʼaia neʼe tuʼaniaʼi e te hahaʼi ʼi te temi ʼaē neʼe nofo ai Sesu Kilisito ʼi te kele. Kae neʼe ina fakatokagaʼi ko te holi ʼaia ʼaē ʼe ko he meʼa ʼe ʼaoga, ʼe feala ke liliu ko he tuʼania tāfito ʼo fakatupu kovi ki te ʼu meʼa fakalaumālie. Moʼo fakahā ʼo te meʼa ʼaē ʼe maʼuhiga, neʼe ʼui age e Sesu ki tana ʼu tisipulo ke nātou vakaʼi fakalelei te ʼu manulele pea mo te ʼu fisiʼi teu.

ʼE ʼaoga ke kakai te ʼu manulele ʼi te ʼaho fuli—ʼo lahi ʼaupito age ʼi te meʼa ʼaē ʼe tou fai ʼuhi ko te fetogi fakavilivili ʼo tonatou sino. Pea tahi ʼaē meʼa, ʼe mole nātou to magisi, mo nātou utu magisi, peʼe nātou tānaki te meʼa kai ki te temi ka haʼu. Kae, ohage ko te fakatokagaʼi e Sesu, ʼe “fafaga nātou e [tatatou] Tāmai ʼaē ʼe ʼi selo.” (Mateo 6:26) ʼO toe feiā aipe, ʼe teuteuʼi e te ʼAtua ʼi he ʼaluʼaga fakaofoofo te “ ʼu lilio [matalelei] ʼo te ʼu gāueʼaga.”—Mateo 6:28-30.

ʼE fakamoʼoni mai e Sesu kia tatou kapau ʼe tou tuku te ʼu meʼa fakasino ʼaē ʼe ʼaoga ki tona ʼaluʼaga totonu pea ke tou fakamuʼamuʼa te ʼu meʼa fakalaumālie, ʼe fakamoʼoni mai e te ʼAtua ʼe tou maʼu anai te meʼa kai pea mo te mutuʼi meʼa ʼaē ʼe ʼaoga. Kapau ʼe tokaga ia Sehova ʼAtua ki te ʼu manulele pea mo te ʼu fisiʼi teu, ʼe tokaga moʼoni anai ia kia nātou ʼaē ʼe ʼoʼofa kia te ia pea mo nātou ‘haga kumi muʼa te puleʼaga pea mo tona faitotonu.’ (Mateo 6:33) ʼE koutou fakamuʼamuʼa koa te ʼu meʼa ʼo te Puleʼaga ʼo te ʼAtua ʼi tokotou maʼuli?