ʼE Ko He Agamāhani Koa ʼe Mole Hona ʼAoga?
KO TE sakalameta ʼo te kofesio neʼe taupau e te kau Katolika lolotoga te ʼu sēkulō. Kae, ki te tokolahi ko te kofesio ʼe ko he agamāhani ʼe mole hona ʼaoga. ʼI tana manatuʼi tona temi tūpulaga, ʼe ʼui fēnei e Bob, ko te tagata pule ʼo te kolesi: “ ʼI toku temi tūpulaga, neʼe mole ʼau tokagaʼi pe la te kofesio ohage he meʼa fakamalotoloto.” Koteā tona tupuʼaga? Kia ia, ko te kofesio neʼe liliu ia ko he agamāhani kua fai kae mole hona ʼaoga. ʼE ina fakamahino fēnei mai: “Neʼe hage te kofesio ko he ʼave ʼo takotou ʼuta ʼe fonu ai te ʼu agahala ki te tagata ʼaē ʼe ina vakaʼi te ʼu ʼuta ʼi te malaʼe vakalele. ʼE ina fakafehuʼi koutou ʼo ʼuhiga mo takotou ʼu agahala pea ʼe hoki ina tuku atu ke koutou fakalaka ʼi te hili ʼo takotou totogi te tukuhau ʼo te ʼu koloā neʼe koutou fakatau ʼi he tahi fenua.”
ʼO toe feiā aipe mo Frank Wessling, ko te tagata faitohi ʼi te U.S. Catholic, ʼe ina fakahāhā te ʼuhiga ʼo te kofesio ohage ko “he tokoni faigafua ʼaupito, ʼe kamata ai te fakamolemole ʼo te ʼu agahala māhani ʼaki te faikole kua maʼu fakaʼatamai ʼo ʼuhiga mo te fakahemala, ʼo aʼu ki te fai ʼo he meʼa māhani ʼe fakatā ʼaki ai te fakahemala mai te agahala.” ʼE fakaʼosi feafeaʼi e Wessling tana palalau? ʼE ina ʼui fēnei: “ ʼE mahino papau kia ʼau ko te kofesio ʼe ko he meʼa lelei ia ki te fīmālie ʼo te sino ʼi te faʼahi fakalaumālie.” “Kae ko te faʼahiga fai ʼo te kofesio e te kau Katolika ʼe ko he meʼa faigataʼaʼia ia.”
ʼE kehe ia te fakahāhā e te Tohi-Tapu te kofesio. ʼE maʼuhiga age te kofesio ʼaē ki te ʼAtua. (Pesalemo 32:1-5) Pea neʼe tohi fēnei e te tisipulo Kilisitiano ko Sake: “ ʼE mahaki koa he tahi ia koutou? Ke ina pāui ki ʼona tafa te ʼu tagata ʼāfea ʼo te kokelekasio, pea ke nātou faikole ʼo ʼuhiga mo ia, ʼo nātou tākai ia ia ʼaki te lolo ʼi te huafa ʼo Sehova. Koia koutou kofesioʼi fakahāhā ʼakotou ʼu agahala pea ke koutou fehūfakiʼaki, koteʼuhi ke koutou mālōlō.”—Sake 5:14, 16.
Ko he Kilisitiano ʼe lotohoha ʼi tana fai he agahala ʼe feala ke ina pāui te ʼu tagata taupau ʼo te kokelekasio, ʼaē ʼe feala ke nātou foaki ki ai he tokoni ʼo ʼuhiga mo ia pea mo he tokoni ʼaoga mai te Tohi-Tapu moʼo tokoni kia ia ʼaē neʼe ina fai te agakovi ke ina līaki te agahala. ʼE feala ke foaki e te ʼu tagata taupau he palalau fakaloto mālohi ʼe ʼaoga pea mo nātou fakasiosio te tuputupu ʼo ia ʼaē ʼe lolotoga mamahi ʼi te faʼahi fakalaumālie. ʼE kehe ia mo te agamāhani ʼo ʼuhiga mo te kofesio ʼaē ʼe fai ʼi te ʼu ʼēkelesia ia ʼaho nei! ʼI tonatou fakaloto mālohiʼi e te ʼu tagata ʼāfea ʼo te ʼu kokelekasio, ko te hahaʼi ʼaē neʼe agahala ʼaē kua fakahemala ʼe feala ke nātou maʼu te loto fīmālie ʼaē neʼe logoʼi e Tavite, ohage ko tana fakahā ʼi te pesalemo: “Ko taku agahala, neʼe ʼau kofesioʼi atu, pea neʼe mole ʼau ʼuʼufi taku hala. Neʼe ʼau ʼui: ‘ ʼE ʼau kofesioʼi anai taku ʼu talagataʼa kia Sehova.’ Pea ko koe neʼe ke fakamolemole te hala ʼo taku ʼu agahala.”—Pesalemo 32:5.