“ ʼAua Naʼa Koutou Kaugā ʼAmo Fakatahi Mo Te Hahaʼi ʼAē ʼe Mole Tatau Mo Koutou”
KO TE ʼu vitulo e lua ʼaē ʼe tuʼu ʼi te paki ʼaenī ʼe mālolohi ʼaupito, koia ʼe faigafua ai te toho e te ʼu vitulo ʼaia te ʼu ʼāmoga mamafa. Kae e feafeaʼi la mokā ʼe fetogi he tahi vitulo ʼaki he asino. ʼI te veliveli pea mo te vaivai ʼo te asino ʼi te vitulo, ʼe mahino ia ʼe hehegi anai ʼo ina aka te ʼu seini ʼaē ʼe haʼi ʼaki ia ia ki te ʼakau toho, ʼaē ʼe fakatahiʼi ia ia ki te manu ʼaē ʼe mole tatau tonā mālohi. Koia, neʼe ʼui fakalelei ai e te lao ʼa te ʼAtua kia Iselaele: “ ʼAua naʼa ke fakatahiʼi he vitulo pea mo he asino ki tau gāue fuli kele.”—Teutalonome 22:10.
Neʼe tohi e te ʼapositolo ko Paulo te manatu feiā ʼo ʼuhiga mo te hahaʼi. Neʼe ina ʼui fēnei: “ ʼAua naʼa koutou kaugā ʼamo fakatahi mo te hahaʼi ʼaē ʼe mole tui, koteʼuhi ʼe mole koutou tatau.” (2 Kolonito 6:14) ʼE tonu ke tou manatuʼi tāfito te faʼahi ʼaia mokā tou fili he tahi ke tou ʼohoana mo ia. Ko te ʼohoana ʼe ko he fakatahiʼi ʼo he taumatuʼa ʼo talu ai, koia la ʼaē neʼe ʼui ai e Sesu Kilisito: “Ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.” (Mateo 19:6) ʼE lahi te ʼu meʼa fakatupu lotomamahi ʼe hoko mokā ʼe mole tatau te lotu ʼa he taumatuʼa, mo tanā ʼu pelesepeto, pea mo tanā ʼu fakatuʼutuʼu. Koia la ʼaē, ʼe ko he aga fakapotopoto te muliʼi ʼo te fakatokaga ʼa te Tohi-Tapu ʼaē ke ʼohoana “[pe] ʼi te ʼAliki.” (1 Kolonito 7:39) Ko te ʼohoana mo he tahi ʼe mole tatau tana tui mo koutou, ʼe hoko ai anai he fihifihia ʼe lahi age, ʼi te fihifihia ʼo te fakatahiʼi ʼo he vitulo pea mo he asino ʼi he ʼakau toho.
Ko te kehekehe ʼo te ʼu tui faka lotu ʼe ko he faʼahi ʼe feala ke fakatupu ʼaki ai he mole felogoi ʼa he taumatuʼa. Ko he toko lua ʼe nā fakatuʼutuʼu ke nā ʼohoana—tatau aipe peʼe nā lotu tahi—ʼe lelei anai ke nā fai te ʼu fehuʼi ʼaenī, ‘ ʼE tatau koa tamā ʼu fakatuʼutuʼu? ʼE ma maʼuʼuli anai koa ʼifea? Ko ai koa ʼaē ka tokaga anai ki te falā? ʼE ʼaoga anai koa ke ma gāue toko lua? ʼE tonu anai koa ke maʼu hamā fānau? Ko te agaʼofa pea mo te fakaʼapaʼapa ʼe nā takitaki anai koa tamā felogoi faka taumatuʼa?’
ʼI te tahi faʼahi, ko te faʼahiga palalau ʼo ʼuhiga mo te ʼu fehuʼi ʼaia ʼe feala ke hā ai peʼe lelei anai koa tanā felogoi peʼe kailoa. ʼE mahino ia, ʼe mole maʼu anai he toko lua ʼe nā felogoi lelei ʼosi ia meʼa fuli. Kae, kapau ʼe feala hanā fakatokatoka fakatahi tonā ʼu fihifihia ʼi te temi ʼaē ʼe nā fakatahi ai, pea kapau ʼe feala hanā felogoi fakalelei, ʼe mahino ia ʼe mole feala anai hatatou ʼui, ʼe mole nā ʼalutahi.