Te ʼu Fehuʼi ʼa Te Kau Lautohi

Ia Filipe 2:9, neʼe ʼui fēnei e Paulo ʼo ʼuhiga mo Sesu: “Neʼe hikihiki ia e te ʼAtua ki he tuʼulaga māʼoluga pea mo ina foaki fakalelei age kia te ia te higoa ʼaē ʼe māʼoluga age ʼi te ʼu higoa fuli pe.” Koteā koa te higoa foʼou ʼaia? Pea kapau ʼe mālalo age Sesu ia Sehova, e feafeaʼi koa te māʼoluga age ʼo te higoa ʼo Sesu ʼi te ʼu higoa fuli pe?

ʼE tou lau fēnei ia Filipe 2:8, 9: “Tahi ʼaē meʼa, ʼi tana [Sesu] liliu leva ʼaē ʼo tagata, neʼe ina fakamālaloʼi ia ia totonu pea neʼe talagafua ʼo aʼu ki te mate, ʼio, ki te mate ʼi te pou fakamamahi. Ko te tupuʼaga la ʼaia ʼo tona hikihiki ʼaē e te ʼAtua ki he tuʼulaga māʼoluga pea mo ina foaki fakalelei age kia te ia te higoa ʼaē ʼe māʼoluga age ʼi te ʼu higoa fuli pe.”

Ko te vaega ʼaia ʼe mole ina faka ʼuhiga leva, kapau ʼe maʼu e Sehova tokotahi he huafa ʼe māʼoluga age ʼi te ʼu higoa fuli pe, pea ʼe tonu leva ke tou ʼui ko Sesu ʼe ko Sehova totonu. Ohage ko tona fakahā mai ʼi te ʼu vaega ʼo te kapite 2 ʼo Filipe, neʼe maʼu e Sesu tona higoa maʼuhiga ʼaia ʼi tona ʼosi fakatuʼuake. Ki muʼa atu, neʼe mole ina maʼu te higoa māʼoluga ʼaia. ʼI te tahi faʼahi, ʼe māʼoluga tuʼumaʼu pe ia Sehova, pea neʼe mole heʼeki fetogi tona tuʼulaga. Ko te ʼui ʼaē kua maʼu e Sesu ia he higoa ʼe māʼoluga age ʼi te higoa ʼaē neʼe ina maʼu ʼi muʼa ʼo tana gāue ʼi te kele, ʼe fakamoʼoni ʼaki ai ʼe mole tatau ia mo Sehova. ʼI te ʼui ʼaē ʼe Paulo neʼe foaki age kia Sesu te higoa ʼe māʼoluga age ʼi te ʼu higoa fuli, ko tona faka ʼuhiga kua maʼu e Sesu ʼi te temi nei te higoa ʼaē ʼe māʼoluga age ʼi te ʼu higoa ʼo te ʼu meʼa fuli ʼaē neʼe fakatupu e te ʼAtua.

Koteā koa te higoa māʼoluga ʼaia ʼo Sesu? ʼE tokoni mai ia Isaia 9:6 kia tatou, ke tou maʼu te tali ki te fehuʼi ʼaia. ʼI tana lea faka polofeta ʼo ʼuhiga mo te haʼu ʼa te Mesia, ia Sesu, ʼe ʼui fēnei e te vaega ʼaia: “Ko te pule fakaʼaliki ʼe hili anai ki tona fugaʼuma. Pea ʼe fakahigoa anai ko te Tokoni Taulekaleka, ʼAtua Mālohi, Tāmai Heʼegata, ʼAliki ʼo te Tokalelei.” ʼI henī ko te “higoa” ʼo Sesu ʼe ʼalutahi mo tona tuʼulaga māʼoluga pea mo tona ʼuhiga pule, pea ʼe toe tatau pe tona faka ʼuhiga mo “te higoa [ʼaē] ʼe māʼoluga age ʼi te ʼu higoa fuli pe” ʼaē ʼe talanoa kiai ia Filipe 2:9. ʼE fakatotonu ki te hahaʼi fuli ke nātou tuʼutuli ia muʼa ʼo Sesu, ʼo fakamoʼoni ki te tuʼulaga pule māʼoluga ʼaē neʼe foaki age e Sehova kia te ia—ko he tuʼulaga pule ʼe māʼoluga age ʼi te ʼu tuʼulaga ʼaē kua ina foaki ki ʼihi ʼi tana ʼu meʼa maʼuli. Ko te kupu “fuli pe” ʼi te fakaliliu ʼaenī ʼo te vaega, ʼe mole tuʼu totonu ʼi te tohi faka Keleka, kae ʼe ʼalutahi mo te faka ʼuhiga ʼo te vaega ʼaia. Ko te “higoa” ʼo Sesu ʼe mole māʼoluga age ia ʼi tona higoa ʼo ia totonu, kae ʼe māʼoluga age ʼi te ʼu higoa fuli pe.

ʼI meʼa fakaloto fiafia tatatou fakatahi mo te kau ʼaselo agatonu fuli pea mo te ʼu hahaʼi agatonu ʼo tuʼutuli ʼo fakamoʼoni ki te higoa ʼo Sesu! ʼE tou fai te faʼahi ʼaia ʼaki tatatou fakalogo kia Sesu ʼi tona tuʼulaga māʼoluga pea mo mālohi ʼaē neʼe foaki age ki ai e Sehova—“ki te kolōlia ʼo te ʼAtua te Tāmai.”—Filipe 2:11; Mateo 28:18.