Koutou Sisio! Ki Te Fale ʼo Te Puleʼaga ʼi Niue

KO NIUE ko te kiʼi motu ʼi te Potu Toga ʼo te Pasifika, ia kilometa e 2 160 ʼi te Potu Tokelau pea mo te Potu Hahake ʼo Niusila. Ohage ko tona tuʼu ʼi te nusipepa folau, ʼe faʼu te higoa Niue ʼaki te ʼu kupu e lua ʼi te lea ʼa te kau Niue, ko te kupu Niu, ʼaē ʼe faka ʼuhiga ki te “fuʼu niu,” pea mo te kupu e, ʼaē ʼe faka ʼuhiga “sio,” peʼe “vakaʼi.” ʼE ʼui e te nusipepa ʼaia: “Ohage ko tona ʼui e te fagana, ko te ʼu ʼuluaki hahaʼi Polinesia ʼaē neʼe ʼōmai ki te fenua ʼaia, ʼi tanatou tau kiai, neʼe nātou ʼui te ʼu kupu ʼaia ʼi tanatou sisio ʼaē ki te ʼu fuʼu niu ʼaē ʼe maʼuʼuli ʼi te motu ʼaia.”

Ia ʼaho nei, ʼe fiafia te kau Fakamoʼoni ʼa Sehova ʼi tanatou ʼui kia nātou ʼaē ʼe ʼōmai ʼo ʼaʼahi, “E! Fale he Kautu ha mautolu!” ko tona faka ʼuhiga, “Koutou sisio ki tomatou Fale ʼo te Puleʼaga!” He koʼe ʼe nātou fiafia feiā ʼo ʼuhiga mo te fale ʼaia? ʼI te potu fuli pe, ʼe fiafia te kau Fakamoʼoni ʼa Sehova ʼi tonatou ʼu Fale ʼo te Puleʼaga, tāfito mo kapau neʼe ko nātou totonu ʼaē neʼe nātou laga te ʼu fale ʼaia. Kae ko te laga ʼo he Fale ʼo te Puleʼaga ʼi te motu mamaʼo ʼaia, ʼaē ʼe tuʼu ʼi te lotomalie ʼo te Potu Toga ʼo te Pasifika, neʼe mole tatau ia mo te ʼu laga fale ʼaē ʼe fai māhani. Pea tahi ʼaē, ʼe lahi ia Niue ia kilometa pe e 260, pea ko te toko 2 300 hahaʼi ʼe nātou maʼuʼuli ʼi te motu katoa. Neʼe tupu te fihifihia ʼaē pe ko ai ʼaē ka ina fakatuʼu te Fale ʼo te Puleʼaga. Ko te kokelekasio pe e tahi ʼi Niue pea ko te toko 32 kau Fakamoʼoni. Ko te ʼu meʼa gāue fuli ʼaē neʼe ʼaoga ki te laga fale ʼaia, ohage ko te ʼu kamio, te ʼu peletesi, pea mo te ʼu masini hiki meʼa mamafa, neʼe ko he ʼu meʼa ia ʼo te puleʼaga. Pea tahi foki, ko te ʼu meʼa gāue maʼuhiga ʼaē neʼe ʼaoga ki te laga fale ʼaia—te ukamea, te ʼu piliki, te ʼu meʼa ʼaē ʼe ʼaoga ki te ʼato, te hila pea mo te ʼu meʼa gāue ʼaē ʼe ʼaoga ki te ʼai ʼo te vai, pea mo te ʼu fale vao, te fakatagi pea mo te ʼu mikolo, pea mo te ʼu hekaʼaga—neʼe tonu ke ʼaumai mai Niusila ʼi te vaka ʼaē ʼe ina fetuku mai te ʼu meʼa kehekehe ki te motu ʼaia, pea neʼe haʼu tuʼa tahi pe ʼi te ʼosi ʼo vāhaʼa e nima. Tahi ʼaē meʼa, neʼe faigataʼa te fakatuʼu ʼo te fale ʼuhi ko te kele fefeka ʼo te motu, pea neʼe tonu ke mālohi te fakatuʼu ʼo te fale ʼaia, ʼuhi ko te ʼu afā ʼaē ʼe tau tō. ʼIo, neʼe ko he toe gāue lahi ʼaupito!

Kae neʼe ʼi ai te kehekehe maʼuhiga ʼi te faʼahi ʼaia. Maʼa te kau Fakamoʼoni ʼa Sehova, ko te Fale ʼo te Puleʼaga ʼe ko te tāfito ʼaia ʼo te tauhi moʼoni ʼi tonatou motu, pea ʼe nātou mulimuli ki te takitaki ʼa Sehova pea mo tana tokoni. (Pesalemo 56:11; 127:1) Ko te ʼu tēhina mai Niusila, ʼo kau ai mo te ʼu tēhina ʼo te kokelekasio ʼo Niue ʼi Auckland, neʼe nātou ʼōmai ʼo tokoni ki te kiʼi kokelekasio ʼaia ʼo te kau Fakamoʼoni ʼo te motu ʼo Niue, ʼo nātou tokoni ʼaki tonatou loto katoa ki te fakatuʼutuʼu ʼo te laga ʼaia ʼo te Fale ʼo te Puleʼaga.

Ko Te Fakatotonu ʼAē Ke Kamata Te Gāue

ʼI Sūnio 1994, ʼi te potu ʼaē ʼe laga ai te Fale ʼo te Puleʼaga ʼi Rotorua, ʼi Niusila, neʼe fai te pāui kia nātou ʼaē ʼe nātou fia kau ki te laga ʼo te Fale ʼo te Puleʼaga ʼi Niue. Meʼa fakaofoofo, ko te ʼu tēhina pea mo te ʼu tuagaʼane Kilisitiano e toko 200 neʼe nātou tali ki te pāui. Ia nātou ʼaia, ko te toko 80 neʼe fili ki te gāue ʼaia, ʼo kau ai te kau tagata tufuga ʼakau, te kau gāue ukamea, te kau gāue gaohi tuio, te kau gāue ʼato, te kau plâtriers, te kau fai pena, te kau gāue hila, te kau gāue ʼo te ʼu mikolo pea mo te ʼu fakatagi, te kau gāue simā, mo nātou ʼaē ʼe nātou fakatuʼu te ʼu piliki, pea mo te kau tokoni ki te gāue.

Neʼe tohi e te ʼu tēhina te faʼahiga faʼu ʼo te fale pea neʼe nātou kātaki ʼo fai te gāue ʼaia, ʼo nātou falala kia Sehova. Ko te tagata ʼāfea e tahi ʼi te ʼu tagata ʼāfea e lua ʼo te kokelekasio ʼo Niue, ʼe gāue ʼi te ʼu meʼa fakakoloa, neʼe ina kamata fai he ʼu fakatuʼutuʼu moʼo toʼo te ʼu meʼa gāue fuli ʼaē neʼe ʼaoga. Neʼe talagaʼi te totogi ʼo te ʼu lapalasi ʼi te vaka pea mo te nofoʼaga ʼo te kau gāue, ʼaē neʼe nātou totogi pe tonatou tohi folau, pea neʼe kua ʼiloʼi papau te ʼaho ʼaē ʼe laga ai te fale. Neʼe tonu ke fai te gāue lolotoga ia ʼaho e 20, ʼo kamata ʼi te ʼaho 4 ʼo aʼu ki te ʼaho 23 ʼo Malesio 1995, ʼi te temi ʼaē ka tonu ke avahi ai te Fale ʼo te Puleʼaga.

Neʼe ʼui fēnei e te tagata pule ʼo te fakatuʼutuʼu, ʼaē neʼe haʼu mai Niusila ʼi te ʼuluaki vāhaʼa ʼaē neʼe kamata ai te gāue: “Neʼe ʼau punamaʼuli ʼaupito ʼi taku sio ki te kele ʼaē ka laga ai te Fale ʼo te Puleʼaga. ʼE makamakaʼia te kele. ʼE ʼaoga anai ia vāhaʼa e lua moʼo keli te fakatafito.” Kae neʼe ina tala ki muli age, neʼe mole ina fakafuafua lelei te ʼu fealagia ʼa te kau Fakamoʼoni ʼo te motu. Neʼe ina ʼui fēnei: “ ʼE ʼiloʼi lelei e te ʼu tēhina ʼo Niue te faʼufaʼu ʼo te kele. ʼE nātou ʼiloʼi te faʼahi ʼaē ʼe tonu ke haha ai te kele ke tō mai ai he ʼu koga maka lalahi.” Ko te keli ʼo te ʼu fakatafito neʼe ʼosi ia ʼaho e lua!

Ko te ʼuluaki vakalele ʼa te kau Fakamoʼoni mai Niusila neʼe tau ʼi te ʼaho 4 ʼo Malesio, pea neʼe kamata leva te gāue simā. ʼI te fakakatoa mai ʼo te kau gāue kehekehe ʼo te laga fale ʼaia, neʼe ʼosi fuli te ʼu faʼahi kehekehe ʼo te fakatuʼutuʼu ʼaia. Ko te gāue ʼi te ʼaho fuli neʼe kamata ʼi te hola 7 uhu ʼaki he fai palalau fakanounou ʼo ʼuhiga mo te vaega faka Tohi-Tapu ʼaē ʼe lau ʼi te ʼaho fuli. Ko ʼihi tēhina neʼe nātou gāue lolotoga ia hola e 12 ʼi te vevela. Moʼo fakaʼosi, ʼi te ʼaho 23 ʼo Malesio 1995, neʼe kua tokalelei te potu ʼaē neʼe laga ai te fale. Neʼe fai te fakaʼiloga ʼaki te fuʼu mago moʼo fakahā ko te fale ʼaē ʼe laga ko te “Fale ʼo te Puleʼaga ʼa te kau Fakamoʼoni ʼa Sehova.”

Ko Te Kaugā Gāue Fakatahi Pea Mo Te Tali Kāiga

Ko te meʼa maʼuhiga ʼaē neʼe kau ki te maui mālie ʼo te fakatuʼutuʼu ʼaia, neʼe ko te kaugā gāue fakatahi ʼa te hahaʼi ʼo Niue. Neʼe foaki e te ʼu hahaʼi ʼo te kolo te meʼa kai pea mo te paʼaga, he neʼe nātou ōfo ʼi tanatou sio ki te gāue ʼa te ʼu tēhina. Tokolahi neʼe nātou faka ʼuhiga te laga ʼo te fale ohage ko hanatou gāue. Neʼe tokoni te kau takitaki ʼo te puleʼaga pea mo te kau tagata gāue koloā ʼo laka age ʼi te meʼa ʼaē neʼe tonu ke nātou fai. Neʼe foaki age kia nātou te ʼu meʼa gāue ʼaē neʼe ʼaoga ki te laga fale. Māʼia mo te kūtuga ʼaē ʼe gāue ʼi te vaka, neʼe nātou fai he puleʼaki moʼo fakatau tonu te ʼu meʼa gāue ʼaē neʼe ʼaoga ki te laga fale.

Neʼe leleiʼia moʼoni e nātou ʼaē neʼe ʼōmai ʼo gāue, te gāue kinakina pea mo te tali kāiga ʼa te kau Fakamoʼoni ʼo Niue, ʼaē neʼe nātou vaevae mo nātou tonatou ʼapi pea mo te ʼu meʼa ʼaē ʼe nātou maʼu. Neʼe ʼui fēnei e te tahi neʼe kau ʼi te gāue ʼo te laga fale: “Neʼe agalelei te ʼu tuagaʼane ʼo Niue.” ʼO mole gata ʼaki pe te gaohi ʼo te meʼa kai ʼi te ʼaho fuli e te ʼu tuagaʼane ki te fetapā, kae neʼe nātou teuteuʼi foki mo te meʼa kai ki te hola 6 vaelua ʼi te uhu fuli. Neʼe ʼala ake ʼihi ʼi te hola 4 vaelua māfoatā moʼo teuteuʼi te meʼa kai. Neʼe ʼui e te tahi ʼi te kau gāue: “ ʼI taku manatu, ʼe lelei age tamatou faʼahiga maʼuli ʼi henī, ʼi Niue, ʼi tomatou maʼuli ʼi tomatou ʼu ʼapi.”

ʼI te ʼaho 10 ʼo Malesio, neʼe fakamatala te laga fale ʼaia ʼi te sulunale ʼo te Niue Star, ʼo tohi fēnei ʼi te ʼuluaki pasina “Te ʼUluaki Fale ʼo Te Puleʼaga ʼi Niue,” pea mo te paki ʼo te kau Niusila pea mo te kau Niue ʼaē neʼe gāue ʼi te laga fale ʼaia. Neʼe ina toe fakamatala te lahi ʼo te fale ia meta e 280 pea mo te ʼu hekaʼaga ʼe feʼauga maʼa te toko 70 ki te toko 100 hahaʼi. Neʼe toe ʼui fēnei e te alatike: “ ʼI tona fakahagatonu, neʼe feala ke fakaʼosi katoa te gāue ia [vāhaʼa] e lua, kae ʼe lagi fualoa anai. ʼI te faʼahi ʼaia, hili pe ia ʼaho e lua ʼo te kamata ʼo te gāue, neʼe kua fualoa te ʼosi ʼo te fakatuʼu ʼo te ʼu fakatafito, te ʼu papa ʼo te fale, te ʼu lalago pea mo te ʼato.”

Neʼe fakahā e te tagata gāue koloā te loto ʼo te hahaʼi fuli ʼo Niue ke laga te fale ʼaia, pea neʼe nātou tāʼofi te ʼu manatu ʼaoga ʼi te laga fale ʼaia. Neʼe ina ʼui neʼe fakaʼamu ke fakahā e te faʼahi ʼaia ki te hahaʼi fuli te ʼu meʼa ʼaē ʼe feala ke fakahoko ʼaki te ʼofa pea mo te kaugā gāue fakatahi.

Neʼe kau te toko 204 ki te avahi ʼo te Fale ʼo te Puleʼaga. Ko te meʼa ʼaē neʼe uga mālohi ia nātou fuli ʼaē neʼe kau ki te avahi ʼo te fale ʼaia, neʼe ko te fakamamata makehe ʼaē neʼe kau ai te ʼu tēhina mo te ʼu tuagaʼane ʼo Niue, ʼo kau ai foki mo te ʼu fānau, ʼo nātou fakamatala ʼaki te ʼu hiva pea mo te ʼu meʼe te gāue ʼo te laga ʼo te Fale ʼo te Puleʼaga. Neʼe fai te ʼu fakamālo ki te kūtuga ʼo te laga fale pea mo Sehova, ʼaē neʼe uga e tona laumālie te ʼu fakakaukau, te ʼu loto, pea mo te ʼu nima moʼo fakahoko ʼo te gāue.—Isaia 40:28-31.