Koutou Tauhi Kia Sehova ʼAki He ʼu Nima Maʼa

ʼAKI te laumālie ʼo te ʼAtua, neʼe hiva fēnei ia Tavite: “ ʼE ʼau fanofano anai toku ʼu nima ʼi te meʼa ʼaē ʼe tonu, pea ʼe ʼau haʼele anai ʼo foliʼi tou ʼaletale, Ê Sehova.”​—⁠Pesalemo 26:⁠6.

ʼI tana tohi te ʼu kupu ʼaenī, neʼe lagi fia talanoa ia Tavite ki te agamāhani ʼa te kau pelepitelo Levite ʼo Iselaele, he neʼe nātou hake ki te ʼaletale pea mo nātou hili ai tanatou ʼu sakilifisio ki te afi. Kae ʼi muʼa ʼo te fakahoko ʼo te toʼotoʼoga ʼaia, neʼe maʼua ki te kau pelepitelo ke nātou fanofano ʼonatou nima pea mo fulufulu ʼonatou vaʼe. Neʼe mole tonu ke meʼa noaʼi te faʼahi ʼaia. Neʼe feala ke mate te pelepitelo mo kanapaula neʼe mole ina ʼuluaki fai te faʼahi ʼaia!​—⁠Ekesote 30:​18-21.

ʼI tona ʼuhiga fakatā, ko te fakamaʼa ʼaki te vai, ʼe ko he fakamaʼa ʼi te faʼahi fakalaumālie pea ʼe ko he fakamaʼa ʼo kita mai te ʼu aga ʼaē ʼe heʼemaʼa. (Isaia 1:16; Efesi 5:​26) ʼE loto e Sehova ke tou ‘haʼele ʼo foliʼi tona ʼaletale’ ia ʼaho nei, ʼo tou tauhi kia te ia. Kae ʼe ina fakamaʼua mai ke tou fai te faʼahi ʼaia ʼaki he ʼu nima maʼa​—⁠ohage ko tona ʼui e Tavite, ke tou fai ʼaki he ʼu nima ʼe fanofano “ ʼi te meʼa ʼaē ʼe tonu.” ʼE mole tonu ke tou meʼa noaʼi te fakamaʼua ʼaia, he ko nātou ʼaē ʼe nātou fai te ʼu aga heʼemaʼa ʼe mole nātou maʼu anai te Puleʼaga ʼo te ʼAtua. (Kalate 5:​19-21) Kapau ʼe lahi te ʼu gāue ʼaē ʼe tou fai ki te ʼAtua, ʼe mole ko he takuʼaki ʼaia moʼo fai ʼo he ʼu aga heʼeʼaoga. Ko te tupuʼaga la ʼaia ʼo te tohi fēnei e te ʼapositolo ko Paulo: “Ko toku sino, ʼe ʼau tukipalaʼi pea ʼe ʼau taki ʼau ohage he tahi ʼe popūla, heʼe ʼau mataku naʼa hili anai taku faka mafola ki te hahaʼi, kae ʼau liliu ʼau, ʼi he faʼahiga meʼa pe, ko he tagata ʼe faka lākahalaʼi.”​—⁠1 Kolonito 9:⁠27.

Ko nātou ʼaē ʼe nātou kumi te ʼofa ʼa te ʼAtua pea mo te fiafia moʼoni, ʼe tonu ke nātou tauhi kia Sehova ʼaki he ʼu nima maʼa. Ohage ko Tavite, ʼe nātou haʼele “ ʼi te agatonu ʼo te loto pea mo te faitotonu.”​—⁠1 Hau 9:⁠4.