Te ʼu Fehuʼi ʼa Te Kau Lautohi
ʼE ʼui ia Efesi 3:14, 15 ko te ʼAtua “ ʼaē ʼe maʼu mai ai e te famili katoa ʼi selo pea mo te kele tonatou higoa.” ʼE ʼi ai koa ni ʼu famili ʼi te lagi, pea ʼe maʼu koa e te ʼu famili takitokotahi ʼo te kele tona higoa mai ia Sehova?
ʼE mole ʼi ai ni ʼu famili ʼi te lagi ohage ko te ʼu famili ʼaē ʼe ʼi te kele, ʼaki he tāmai, he faʼe, pea mo he ʼu fānau—ʼo nātou kāiga fuli ʼi te kakano mo he tahi age. (Luka 24:39; 1 Kolonito 15:50) Neʼe fakahā lelei e Sesu ʼe mole ʼohoana te kau ʼaselo, pea neʼe mole ina ʼui ʼe maʼu e te ʼu ʼaselo honatou hākoga.—Mateo 22:30.
Kae, ʼe ʼui e te Tohi-Tapu ʼi hona ʼaluʼaga fakatā, ko Sehova ʼAtua ʼe ʼohoana mo tana kautahi ʼaē ʼi te lagi; ʼe ʼohoana ʼi te faʼahi fakalaumālie. (Isaia 54:5) Ko te kautahi ʼaia, ʼaē ʼe ʼi te lagi, ʼe ina fakatupu he ʼu fānau, ohage ko te kau ʼaselo. (Sopo 1:6; 2:1; 38:4-7) Koia, ʼi te faʼahi ʼaia, ʼe ʼi ai te famili fakalaumālie fakatalakitupua ʼi te lagi.
Pea tahi ʼaē, ʼe tuputupu te famili foʼou fakatā ʼi te lagi, ʼaē ʼe faʼufaʼu e Sesu Kilisito pea mo tona ʼohoana, ʼaē ʼe faʼufaʼu e te kokelekasio ʼo te toko 144 000. (2 Kolonito 11:2) Tokolahi ʼi te kau fakanofo ʼaia kua ʼosi mamate, ʼaki tanatou ʼamanaki ki te lagi. Ko ʼihi ʼe kei maʼuʼuli ʼi te kele. Kua nātou fakaʼamu fuli ke hoko la te “ ʼohoana ʼo te Akeno” ʼi te lagi. ʼE fakapipiki e te Tohi-Tapu te ʼohoana ʼaia ki te temi ʼo te mamahi lahi ʼaē kua ōvi mai—te fakaʼauha ʼo Papiloni Lahi, pea mo te pulihi ʼo te toe ʼo te tuʼu ʼa Satana.—Fakahā 18:2-5; 19:2, 7, 11-21; Mateo 24:21.
ʼO ʼuhiga mo te ʼu famili ʼo te kele, neʼe mole ʼui e te ʼapositolo ko Paulo ia Efesi 3:15 ko te ʼu higoa fuli ʼo te ʼu famili ʼe haʼu mai te ʼAtua. Kae, ʼe mahino ia neʼe fia talanoa ʼi henī ia Paulo ki te ʼu hōloga ʼaē ʼe nātou taupau te higoa ʼo tonatou famili. ʼE tuku mai ia Sosue 7:16-19 he faʼifaʼitaki. Neʼe fakahā e Sehova te agahala ʼa Akani. ʼUluaki, neʼe fakatokagaʼi, pe neʼe fakahā, ko te agahala neʼe hoko ʼi te telepi ʼo Suta. Pea neʼe fili leva ʼi ai te famili ʼo te kau Selaite. Pea moʼo fakaʼosi, neʼe ʼōmai leva te loto fale ʼo Akani. Ko Akani mo tona ʼohoana, pea mo tana fānau, neʼe faka ʼuhiga, peʼe neʼe ʼui, ko te koga ʼo te loto fale (peʼe ko te famili) ʼo Sapiti, te kui ʼa Akani. Ko te famili ʼaia, neʼe ko te hōloga ʼaē neʼe nātou taupau te higoa ʼo tanatou kui ko Sela.
ʼI te kau Hepeleo, ko te ʼu taʼi hōloga faka famili ʼaia neʼe maʼuhiga ʼaupito, pea lahi te ʼu hōloga neʼe tohi tonatou ʼu higoa ʼi te Tohi-Tapu. Neʼe lagolago te ʼAtua ki te fakahoholo ʼo te ʼu hōloga ʼaia, he neʼe ina fai te fakatuʼutuʼu, ke fakahoko te higoa ʼo te ʼu hōloga ʼaia ʼaki te feʼohoanaʼaki ʼa te ʼu māʼā pea mo te ʼu holotuʼa.—Senesi 38:8, 9; Teutalonome 25:5, 6.
Ko te tahi faʼifaʼitaki ʼo te ʼu taʼi famili lalahi ʼaia, tou vakaʼi ia Sesu, te foha ʼo Tavite. ʼE mahino papau ia neʼe mole kau fakahagatonu ki te hōloga ʼo te Hau ko Tavite, he neʼe tupu ia ka kua mate Tavite kua hili kiai ni ʼu sēkulō. Kae, moʼo ʼiloʼi pe ko ai te Mesia, neʼe tonu ke kau ki te famili ʼo Tavite, ohage ko te meʼa ʼaē neʼe kua mahino kiai te kau Sutea fuli. (Mateo 22:42) Neʼe kau Sesu ʼi te hākoga ʼo Tavite ʼuhi ko tana faʼe pea mo tana tāmai ʼaē neʼe nā taupau ia ia.—Mateo 1:1; Luka 2:4.
Kae ʼe maʼu feafeaʼi e te ʼu famili tonatou ʼu higoa mai ia Sehova? ʼI tona ʼaluʼaga moʼoni, neʼe mole lahi te ʼu lakaga ʼaē neʼe foaki totonu ai e Sehova he higoa ki te tagata takitaki ʼo he famili, ohage ko te ʼu higoa ʼaē neʼe ina foaki kia Apalahamo pea mo Isaake. (Senesi 17:5, 19) Neʼe makehe nātou ʼaia. ʼI te ʼu ʼaluʼaga lalahi, neʼe mole foaki e Sehova ki te ʼu famili takitokotahi he higoa ke fakahoko ki tanatou ʼu fānau.
Kae neʼe ko Sehova ʼaē neʼe ina fakatupu te famili, ʼi te temi ʼaē neʼe ina ʼui ai kia Atama mo Eva ke ‘nā fanaunau, pea mo nā liliu ʼo hahaʼi pea nā fakafonu te kele.’ (Senesi 1:28) Pea neʼe fakagafua e Sehova ke maʼu fānau ia Atama mo Eva ʼaē neʼe heʼe haohaoa, ʼo ina fakatuʼu ai te tafitoʼaga maʼa te famili fuli. (Senesi 5:3) Koia, ʼi hona ʼu ʼaluʼaga kehekehe, ʼe feala ke fakahigoa te ʼAtua ko te Tupuʼaga ʼo te ʼu higoa ʼo te ʼu famili.
Ia ʼaho nei, ʼe lahi te ʼu agaʼi fenua ʼe mole kei faʼa maʼuhiga kia nātou te taupau ʼo te ʼu higoa ʼo te ʼu famili lolotoga te ʼu taʼiake. Kae, ʼi te ʼu fenua fuli, ʼe fakamālo te kau Kilisitiano kia Sehova ki te fakatuʼutuʼu faka famili pea mo nātou fakaʼapaʼapa kia te ia, ʼo nātou gāue kinakina ke maui mālie te logo tahi ʼo tanatou famili.