ʼE Leleiʼia ʼAupito e Irina Te Tohi Katiko

NEʼE mole heʼeki faʼa fualoa, ko te taʼahine ko Irina ʼaē ʼe nofo ʼi Sofia, ʼi Pulukalia, neʼe papitema ko he Fakamoʼoni ʼa Sehova ʼi tona taʼu hiva. ʼE ina leleiʼia te hiva kae tāfito te ʼu hiva ʼi te tohi Tou Vikivikiʼi Ia Sehova ʼAki Tatatou ʼu Hiva. Koia neʼe fakatuʼutuʼu ai e Irina ke ina ako he ʼu kiʼi katiko ke ina maʼu loto ʼi te māhina fuli.

Ko te musika ʼe ko te meʼa ʼaia ʼe leleiʼia ʼaupito e Irina ʼi te faleako. Koia neʼe punamaʼuli ai tana fafine faiako musika, ʼi te fakafisi age ʼa Irina ʼi tana fakaafe ke hiva ʼi te kauhiva ʼo te faleako. He koʼe neʼe fakafisi age ia Irina? Neʼe mahino ia ʼe lahi te ʼu musika ʼe hiva ai te ʼu hiva moʼo faka kolōliaʼi ʼo te ʼu tagata ʼiloa ʼo te puleʼaga, pea mo te ʼu ʼaho mālōlō ʼaē ʼe fakatafito ki te ʼu meʼa faka pagani. Ko ʼihi ʼu hiva ʼe nātou toe lagolago ki te fakafeagai pea mo te agamālohi moʼo fakahaʼele ki muʼa ʼo te ʼu manatu faka puleʼaga. Neʼe mole mahino te fafine faiako ki te fakatuʼutuʼu ʼa Irina ʼi te faʼahi ʼaia. Neʼe faitohi ai Irina ki tana fafine faiako, ʼo fakahā ki ai tana tui faka lotu​—⁠kae neʼe mole ʼi ai pe la hona fua.

Neʼe maʼu leva e te tāmai ʼa Irina te manatu. Neʼe ina foaki ki te fafine faiako he tohi Tou Vikivikiʼi Ia Sehova ʼAki Tatatou ʼu Hiva, ʼe tuʼu ai te ʼu hiva ʼaē ʼe fia hiva kiai ia Irina. ʼI te hili ʼo he ʼu ʼaho, neʼe pāuiʼi e te fafine faiako ia Irina ki te kalasi fai musika. Neʼe ina ʼui age kia Irina ke ina hiva te ʼu hiva ʼaē ʼe ina leleiʼia ʼaupito ʼi te tohi​—⁠ʼi muʼa ʼo tana kalasi⁠—​kae mulimuli ia kiai ʼaki te piano. Neʼe fakalaka tana hiva ʼi te hola katoa! Neʼe ʼiloʼi ai e te fafine faiako ʼa Irina ko tana tohi katiko ʼaē ʼe ina leleiʼia ʼaupito ʼe tuʼu ai te ʼu fasi matalelei.