Neʼe Lagolago Kia Nātou Tonatou Kaumeʼa Lahi
ʼE MAʼU e te kau Fakamoʼoni ʼa Sehova te fakakaumeʼa ʼe lagolago tāfito kia nātou. ʼE ko tonatou vāhaʼa maʼuhiga mo tonatou Kaumeʼa lahi, ko Sehova ʼAtua. (Vakaʼi ia Sake 2:23.) ʼE lagolago kia nātou lolotoga te ʼu ʼahiʼahi lalahi ʼaē ʼe fai ki tanatou tui.
Ko te fakamatala ʼo te agatonu ʼa te kau Fakamoʼoni ʼi te ʼu puleʼaga ʼaē ʼe pule fakahau, neʼe vikiʼi e te tokolahi neʼe nātou sisio kiai. ʼE kau ki ai ia Jiří Krupička, te tagata faiako ʼo te filosofia pea mo te science naturelle, ʼaē neʼe mavae mai te tahi fenua ʼo haʼu ki Sekosolovakia ʼi te taʼu 1968, ʼi tana ʼosi nofo lolotoga ni ʼu taʼu ʼi te ʼu lotoʼā fakamamahi Komunisi. ʼI tana tohi Renesance rozumu (Ko te toe tupu ʼo te fakakaukau), ʼe ina fakamatala te ʼu mamahi pea mo te lotomālohi ʼa te kau Fakamoʼoni neʼe pilisoniʼi ʼuhi ko tanatou mole kau ki te tau.
ʼI te puleʼaga Komunisi, tokolahi te kau Fakamoʼoni neʼe fakatūʼa ke pilisoniʼi ʼuhi ko tanatou tui. Logope tonatou pilisoniʼi, neʼe mole nātou fia keli te ulaniome ʼi te ʼu lameni moʼo fakaʼaogaʼi ki te tau. (Isaia 2:4) ʼE fakamatala e Krupička te meʼa neʼe mamata kiai ʼi te ʼu lameni ʼaia ʼi te taʼu 1952. Neʼe sio ki te ʼu tagata e lua ʼe nā tutuʼu ohage ko he ʼu maka ʼaisi ʼi te temi neʼe momoko ʼaupito ai te nive. Neʼe pūlouʼi tona ʼu ʼulu pea mo tona ʼu fugaʼuma ʼaki te ʼu foi poe ukamea.
ʼE tohi fēnei e Krupička: “Neʼe nā tutuʼu ʼi tuʼa ʼaki te ʼu mutuʼi meʼa ʼo te fale pilisoni talu mai te kei hegihegi. Neʼe lava feafeaʼi hanā faʼa tutuʼu ʼi te kua fefeka ʼo tona ʼu vae ʼuhi ko te momoko? Neʼe lavaʼi te faʼahi ʼaia ʼaki te mālohi ʼo tanā tui. Neʼe kua ʼāfea pea mo ukaukamea te ʼu foʼi poe. Neʼe haga te tagata agakovi ʼo lomiʼi mālohi te ʼu poe ki tana ʼu foʼi ʼulu pea mo tana ʼu fugaʼuma, ʼo tuʼusi ai e te ʼu faʼahi māsila ʼo te poe te kofu pea mo te kili ʼo te tahi ʼi te ʼu tagata ʼaia, pea neʼe hali te toto mai tona nimaʼi kofu.
“Neʼe fakatuʼu mātou e te tagata leʼo ʼi ʼonā muʼa, pea neʼe fai e te ofisie pule kia mātou te ʼu palalau fakanounou. Neʼe ina ʼui ko te fakafisi ki te gāue, ʼe ko he agatuʼu pea ko ia ʼaē ʼe mole fia gāue ʼe fakatūʼa anai. Ko te manatu fakavale ʼaia pea mo fakaʼofaʼofa fau ʼaia ʼo ʼuhiga mo te tau pea mo te matehi ʼa te hahaʼi, ʼe mole tokoni anai ki te hahaʼi ʼaia ʼaē ʼe fakafisi ki te tau, te ʼu fili ʼaia ʼo te sosialisi.”
Neʼe toʼo e te ofisie pule te koga ukamea ʼo ina haha ʼaki te foi poe e tahi. Ko te tagata ʼaē neʼe ʼi loto neʼe tō ʼaki te foi poe ka kei hili ʼi tona ʼulu. Ko te meʼa ʼaē neʼe hoko ki muli age neʼe mole galoʼi e Krupička. ʼE ina tala fēnei:
“Neʼe ʼi ai te hiva neʼe logo mai te ʼu foi poe. Neʼe logo mālie, ko te faikole neʼe muhumuhu ki te ʼAtua, ʼaē ʼe feala ke fagono ki te ʼu faikole fuli ʼi te potu fuli pe—māʼia mo tana ʼu faiga ʼaē ke nā hiva ʼi te ʼu foʼi poe ulaniome ʼaē kua ʼāfea pea mo ukaukamea. ʼE lahi age te logoʼi e te ʼAtua tanā hiva ʼi te hiva ʼaē ʼe fai ʼi te katetalale lahi.”
ʼI te ʼaho 1 ʼo Sepetepeli 1993, ko te gāue ʼa te kau Fakamoʼoni ʼa Sehova neʼe fakamoʼoni ʼaki te lao ʼo te Lepupilika Tchèque. Ko te kau Fakamoʼoni Tchèques, ʼe nātou fiafia ʼi te temi nei ʼi tanatou fakahoko faʼifaʼitaliha tanatou gāue faka Kilisitiano ʼaē ko te akoʼi ʼo te hahaʼi. Ei, ʼe nātou fiafia ʼi tanatou palalau ki te hahaʼi ʼo ʼuhiga mo Sehova, tonatou Kaumeʼa lahi.
[Paki ʼo te pasina 7]
Te fakatahi ʼi te Lepupilika Tchèque