Te Fakatagaʼi ʼo Te Lotu—Koteā Tona Tupuʼaga?
ʼE KOUTOU manatu koa ʼe tonu ke fakatagaʼi te hahaʼi ʼuhi ko tanatou lotu? Kailoa, mo kapau ko te hahaʼi ʼaia ʼe mole nātou fakatupu kovi ki ʼihi. Kae kua talu mai fualoa te fakatagaʼi ʼo te lotu pea ʼe kei fai pe. Ohage la, ʼi Eulopa pea mo te tahi ʼu potu ʼo te malamanei neʼe tapuʼi māhani ai te lotu ʼa te kau Fakamoʼoni ʼa Sehova, pea neʼe gaohi koviʼi ʼaupito nātou ʼi te 20 sēkulō.
Lolotoga te temi ʼaia, neʼe gaohi koviʼi, pea mo fakamamahiʼi fualoa ia te kau Fakamoʼoni ʼa Sehova e te ʼu puleʼaga fefeka ʼo Eulopa. Koteā te ako ʼe tou tāʼofi mai te fakatagaʼi ʼaia ʼo te lotu? Pea koteā te tahi ako ʼe tou lava tāʼofi mai te aga ʼa te kau Fakamoʼoni ʼa Sehova ki tonatou fakamamahiʼi ʼaia?
“Mole Nātou Kau ʼi Te Malamanei”
Ko te kau Fakamoʼoni ʼa Sehova ʼe ko te hahaʼi ʼe nātou faiga ke nātou fakaʼapaʼapa ki te ʼu lao, mo maʼuli tokalelei, pea mo fai te ʼu aga ʼaē ʼe tonu ke fai. ʼE mole nātou fakafeagai ki te ʼu puleʼaga pea ʼe mole nātou fakafihiʼi tanatou takitaki, peʼe nātou kumi ke fakatagaʼi nātou ʼuhi pe heʼe nātou loto ke gaohi koviʼi nātou. Ko te kau Kilisitiano ʼaia ʼe mole nātou kau ki te ʼu meʼa faka politike. ʼE ʼalutahi mo te ʼu palalau ʼaenī ʼa Sesu: “[Ko taku ʼu tisipulo] ʼe mole nātou kau ʼi te malamanei, ohage pe ko ʼau ʼe mole ʼau kau ʼi te malamanei.” (Soane 17:16, MN ) ʼE lahi te ʼu puleʼaga ʼe nātou ʼiloʼi ko te kau Fakamoʼoni ʼe mole nātou kau ki te ʼu meʼa faka politike. Kae ʼe mole fakaʼapaʼapa te ʼu puleʼaga fefeka ki te fakatotonu faka Tohi-Tapu ʼaē ʼo ʼuhiga mo te kau Kilisitiano, ke mole nātou kau ki te malamanei.
Neʼe fakamahino te faʼahi ʼaia ʼi te fono neʼe fai ʼi Siamani ʼi te Univelesitē ʼo Heidelberg ʼi te māhina ʼo Novepeli 2000. Neʼe talanoa te fono ki te “Fakatūʼa pea mo te Revendication : Ko te kau Fakamoʼoni ʼa Sehova ʼi Te Takitaki ʼa Te ʼu Pule Fefeka Sosialisi pea mo Komunisi.” Neʼe ʼui fēnei e te Polofesea ko Clemens Vollnhals ʼi te Fale Hannah-Arendt ʼaē ʼe fai ai te ʼu kumi ʼo ʼuhiga mo te ʼu puleʼaga fefeka: “Ko te ʼu puleʼaga fefeka ʼe mole nātou faka tuʼakoi tanatou ʼu gāue ki te ʼu meʼa faka politike, kae ʼe nātou toe fia puleʼi mo te maʼuli katoa ʼo te hahaʼi.”
Ko te kau Kilisitiano moʼoni ʼe mole nātou lava foaki tonatou “maʼuli katoa” ki he puleʼaga fakatagata, koteʼuhi neʼe kua nātou fakapapau ke nātou foaki katoa tonatou maʼuli maʼa Sehova ʼAtua tokotahi pe. Neʼe mahino ki te kau Fakamoʼoni ʼaē ʼe maʼuli ʼi te ʼu fenua ʼaē ʼe takitaki e te ʼu puleʼaga fefeka, ʼi ʼihi temi ʼe fakafeagai te ʼu fakatuʼutuʼu ʼa te Puleʼaga ʼo te fenua pea mo te ʼu meʼa ʼaē ʼe nātou tui kiai. Koteā ʼaē neʼe nātou fai moʼo fakatokatoka te ʼu fihifihia ʼaia? Tuʼa lahi ʼi te hisitolia, ko te kau Fakamoʼoni ʼa Sehova neʼe nātou mulimuli ki te pelesepeto ʼaē neʼe fakahā e te ʼu tisipulo ʼa Sesu Kilisito: “ ʼE tonu ke mātou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”—Gaue 5:29, MN.
Ko te ʼu toko lauʼi afe kau Fakamoʼoni neʼe nātou agatonu pea neʼe mole nātou kau ki te ʼu meʼa faka politike, tatau aipe peʼe fakatagaʼi kovi ia nātou. Neʼe nātou lava ʼutakiʼi feafeaʼi te ʼu meʼa ʼaia? Neʼe nātou maʼu ʼi fea te mālohi moʼo tauʼi te faʼahi ʼaia? Tou tuku ke nātou tali mai. Pea tou vakaʼi takitokotahi, kau Fakamoʼoni pea mo koutou ʼe mole ko ni kau Fakamoʼoni, pe koteā te meʼa ʼe tou lava ako mai te ʼu meʼa ʼaē neʼe hoko kia nātou.
[Talanoa ʼo te pasina 4]
Ko te ʼu puleʼaga fefeka ʼo Siamani neʼe nātou gaohi koviʼi, mo fakamamahiʼi fualoa ia te kau Fakamoʼoni ʼa Sehova ʼi te 20 sēkulō ʼi te pule ʼa te ʼu puleʼaga fefeka
[Talanoa ʼo te pasina 4]
“Ko te ʼu puleʼaga fefeka ʼe mole nātou faka tuʼakoi tanatou ʼu gāue ki te ʼu meʼa faka politike, kae ʼe nātou toe fia puleʼi mo te maʼuli katoa ʼo te hahaʼi.” Ko te Polofesea ko Clemens Vollnhals
[Paki ʼo te pasina 4]
Neʼe pilisoniʼi te famili Kusserow ʼuhi he neʼe mole nātou fia fakafisi ki tanatou tui
[Paki ʼo te pasina 4]
Neʼe matehi ia Johannes Harms ʼi te fale pilisoni Nasi ʼuhi ko tana tui