Neʼe Fakaʼapaʼapa Ki Te ʼu Meʼa ʼAē ʼe Tau Mo Ia ʼAē ʼe Mahaki
‘ ʼE mole feala ke ʼau fakahoko te tafa ʼaenī mo kapau ʼe mole fakaʼaogaʼi te toto. Kapau ʼe ke loto ke tafa koe, ʼe tonu anai ke ke tali taku faʼahiga faitoʼo ʼaē ka ʼau fai kia koe. Kapau ʼe mole ke tali, ʼe tonu anai ke ke kumi he tahi age tōketā.’
NEʼE mole fakaloto vaivaiʼi e te ʼu palalau ʼa te tōketā te tui ʼo Cheng Sae Joo, te Fakamoʼoni ʼa Sehova ʼe nofo ʼi Tailani. ʼI tana maʼu te mahaki ʼaē ko te méningiome, ko te mahaki ʼi te ʼuto, neʼe ʼaoga ke tafa ia Cheng. Kae neʼe ina fakapapau ke mulimuli ki te fakatotonu ʼaenī ʼa te Tohi-Tapu: “Koutou fakamamaʼo mai . . . te toto.”—Gāue 15:28, 29.
Neʼe ʼalu ia Cheng ki te tahi ʼu fale mahaki e lua, ʼi tana loto ʼaē ke faitoʼo ia ia ʼi tona kolo totonu, mo kapau neʼe feala. Meʼa fakaʼofaʼofa foki kia ia, ko te ʼu tōketā ʼo te ʼu fale mahaki ʼaia neʼe nātou fakafisi ke nātou tafa ia ia mo kapau ʼe mole fakaʼaogaʼi te toto. Moʼo fakaʼosi, neʼe faka felogoi e te Selevisi ki te ʼu Logo ʼo te ʼu Fale Mahaki ʼi Tailani ia Cheng mo te Fale Mahaki ʼe faitoʼo tāfito ai te ʼu ivi, e te kau tōketā fafine ʼo Tokio. Ko te fale mahaki ʼaia, neʼe ina faitoʼo te 200 tupu ʼu hahaʼi mahahaki ʼo te ʼuto, ʼo ina fakaʼaoga te rayon gamma, ko te meʼa foʼou ʼi te faitoʼo ʼaki te hila.
Neʼe fai te ʼu fakatuʼutuʼu ke nofo ia Cheng mo te kau Fakamoʼoni Saponia ʼe nātou vāhaʼa tahi mo te fale mahaki. Neʼe felāveʼi mo te kau Fakamoʼoni ʼi te malaʼe vakalele, ʼo kau ai te ʼu Fakamoʼoni ʼa Sehova e lua ʼe nā popoto ʼi te palalau faka Thaï pea mo te tahi ʼe ina fakafofoga te Selevisi ki te ʼu Logo ʼo te ʼu Fale Mahaki. Lagi hili kiai te vāhaʼa katoa ʼo te ʼu sivi ʼaē neʼe fai kia ia, neʼe tali ke hū ia Cheng ki te fale mahaki ʼaē ka faitoʼo ai ʼaki te faʼahiga tafa ʼaē ʼe fakaʼaogaʼi ai te rayon gamma. Neʼe ko te hola pe e tahi ʼaē neʼe fai ai te faitoʼo ʼaia. ʼI te ʼosi pe ʼo tona faitoʼo, neʼe mavae mai lopitali, pea hili ʼaia ʼaho e lua, pea neʼe toe liliu ia Cheng ki Tailani.
Neʼe ʼui fēnei e Cheng: “Neʼe mole ʼau manatu ʼau ʼe feala anai ke foaki mai he tokoni lahi feiā e te fakatuʼutuʼu ʼaia. Neʼe ʼau punamaʼuli moʼoni ʼi te ʼofa ʼaē neʼe fakahā ʼi te fetokoniʼaki ʼo te ʼu fakatuʼutuʼu kehekehe ʼaē neʼe kau ki ai.”
Neʼe fakamatala e te sulunale Saponia te Mainichi Shimbun te meʼa ʼaia neʼe hoko, ʼo ina ʼui fēnei: “ ʼO aʼu ki te temi nei, neʼe faka maʼuhigaʼi te ʼu tupuʼaga faka lotu ʼo ʼuhiga mo te fakafisi ʼaē ʼo te ʼu foʼi huki toto. Kae, ko te ʼu foʼi huki toto ʼe tupu ʼaki ai te tahi ʼu meʼa kovi, ohage ko te SITA, mo te tahi ʼu faʼahiga mahaki ohage ko te hépatite C, pea mo te ʼu mahaki tupu mai he ʼu meʼa ʼe mole kei ʼaoga kia kita. Ko te tupuʼaga la ʼaē ʼo te fakafisi ʼa te hahaʼi ki te ʼu foʼi huki toto, ka mole nātou fakafisi ki te faʼahi ʼaia ʼuhi ko tanatou lotu.”
Neʼe toe tala fēnei e te nusipepa: “Tokolahi te kau mahahaki ʼaē neʼe fakafisi ki te ʼu foʼi huki toto neʼe tonu ke nātou fetogi fale mahaki, kae ʼe tonu ke fetogi te ʼu fakatuʼutuʼu ʼo te ʼu fale mahaki ʼo ʼuhiga mo te fakaʼapaʼapa ki te meʼa ʼaē ʼe loto kiai te mahaki. ʼE maʼua ke ʼiloʼi lelei e te mahaki te ʼu meʼa ʼaē ka fai kia ia (ʼe fakamahino fuli kiai ia te ʼu meʼa ʼaē ka fai kia ia pea mo ina tali ai te faitoʼo), pea ʼe kau ki ai mo te ʼu foʼi huki toto. ʼE tonu ke ʼiloʼi papau ko te faʼahi ʼaia ʼe mole ko he meʼa ʼe pipiki pe kiai he faʼahiga lotu.”
Ohage ko Cheng Sae Joo, ko te tokolahi ʼo te hahaʼi ʼaē ʼe nātou leleiʼia te faitoʼo ʼaē ʼe mole fakaʼaogaʼi ai te toto, ʼe tonu ke ʼave ki te tahi ʼu fale mahaki. Kae, ʼe nātou leleiʼia te ʼu faiga ʼo te kau tōketā ʼaē ʼe nātou fia fakaʼapaʼapa ki te ʼu meʼa ʼaē ʼe loto kiai te kau mahahaki.
Neʼe fakatuʼu te Selevisi ki te ʼu Logo ʼo te ʼu Fale Mahaki e te kau Fakamoʼoni ʼa Sehova ʼi te ʼu filiale ʼo te Sosiete Watch Tower moʼo faigaʼi ke nātou faka felogoi mo te kau tōketā ʼaē ʼe nātou fakaʼapaʼapa ki tanatou tui. ʼI te malamanei, ko te Selevisi ki te ʼu Logo ʼo te ʼu Fale Mahaki, ʼe ina fai he ʼu felogoi mo te ʼu fale mahaki, mo te ʼu tōketā, mo te hahaʼi taupau mahaki, mo te kau avoka, pea mo te kau tagata tuʼi fakamāu.