ʼE Tuputupu Te Gāue ʼAki Te Tapuakina ʼa Sehova

ʼI TE polokalama ʼo te avahi ʼo te ʼu fale ʼaē neʼe fai ʼi te ʼaho 18 ʼo Sepetepeli 1995, neʼe fakahā ai ko Sehova ʼAtua neʼe ina tapuakina moʼoni te tuputupu ʼo tana kau Fakamoʼoni ʼi te faʼahi ʼaē ʼe tuʼu ai tonatou ʼu fale lalahi ʼi Brooklyn, ʼi New York.

Ko te toko 6 000 tupu neʼe nātou fakalogo ki te polokalama ʼo te avahi ʼo te ʼu fale ʼaia. Neʼe nātou fakatahitahi ʼi Brooklyn, ʼaē neʼe fai ai te polokalama, pea ʼi ʼihi ʼatu ʼu fale, ʼo kau ai mo te tahi ʼu fale gāue ʼa te kau Fakamoʼoni ʼa Sehova, ʼe ōvi ki Patterson pea mo Wallkill, ʼi New York, pea mo tonatou filiale ʼaē ʼe ōvi ki Toronto, ʼi Kanata. Ko nātou ʼaē neʼe mole fakatahitahi ki Brooklyn neʼe nātou fakalogo ki te fakaʼaluʼalu ʼo te polokalama ʼaki te fakahoko telefoni.

Ko He Polokalama Fakaloto Māfana

Ko te kau Petelite, ko te higoa ʼaia ʼaē ʼe foaki ki te kau gāue, ʼaē neʼe nātou fakalogo ki te polokalama, ʼe nātou faʼufaʼu te tokolahi ʼo te foʼi famili ʼi te malamanei katoa ʼo te kau Petelite, ʼo nātou fakalaka ʼi te toko 16 400. Ko te ʼu hahaʼi ʼaia ʼe nātou gāue ʼi te ʼu fenua e teau tupu, pea ʼe nātou tā ai te ʼu tohi faka Tohi-Tapu pea mo nātou tokoni ki te tufa ʼo te ʼu tohi ki te ʼu kokelekasio ʼe 78 600 ʼo te kau Fakamoʼoni ʼa Sehova ʼi te malamanei.

Neʼe kua nātou ʼamusia age la ke kamata, pea neʼe kamata te polokalama ʼo te avahi ʼo te ʼu fale ʼi te hola ono vaelua ʼi te afiafi ʼaki he katiko, ʼo hoa kiai mo te faikole neʼe fai e Karl Klein. Ko te pelesita ʼo te polokalama, ia Lloyd Barry, neʼe ina fakaʼalofa ki te hahaʼi fuli ʼaki hana ʼu palalau fakanounou ki te faka ʼuhiga ʼo te lakaga ʼaē ʼe nātou fakatahitahi ai. ʼI te hili ʼo te vakaʼi fakanounou ʼo Te Tule Leʼo ʼo te vāhaʼa, ʼaē neʼe takitaki e Albert Schroeder, neʼe hoa ki ai ia Daniel Sydlik ʼo fai tana akonaki, koʼeni tona kupu tāfito “Tatatou Gāue Taputapu ʼi Te Petele.” Ko te ʼu ʼuluaki tēhina ʼaē neʼe nātou kamata te polokalama, neʼe ko te ʼu tēhina fuli ʼo te Kolesi Pule ʼo te kau Fakamoʼoni ʼa Sehova.

Ko te ʼu akonaki e lua ʼaē neʼe hoa kiai​—koʼeni tona ʼu kupu tāfito “Te Tali Ki Te ʼu Meʼa ʼAē ʼe ʼAoga Moʼo Fakatuputupu Te ʼu Fale, Mai Te Taʼu 1974 Ki Te Taʼu 1995,” pea mo ia ʼaenī “Te Fakafoʼou Pea Mo Te Laga Fale Maʼuhiga ʼo Te Petele ʼi Brooklyn”​—pea neʼe fakahā ai te ʼu puani maʼuhiga ʼo ʼuhiga mo te laga ʼo te ʼu fale fata pea mo te ʼu fale fata ʼaē neʼe totogi ʼo toe fakafoʼou, he neʼe ko te ʼu fale ʼaia ʼaē neʼe avahi. Neʼe fakatokagaʼi tāfito e te akonaki te hoki ʼosi laga ʼo te fale fata ʼaē ʼe nonofo ai ʼi te temi nei te toko afe kau Petelite. Ko te fale ʼaia ʼaē ʼe meta 115 tona māʼoluga ʼaē ʼe tuʼu ʼi te 90 Sands Street ʼe pipiki ki te fale gāue ʼaē ʼe tā ai te ʼu tohi.

Ko te koga tāfito ʼo te polokalama, neʼe ko te akonaki ʼaē neʼe fai e Milton Henschel, te pelesita ʼo te Watch Tower Bible and Tract Society, ʼo ʼuhiga mo te avahi ʼo te fale. Neʼe ina faka maʼuhigaʼi te ʼu faʼifaʼitaki ʼaē ʼe talanoa kiai te Tohi-Tapu ʼo ʼuhiga mo te ʼu fale ʼaē neʼe avahi ke ʼaoga ki te tauhi ʼaē kia Sehova. ʼI te hili ʼo te hiva ʼo te katiko, neʼe fakaʼosi te polokalama ʼaki te faikole neʼe fai e Carey Barber, ʼaē ʼe toe kau mo ia ʼi te Kolesi Pule. Kae neʼe koteā te ʼu faʼahi maʼuhiga ʼo te polokalama?

Te ʼu Fale ʼAē Neʼe Avahi

Ko George Couch, te tagata taupau ʼo te Petele, neʼe ina fakamahino ko te tahi ʼu fale e 17 kua laga talu mai te avahi fakamuli ʼo te Petele ʼi Brooklyn ʼi te ʼaho 2 ʼo Maio 1969.a Ko te ʼu fale ʼaia neʼe ko te ʼu fale foʼou neʼe laga peʼe ko he ʼu fale neʼe toʼo pea mo toe fakafoʼou. Neʼe ko te avahi ʼaia ʼo te ʼu fale e 17, mo te ʼu fale fata veliveli e lua​—ʼaē neʼe toʼo ʼi te ʼu taʼu 1940 pea neʼe fakaliliu ko te ʼu koga fale ʼo te Petele​—ʼo toe feiā mo te fale gāue pea mo te ʼu pilō ʼaē neʼe laga pe neʼe toʼo talu mai te avahi ʼo te ʼu pilō ʼo te ʼu fale lalahi ʼa te kau Fakamoʼoni ʼa Sehova ʼi te ʼaho 15 ʼo Malesio 1982.b

Ko te fale fata laulahi tokotahi ʼaē neʼe avahi, ʼe ko te fale ʼaē neʼe tuʼu ʼi te 360 Furman Street. Neʼe laga ʼi te taʼu 1928, pea neʼe toʼo e te kau Fakamoʼoni ʼa Sehova ʼi te ʼaho 15 ʼo Malesio 1983, ʼo nātou toe fakafoʼou te fale katoa. Neʼe ko meta e 93 000 ʼo te lahi ʼo te fāliki, peʼe ko teitei eketa e 9. Ko te tahi ʼu fale ʼaē neʼe kau ki te avahi, neʼe ko te fale ʼo te ʼu pilō ʼaē ʼe tuʼu ʼi te 175 Pearl Street pea mo te ʼu fale laulahi ʼaē neʼe hoki faʼu ʼi te ʼu taʼu ʼaenī, ʼaē ʼe tau kiai te ʼu motokā.

He Koʼe Neʼe ʼAoga Ke Laga He Tahi ʼu Fale

ʼI te taʼu 1969, ʼaē neʼe avahi fakamuli ai te ʼu koga fale ʼo te Petele ʼo Brooklyn, neʼe ko te toko 1 336 112 kau Fakamoʼoni ʼaē neʼe nātou faka mafola te logo lelei ʼo te Puleʼaga ʼi te malamanei katoa. Kae ʼi te taʼu 1995 neʼe ko te toko 5 199 895 neʼe nātou fai te faka mafola, ʼo fakalaka tuʼa tolu age ʼi te taʼu 1969! Moʼo tali ki te tuputupu ʼo te kole ʼo te ʼu tohi faka Tohi-Tapu, ko te famili ʼo te Petele ʼo Brooklyn neʼe tuputupu talu mai te taʼu 1969 ʼaē neʼe toko 1 042 ʼo aʼu ki te toko 3 360 tupu, ʼaē ʼe nonofo ʼi te temi nei ʼi te ʼu nofoʼaga e 22!

Neʼe fakamatala e George Couch pe neʼe hā feafeaʼi te ʼaoga ʼaē ke toe laga he tahi ʼu fale talu mai te taʼu 1974 ki te taʼu 1995. ʼI te kamata ʼo te ʼu taʼu 1970 neʼe lue e te kau Fakamoʼoni ʼa Sehova te ʼatu ʼu koga fale ʼi te Otele Towers he neʼe kua tuputupu te famili ʼo te Petele. Koia, ʼi Tesepeli 1973, ko Nathan Knorr, ʼaē neʼe pelesita ʼi te Sosiete Watch Tower ʼi te temi ʼaia, neʼe ina fai te tohi ki te ʼu pilō ʼo te Petele pea mo te tahi kia nātou ʼaē ʼe nātou fakahaʼele te Otele Towers, ʼo ina ʼui neʼe fakatuʼutuʼu e te Sosiete ke ‘nātou mavae ʼi te Otele Towers ʼi te ʼuluaki ʼaho ʼo ʼOketopeli 1974.’

Neʼe ʼui e te Tēhina ko Couch neʼe mata faikehe kia ia te faʼahi ʼaia, he neʼe mole ʼi ai he ʼu fale ke nonofo ai te kau Petelite ʼaē neʼe nonofo ʼi te Otele Towers. Neʼe toe punamaʼuli mo nātou ʼaē neʼe nātou fakahaʼele te Otele Towers koteʼuhi neʼe nātou falala ki te falā ʼaē neʼe foaki age e te Sosiete moʼo lue ʼo te Otele, he neʼe nātou falala ki te falā ʼaia moʼo huʼi ʼaki ʼonatou ʼu maʼua. Ko tona ikuʼaga neʼe uga ai e nātou ʼaē ʼe nātou fakahaʼele te Otele Towers ia te kau Fakamoʼoni ʼa Sehova ke nātou toʼo te otele ʼaia. Neʼe nātou ʼui fēnei: “Kua koutou tuputupu talu takotou nonofo ōvi mai kia mātou, pea ʼe ʼaoga kia koutou te fale ʼaenī.”

Neʼe tali fēnei e nātou ʼaē ʼe nātou fakafofoga te Sosiete: “ ʼE lahi te hahaʼi ʼe nonofo ʼi te fale ʼaia. Kapau ʼe mātou toʼo te fale ʼaia, ʼe mātou loto anai ke nonofo ai tamatou ʼu hahaʼi.”

Neʼe fakapapau fēnei age e nātou ʼaē ʼe nātou fakahaʼele te Towers: “ ʼE mātou fakamavae anai te hahaʼi, ʼo kumi honatou tahi ʼu nofoʼaga.” Koia, neʼe toʼo atu aipe e te kau Fakamoʼoni ʼa Sehova te fale fata Towers ʼo mole totogi kovi. “He koʼe neʼe fai e te Tēhina ko Knorr te tohi ʼaia?” Ko te fehuʼi ʼaia ʼaē neʼe fai e Couch kia nātou ʼaē neʼe kau ki te fono. “Neʼe lagi mole ina ʼiloʼi mo ia, kae neʼe hoko te toʼo e te Sosiete Watch Tower te otele Towers.”

Neʼe toe fakamatala e te Tēhina ko Couch pe neʼe feafeaʼi te toʼo e te kau Fakamoʼoni ʼa Sehova te 97 Columbia Heights, te tuʼuʼaga ʼāfea ʼo te otele ʼiloa ʼaē ko te Margaret, ʼaē neʼe ōvi pe ki te nofoʼaga ʼuluaki ʼo te Petele. ʼE lelei tona tuʼuʼaga, koteʼuhi neʼe faigafua tona fakapipiki mo te Petele ʼaki te ala ʼi te lalo kele. ʼI Fepualio 1980, ʼi te temi ʼaē neʼe fakatuʼutuʼu ai ke toe fakafoʼou te otele, neʼe vela ia. Koia, ʼuhi he neʼe faigataʼa ki te tagata ʼaē neʼe ʼa ia te otele ke ina toe laga he fale foʼou ʼi te faʼahi tonu ʼaia, neʼe ina fakatau ai te moʼi kele ʼaia ki te kau Fakamoʼoni ʼa Sehova.

Neʼe ʼui fēnei e te Tēhina ko Couch: “Ko te ʼu fale fuli ʼaia ʼe ʼi ai tonatou hisitolia, ʼe ina fakahā mai te meʼa e tahi: neʼe ko Sehova ʼaē neʼe ina takitaki tana kautahi fakakelekele ke nātou maʼu te ʼu fale ʼaia.”

Ko Te Hisitolia ʼo Te Fale ʼAē ʼe Tuʼu ʼi Te 90 Sands

Ko te fale foʼou pea mo fālahi tokotahi, ʼe koia ʼaē ʼe tuʼu ʼi te 90 Sands Street. ʼI te temi ʼaē neʼe toʼo ai te fale e te kau Fakamoʼoni ʼa Sehova ʼi Tesepeli 1986, neʼe pipiki kiai te fale gāue lahi neʼe tuʼu ʼi te 160 Jay Street.c Neʼe maumauʼi te fale gāue, pea ʼi te ʼaho 30 ʼo ʼAukusito 1990, neʼe tala ki te famili ʼo te Petele neʼe kua ʼosi foaki te fealagia ʼaē ke laga he fale ʼaki he ʼu fata e 30 ʼi te potu ʼaia.

Ko te fakafehuʼi neʼe fai e Theodore Jaracz, ʼaē ʼe kau ʼi te Kolesi Pule, mo te tagata taupau ʼo te fale tā tohi ʼo te Sosiete ʼaē ʼi Brooklyn, ko Max Larson, neʼe ina fakahā pe neʼe hoko feafeaʼi te fakagafua ʼaē ke laga te fale ʼaē ʼe tuʼu ʼi te 90 Sands Street. Neʼe fakamahino e te Tēhina ko Max Larson, ko te meʼa ʼaē neʼe hoko ʼi te taʼu 1965, neʼe ko te meʼa maʼuhiga. Neʼe loto e te Sosiete ke ina laga he fale gāue ʼe laufata hogofulu ʼi te moʼi kele ʼaē ʼe ōvi mai ki te tahi ʼu fale gāue, kae ʼi te moʼi kele ʼaia, neʼe feala pe ke laga he ʼu fale e laufata lua.

Neʼe tali e he tagata tufuga fale ke ina fai te ʼu plans ʼo te fale gāue foʼou, kae neʼe ina ʼui fēnei: “ ʼE mole ʼau ʼiloʼi papau peʼe tali anai e te komite faka puleʼaga.” ʼI tana manatu, ʼe mole tali anai e te Komite faka puleʼaga ʼaia ke fetogi te ʼu fakatuʼutuʼu ʼo ʼuhiga mo te laga fale ʼi te koga meʼa ʼaia. ʼI te temi ʼaē neʼe tali ai te ʼu plans ʼo te laga fale, neʼe ina ʼui fēnei: “Neʼe lava feafeaʼi takotou maʼu te faʼahi ʼaia!”

Neʼe toe hoko atu e Larson ʼo ina ʼui ko tona tupuʼaga ʼaē heʼe ʼi te temi ʼaē neʼe foaki ai he ʼu lekula foʼou ʼo ʼuhiga mo te ʼu laga fale, ʼi te kolo ʼaia ʼaē neʼe laga ai tomatou fale laufata hogofulu, neʼe toe hoko feiā foki mo te ʼu kolo ʼaē ʼi ʼo nātou tafaʼaki, ʼo kau kiai mo te fale ʼaē ʼe tuʼu ʼi te 160 Jay Street. Pea, meʼa fakapunamaʼuli foki, ko te fetogi ʼaia ʼo te ʼu lekula ʼo ʼuhiga mo te laga fale, neʼe fakagafua ai ke laga he otele. Kae neʼe ʼui e Larson, neʼe ko he meʼa neʼe mole fakatokagaʼi e he tahi​—neʼe lagi hili kiai he ʼu taʼu e 25, ʼi tamatou ʼosi kamata kumi he koga meʼa ke laga ai he Petele foʼou, pea hoki toe maʼu ai neʼe kua fakagafua te faʼahi ʼaia!

Neʼe fakamahino fēnei e te Tēhina ko Larson te meʼa ʼaē neʼe hoko: “Neʼe mātou teuteuʼi te ʼu plans ʼo te fale e laufata 30 pea neʼe mātou ʼave ki te ʼu pilō ʼaē ʼe nātou foaki mai te ʼu fealagia ke laga he fale, pea neʼe nātou ʼui mai kia mātou: ‘ ʼE mole feala hakotou laga he fale moe ʼi henī. Ko te koga meʼa ʼaenī ʼe ko te ʼu fale gāue fuli, pea ʼe mole nātou fetogi anai te koga meʼa ʼaia kia koutou.’ ”

Neʼe mātou fakahā fēnei age ki te ʼu hahaʼi ʼaia: “ ʼE mole tonu ke nātou fetogi. Heʼe kua ʼosi fakagafua ke laga ai he otele.” ʼI tanatou vakaʼi te ʼu pepa ʼaē ʼe tuʼu ai te fakagafua ʼaia, neʼe nātou punamaʼuli! “Ei, neʼe feiā tamatou maʼu te fale ʼaē ʼe laufata 30,” ko te ʼu palalau fakaʼosi ʼaia ʼa Larson.

Ko Te ʼu Tapuakina ʼa Sehova ʼe Hā Lelei

Neʼe tohi fēnei e te tagata fai pesalemo ʼi te Tohi-Tapu: “Kapau ʼe mole laga e Sehova totonu ia te fale, pea neʼe mole pe he ʼaoga ʼo te gāue kinakina ʼaē neʼe fai ai e tona ʼu tufuga.” (Pesalemo 127:1) ʼE fakahā lelei ai, neʼe tapuakina e Sehova te ʼu gāue laga fale ʼo te kau Fakamoʼoni ʼa Sehova, moʼo faka faigafua te gāue ʼaē neʼe fakatotonu e Sesu ki tana kau tisipulo ke nātou fai, ʼaē ko te fai faka mafola pea mo akoʼi ʼo te hahaʼi ʼi te malamanei katoa.​—Mateo 24:14; 28:19, 20.

Ko nātou ʼaē neʼe nātou maʼu te pilivilesio ʼaē ko te fakalogo ki te polokalama ʼo te ʼaho 18 ʼo Sepetepeli 1995, neʼe nātou fiafia he kua hā lelei ʼe tapuakina te fakalahi ʼo te ʼu fale lalahi ʼo te malamanei ʼa te kau kaugana ʼa Sehova. ʼE feala ke tui papau te hahaʼi ʼa Sehova ʼe tapuakina tuʼumaʼu anai nātou e Sehova mo kapau ʼe nātou haga fai te ʼu meʼa ʼaē ʼe ina fakatotonu age ke nātou fai.

[Nota ʼi te lalo pasina]

[Paki ʼo te pasina 23]

90 Sands St. • 1995

[Paki ʼo te pasina 24, 25]

Ko te tahi ʼu fale neʼe avahi

97 Columbia Hts. • 1986

Otele Bossert, 98 Montague St. • 1983

34 Orange St. • 1945

Otele Standish, 169 Columbia Hts. • 1981

67 Livingston St. • 1989

108 Joralemon St. • 1988

Otele Towers, 79-​99 Willow St. • 1975

[Paki ʼo te pasina 26]

175 Pearl St. • 1983

69 Adams St. • 1991

360 Furman St. • 1983