Ko He “Kiʼi Kūtuga ʼo Te Kau Fakamoʼoni” ʼi Te Fenua ʼo Te “Moʼuga ʼo Te ʼAtua”

ʼI TE mape ʼo te fenua, kapau ʼe koutou mulimuli ki te kauvai ʼo te Potu Hihifo ʼo Afelika pea mo koutou maliu ʼi te potu hahake ʼo te Vaha ʼo Guinée, ʼo aʼu ki te faʼahi ʼaē ʼe maliu ki te potu toga, ʼe koutou tau anai ki Cameroun. Kapau ʼe hoko atu takotou hifo ʼi te kauvai ki te potu toga, pea ʼe koutou aʼu anai ki te loaloaga ʼo te mataʼone lanu ʼuli. ʼE ʼuli feiā te ʼone ʼuhi ko te pa ʼo te moʼuga afi ʼo te Moʼuga ʼo Cameroun.

Ko te moʼuga ʼaia e meta 4 070 pea ʼe māʼoluga tokotahi ʼi te koga meʼa ʼaia. ʼI te temi ʼaē ʼe hifo ai te mālama ʼo te laʼā ki te Moʼuga ʼo Cameroun, ʼe hā ai te ʼu lanu matalelei​—ko te huʼa lotuma, te legalega momoho, te lanu aulo, pea mo te lanu kula fakapōʼuli. Ko te tai pea mo te ʼu puvai ʼaē ʼe ōvi mai ʼe hā ai te ʼu lanu ʼaia ohage ko he sioʼata, ʼo teitei ke faigataʼa te fakakeheʼi ʼo te lagi mo te kele. ʼE faigafua te mahino pe koʼe neʼe fakahigoaʼi e te ʼu telepi animistes ʼo te koga meʼa ʼaia te moʼuga ko Mongo Ma Loba, ʼaē ʼe fakaliliu “Ko te saliote ʼo te ʼu ʼatua,” peʼe ʼi te agamāhani ʼe fakahigoaʼi, ko te “Moʼuga ʼo te ʼAtua.”

ʼO mamaʼo atu ʼi te potu toga, ʼe ʼi ai te ʼu mataʼone lanu hina, pea mo ʼona ʼulu niu. ʼO hilifaki ki te kauvai matalelei, ʼe lahi te ʼu vao matuʼa ʼi te fenua, ʼo kaku ki te kauvai ʼo Congo pea mo te Lotomalie ʼo Afelika pea mo te potu tokelau ʼo Nigéria pea mo te potu toga ʼo Tchad ʼi te Sahara. Ko te potu hihifo ʼo te fenua ʼe moʼugaʼia, ʼo ina fakamanatuʼi ki te hahaʼi folau te ʼu koga meʼa ʼo te Eulopa. Kae ko te vevela ʼo te ʼaele, ʼe ina fakamanatuʼi atu anai kia koutou, ʼe koutou tuʼu ōvi ki te Équateur. Ko te kehekehe ʼo tona matalelei ʼe ina uga ai te kau takitaki tulisi ke nātou ʼui ko Cameroun ʼe ko Afelika ʼi tona ʼuhiga veliveli. ʼE toe kau kiai te ʼu lanu kehekehe ʼo te ʼu hahaʼi ʼo te fenua, pea mo te ʼu lea kehekehe e 220 tupu.

Mokā koutou ʼaʼahi te fenua ko Cameroun, ʼe feala ke koutou nonofo ʼi te ʼu otele lalahi ʼaē ʼe tuʼu ʼi te ʼuafu ʼo Douala, peʼe ko te kolo tāfito ko Yaoundé. Kae ʼe tonu ke tou feʼiloʼiʼaki muʼa mo te hahaʼi ʼo te fenua, kae tāfito mo te toko 24 000 tupu kau Fakamoʼoni ʼa Sehova, ʼaē neʼe nātou maʼumaʼua ʼi te faʼufaʼu ʼo te “kiʼi kūtuga ʼo te kau fakamoʼoni” ʼi te fenua ʼaia ʼo te “Moʼuga ʼo te ʼAtua.”a He koʼe koa la ʼe mole koutou folau ki te fenua ʼaia ke koutou felāveʼi ai mo ʼihi ia nātou ʼaia? ʼE mahino papau ia, ʼi takotou ʼaʼahi ia te Potu Hihifo ʼo Afelika ʼe koutou maʼu ai anai hona ʼu fua lelei.

ʼE Nātou Feʼoloʼaki ʼi Te ʼu Vaka, ʼi Te Kā, Peʼe ʼi Te Lelue?

ʼE tuʼu ʼi Sanaga te liuʼa ʼo Cameroun, pea ʼe aʼu tona loaloaga ki te moana, pea ʼe laulahi. Ke feala hanatou aʼu ki te ʼu hahaʼi fuli ʼo te koga meʼa ʼaia, ʼe tonu ke ʼolo te kau Fakamoʼoni ʼa Sehova ʼi te ʼu vaka. Ko te meʼa ʼaia ʼaē ʼe fai e te toko hiva kaugā fai faka mafola ʼo te Puleʼaga ʼi te kiʼi kūtuga ʼo Mbiako. Ko te toko lua ia nātou ʼaia ʼe nonofo ia kilometa e 25, ʼi te kolo ʼo Yoyo. Ke feala hanā aʼu ki Mbiako ʼe tonu ke nā tau ʼaʼalo mālohi, kae ʼe nā kau tuʼumaʼu ki te ʼu fono faka Kilisitiano. Lolotoga tana ʼaʼahi ia te kūtuga ʼaia, neʼe fakatuʼutuʼu e te tagata taupau feʼaluʼaki ke ina fakahā te foʼi fime viteo Les Témoins de Jéhovah: un nom, une organisation. Kae neʼe mole faigafua te fai ʼo te faʼahi ʼaia, koteʼuhi ʼi te kolo mamaʼo ʼaia, ko te faʼahi fea ʼaē ka maʼu ai he viteo, he televisio, pea mo te hila ke feala ai foki te fakahaʼele ʼo te ʼu meʼa ʼaia?

Lolotoga te vāhaʼa ʼaia neʼe ʼolo ʼihi kaugā fai faka mafola ʼo ʼaʼahi te pasitea ʼo te ʼēkelesia ʼo te kolo. Neʼe nātou punamaʼuli ʼi te tali fakafiafia ʼo nātou e te pasitea, pea neʼe lelei tanatou fai palalau mo ia ki te Tohi-Tapu. Neʼe nātou fakatokagaʼi neʼe ʼi ai te foʼi viteo ʼa te pasitea pea mo tana masini moʼo fakahaʼele ʼo te hila, koia ʼaki he lotomālohi, neʼe kole e te ʼu tēhina peʼe feala hanatou fakaʼaogaʼi tana ʼu meʼa ʼaia. ʼI tana leleiʼia tanatou fai palalau ki te Tohi-Tapu ʼi te kamataʼaga, neʼe lotolelei ai te pasitea ʼo ina foaki age te ʼu meʼa ʼaia kia nātou. ʼI te Moeaki afiafi ko te toko 102 hahaʼi ʼaē neʼe ʼōmai ʼo sioʼi te foʼi fime ʼo kau ai te pasitea pea mo te tokolahi ʼo te hahaʼi ʼo tona ʼēkelesia. Ko te ʼu Fakamoʼoni e lua mai Yoyo neʼe nā ʼōmai ʼi te ʼu vaka e lua mo te tokolahi neʼe nātou fia logo ki te moʼoni. Neʼe mole nātou tokagaʼi te faigataʼa ʼo te tau ʼaʼalo ʼo fakafeagai ki te tafe ʼo te vaitafe. ʼI tanatou ʼosi sioʼi te foʼi fime viteo, neʼe uga ai nātou pea mo fakaloto mālohiʼi ai nātou, pea neʼe nātou fiafia ʼi te kau ki he kautahi lahi feiā, ʼaē ʼe ina fakatuʼutuʼu ke ina faka maʼuhigaʼi ia Sehova.

Kapau ʼe kita fia ʼalu ki te faʼahi ʼaē ʼe mole feala ke ʼalu kiai he vaka, pea ʼe feala ke kita fakaʼaogaʼi te kā. ʼI te tauʼaga motokā, ʼaē ʼe fakatalitali ai te ʼu kā ki te hahaʼi, ʼe lahi te ʼu hahaʼi ʼe nātou gāue ai. ʼE feala hakita puli ʼi te lotolotoiga ʼo te ʼu hahaʼi ʼaē ʼe nātou fakatau te vai ʼaisi, te ʼu hahaʼi fakatau siaina, pea mo te ʼu tama ʼaē ʼe gāue ki te ʼu kā. Ko te gāue ʼa te ʼu tama ʼaia, ʼe ko te ʼamo ʼo te ʼu fakatau kehekehe ʼa te hahaʼi ki te ʼu kā, “ ʼaē ʼe fakatalitali kia nātou.” Kae, ʼe fualoa tanatou “fakatalitali,” heʼe feala ke nātou fakatalitali lolotoga ni ʼu hola, pe ko ni ʼu ʼaho. Ko te ʼu hahaʼi folau ʼe tonu ke nātou fakaʼaogaʼi he ʼu hola, ko ʼihi ʼe nātou fakaʼaogaʼi he ʼu ʼaho, ʼi tanatou talitali. ʼI te temi ʼaē kua katoa fuli ai te hahaʼi folau ki te kā pea mo fakatokatoka tanatou ʼu fakatau, te ʼu kato meʼa kai, pea ʼi ʼihi temi ʼe nātou ʼai te ʼu moa maʼuli pea mo te ʼu tao ʼi te fuga kā, pea ʼalu ai leva te kā ʼi he ʼu ala tokakovi pea mo vaoa.

Ko te tagata taupau feʼaluʼaki, ʼe mole kei ina toʼo te kā, he kua fiu ʼi te fakatalitali. ʼI te temi nei ʼe feʼaluʼaki ʼi te lelue. ʼE ina ʼui fēnei: “ ʼE mole kei ʼau tauhala ki te ʼaʼahi ʼo te ʼu kokelekasio, talu mai taku fakatuʼutuʼu ʼaē ke ʼau fakaʼaogaʼi te lelue moʼo feʼaluʼaki ʼi te ʼu kokelekasio. ʼE moʼoni, ʼe lagi loaloaga taku ʼalu lelue, kae ko te meʼa ʼaē ʼe lelei, heʼe mole kei ʼau talitali ʼi he ʼaho katoa pe ko ʼaho e lua ki te kā. ʼI te ʼu ʼaho ʼua, ʼe mole kei ʼiloga lelei te ʼu ala, he kua ʼaofi e te vai. ʼE tonu ke koutou toʼo tokotou ʼu sūlie pea koutou haʼele ʼi te ʼu ala pelapela pea mo fonu ʼi te vai. ʼI te tahi ʼaho neʼe tō toku foʼi sūlie ki te vaitafe pea neʼe hoki maʼu ʼi he ʼu vāhaʼa ki muli mai, e te taʼahine ʼa te kau Fakamoʼoni ʼa Sehova ʼi tana ʼalu ʼo gelu! Kua ʼau fiafia ʼi taku toe maʼu toku hoaʼi sūlie ʼaē neʼe tō ki te vaitafe. ʼI ʼihi temi ʼe ʼau ʼalu ki te ʼu koga meʼa ʼaē neʼe mole heʼeki faka mafola ai te kau Fakamoʼoni ʼa Sehova. ʼE fehuʼi tuʼumaʼu mai e te hahaʼi ʼo te kolo, pe koteā te ʼu meʼa ʼaē neʼe ʼau haʼu mo ia. Koia ʼe ʼau ʼave tuʼumaʼu te ʼu nusipepa pea mo te ʼu kaupepa. Mokā ʼai haku kiʼi tuʼu, pea ʼe ʼau foaki te ʼu tohi faka Tohi-Tapu ʼaia, pea ʼe ʼau faka mafola fakanounou age kia nātou. ʼE ʼau tui ʼe fakatuputupu anai e Sehova te ʼu pulapula ʼaia ʼo te moʼoni.”

ʼE Nātou Nonofo ʼi Te ʼu Potu Mamaʼo

Ko te kau Fakamoʼoni ʼa Sehova ʼe nātou faiga ke nātou faka mafola te logo lelei ʼo te Puleʼaga ʼo te ʼAtua ki te hahaʼi, māʼia mo nātou ʼaē ʼe nonofo ʼi te ʼu potu mamaʼo ʼo Cameroun, ʼi te ʼu kolo ʼaē ʼe ū ʼi te ʼu vao matuʼa. Ko te faʼahi ʼaia ʼe fakamaʼua kiai he faiga lahi, kae ʼe fakaloto mālohi te ʼu fua ʼo te faiga ʼaia.

Ko Malia, ko te pionie katoa, neʼe ina kamata te ako Tohi-Tapu mo te taʼahine ʼe higoa ko Arlette. ʼI te ʼosi ʼo te ʼuluaki ako, neʼe fehuʼi age e Malia kia Arlette peʼe feala hanā kaugā ʼolo, ʼo mulimuli ki te agaʼi fenua ʼo te koga meʼa ʼaia ʼo Afelika. Kae, neʼe fakamahino age e te taʼahine ʼe faigataʼa tana haʼele heʼe mamahi tona ʼu vaʼe. Ko te ʼu vaʼe ʼo Arlette neʼe kua ʼaukau he neʼe hū kiai te kiʼi manu, pea neʼe fanaunau ai. Neʼe lotomālohi ia Malia ʼo ina kapeʼi te ʼu kiʼi manu ʼaia. Ki muli age, neʼe fakahā age kia ia, neʼe gaohi te kiʼi taʼahine ʼaia ʼi te tahi po e te ʼu temonio. Neʼe fakamahino māmālie age e Malia peʼe feafeaʼi hana falala kia Sehova, tāfito ʼo ina pāui leʼolahi tona huafa ʼi te faikole.​—Tāʼaga Lea 18:10.

Neʼe tuputupu fakavilivili te ako ʼa Arlette. ʼI te kamata, neʼe mole koviʼia e tona famili tana ako, he neʼe lelei ki tana tuputupu ʼi te faʼahi fakasino pea mo te faʼahi fakaʼatamai. Kae ʼi tanatou sio ʼaē ʼe fia liliu ia ko he Fakamoʼoni ʼa Sehova, neʼe nātou fakagata ai tana ako. Hili kiai vāhaʼa e tolu, pea fakatokagaʼi e te faʼe ʼa Arlette te lotomamahi ʼo tana taʼahine, ʼo ina kole ai kia Malia ke haʼu ʼo toe fai tana ako.

ʼI te temi ʼaē neʼe hoko ai te fakatahi faka silikosikilipisio, neʼe totogi e Malia te takisi ke haʼu ʼo ʼavage ia Arlette ʼi te ʼu ʼaho ʼaia e lua. Kae, neʼe mole fia ʼalu te tagata fai takisi ki te ʼapi ʼo Arlette, ʼo ina ʼui ʼe mole feala te ʼalu ʼa te motokā ʼi te ala ʼaia heʼe tokakovi. Koia neʼe fakatuʼutuʼu ai e Malia ke ina ʼaumai te taʼahine ki te ala ke feala ai hana aʼu ki te takisi. ʼE mahino papau ia neʼe tapuakina e Sehova te ʼu faiga ʼaia. Ia ʼaho nei kua ʼalu tuʼumaʼu ia Arlette ki te ʼu fono fuli ʼo te kokelekasio. Moʼo tokoni kia ia ʼi te faʼahi ʼaia, ʼe ʼalu ia Malia ʼaki he lotomālohi ʼo kumi mai ia ia. ʼE nā haʼele fakatahi ʼi he hola katoa pea mo minuta e 15. Mai tona ʼaluʼaga ʼaē ʼe kamata te fono ʼi te ʼAhotapu uhu ʼi te hola 8 vaelua, koia ʼe tonu ai ke mavae ia Malia ʼi tona ʼapi ʼi te hola 6 vaelua; kae ʼe nā kaku tautonu atu ki te fono. ʼE fakaʼamu ia Arlette ke ina foaki tona maʼuli ki te ʼAtua ʼaki te papitema. ʼE ʼui fēnei e Malia: “Ko ʼaē neʼe mole sio kia ia ʼi tana kamata ako, ʼe mole feala ke mahino ki ai te ʼu fetogi lahi ʼaē neʼe ina fai. ʼE ʼau fakamālo ʼaupito kia Sehova ʼi tana tapuakina ia ia.” ʼE mahino papau ia ko Malia ʼe ko he faʼifaʼitaki lelei ʼo ʼuhiga mo te ʼofa faka sakilifisio.

ʼI Te Potu Taupotu ʼo Te Potu Tokelau

ʼI te Potu Tokelau ʼo Cameroun ʼe lahi ai te ʼatu ʼu meʼa kehekehe pea mo matalelei. ʼI te ʼu temi ʼua, ʼe liliu te fenua ohage ko he ʼōloto lahi, pea mo maʼuli. Kae ʼi te vevela ʼo te laʼā, ʼe moamoa ai te vao. ʼI te fetapā, mokā tuʼu te laʼā ʼi te lotomalie ʼo te lagi, pea mo te faigataʼa ʼo te maʼu ʼo he faʼahi moʼo fakamalumalu, ko te faga ōvi ʼe nātou ʼolo ʼo fakaʼefihi ki te ʼu kaupā ʼo te ʼu ʼapi, ke nātou fakamalumalu ai. ʼI te lotolotoiga ʼo te ʼone pea mo te vao moamoa, ʼe gata pe ki te ʼu lauʼakau ʼo te ʼu fuʼu baobabs ʼaē ʼe mole moamoa. Logope la ʼe mole tatau te ʼu fuʼu ʼakau ʼaia mo te tahi ʼu fuʼu ʼakau ʼo te vao matuʼa ʼo te Équateur, kae ʼe nātou mālolohi. Ko tonatou mālohi ʼaē moʼo kātakiʼi ʼo te ʼu ʼaluʼaga faigataʼa, ʼe ko he fakatā lelei ʼaia ʼo te lotomālohi pea mo te lototoʼa ʼo te kiʼi kūtuga ʼo te kau Fakamoʼoni ʼaē kua ʼolo ʼo maʼuʼuli ʼi te fenua ʼaia, ke feala ai he fakahā te mālama ʼo te moʼoni.

Ko ʼihi ʼu kokelekasio ʼi te ʼu koga meʼa ʼaia ʼe vaha mamaʼo ia kilometa e 500 ki te 800, pea ʼe nātou logoʼi moʼoni ʼi tonatou loto tanatou nonofo mamaʼo. Kae ʼe lahi ʼaupito te hahaʼi ʼaē ʼe fia logo ki te moʼoni. Ko te kau Fakamoʼoni ʼo te tahi ʼu fenua ʼe nātou ʼolo ki te koga meʼa ʼaia moʼo tokoni ki te ʼu tēhina ʼaia. Ke feala he fua lelei ʼo tonatou minisitelio, ʼe tonu ke nātou ako te lea ʼo te kolo, ko te faka Foufouldé.

Ko te Fakamoʼoni mai Garoua neʼe ina fakatuʼutuʼu ke ina fakaʼaogaʼi he ʼu ʼaho moʼo fai faka mafola ʼi te kolo ʼaē neʼe tupu ai, ʼaē ʼe tuʼu ia kilometa e 160. Neʼe ina maʼu te ʼu hahaʼi ʼe nātou fia ʼiloʼi te moʼoni, kae ʼi te totogi kovi ʼo te feʼaluʼaki, neʼe mole feala ai hana liliu tuʼumaʼu kia nātou. Hili kiai te ʼu vāhaʼa, neʼe maʼu e te Fakamoʼoni ʼaia te tohi ʼa te tahi ʼe ina kole age kia ia ke toe liliu age ʼo ʼaʼahi ia ia. Kae neʼe mole heʼeki ina maʼu hana falā moʼo totogi ʼo tana feʼaluʼaki, koia neʼe mole feala ai tana ʼalu. Tou fakakaukauʼi muʼa te punamaʼuli ʼa te Fakamoʼoni ʼaia ʼi te ʼalu age ʼo ia ʼaia ki tona ʼapi ʼi Garoua, ʼo fakahā age kia ia ko te toko hogofulu ʼi te kolo ʼe nātou talitali ke ʼalu age ʼo ʼaʼahi nātou!

ʼI te tahi kolo, ʼo ōvi ki te kauvai ʼo Tchad, ko te toko 50 hahaʼi neʼe fia logo ki te moʼoni, neʼe nātou fai e nātou totonu tanatou ako Tohi-Tapu. Neʼe nātou fakatuʼutuʼu ke ʼolo he toko tolu ia nātou ʼo kau ki te ʼu fono ʼo te kokelekasio ʼaē ʼe ōvi mai ʼi Tchad. ʼI tanatou liliu kio nātou, neʼe nātou fai te ako Tohi-Tapu mo te kūtuga katoa. ʼE moʼoni, ko te ʼu palalau ʼaē neʼe fai e Sesu ʼe feala ke fakaʼaogaʼi ʼo ʼuhiga mo nātou: “Ko te taʼukai ʼe lahi, kaʼe tokosiʼi te kaugāue. Koutou faikole ki te ʼAliki ʼo te taʼukai ke ina fekauʼi mai he kaugāue ki tana taʼukai.”​—Mateo 9:​37, 38.

Te Fai Faka Mafola ʼi Te ʼu Kolo Lalahi

Hili kiai te ʼu taʼu e lua mo tanatou mole kei maʼu te ʼu nusipepa, kua feala leva te tufa faʼifaʼitaliha ʼo Te Tule Leʼo pea mo te Réveillez-vous! ʼi Cameroun. Ko te tokolahi ʼo te hahaʼi, ʼe nātou fiafia pea mo nātou leleiʼia te ʼu nusipepa ʼaia ʼi tanatou ʼuluaki lau. Ko te taumatuʼa ʼe nā pionie makehe, neʼe hinoʼi nāua ki te kolo ʼi te ʼu kolo ʼaia, pea neʼe nā tufa te ʼu nusipepa e 86 ʼi te ʼuluaki fai faka mafola ʼi te uhu ʼi tonā telituale foʼou. Ko ʼihi kaugā fai faka mafola neʼe nātou tufa te ʼu nusipepa e 250 ʼi te māhina e tahi! He koʼe ʼe haʼele lelei tanatou gāue? ʼE haʼele lelei ʼuhi ko te tufa ʼo te ʼu nusipepa ki te hahaʼi fuli.

Ko te Fakamoʼoni ʼe gāue ʼi te pilō ʼe avahi ki te kaugamālie ʼe ina tuku tuʼumaʼu te ʼu nusipepa ʼi te faʼahi ʼaiʼaga tohi. Neʼe sio te fafine ki te ʼu nusipepa ʼaia kae neʼe mole ina toʼo. Neʼe tokagaʼi e te Fakamoʼoni ʼe fia lau te fafine ki te ʼu nusipepa ʼaia, koia neʼe ina foaki age ai kia ia he nusipepa, pea neʼe ina tali. Neʼe punamaʼuli te Fakamoʼoni ʼi tana sio ki tana toe liliu mai ʼi te ʼapogipogi ake. Neʼe haʼu ko te totogi ʼo te nusipepa, kae neʼe lahi te tahi ʼu meʼa neʼe ina fia ʼiloʼi. Koteā koa tona tupuʼaga? Neʼe fakaʼalikiʼi ia ia, koia neʼe ina fili ai te nusipepa ʼaē ʼe talanoa ki te faʼahi ʼaia. Neʼe ina lau te nusipepa ʼaia ʼi te po katoa pea ina toe lau te ʼu tokoni ʼaē ʼe tuʼu ʼi te nusipepa. Neʼe fīmālie ʼaupito tona loto, koia neʼe lahi age tana fia ʼiloʼi te tahi ʼu meʼa ʼo ʼuhiga mo te kau Fakamoʼoni ʼa Sehova.

Tatau aipe mo te ʼu tamaliki liliki ʼe feala ke nātou faka mafola te logo lelei ʼo te Tohi-Tapu. ʼI te ʼui age e te tagata faiako ki te kiʼi taʼahine ʼe taʼu ono ke ina hivaʼi te hiva faka Katolika, neʼe fakafisi ia, ʼo ina ʼui age ko ia ko te Fakamoʼoni ʼa Sehova. Pea neʼe ʼui age e te tagata faiako ke ina hivaʼi he hiva ʼo tana lotu ke feala ai hana nota ia ia ʼi tana hiva ʼaia. Neʼe ina fili te katiko ko tona kupu tāfito “Te Fakapapau ʼa Te ʼAtua ʼo ʼUhiga Mo Te Palatiso” pea neʼe ina hiva fakaʼatamai. Neʼe fehuʼi age fēnei e te tagata faiako: “ ʼE ke talanoa ki te palatiso ʼi tau hiva. ʼE ʼifea te palatiso ʼaia?” Neʼe fakamahino age e te kiʼi taʼahine ʼaia kua vave fakahoko e te ʼAtua tana fakatuʼutuʼu ʼaē ke ina fakatuʼu te Palatiso ʼi te kele. ʼI tana punamaʼuli ki tana tali, neʼe kole e te tagata faiako ki tana ʼu mātuʼa te tohi ʼaē neʼe ako e tanā kiʼi taʼahine. Neʼe ina foaki te nota lelei ki te kiʼi taʼahine ʼuhi ko te meʼa ʼaē neʼe ina ako ʼi te tohi ʼaia kae ʼe mole ko te meʼa ʼaē ʼe ina akoʼi lolotoga te ʼu ako ʼo ʼuhiga mo te lotu. Neʼe fakahā age e te ʼu mātuʼa ki te tagata faiako, kapau ʼe ina fia nota leleiʼi ia ia, pea ʼe tonu ke ʼuluaki ako muʼa mo ia. Neʼe kamata ai tana ako Tohi-Tapu.

ʼE Koutou Fakatuʼutuʼu Koa He ʼAʼahi?

Ia ʼaho nei ʼe lahi te ʼu fenua ʼi te malamanei, ʼe mole fia logo ai te hahaʼi ki te logo lelei ʼo te Puleʼaga. ʼE mole nātou fia logo ki he talanoa ʼo ʼuhiga mo te ʼAtua peʼe ki te Tohi-Tapu. Ko ʼihi ʼe nātou matataku pea ʼe mole nātou fia palalau mo he matāpule ʼe haʼu ʼo fisifisi tonatou matapā. Ko te ʼu meʼa fuli ʼaia ʼe ko he fihifihia moʼoni ki te kau Fakamoʼoni ʼa Sehova ʼi tonatou minisitelio. Kae ʼe kehekehe ia mo Cameroun!

ʼI te fenua ʼaia, ko te fai faka mafola ʼi te ʼu ʼapi ʼe ko he meʼa fakafiafia. ʼE mole nātou fisifisi ʼi te matapā, kae ʼo mulimuli ki te agaʼi fenua ʼe nātou pāui, “Kong, kong, kong.” Pea ʼe tali fēnei mai e he tahi mai te ʼapi, “Ko ai?” ʼosi ʼaia pea tou fakahā ko tatou ko te kau Fakamoʼoni ʼa Sehova. ʼI te agamāhani, ʼe ʼui age e te ʼu mātuʼa ki tanatou tamaliki ke nātou ʼaumai he ʼu hekaʼaga pea ke nātou tuku ʼi te malumalu ʼo te fuʼu ʼakau, lagi ʼi he lalo mago. Pea ʼe ko he meʼa fakafiafia te fakaʼaogaʼi ʼo tokita temi moʼo fakamahino pe koteā te Puleʼaga ʼo te ʼAtua, pea mo te meʼa ka ina fai anai moʼo faka ʼāteaina ʼo te malamanei ʼi te ʼu mamahi ʼaē ʼe tau mo ia.

ʼI te hili ʼo te fai palalau feiā, neʼe fakahā e te fafine te meʼa ʼaē ʼe ina logoʼi ʼi tona loto, ʼo ina ʼui fēnei: “ ʼE ʼau lotomamahi ʼi taku sio ko te moʼoni ʼaē neʼe ʼau kumi, ʼe mole maʼu ia ʼi te lotu ʼaē neʼe ʼau tupu ai, pea mo ʼau lahi ai. ʼE ʼau fakamālo ki te ʼAtua ʼi tana fakahā mai te moʼoni. Neʼe ʼau tiakono ʼi toku ʼēkelesia. ʼE tuku te fakatātā ʼo Malia ʼi te vāhaʼa katoa ʼi te ʼu ʼapi ʼo te ʼu tiakono, ke feala hanatou faikole kia ia. Ko ʼau, neʼe ʼau kole tuʼumaʼu kia Malia ke tokoni mai kia ʼau ke ʼau ʼiloʼi te moʼoni. ʼI te temi nei ʼe fakahā mai e te ʼAtua kia ʼau ko te moʼoni ʼaia ʼe mole nofo ia mo Malia. ʼE ʼau fakamālo kia Sehova.”

Koia kapau ʼi he ʼaho ʼe koutou fia maʼu he fiafia lahi ʼi takotou faka mafola te logo lelei ʼo te Puleʼaga ʼo te ʼAtua, he koʼe koa ʼe mole koutou ʼolo ʼo ʼaʼahi te Potu Hihifo ʼo Afelika? ʼE mole gata pe anai ʼi takotou mamata ki Afelika ʼi takotou ʼolo ʼi te vaka, ʼi te kā, ʼi te lelue, kae ʼe koutou kau anai ki te fakatuputupu ʼo te “kiʼi kūtuga ʼo te kau fakamoʼoni” ʼi te fenua ʼo te “Moʼuga ʼo te ʼAtua.”

[Kiʼi nota ʼi te lalo pasina]

[Haʼuʼaga ʼo te paki pasina 22]

Map: Mountain High Maps® Copyright © 1995 Digital Wisdom, Inc.