Ko Te Fakaloto Fīmālie ʼi Te Tau Ia Taʼu e Fā
LOLOTOGA te tau ʼaē neʼe hoko ia taʼu e fā ʼi te telituale ʼo te Iukoselavia ʼāfea, ko te tokolahi neʼe nātou tau mo te ʼu faigataʼaʼia pea neʼe nātou hoge ʼi te ʼu meʼa ʼaē ʼe ʼaoga ki tonatou maʼuli. Ia nātou ʼaia neʼe kau kiai te ʼu lauʼi teau Fakamoʼoni ʼa Sehova ʼaē neʼe nātou haga tauhi agatonu ki “te ʼAtua ʼo te ʼu fakaloto fīmālie fuli.” —2 Kolonito 1:3.
Neʼe lahi age te ʼu faigataʼaʼia ʼaē neʼe tau mo te hahaʼi ʼo Sarajevo, koteʼuhi neʼe nātou nonofo ʼi te kolo lahi ʼaē neʼe nofoʼi tuʼumaʼu e te kau solia lolotoga te tau. Neʼe kua tuʼusi te hila, te vai, neʼe mole kei ʼi ai he fafie pea mo he meʼa kai. Neʼe haʼele feafeaʼi te kokelekasio ʼo te kau Fakamoʼoni ʼa Sehova ʼi Sarajevo ʼi te ʼu ʼaluʼaga faigataʼa ʼaupito ʼaia? Ko te ʼu Kilisitiano mai te ʼu fenua ʼi tona tafaʼaki neʼe mole nātou fakameʼameʼa ʼi te faka tuʼutāmakiʼia ʼo tonatou maʼuli moʼo ʼave ʼo te ʼu tuʼuga meʼa ʼaē ʼe ʼaoga ki te ʼu tēhina mo tuagaʼane. (Vakaʼi Te Tule Leʼo, ʼaho 1 ʼo Novepeli 1994, ʼi te pasina 23-7.) Tahi ʼaē meʼa, neʼe fevaevaeʼaki e te ʼu tēhina ʼo Sarajevo te ʼu meʼa ʼaē neʼe nātou maʼu, tāfito te ʼu meʼa fakalaumālie. Lolotoga te tau, koʼeni te fakamatala ʼaē neʼe fai e te tagata taupau faka Kilisitiano ʼo te kolo ʼaia:
“ ʼE maʼuhiga ʼaupito kia mātou tamatou ʼu fono. Ko ʼau pea mo toku ʼohoana, ʼe ma ʼolo fakatahi mo te tahi ʼu hahaʼi e toko 30 ki te ʼu fono, ʼo mātou fai ia kilometa e 15 ʼi te ʼalu pea mo te liliu. ʼI ʼihi temi neʼe tala ko te vai ʼe tufa anai ʼi te temi ʼaē ka fai ai te ʼu fono. Koteā ʼaē neʼe fai e te ʼu tēhina? Neʼe nātou nonofo koa ʼi fale, pe neʼe nātou kau ki te ʼu fono? Neʼe fakamuʼamuʼa e totatou ʼu tēhina tanatou kau ki te ʼu fono. ʼE fetokoniʼaki tuʼumaʼu te ʼu tēhina; māʼiape la mo te ʼu meʼa ʼaē ʼe nātou maʼu, ʼo nātou fevaevaeʼaki. Ko te tuagaʼane ʼi tomatou kokelekasio ʼe nofo ʼi te tafaʼaki ʼo te kolo, ʼo ōvi ki te vao matuʼa; koia ʼe faigafua age kia ia ke ina maʼu te fafie. ʼE toe gāue foki ʼi te fale taʼo pane pea ko tona litotogi ʼe ko te falena. Mokā ʼe feala kia ia, pea ʼe ina taʼo te foʼi pane lahi pea ʼe ina ʼaumai ki te fono. ʼI te hili ʼo te fono mokā mavae, pea ʼe ina foaki mai kia mātou fuli he koga pane.
“ ʼE maʼuhiga ke mole logoʼi e he tēhina pe ko he tuagaʼane ʼe līʼakina. ʼE mole he tahi ʼe ina ʼiloʼi pe ko ai anai ia tatou ʼaē ka ʼaoga ki ai he tokoni ʼi he faigataʼaʼia. ʼI te temi ʼaē neʼe ʼaisi ai te ʼu ala, neʼe ʼi ai te tuagaʼane neʼe mahaki, pea ko te ʼu tēhina tūpulaga mo mālolohi neʼe nātou ʼave ia ia ki te ʼu fono ʼi te saliote fakaheheke.
“ ʼE mātou kau fuli ki te gāue fai faka mafola, pea neʼe tapuakiʼi e Sehova tamatou ʼu faiga. Neʼe sio ia ki tomatou maʼuli kinakina ʼi Bosnie, kae neʼe ina tapuakiʼi mātou ʼo ina fakatuputupu te gāue—pea ko te tuputupu ʼaia neʼe mole heʼeki hoko ia ʼi muʼa ʼo te tau.”
ʼE tatau pe mo te ʼu koga meʼa ʼo Iukoselavia ʼaē ʼe hoko ai te tau, kua tuputupu pe te hahaʼi ʼo te kau Fakamoʼoni ʼa Sehova logope la te ʼu faigataʼaʼia. ʼE maʼu mai te pilō ʼo te kau Fakamoʼoni ʼa Sehova ʼo Croatie te fakamatala ʼaenī, ʼo ʼuhiga mo te kiʼi kūtuga ʼo te kau Fakamoʼoni: “Neʼe tonu ke tauʼi e te ʼu tēhina ʼaē ʼe nonofo ʼi Velika Kladuša te ʼu temi faigataʼa ʼaupito ʼaia. Neʼe lahi te ʼu ʼohofi ʼaē neʼe fai ki te kolo. Neʼe maʼua ke fakamahino e te ʼu tēhina tanatou fakafisi ki te ʼu meʼa faka politike ki te kau Croates, te kau Serbes pea mo te ʼu kautau Mahometa kehekehe. Ei, neʼe lahi te ʼu meʼa neʼe tonu ke nātou kātakiʼi—te pilisoni, te tā ʼo nātou, te pakupaku, pea mo te mate. Kae, ko nātou fuli neʼe nātou nonofo agatonu, pea ʼe nātou maʼu te pilivilesio fakaofoofo ʼaē ke nātou sio ki te tapuakina ʼa Sehova ki tanatou ʼu gāue.”
Logope la tonatou ʼu mamahi ʼaia, ko te kau Fakamoʼoni ʼa Sehova ʼi Velika Kladuša pea mo Bihać ʼaē ʼi tona tafaʼaki, ʼe lahi pe tonatou fiafia ʼi te tuputupu ʼa te gāue, pea ʼaki he lotomālohi ʼe nātou fakahā te logo fakaloto fīmālie ʼo te ʼAtua ki te ʼu hahaʼi ʼo tonatou kolo. ʼO fakakatoa, ko te toko 26 kaugā fai faka mafola ʼi te ʼu koga meʼa ʼaia e lua, ʼe nātou fai te ʼu ako Tohi-Tapu e 39!