Neʼe Nātou Fai Te Finegalo ʼo Te ʼAtua

Neʼe Tauhi Tuʼumaʼu Ia Taniela Ki Te ʼAtua

ʼE TAHITAHIGA te fetogi ʼo te hisitolia ʼi te po pe e tahi. Kae neʼe hoko te meʼa ʼaia ʼi te taʼu 539 ʼi muʼa ʼo totatou temi, ʼi te temi ʼaē neʼe mālo ai te kau Metia pea mo te kau Pelesia ʼi te Puleʼaga ʼo Papiloni ʼi te ʼu kiʼi hola nounou pe. ʼI te taʼu ʼaia, ko Taniela, te polofeta ʼa Sehova, neʼe ko te tagata Sutea neʼe kua teitei taʼu 80 tana nofo pilisoni ʼi Papiloni. ʼI tona lagi taʼu 90 tupu, neʼe kua ʼamanaki hoko kia Taniela te ʼahiʼahi lahi ʼo ʼuhiga mo tana nofo agatonu ki te ʼAtua.

ʼI te ʼosi tō ʼo Papiloni, neʼe hage kua lelei te ʼaluʼaga ʼo Taniela ʼi te kamataʼaga. Ko te hau foʼou neʼe ko Taliusi te Metia ʼaē neʼe taʼu 62, pea neʼe ina leleiʼia ia Taniela. ʼI te ʼu ʼuluaki meʼa ʼaē neʼe ina fai ʼi tona ʼuhiga hau, neʼe ina fili te ʼu satrapesa e toko 120, pea mo ina fakanofo te ʼu tagata e toko tolu ki te ʼu tuʼulaga maʼuhiga. Ko Taniela neʼe kau ki te ʼu tagata e toko tolu ʼaia ʼaē neʼe tuku ki ai te pilivilesio ʼaia. ʼI tana ʼiloʼi ʼaē te ʼu fealagia lahi ʼo Taniela, neʼe ina loto ʼaupito ke fakanofo ia ia ki te tuʼulaga ʼaē ko te ʼuluaki minisi. Kae ʼi te temi pe ʼaia, neʼe hoko ai te meʼa neʼe ina fetogi fakafokifā ai te ʼu fakatuʼutuʼu ʼa te hau.

Ko He Fakatuʼutuʼu Kākā

Ko te ʼu tagata ʼaē neʼe tatau tonā tuʼulaga mo Taniela, neʼe nā ʼōmai fakatahi ki te hau mo te ʼu satrapes, ʼo fakahā tanatou manatu faikehe. Neʼe nātou kole mamahi kia Taliusi ke ina fai te fakatotonu ʼaenī: “Lolotoga ʼaho e tolugofulu, ko ia ʼaē ʼe ina fai he kole ki he ʼatua peʼe ki he tagata, kae mole ina fai kia te koe, Ê hau, ʼe tonu anai ke lī ia ia ki te luo ʼo te ʼu laione.” (Taniela 6⁠:⁠7) Neʼe lagi manatu e Taliusi neʼe fakahā e te ʼu tagata ʼaia tanatou agatonu kia ia. Pea neʼe lagi manatu ia ko te lao ʼaia ʼe tokoni anai kia ia ʼaē ʼe matāpule, ke ina fakamālohiʼi tona tuʼulaga pule ʼo te puleʼaga.

Kae, neʼe mole fakaʼamuʼamu e te kau takitaki pea mo te kau satrapes ke fai te lao ʼaia maʼa te hau totonu. Neʼe nātou “faiga ke nātou maʼu he takuʼaki moʼo fakafeagai kia Taniela ʼo ʼuhiga mo te puleʼaga; kae neʼe mole he takuʼaki peʼe ko he meʼa fakakākā neʼe feala ke nātou maʼu, mai tona ʼaluʼaga ʼaē neʼe tau mo te falala pea neʼe mole maʼu ia te ia he meʼa neʼe ina fai ʼaki he lotonoa, peʼe fai fakakākā.” Koia, neʼe fakakaukau fēnei te ʼu tagata kākā ʼaia: “ ʼE mole tou maʼu anai he takuʼaki ʼi te Taniela ʼaenī, gata pe mo kapau ʼe tonu ke tou maʼu he meʼa ʼe fakafeagai kia te ia ʼi te lao ʼo tona ʼAtua.” (Taniela 6:​4, 5) ʼI tanatou ʼiloʼi ʼaē neʼe faikole ia Taniela kia Sehova ʼi te ʼaho fuli pe, koia neʼe nātou kumi ai ke liliu te faʼahi ʼaia ko he agahala mamafa.

Neʼe lagi fehiʼa te kau takitaki pea mo te kau satrapes kia Taniela he neʼe “ina fakakeheʼi tuʼumaʼu pe ia ia [ia nātou], koteʼuhi neʼe ina maʼu te ʼatamai faka­ofoofo ia te ia; pea ko te hau neʼe ina fia hikihiki ia ia ʼi te puleʼaga katoa.” (Taniela 6⁠:⁠3) Neʼe mole lagi nātou leleiʼia te faitotonu ʼa Taniela he neʼe ina tāʼofi ia nātou ke mole nātou fai te ʼu meʼa fakahehema peʼe ko tanatou aga fakakākā. Ko te ʼu tagata ʼaia neʼe nātou fakalotoʼi te hau ke ina sinie te fakatotonu ʼaia, ke ina fakakau ki “te lao ʼaē ʼe mole molehi ʼa te kau Metia pea mo te kau Pelesia.”​—Taniela 6:​8, 9.

ʼE Nofo Agatonu Ia Taniela

ʼI tana ʼosi ʼiloʼi te lao foʼou ʼaia, neʼe tuku koa e Taniela tana faikole kia Sehova? Kailoa! Neʼe faikole tuʼa tolu ʼi te ʼaho ki te ʼAtua ʼo tuʼutuli ʼi te kogafale ʼaē ʼi te ʼato ʼo tona ʼapi, “ohage pe ko tana fai tuʼumaʼu ʼi muʼa atu.” (Taniela 6⁠:10) Lolotoga tana faikole, ko tona ʼu fili “neʼe nātou hū fakatahi pea mo nātou maʼu atu ia Taniela neʼe kole mamahi pea mo tagi ʼi muʼa ʼo tona ʼAtua ke ʼofa kia te ia.” (Taniela 6⁠:11) ʼI tanatou fakahā te faʼahi ʼaia ki te hau, neʼe lotomamahi ia Taliusi ʼo ʼuhiga mo te lao ʼaē neʼe ina fai he neʼe fua kovi kia Taniela. ʼE tou lau fēnei ʼi te fakamatala: “ ʼO aʼu ki te tō ʼo te laʼā neʼe ina faigaʼi tuʼumaʼu ke ina fakahāo ia ia.” Kae, māʼiape la mo te hau, neʼe mole feala kia ia ke ina molehi te lao ʼaē neʼe ina fai. Koia neʼe ʼave ai ia Taniela ki te luo ʼo te ʼu laione, neʼe ko te koga meʼa neʼe keli ʼi te lalo kele. Neʼe ʼui papau e te hau kia Taniela: “Ko tou ʼAtua ʼaē ʼe ke tauhi tuʼumaʼu ki ai, ko ia totonu ʼaē ka ina hāofaki anai koe.”—Taniela 6:​12-​16.

Hili ʼaia te po katoa neʼe mole mamoe ia Taliusi, pea neʼe sesunio ai, neʼe lele fakavilivili ki te luo. Neʼe kei maʼuli ia Taniela pea mo haohaoa! Neʼe foimo fai e te hau tana puleʼaki. Neʼe ina fakatotonuʼi ke lī te ʼu fili ʼo Taniela pea mo tonatou ʼu kāiga ki te luo ʼo te ʼu laione, moʼo fakatūʼa ʼo nātou. Pea neʼe fakahā e Taliusi ʼi te puleʼaga katoa, “ ʼi te ʼu telituale fuli ʼo toku puleʼaga, ʼe tonu ke tete pea mo manavasiʼi te hahaʼi ia muʼa ʼo te ʼAtua ʼo Taniela.”—Taniela 6:​17-​27.

Ko Te Ako Maʼa Tatou

Ko Taniela neʼe ko he faʼifaʼitaki lelei ʼo te agatonu. Māʼiape la mo te hau, ʼaē neʼe mole tauhi kia Sehova, neʼe ina fakatokagaʼi neʼe tauhi “tuʼumaʼu” ia Taniela kia te Ia. (Taniela 6:​16, 20) Ko te kupu faka Alamea ʼaē neʼe fakaliliu ʼaki te kupu “tuʼumaʼu,” ʼe faka ʼuhiga tāfito ki te “ ʼalu takafoli.” ʼE faka ʼuhiga ki he meʼa ʼe fai hoholo. Ko te faʼahi ʼaia ʼe tau mo feʼauga pea mo te nofo agatonu ʼa Taniela kia Sehova!

Talu mai fualoa ʼi muʼa ʼo tona lī ki te luo ʼo te ʼu laione, neʼe kua māhani ia Taniela ʼi te fai tuʼumaʼu ʼo tona ʼu maʼua. ʼI tona maʼuli popūla ʼi Papiloni ʼi te temi ʼaē neʼe kei tūpulaga ai, neʼe ina fakafisi ki te meʼa kai pea mo te meʼa ʼinu ʼaē neʼe tapuʼi e te lao ʼo Moisese, pe ko te ʼu meʼa ʼaē neʼe ʼulihi e te ʼu toʼotoʼoga faka pagani. (Taniela 1⁠:⁠8) Ki muli age, neʼe ina fakahā ʼaki he lototoʼa te logo ʼo te ʼAtua ki te hau Papiloni ko Nepukanesa. (Taniela 4:​19-​25) ʼI he ʼu kiʼi hola ʼi muʼa ʼo te tō ʼo Papiloni, neʼe tala ʼaki he lototoʼa e Taniela te fakamāu ʼa te ʼAtua ki te hau ko Pelesasā. (Taniela 5:​22-​28) Koia, ʼi te temi ʼaē neʼe lī ai Taniela ki te luo ʼo te ʼu laione, neʼe haga nofo agatonu aipe ohage ko tana fai māhani.

ʼO toe feiā pe mo koutou, ʼe feala ke koutou tauhi tuʼumaʼu kia Sehova. Ko koutou koa ko he tūpulaga? Koia koutou faiga ʼi te temi nei ke koutou fakamāmāhani ʼi te fai tuʼumaʼu ʼo tokotou maʼua, ʼo fakafisi ki te fakatahi mo te mālama kovi ʼaenī pea mo tana aga fakahehema. Kapau kua koutou tauhi ki te ʼAtua talu mai fualoa, pea koutou taupau maʼu takotou faʼa kātaki agatonu ohage ko te meʼa ʼaē ʼe koutou fai māhani ʼi te temi nei. ʼAua naʼa tou līaki tatatou agatonu, heʼe ko te ʼu ʼahiʼahi fuli pe ʼaē ʼe tou tauʼi, ʼe nātou foaki mai kia tatou te fealagia ʼaē ke tou fakahā kia Sehova kua tou fakatotonu ke tou tauhi tuʼumaʼu kia ia.—Filipe 4:​11-​13.

[Nota ʼi te lalo pasina]