Neʼe Toe Fakamoʼoni ʼe Hoki Tali e Ia ʼAē ʼe Mahaki He Faitoʼo Mo Kapau Kua Mahino Lelei Kiai
MOLE heʼeki faʼa fualoa, ko te tuʼi fai fakamāu ʼo te ʼu ʼUluaki Kumi ʼo te Telepinale ʼo Messine ʼi Italia, neʼe ina fai tana tonu ʼo ina toe fakahā, ʼe maʼua ki te ʼu tōketā ke nātou fakaʼapaʼapa ki te ʼu meʼa ʼaē ʼe loto kiai te tagata peʼe ko te fafine ʼaē ʼe mahaki. Neʼe fai te tonu ʼaia ʼo ʼuhiga mo te Fakamoʼoni ʼa Sehova.
ʼI Sanualio ʼi te 1994, neʼe foimo leletakiʼi ki te lopitali ʼi Taormina, ʼi Messine, ia Antonino Stellario Lentini, ko te Fakamoʼoni neʼe taʼu 64 pea neʼe mahaki toto he neʼe mole totoka tona toto. Neʼe fakatokagaʼi age e Catena, te ʼohoana ʼo Antonino, ki te hahaʼi gāue ʼi te fale mahaki, ko ia mo tona ʼohoana ʼe mole nā tali anai he foʼi huki toto. (Gāue 15:20, 28, 29) Neʼe nātou fakaʼapaʼapa ki tonā loto.
Kae, lolotoga tona ʼave ki te tahi lopitali, neʼe mole kei mānava ia Antonino, pea neʼe kua kovi ia ʼi tana tau atu kiai. Neʼe mole fualoa pea mate ia. Neʼe lotomamahi ia Catena, kae neʼe ina maʼu te fakaloto fīmālie lahi ʼi te fakapapau ʼo te fakatuʼuake ʼaē ʼe talanoa kiai te Tohi-Tapu. (Gāue 24:15) Pea, neʼe punamaʼuli ʼaupito ʼi tana logo ʼaē, ko te ʼu tuʼi fakamāu neʼe nātou tukugakoviʼi hala ia ia—ʼo lagi ʼuhi ko te ʼu tala logo hala ʼaē neʼe faka mafola e te ʼu sulunale, mo te televisio pea mo te lātio—ʼo nātou ʼui kua mate tona ʼohoana ʼuhi ko ia, he neʼe fakafisi ki te ʼu faitoʼo ʼaē neʼe ʼui age e te ʼu tōketā ʼe ʼaoga ki tona ʼohoana.
ʼOsi ʼaia te taʼu katoa, pea ʼi te ʼaho 11 ʼo Sūlio 1995, neʼe faka ʼāteaina ia Catena mai te tukugakovi ʼaia mai tona ʼaluʼaga ʼaē neʼe mole ina maumauʼi te lao. ʼI tona fakahagatonu, neʼe fakamoʼoni e te ʼu tōketā tatau aipe pe neʼe tafa tona ʼohoana, kae neʼe mole ʼi ai anai hona ʼaoga, he neʼe kua kovi ʼaupito tona mahaki.
Kae neʼe faka maʼuhigaʼi e te ʼu palalau ʼa te tuʼi fai fakamāu te puani tāfito ʼaenī. Neʼe ina ʼui ʼe faigataʼa ke tali te manatu ʼaē, ʼe tonu ki te ʼu tōketā ke nātou fakafeagai ki te fakafisi ʼo te faitoʼo e te hahaʼi mahaki peʼe ko nātou ʼaē ʼe nātou fakafofoga te hahaʼi mahaki ʼaia. Neʼe ina toe ʼui foki, ko te lao ʼo Italia ʼo ʼuhiga mo te ʼu maʼua ʼa te ʼu tōketā, “ ʼe ina fakatuʼutuʼu ʼe tonu ke ʼiloʼi e te ʼu tōketā peʼe tali pea mo mahino lelei ia ia ʼaē ʼe mahaki, ki te ʼu faitoʼo ʼaē ka fai age ki ai, ʼi muʼa ʼo tanatou fai he meʼa.” Koia, neʼe ina ʼui ko Catena “neʼe mulimuli ki te lao ʼi tana fakafisi ʼaē ke tafa feiā tona ʼohoana.”
Ko te fakamāu ʼaia ʼe toe fakahā ai foki ʼe feala ki he tagata peʼe ki he fafine ke nā fakafisi ki te faitoʼo ʼaē ʼe fakafeagai ki tonā loto.