Tou Fakaʼaogaʼi Te Faigamālie Makehe ʼAenī!

NEʼE haʼele lelei te ako ʼo Petelo ʼi te faʼahi faka tōketā, ʼi te temi ʼaē neʼe fia logo ai ki te logo ʼo te hāofaki ʼaē ʼe talanoa kiai te Tohi-Tapu. ʼI te temi ʼaē neʼe maʼu pepa ai pea mo kamata gāue tōketā ʼi te fale mahaki, neʼe fakaloto mālohiʼi tuʼumaʼu e tana ʼu pule ia ia ke ina ako te tafa ʼo te ʼuto pea mo te ʼu ivi. Neʼe ko he fealagia ʼaia neʼe mole fakafisi anai kiai he tōketā foʼou.

Kae, neʼe fakatotonu e Peteloa ke ina fakafisi ki te fealagia ʼaia. Koteā tona tupuʼaga? Neʼe mole feʼauga koa tana holi ʼaē ki te faʼahi ʼaia? Kailoa, kae neʼe vakavakaʼi lelei e Petelo te fealagia ʼaē neʼe foaki age kia ia. ʼI tana kua liliu ʼaē ko he Fakamoʼoni ʼa Sehova kua foaki tona maʼuli pea mo papitema, neʼe holi ia ke lahi te temi ʼaē ka ina fakaʼaogaʼi ʼi te ʼu faʼahi kehekehe ʼo te minisitelio faka Kilisitiano. ʼI tana ʼosi maʼu tona pepa fai tafa ʼo te ʼu ivi, neʼe ina fakakaukauʼi, ʼe lahi anai te temi pea mo te mālohi ʼaē ka ina fakaʼaogaʼi ki tana gāue ʼaia. Neʼe ko he agavale koa ʼaē neʼe ina fai ʼi tana fakafisi ki te gāue ʼaia, pe neʼe ko he aga fakapotopoto ʼaē neʼe ina fai?

Maʼa ʼihi, ko te tonu ʼaē neʼe fai e Petelo neʼe mole fakapotopoto ia. Kae, neʼe ina fakatokagaʼi te ʼu vaega ʼo te Tohi-Tapu, ohage ko Efesi 5⁠:​15, 16. ʼI te vaega ʼaia, ʼe uga fēnei e Paulo te kau Kilisitiano: “Ke koutou tokakaga fakalelei ki takotou faʼahiga haʼele: ke ʼaua naʼa hage ko he kau vavale, kae ke hage ko ni kau popoto, ʼo koutou totogi maʼa koutou te temi faigamālie, koteʼuhi ko te ʼu ʼaho ʼe ko te ʼu ʼaho ʼo te agakovi.”

Koutou fakatokagaʼi te kupuʼi palalau ʼaē ko “te temi faigamālie.” ʼE fakaliliu te ʼu kupu ʼaia mai te kupu faka Keleka, ʼe fakaʼaogaʼi tāfito ʼi te Tohi-Tapu ʼo ʼuhiga mo he temi pe ko he lakaga ʼe fakaʼiloga ʼaki he ʼu faʼahiga agaaga, peʼe ko he temi faigamālie ki he gāue makehe. ʼI henī, ʼe fakahā lelei mai e Paulo, ʼe tonu ke fakaʼaogaʼi e te kau Kilisitiano he koga ʼo tonatou temi ki te ʼu meʼa ʼaē ʼe maʼuhiga tāfito. ʼIo, ʼe tonu ke nātou “ ʼiloʼi papau te ʼu meʼa ʼaē ʼe maʼuhiga tāfito.” (Filipe 1:​10) ʼE tonu ke nātou fakamuʼamuʼa te ʼu meʼa ʼaē ʼe maʼuhiga tāfito.

Koia, koteā te fakatuʼutuʼu ʼa te ʼAtua ʼo ʼuhiga mo totatou temi? Koteā te finegalo ʼo te ʼAtua ʼo ʼuhiga mo nātou ʼaē ʼe nātou ʼoʼofa kia te ia? ʼE fakahā lelei e te ʼu lea faka polofeta ʼo te Tohi-Tapu, ko totatou temi ʼe ko “te temi ʼo te fakaʼosi,” pe “ko te ʼu ʼaho fakamuli.” (Taniela 12:4; 2 Timoteo 3:1) Neʼe fakahā lelei e Sesu Kilisito te meʼa ʼaē ka maʼuhiga tāfito anai ʼi totatou temi. Neʼe ina ʼui fēnei, ʼi muʼa ʼo te fakaʼosi ʼo te tuʼu ʼo te faʼahiga meʼa agakovi ʼaenī, “ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa.” Pea hoko mai ai leva te fakaʼosi.​—Mateo 24:​3, 14.

Koia la ʼaē, ʼe tonu ai ke tou fakaʼaogaʼi te ʼu faigamālie fuli ke tou faka mafola te logo lelei ʼo te Puleʼaga pea mo fai ni ʼu tisipulo. (Mateo 28:19, 20) Mai tona ʼaluʼaga ʼaē ʼe mole toe fakahoko anai te ʼu gāue ʼaia, ʼe ko te fealagia fakamuli ʼaenī ke tou foaki ia tatou ki te gāue ʼaia ʼaē ʼe ina hāofaki te maʼuli ʼo te hahaʼi. “ ʼI te temi nei, ʼe ko te temi tāfito ʼaē ʼe faigamālie ai.” ʼI tona fakahagatonu, “ko te ʼaho ʼaenī ʼo te fakamaʼuli.”​—2 Kolonito 6:2.

Koutou Fai He Tonu Fakapotopoto

Ko Petelo​—te tagata tūpulaga ʼaē neʼe tou talanoa ki ai ʼi ʼoluga, neʼe ina fakakaukauʼi lelei te tonu ʼaē ka ina fai, pea neʼe ina fakafuafua te ʼu meʼa ʼaē neʼe feala ke ina fili ke ina fai. Neʼe mahino kia ia ʼe mole kovi tana ako ke feala hana liliu ko he tōketā ʼe ina tafa te ʼu ivi. Kae, koteā ʼaē neʼe maʼuhiga tāfito kia ia? Neʼe ko tana gāue ʼi te minisitelio faka Kilisitiano, ʼuhi ko te maʼuhiga ʼo te gāue ʼaia. Tahi ʼaē meʼa, neʼe ʼi ai tona ʼu maʼua neʼe tonu ke ina fakahoko. Neʼe kua ʼohoana pea neʼe tonu ke tokaga ki tona ʼohoana, ʼaē neʼe kau ki te gāue fai faka mafola ʼi te temi katoa. (1 Timoteo 5:8) Neʼe toe maʼua foki ke totogi e Petelo tona ʼu maʼua ʼo ʼuhiga mo te ako ʼaē neʼe ina fai. Koia, koteā koa te meʼa ʼaē neʼe ina fakatotonu ke ina fai?

Neʼe fakatotonu e Petelo ke ina ako te ʼu fai lātio pea mo poto ʼi te fakaʼaogaʼi ʼo te sonde à ultrasons. Neʼe ko he gāue neʼe fai ʼaho katoa. Tahi ʼaē meʼa, neʼe ina ako te faʼahi ʼaia lolotoga te ʼu hola gāue. ʼE moʼoni, ʼe feala ke manatu e ʼihi ʼo ʼuhiga mo te faʼahi ʼaia, ʼe mole ko he tuʼulaga maʼuhiga, kae neʼe faka fealagia ai kia ia ke lahi age te temi ʼaē ka ina fakaʼaogaʼi ki te ʼu gāue fakalaumālie.

Neʼe ʼi ai te tahi faʼahi neʼe ina uga ai ia Petelo ke ina fai te tonu ʼaia. Logope la neʼe mole ina valoki ia nātou ʼaē neʼe lagi nātou fai he tahi tonu, he neʼe ina ʼiloʼi, ʼe ko he tuʼutāmaki ki he Kilisitiano mo kapau ʼe tokaga fau ki te ʼu meʼa fakamālama. ʼE feala ke tupu ai tana mole tokaga ki tona ʼu maʼua fakalaumālie. ʼE ʼi ai te tahi faʼifaʼitaki ʼo ʼuhiga mo te faʼahi ʼaia. ʼE toe pipiki ki te gāue.

Ko te pionie neʼe ko te tēhina fai pena. Neʼe feʼauga tana falā, he neʼe ina fakatau te ʼu meʼa ʼaē neʼe ina pena. Logope la te lahi ʼo te temi ʼaē neʼe ina fakaʼaogaʼi ki te minisitelio faka Kilisitiano ʼaē ʼe maʼuhiga tāfito, neʼe feʼauga pe tona maʼuli mo te ʼu meʼa ʼaē neʼe ina maʼu. Kae, neʼe kamata tuputupu ia ia te holi ʼaē ke fakahaʼele ki muʼa tana gāue ʼaia. ʼAki te temi, neʼe lahi te temi ʼaē neʼe ina fakaʼaogaʼi ki te fai pena, pea mo te temi ʼaē neʼe fakatahi ai mo nātou ʼaē ʼe nātou fai te taʼi gāue ʼaia, ʼo ina tuku ai tona minisitelio katoa, pea neʼe mole kei fai faka mafola, ʼo aʼu ki tana mole kei kau ki te ʼu faʼahi kehekehe ʼo te gāue fai faka mafola ʼo te Puleʼaga. ʼAki te temi, neʼe ina fai te aga ʼe mole ʼalutahi mo te Tohi-Tapu, pea neʼe fakamavae ai ia ia ʼi te kokelekasio faka Kilisitiano.​—1 Kolonito 5:​11-​13.

ʼE Makehe Te Temi ʼAē ʼe Tou Maʼuʼuli Ai

Mai tona ʼaluʼaga ʼaē ʼe tou tauhi kia Sehova ʼi te temi nei, ʼe mahino papau ia ʼe tou fia nonofo agatonu anai kia te ia. ʼE tou ʼiloʼi ʼe tou maʼuʼuli ʼi te temi ʼe mole hona fakatatau ki muʼa atu ʼi te hisitolia ʼa te tagata. Ke feala hatatou haga tauhi ki te ʼAtua, pea mo kātakiʼi te ʼu ʼaluʼaga ʼo te temi ʼaenī, ʼe lagi ʼaoga anai ke tou fai he ʼu fetogi. ʼE feala ke tou fakatatau te faʼahi ʼaia ki te temi taʼukai ʼo te tagata gāue kele. ʼE ko te lakaga ʼo he gāue makehe, heʼe ʼiloʼi e te kau tagata gāue kele, ʼe lahi anai te gāue, pea ʼe fualoa anai tanatou gāue ʼi te ʼaho ʼaia. Koteā tona tupuʼaga? Heʼe faka tuʼakoi te temi ʼaē ʼe tonu ke tānaki ai te taʼukai.

ʼE kua nounou te temi ʼaē ʼe kei toe ki te tuʼu ʼo te ʼu faʼahiga meʼa agakovi ʼaenī. ʼI te temi nei, kua maʼuhiga ʼaupito ki te Kilisitiano moʼoni, ke mulimuli ki te faʼifaʼitaki ʼa Sesu pea mo haʼele ʼi tona ʼu tafuga vaʼe. ʼI tana maʼuli ʼi te kele neʼe ina fakahā lelei te meʼa ʼaē neʼe maʼuhiga tāfito kia te ia. Neʼe ina ʼui fēnei: “ ʼE tonu ke tou fai ʼi te kei ʼaho, te ʼu gāue ʼa ia ʼaē neʼe ina fekauʼi mai ʼau; ʼe haʼu te pōʼuli, ʼaia ʼe mole feala ke gāue ai he tahi.” (Soane 9:4) ʼI tana ʼui ʼaē ʼe haʼu te pōʼuli, neʼe talanoa ia Sesu ki te temi ʼo tona ʼahiʼahiʼi, tona haʼi ki te pou, pea mo tona mate, te temi ʼaē ka fakagata ai anai tona minisitelio ʼi te kele, pea mole kei feala anai kia te ia ke ina fai te ʼu gāue ʼo tana Tāmai ʼaē ʼi selo.

ʼE moʼoni, lolotoga tona minisitelio ia taʼu e tolu vaelua, neʼe ʼi ai te temi neʼe fakaʼaogaʼi e Sesu moʼo fakahoko te ʼu milakulo pea mo fakamālōlō te ʼu mahaki. Kae, neʼe lahi tāfito te temi ʼaē neʼe ina fakaʼaogaʼi moʼo faka mafola te logo lelei ʼo te Puleʼaga, pea mo ina “faka mafola te ʼāteaina kia nātou [ʼaē neʼe] popūla” ki te lotu hala. (Luka 4:​18; Mateo 4:​17) Neʼe lahi te ʼu faiga ʼaē neʼe fai e Sesu ʼi tona minisitelio, pea neʼe ina toe fakaʼaogaʼi foki hona temi moʼo akoʼi tana ʼu tisipulo, ke feala ai hanatou mulimuli ki te faʼifaʼitaki ʼaē neʼe ina tuku age kia nātou, pea ke nātou popoto ʼi te fakahoko atu ʼo te gāue fai faka mafola. Neʼe fakaʼaogaʼi e Sesu te ʼu faigamālie fuli moʼo fakahaʼele ki muʼa te ʼu meʼa gāue ʼo te Puleʼaga, pea neʼe ina loto ke fai feiā mo tana kau tisipulo.​—Mateo 5:​14-​16; Soane 8:​12.

Ohage ko Sesu, ko tatou ʼaē ko tana ʼu tisipulo ʼo te temi ʼaenī, ʼe tonu ke tatau tatatou faʼahiga sio ki te malamanei, ohage ko Sehova ʼAtua. Kua hoko mai te temi fakaʼosi ʼo te tuʼu ʼo te ʼu faʼahiga meʼa ʼaenī, pea ʼaki he loto manavaʼofa, ʼe loto e Sehova ke maʼu e te hahaʼi fuli te fealagia ʼaē ke nātou hāo. (2 Petelo 3:9) Koia, ʼe mole ko he aga fakapotopoto koa la hatatou tuku kehe te ʼu meʼa fuli ʼaē ʼe tou fia maʼu, kae tou fakamuʼamuʼa te fai ʼo te finegalo ʼa Sehova? (Mateo 6:​25-​33) Tāfito ʼi te lolotoga ʼo te temi ʼaenī, ko te meʼa ʼaē ʼe faka ʼuhiga ʼi te aga māhani ʼe ko he meʼa maʼuhiga, ʼe feala ke liliu ʼo mole faʼa maʼuhiga ʼi totatou maʼuli, ʼi totatou ʼuhiga kau Kilisitiano.

ʼE tou fakahemala anai koa ʼi tatatou fakamuʼamuʼa te finegalo ʼo te ʼAtua ʼi totatou maʼuli? Kailoa, he ko te maʼuli faka sakilifisio ʼo te Kilisitiano ʼe lahi te ʼu fakapale ʼaē ʼe ina maʼu. Ohage la neʼe ʼui fēnei e Sesu ki ʼana ʼu tisipulo: “ ʼE ʼau tala moʼoni atu kia koutou, ʼe mole he tahi kua ina tuku hona fale, pe ko hona ʼu tēhina, pe ko hona ʼu tuagaʼane, pe ko tana faʼe, pe ko tana tāmai, pe ko tana fānau, peʼe ko ʼana gāueʼaga, ʼuhi ko ʼau pea ʼuhi ko te logo lelei, ʼe hala mo tana maʼu nei ʼo liuga teau, ʼi te temi ʼaenī, ia te ʼu fale, te ʼu tēhina, te ʼu tuagaʼane, pea mo te ʼu faʼe, te ʼu fānau, te ʼu gāueʼaga, ʼaki te ʼu fakataga, pea ʼi te tuʼu ʼo te ʼu faʼahiga meʼa ka haʼu, te maʼuli heʼegata.”​—Maleko 10:29, 30.

ʼE mole he tahi ʼe feala ke ina fetogi te maʼuhiga ʼo te fakapale ʼaē ʼe maʼu e nātou ʼaē ʼe nātou fakaʼaogaʼi tonatou temi, moʼo fakavikiviki kia Sehova pea mo kalagaʼi te logo ʼo te Puleʼaga. ʼE lahi ʼaupito te ʼu tapuakina ʼaē ʼe nātou maʼu! ʼE kau ki te ʼu meʼa ʼaia te maʼu ʼo he ʼu kaumeʼa moʼoni, te fiafia ʼo te fai ʼo te finegalo ʼa te ʼAtua, mo te leleiʼia ʼo tatou e te ʼAtua, pea mo te ʼamanaki ʼaē ʼo te maʼuli heʼegata. (Fakahā 21:​3, 4) Pea ʼe ko he tapuakina hatatou tokoni ki te hahaʼi ʼi te faʼahi fakalaumālie, pea ʼi totatou ʼuhiga kau Fakamoʼoni ʼa Sehova, ke tou faka maʼuhigaʼi tona huafa! ʼIo, ʼe ko he aga fakapotopoto te “totogi [ʼo] te temi faigamālie” pea ʼe fakapale ai tatou. ʼE ko te temi ʼaenī ke tou kau ki te kalagaʼi ʼo te logo lelei ʼo te Puleʼaga ʼo te ʼAtua. ʼE koutou fakaʼaogaʼi anai koa te temi faigamālie ʼaia pea mo koutou taupau maʼu?

[Nota ʼi te lalo pasina]