ʼE Mole Kei Tou Māʼuʼuli Maʼa Tatou Totonu
“Neʼe mate [Kilisito] maʼa te hahaʼi fuli ke feala kiā nātou ʼaē ʼe māʼuʼuli, ke mole nātou toe māʼuʼuli maʼa nātou totonu.”—2 Kolonito 5:15, MN.
1, 2. Koteā te fakatotonu faka Tohi-Tapu ʼaē neʼe ina uga ai te ʼu tisipulo ʼa Sesu ʼo te ʼuluaki sēkulō ke ʼaua naʼa nātou tahi manatu pe kiā nātou?
ʼE KO te pō fakaʼosi ʼa Sesu ʼi te kele. Kei toe pe he ʼu kiʼi hola, pea ʼe ina foaki anai tona maʼuli maʼa nātou fuli ʼaē ka tui anai kiā te ia. ʼI te pō ʼaia, neʼe lahi te ʼu faʼahi maʼuhiga neʼe fakahā age Sesu ki tana kau ʼapositolo agatonu. ʼI te ʼu faʼahi maʼuhiga ʼaia, neʼe kau ai te fakatotonu ʼo ʼuhiga mo te kalitate ʼaē ka liliu anai ko he fakaʼiloga ʼo tana kau tisipulo. Neʼe ina ʼui fēnei: “E au foaki atu kia koutou he fekau foou, koutou feʼofaʼaki o hage ko au, nee au ofa ia koutou, pea koutou feʼofaʼaki. Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.”—Soane 13:34, 35.
2 Ko te kau Kilisitiano moʼoni ʼe nātou fefakahāʼaki ia te ʼofa faka sakilifisio pea mo nātou fakamuʼamuʼa te ʼu meʼa ʼaē ʼe ʼaoga ki tonatou ʼu tēhina kae nātou tukumuli te ʼu meʼa ʼaē ʼe ʼaoga kiā nātou. ʼE nātou tali ke nātou ‘momoli tonatou maʼuli maʼa tonatou ʼu kaumeʼa.’ (Soane 15:13) Neʼe tali feafeaʼi e te ʼu ʼuluaki Kilisitiano ia te fakatotonu foʼou ʼaia? ʼI tana tohi ʼiloa ʼaē ko tona kupu tāfito Apology, ko te tagata faitohi ʼo te lua sēkulō ko Tertullien, neʼe ina tohi te ʼu palalau neʼe fai e ʼihi ʼo ʼuhiga mo te kau Kilisitiano: ‘Koutou sisio age muʼa ki tanatou feʼofaʼofaniʼaki, pea mo tanatou tali ʼaē ke nātou mamate moʼo nātou fehāofakiʼaki.’
3, 4. (a) He koʼe ʼe mole tonu ke tou tahi manatu pe kiā tatou totonu? (b) Koteā ʼaē ka tou vakaʼi anai ʼi te alatike ʼaenī?
3 Mo tatou foki ʼe tonu ke tou “fe’fuaʼaki autou kavega, pea e [tou] fakahoko anai te lao a Kilisito.” (Kalate 6:2) Kae ko te tahi manatu pe ʼaē kiā kita ʼe feala ke faigataʼa ʼaupito ai tatatou mulimuli ki te lao ʼa Kilisito, pea mo tatatou ‘ ʼofa kiā Sehova totatou ʼAtua ʼaki totatou loto, mo totatou nefesi pea mo tatatou ʼatamai kātoa pea mo ʼofa ki totatou kāiga ohage ko tatou totonu.’ (Mateo 22:37-39) ʼI totatou ʼuhiga agahala, ʼe ko he agamāhani hatatou manatu pe kiā tatou totonu. Pea ʼe toe ʼāsili te faʼahi ʼaia ʼuhi ko te maʼuli hoha ʼo te ʼaho fuli, te fakataupiepie ʼi te faleako pea mo te fale gāue, pea mo tatatou haga faiga moʼo taupau ʼo totatou maʼuli. ʼE fakaʼāsili anai te taʼi aga ʼaia ʼaki te temi, he neʼe ʼui fēnei e te ʼapositolo ko Paulo: “I te u aho fakamuli . . . e liliu anai te hahai o tahi ofa pe kia te ia.”—2 Timoteo 3:1, 2.
4 ʼI te koga fakamuli ʼo tana minisitelio ʼi te kele, neʼe fakahā e Sesu ki tana kau tisipulo he ʼu faʼahi e tolu ʼe tonu ke nātou fai ke mole nātou tahi manatu pe kiā nātou. Neʼe koteā te ʼu faʼahi ʼaia, pea ʼe tou lava maʼu feafeaʼi te ʼu lelei ʼo tana akonaki ʼaia?
Tona ʼu Puleʼaki
5. ʼI tana fai faka mafola ʼi te potu noleto ʼo Kalilea, koteā ʼaē neʼe fakahā e Sesu ki tana kau tisipulo, pea he koʼe neʼe nātou punamaʼuli ai?
5 Neʼe fai faka mafola ia Sesu ʼi te koga meʼa ʼe ovi atu ki Sesalea Filipe ʼi te potu noleto ʼo Kalilea. Ko te koga meʼa tokalelei pea mo matalelei ʼaia neʼe lelei moʼo mālōlō ai, kae neʼe mole ko he koga meʼa moʼo akoʼi ai te maʼuli faka sakilifisio. Kae ʼi tanatou ʼolo ki te kolo ʼaia, neʼe kamata fakahā age e Sesu ki tana kau tisipulo “ ʼe tonu kiā te ia ke ʼalu ki Selusalemi, ʼo tali te ʼu mamahi lahi mai te kau tagata ʼāfea pea mo te kau pelepitelo pule pea mo te kau sekelipa, pea ke matehi ia ia pea mo [toe] fakatuʼu ʼi te tolu ʼaho.” (Mateo 16:21, MN ) Neʼe lagi punamaʼuli te kau tisipulo ʼa Sesu ki te logo ʼaia, heʼe ʼo aʼu ki te temi ʼaia neʼe nātou ʼamanaki ʼe fakatuʼu anai e tanatou Tagata Takitaki tana Puleʼaga ʼi te kele!—Luka 19:11; Gaue 1:6.
6. He koʼe neʼe fakatonutonuʼi mālohi e Sesu ia Petelo?
6 ʼI te temi pe ʼaia, ko Petelo neʼe “ina kamata akonakiʼi ia [Sesu] ʼo ʼui maʼana: ‘Agalelei kiā te koe, ʼAliki; kailoa, ʼe mole hoko anai kiā te koe he [meʼa] feiā.’ ” Neʼe koteā te tali ʼa Sesu kiai? “Neʼe mafuli age pea ʼui maʼana kiā Petelo: ‘Haʼu ʼi ʼoku tuʼa, Satana! ʼE ko koe ko te maka fakatupu tūkia kiā te au, heʼe mole ke manatu ʼaki te ʼu manatu ʼa te ʼAtua, kae ʼaki te ʼu manatu ʼa te tagata.’ ” ʼE kehekehe ʼaupito te ʼu manatu ʼaia e lua! Neʼe tali lelei e Sesu te maʼuli faka sakilifisio ʼaē neʼe kole age e te ʼAtua kiā te ia—ke mate faka sakilifisio ʼi he pou fakamamahi ʼi ni ʼu māhina ki muli age. Neʼe ʼui age ia e Petelo ke maʼuli fakafīfīmālie. Neʼe ina ʼui fēnei: “Agalelei kiā te koe.” ʼE mahino ia neʼe manatu lelei ia Petelo. Kae neʼe fakatonutonuʼi e Sesu ia Petelo heʼe ʼi te lakaga ʼaia, neʼe ina maʼu te manatu ʼa Satana. Ko Petelo neʼe mole ina maʼu “te manatu ʼa te ʼAtua, kae [ko] te ʼu manatu ʼa te tagata.”—Mateo 16:22, 23, MN.
7. Ohage ko tona tuʼu ia Mateo 16:24, koteā te ʼu faʼahi neʼe fakahā e Sesu ʼe tonu ke fai e tana kau tisipulo?
7 Ia ʼaho nei, ʼe feala ke tou toe logo ki te ʼu palalau ʼaē neʼe fai e Petelo kiā Sesu. ʼI te agamāhani, ko te malamanei ʼe ina uga he tahi ke ‘agalelei kiā ia’ peʼe ‘ke maʼuli fakafīfīmālie.’ ʼI te tahi age faʼahi, neʼe tokoniʼi mai e Sesu ke tou maʼu he manatu ʼe kehe ʼaupito ʼi te manatu ʼaia. Neʼe ina ʼui fēnei ki tana kau tisipulo: “Kapau ʼe fia mulimuli mai he tahi ia te au, ke fakafisi ia kiā ia totonu pea ke ina toʼo tona pou fakamamahi pea ke mulimuli tuʼumaʼu ia te au.” (Mateo 16:24, MN ) ʼE ʼui fēnei ʼi te tohi The New Interpreter’s Bible: “ ʼE mole fai te fakaafe ʼaia kiā nātou ʼaē ʼe mole heʼeki liliu ko he ʼu tisipulo, kae ʼe ko he fakaafe kiā nātou ʼaē kua nātou tali te pāui ʼa Kilisito ke nātou fakakaukauʼi te faka ʼuhiga ʼo hata liliu ko he tisipulo.” Ko te ʼu faʼahi e tolu ʼaē neʼe fakahā lelei e Sesu ʼi te vaega Tohi-Tapu ʼaia, ʼe tonu ke mulimuli kiai te hahaʼi tui. Tou vakaʼi takitahi te ʼu faʼahi ʼaia e tolu.
8. Koutou fakamahino te faka ʼuhiga ʼo te fakafisi kiā koutou totonu.
8 ʼUluaki, ʼe tonu ke tou fakafisi kiā tatou totonu. Ko te kupu faka Keleka ʼaē neʼe fakaliliu ʼaki te kupu “fakafisi kiā ia totonu,” ʼe ina fakahā te lotolelei ʼaē ke kita fakafisi ki tokita ʼu holi peʼe ki te ʼu meʼa ʼaē ʼe tou leleiʼia. Ko te fakafisi kiā tatou totonu ʼe mole ko te fakafisi ʼi ʼihi temi ki he ʼu fakafiafia; pea ʼe mole faka ʼuhiga ki hata fakafisi kiā meʼa fuli pe. ʼE mole kei tou fakalogo kiā tatou totonu, heʼe kua tou tali ke fakalogo kiā Sehova totatou maʼuli pea mo te ʼu meʼa fuli ʼaē ʼe tou fai. (1 Kolonito 6:19, 20) ʼE mole tou toe tōkakaga ʼi totatou maʼuli kiā tatou totonu, kae ʼe tou tōkakaga tāfito ke tou fakalogo ki te ʼAtua. Ko te fakafisi kiā tatou totonu ʼe ko he fakatotonu mālohi ke tou fai te finegalo ʼo te ʼAtua, tatau aipe peʼe fakafeagai te faʼahi ʼaia ki te ʼu holi ʼo totatou kakano agahala. ʼE tou fakahā ʼe tou tauhi ki te ʼAtua tokotahi pe, mokā tou foaki totatou maʼuli kiā te ia pea mo tou papitema. ʼOsi ʼaia pea ʼe tou faiga mālohi ke tou fakahoko tatatou fakapapau ʼaia ʼi totatou maʼuli kātoa.
9. (a) ʼI te temi ʼaē neʼe maʼuli ai Sesu ʼi te kele, koteā ʼaē neʼe fakatātā e te pou fakamamahi? (b) Koteā te faka ʼuhiga ʼo tatatou toʼo ʼo totatou pou fakamamahi?
9 Lua, ʼe tonu ke tou toʼo totatou pou fakamamahi. ʼI te ʼuluaki sēkulō, neʼe fakatātā te pou fakamamahi ki te mamahi, mo te ufiufi, pea mo te mate. ʼI te agamāhani, neʼe gata pe ki te hahaʼi fai fakapō ʼaē neʼe matehi ʼi te pou fakamamahi pe neʼe tautau ai tonatou sino. ʼI tana fai te ʼu palalau ʼaia, neʼe fakahā ai e Sesu ʼe tonu ke tali e he Kilisitiano tona fakatagaʼi, tona fehiʼaʼinaʼi, peʼe ko tona matehi, heʼe mole kau ki te malamanei. (Soane 15:18-20) ʼE mole tou tatau mo te malamanei ʼuhi ko tatatou ʼu lēkula faka Kilisitiano, ko te tupuʼaga ʼaia ʼo te ‘talanoa kovi ʼa te malamanei ʼo ʼuhiga mo tatou.’ (1 Petelo 4:4) ʼE feala ke hoko te faʼahi ʼaia ʼi te faleako, ʼi tatatou fale gāue, peʼe ʼi totatou loto fale. (Luka 9:23) Kae ʼe tou loto ke tou kātakiʼi te fehiʼa mai ʼo te malamanei heʼe mole kei tou māʼuʼuli maʼa tatou. Neʼe ʼui fēnei e Sesu: “Fiafia ia koutou mokā leakoviʼi koutou, pea mo fakatagaʼi koutou, pea mo lau he ʼu loi kiā koutou ʼo ʼuhiga mo te ʼu meʼa kovi fuape ʼuhi ko au. Koutou fiafia pea ke koutou hihiki fakafiafia, heʼe lahi tokotou fakapale ʼi selo.” (Mateo 5:11, 12, MN ) ʼE moʼoni, ko te meʼa ʼaē ʼe maʼuhiga tāfito ʼe ko tatatou maʼu te ʼofa ʼo te ʼAtua.
10. Koteā ʼaē e tonu ke tou fai ke feala hatatou mulimuli tuʼumaʼu ia Sesu?
10 Tolu, neʼe ʼui e Sesu Kilisito ʼe tonu ke tou mulimuli tuʼumaʼu ia te ia. Ohage ko tona ʼui ʼi te tohi An Expository Dictionary of New Testament Words, ʼo W. E. Vine, ko hata mulimuli ʼe ko hata kaugā ʼolo mo he tahi—“ ʼe nā haʼele ʼi te ala e tahi.” ʼE ʼui fēnei ia 1 Soane 2:6, (MN): “Ko ʼaē ʼe ina ʼui ʼe nofo fakatahi mo [te ʼAtua], ʼe toe maʼua mo ia ke haga haʼele ohage ko te haʼele ʼaē neʼe fai e ia ʼaē [ia Kilisito].” Neʼe haʼele feafeaʼi ia Sesu? Neʼe ʼofa ia Sesu ki tana Tāmai ʼaē ʼe ʼi selo pea mo tana kau tisipulo pea neʼe mole manatu pe kiā ia totonu. Neʼe tohi fēnei e Paulo: “Nee mole fialelei Kilisito kia te iape.” (Loma 15:3) Māʼia pe la ʼi te ʼu temi ʼaē neʼe gaʼegaʼe ai peʼe fia kai ai, neʼe fakamuʼamuʼa e Sesu te ʼu meʼa ʼaē ʼe ʼaoga ki te hahaʼi kae ina tukumuli te ʼu meʼa ʼaē ʼe ʼaoga kiā te ia. (Maleko 6:31-34) Neʼe toe faʼafai ia Sesu ʼi te gāue ʼaē ko te faka mafola ʼo te Puleʼaga pea mo te faiakonaki. ʼE mole tonu koa la ke tou faʼifaʼitaki kiā ia, ʼo tou fakahoko ʼaki he faʼafai tatatou gāue ʼaē ko te ‘fai ʼo he ʼu tisipulo ʼi te ʼu hahaʼi ʼo te ʼu fenua fuli, ʼo akoʼi nātou ke nātou mulimuli kiā meʼa fuli neʼe fakatotonu mai e Sesu’? (Mateo 28:19, 20) ʼI te ʼu gāue fuli ʼaē neʼe ina fai, neʼe tuku mai e Kilisito he faʼifaʼitaki maʼa tatou, pea ʼe tonu ke tou “mulimuli lelei ki tona ʼu tafuga vaʼe.”—1 Petelo 2:21, MN.
11. He koʼe ʼe maʼuhiga ke tou fakafisi kiā tatou totonu, mo toʼo totatou pou fakamamahi, pea mo mulimuli tuʼumaʼu ia Sesu Kilisito?
11 ʼE maʼuhiga ke tou fakafisi kiā tatou totonu, mo toʼo totatou pou fakamamahi, pea mo mulimuli tuʼumaʼu ki totatou Faʼifaʼitakiʼaga. Kapau ʼe tou fai te ʼu faʼahi ʼaia, pea ʼe mole tou manatu pe anai kiā tatou totonu—heʼe ko te faʼahi ʼaia ʼe ina tāʼofi tatatou fia ʼofa faka sakilifisio. Tahi ʼaē meʼa, neʼe ʼui fēnei Sesu: “Ko ae e ina fia haofaki tona mauli, e ina pulihiʼi anai, pea ko ae e ina pulihi tona mauli uhi ko au, e ina mau anai ia. Ko te lelei fea e mau anai e te tagata moka malo i te malama-nei katoa, kae e ina fakamole ai tona laumalie. Pe kotea anai e foaki e te tagata moʼo fetogiʼaki tona [“nefesi,” MN ]?”—Mateo 16:25, 26.
ʼE Mole Feala Ke Tou Tauhi Kiā Pule e Lua
12, 13. (a) Koteā ʼaē neʼe fia ʼiloʼi tāfito e te tūpulaga ʼaē neʼe kumi tokoni kiā Sesu? (b) Koteā te tokoni ʼaē neʼe foaki e Sesu ki te tūpulaga, pea koteā tona tupuʼaga?
12 Hili ni ʼu māhina ʼi te ʼosi fakahā lelei e Sesu te maʼua ʼaē ke fakafisi tana kau tisipulo kiā nātou totonu, neʼe ʼalu age kiā te ia te tūpulaga maʼu koloā pea neʼe ina ʼui fēnei age: “Faiako, koteā te meʼa lelei ʼaē ʼe tonu ke au fai ke au maʼu ai te maʼuli heʼegata?” Neʼe tali age e Sesu kiā ia ke ina “taupau tuʼumaʼu te ʼu folafola” pea neʼe ina fakahā age ʼihi ʼo te ʼu folafola ʼaia. Pea ʼui fēnei age e te tūpulaga: “Ko te ʼu meʼa fuli ʼaia, kua au taupau au.” ʼE mahino ia neʼe fakamalotoloto ia te tūpulaga ʼaia pea neʼe ina faiga ke mulimuli ki te ʼu fakatotonu ʼa te Lao. Koia ʼaē neʼe ina kole fēnei ai: “Koteā ʼaē kei puli ia te au?” Moʼo tali kiai, neʼe fai e Sesu ki te tūpulaga ʼaia he fakaafe ʼe mole hona tatau, ʼo ʼui maʼana: “Kapau ʼe ke fia haohaoa, [“kātoa,” New American Standard Bible] ʼalu ʼo fakatau te meʼa ʼaē ʼe ke maʼu, pea ke ke foaki ki te kau māsisiva, pea ʼe ke maʼu anai hou koloā ʼi te lagi; pea ke haʼu ʼo muli mai ia te au.”—Mateo 19:16-21, MN.
13 Neʼe tokagaʼi e Sesu neʼe mole feala ki te tūpulaga ʼaia ke tauhi kiā Sehova ʼaki tona nefesi kātoa, he neʼe mole fakafisi ia ki te faʼahi ʼaē neʼe tokaga tāfito kiai ʼi tona maʼuli—tona ʼu koloā. Ko he tisipulo moʼoni ʼa Kilisito ʼe mole feala ke tauhi kiā pule e lua. ʼE mole feala ke “kaugana ki te Atua pea mo te Paaga.” (Mateo 6:24) ʼE tonu ke ina maʼu he ‘mata ʼe lelei,’ ko tona faka ʼuhiga ke tokaga tāfito ki te ʼu faʼahi fakalaumālie. (Mateo 6:22) Ko he tahi ʼe ina toʼo tana ʼu koloā ʼo foaki kiā nātou ʼaē ʼe māsisiva, ʼe ko he maʼuli faka sakilifisio ʼaia. Kanapaula neʼe sakilifisioʼi e te tūpulaga tana ʼu koloā ʼaia, kanaʼauala neʼe foaki age e Sesu te pilivilesio maʼuhiga ʼaē ke ina tānaki he ʼu koloā ʼi te lagi, te ʼu koloā ʼaia ʼe ina maʼu ai te maʼuli heʼegata pea mo te ʼamanaki ʼaē ke liliu ʼo kaugā hau mo Kilisito ʼi Selo. Kae neʼe mole heʼeki faʼa fakafisi ia te tūpulaga ʼaia kiā ia totonu. “Neʼe ʼalu lotomamahi ai, he neʼe lahi ʼona koloā.” (Mateo 19:22, MN ) Kae neʼe ʼi ai te tahi ʼu tisipulo ʼa Sesu neʼe kehe tanatou ia tali ki te fakaafe ʼa Sesu.
14. Neʼe tali feafeaʼi e te ʼu tagata tautai e toko fa ia te fakaafe ʼa Sesu ke nātou mulimuli ia te ia?
14 Ia taʼu e lua ki muʼa atu, neʼe fai e Sesu te fakaafe ʼaia ki te ʼu tagata tautai e fa, ko Petelo, Atelea, Sakopo pea mo Soane. Ko te toko lua iā nātou neʼe nā lolotoga ʼaʼau te kupega, pea ko te toko lua ʼaē neʼe nā ʼonoʼono tonā ʼu kupega. Neʼe ʼui age e Sesu kiā nātou: “[Koutou] mulimuli mai ia te au, pea e au fakanofo anai [koutou] ko he u tautai tagata.” Ko te ʼu tagata ʼaia e toko fā neʼe nātou tuku ai tanatou gāue pea nātou mulimuli iā Sesu ʼi tonatou maʼuli kātoa.—Mateo 4:18-22.
15. Neʼe koteā te sakilifisio ʼaē neʼe fai e te Fakamoʼoni ʼa Sehova ia ʼaho nei moʼo mulimuli kiā Sesu?
15 Ia ʼaho nei, tokolahi te kau Kilisitiano ʼe nātou faʼifaʼitakiʼi te ʼu tagata tautai ʼaia e toko fā kae mole nātou hage ko te tūpulaga maʼu koloā. Neʼe nātou fakafisi ki te ʼu koloā pea mo te ʼiloa ʼi te malamanei, ke feala hanatou tauhi kiā Sehova. ʼE ʼui fēnei e Déborah: “ ʼI toku taʼu 22, neʼe tonu ke au fai taku tonu maʼuhiga.” ʼE ina fakamahino fēnei: “Neʼe kua au ako te Tohi-Tapu ia māhina e ono, pea neʼe au fia foaki toku maʼuli kiā Sehova, kae neʼe fakafeagai mālohi kiai taku famili. Neʼe ko te ʼu hahaʼi maʼu paʼaga ʼaupito, pea kiā nātou, ko taku liliu ʼaē ko he Fakamoʼoni neʼe ko he maumau matagafua. Neʼe nātou tuku mai te ʼaho kātoa ke au fili te meʼa ʼaē neʼe au loto kiai—he maʼuli koloāʼia peʼe ko te moʼoni. Kapau ʼe mole au fakagata taku fakatahi mo te kau Fakamoʼoni, pea ʼe nātou toʼo fuli anai taku ʼu koloā. Neʼe tokoni mai ia Sehova ke au fai he tonu ʼe lelei pea ke au lotomālohi ʼo fakahoko taku tonu ʼaia. Neʼe au fakaʼaogaʼi taʼu e 42 ʼi te selevisi kātoa, pea ʼe mole au fakahemala. Ko taku fakafisi kiā au totonu pea mo te ʼu fakafiafia, neʼe au hāo ai mai te faʼahiga maʼuli ʼo taku famili, ʼaē ko te maʼuli vaʼiganoa pea mo mamahi. ʼAki toku ʼohoana, neʼe mā tokoni ki te ʼu hahaʼi e teau tupu ke nātou ʼiloʼi te moʼoni. Ko te ʼu fānau fakalaumālie ʼaia ʼe nātou maʼuhiga age kiā au ʼi ni ʼu koloā.” ʼE toe manatu feiā mo te ʼu lauʼi miliona kau Fakamoʼoni ʼa Sehova. E feafeaʼi koutou?
16. ʼE tou lava fakahā feafeaʼi ʼe mole kei tou māʼuʼuli maʼa tatou totonu?
16 Ko tanatou fakafisi kiā nātou totonu, neʼe ina uga ai te ʼu Fakamoʼoni ʼa Sehova ʼe lauʼi afe ke nātou pionie, peʼe nātou liliu ko he kau fai faka mafola ʼo te Puleʼaga temi kātoa. Pea ko ʼihi, ʼaē neʼe mole feala ke nātou kau ki te minisitelio temi kātoa ʼuhi ko tanatou ʼu ʼaluʼaga takitokotahi, neʼe nātou fakatuputupu te manatu faka pionie pea mo nātou lagolago ki te gāue ʼaē ko te faka mafola ʼo te Puleʼaga, ʼo mulimuli ki tanatou ʼu fealagia. ʼE maʼu e te ʼu mātuʼa te manatu ʼaia, heʼe nātou foaki lahi tonatou temi pea mo nātou fakafisi ki te ʼu meʼa ʼaē ʼe nātou leleiʼia, ke feala hanatou akoʼi tanatou fānau ʼi te faʼahi fakalaumālie. Ko tatou fuli ʼe feala, ʼi he ʼaluʼaga pe, ke tou fakahā ʼe tou fakamuʼamuʼa te Puleʼaga ʼi totatou maʼuli.—Mateo 6:33.
Ko Te ʼOfa ʼo Ai ʼAē ʼe Ina Uga Tatou?
17. Koteā ʼaē ʼe ina uga tatou ke tou fai he ʼu sakilifisio?
17 ʼE mole ko he meʼa faigafua te fai ʼo te ʼofa faka sakilifisio. Kae koutou tokagaʼi pe koteā ʼaē ʼe ina uga tatou ke tou fai ia te faʼahi ʼaia. Neʼe tohi fēnei e Paulo: “Ko te ʼofa ʼo Kilisito ʼe ina uga tatou, heʼe ko te meʼa ʼaenī ʼe mā ʼiloʼi: ko te tagata e tahi neʼe mate maʼa te hahaʼi fuli . . . Pea neʼe mate maʼa te hahaʼi fuli ke feala kiā nātou ʼaē ʼe māʼuʼuli, ke mole kei nātou māʼuʼuli maʼa nātou totonu, kae ke nātou māʼuʼuli maʼa ia ʼaē neʼe mate maʼa nātou pea kua toe fakatuʼuake.” (2 Kolonito 5:14, 15, MN ) Ko te ʼofa kiā Kilisito ʼaē ʼe ina uga tatou ke mole tou māʼuʼuli maʼa tatou totonu. ʼE ko te tupuʼaga mālohi ʼaia ʼe ina uga tatou! Kapau neʼe mate Kilisito maʼa tatou, pea ʼe mole tonu koa la ke tou maʼuli maʼa ia? ʼE moʼoni, ko te loto fakafetaʼi ki te ʼofa lahi ʼaē neʼe fakahā e te ʼAtua pea mo Kilisito kiā tatou, ʼe ina uga tatou ke tou foaki totatou maʼuli ki te ʼAtua pea mo tou liliu ko he ʼu tisipulo ʼa Kilisito.—Soane 3:16; 1 Soane 4:10, 11.
18. He koʼe ʼe ko he meʼa lelei te maʼuli faka sakilifisio?
18 ʼE tou maʼu koa he ʼu lelei ʼi tatatou fakafisi ʼaē kiā tatou totonu? ʼI te fakafisi ʼa te tūpulaga maʼu koloā ki te fakaafe ʼa Kilisito pea ʼalu, neʼe ʼui e Petelo kiā Sesu: “Koʼeni, kua mātou tuku ia meʼa fuli pea kua mātou mulimuli ia te koe; koteā anai te meʼa ka mātou maʼu ai?” (Mateo 19:27, MN ) Ko Petelo pea mo te tahi kau ʼapositolo neʼe nātou fakafisi moʼoni kiā nātou totonu. Neʼe koteā tanatou fakapale? Neʼe ʼuluaki talanoa Sesu ki tanatou pilivilesio ʼaē ke nātou kaugā hau mo ia ʼi selo. (Mateo 19:28) Pea neʼe toe talanoa Sesu ʼi te temi ʼaia ki te ʼu tapuakina ʼaē ka maʼu anai e tana kau tisipulo fuli. Neʼe ina ʼui fēnei: “ ʼE mole he tahi kua ina tuku hona fale, pe ko hona ʼu tēhina, pe ko hona ʼu tuagaʼane, pe ko tana faʼe, pe ko tana tāmai, pe ko tana fānau, peʼe ko ʼana gāueʼaga, ʼuhi ko au pea ʼuhi ko te logo lelei, ʼe hala mo tana maʼu ʼo liuga teau, ʼi te temi ʼaenī . . . pea ʼi te tuʼu ʼo te ʼu faʼahiga meʼa ka haʼu, te maʼuli heʼegata.” (Maleko 10:29, 30, MN ) ʼE lahi age te ʼu meʼa ʼaē ʼe tou maʼu ʼi te ʼu meʼa ʼaē neʼe tou sakilifisioʼi. Ko tatatou ʼu tāmai, mo faʼe, mo tēhina, mo tuagaʼane pea mo fānau fakalaumālie ʼe mole nātou maʼuhiga age koa la ʼi te ʼu meʼa ʼaē neʼe tou fakafisi kiai ʼuhi ko te Puleʼaga? Ko ai ʼaē neʼe fakapale lahi age tona maʼuli—neʼe ko Petelo peʼe neʼe ko te tūpulaga maʼu koloā?
19. (a) ʼE tou maʼu feafeaʼi te fiafia moʼoni? (b) Koteā ʼaē ka tou vakaʼi anai ʼi te alatike ka hoko mai?
19 ʼI tana ʼu palalau pea mo tana ʼu gāue, neʼe fakahā e Sesu ʼe tou maʼu te fiafia ʼi tatatou foaki pea mo tatatou tauhi ki te hahaʼi, kae ʼe mole tou maʼuli fiafia mo kapau ʼe tou maʼuli pe maʼa tatou totonu. (Mateo 20:28; Gaue 20:35) ʼI tatatou fakafisi ʼaē kiā tatou totonu, kae tou mulimuli tuʼumaʼu ia Kilisito, kua tou maʼuli fiafia ʼaupito ʼi te temi nei, pea kua tou maʼu te ʼamanaki ʼo te maʼuli heʼegata ki te ka haʼu. ʼE moʼoni, ka tou fakafisi kiā tatou totonu, ʼe liliu Sehova ko tatatou Pule. ʼE tou liliu ko te ʼu kaugana ʼa te ʼAtua. He koʼe ʼe fakafiafia tatatou maʼuli kaugana ʼaia ki te ʼAtua? ʼE malave feafeaʼi totatou maʼuli ʼaia ki te ʼu tonu ʼaē ʼe tou fai? ʼE tou tali anai ki te ʼu fehuʼi ʼaia ʼi te alatike ka hoko mai.
ʼE Kei Koutou Manatuʼi Koa?
• He koʼe ʼe tonu ke tou tauʼi tatatou manatu ʼaē kiā tatou totonu?
• Koteā te faka ʼuhiga ʼaē ke tou fakafisi kiā tatou, mo toʼo tatatou pou fakamamahi, pea mo mulimuli tuʼumaʼu ia Sesu?
• Koteā ʼaē ʼe ina uga tatou ke mole tou māʼuʼuli maʼa tatou?
• He koʼe ʼe ko he meʼa lelei te maʼuli faka sakilifisio?
[Paki ʼo te pasina 11]
“Agalelei kiā te koe, ʼAliki”
[Paki ʼo te pasina 13]
He koʼe neʼe mole mulimuli te tūpulaga kiā Sesu?
[Paki ʼo te pasina 15]
Ko te ʼofa neʼe ina uga ai te ʼu Fakamoʼoni ʼa Sehova ke nātou faʼafai ʼi tanatou faka mafola te Puleʼaga ʼi te temi kātoa