Tou Muliʼi Tuʼumaʼu Ia Sesu
1 ʼI te tahi lakaga, neʼe ʼui fēnei e Sesu: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” (Mat. 16:24) ʼE mahino papau ia ʼe tou fia tali lelei ki te ʼu palalau ʼaia ʼa Sesu. Tou vakaʼi pe koteā te faka ʼuhiga ʼo te ʼu palalau ʼaia ʼo tana fakaafe.
2 “Ke Fakafisi Ia Kia Ia Totonu”: ʼI te temi ʼaē ʼe tou foaki ai totatou maʼuli kia Sehova, ʼe tou fakafisi ai kia tatou totonu. Ko te ʼuluaki faka ʼuhiga ʼo te kupu faka Keleka ʼaē neʼe fakaliliu ʼaki te kupu “fakafisi” ʼe ko te “ ʼui kailoa.” Ko tona faka ʼuhiga ʼe tou līaki ʼaki he lotolelei te ʼu meʼa ʼaē ʼe tou fia fai kiai, mo totatou ʼu holi, mo te ʼu meʼa ʼaē ʼe tou fīmālie ai, pea mo te ʼu fakafiafia, kae kua tou fakatotonu ke tou fakafiafia ia Sehova ʼo talu ai.—Loma 14:8; 15:3.
3 “Ke Ina Toʼo Tona Pou Fakamamahi”: ʼI te maʼuli faka Kilisitiano ʼe kita ʼamo te pou fakamamahi ʼo gāue faka sakilifisio kia Sehova. Ko te ʼaluʼaga ʼaē ʼe feala ke fakahā ai te loto faka sakilifisio, ʼe ko te gāue mālohi ʼi te minisitelio. ʼI te taʼu ʼaenī, ko te tokolahi ʼi te kau kaugā fai faka mafola neʼe nātou kau ki te gāue pionie vaeluaʼi temi. ʼE lagi koutou kau ia nātou ʼaia, pea ʼe feala ke koutou ʼui ʼe lahi te ʼu tapuakina ʼaē ʼe koutou maʼu ʼi te ʼu sakilifisio ʼaē ʼe koutou fai. Ko nātou ʼaē ʼe mole feala ke nātou pionie vaeluaʼi temi, ʼe nātou tautau fakatuʼutuʼu ke lahi age te temi ʼaē ʼe nātou fakaʼaogaʼi ʼi te gāue fai faka mafola ʼi tonatou ʼuhiga kaugā fai faka mafola ʼo te kokelekasio. Moʼo fakahoko te faʼahi ʼaia, ʼe fakatuʼutuʼu e ʼihi kokelekasio ke nātou fai fakatomuʼa tanatou ʼu fono gāue ʼi te hola māhani. Neʼe toe maʼu e ʼihi he ʼu fua lelei ʼi tanatou fakatotonu ʼaē ke nātou ʼaʼahi ‘he tahi ʼapi’ peʼe ke toe hoko atu tanatou gāue ‘lolotoga ni ʼu kiʼi minuta.’
4 Ko te tahi ʼaluʼaga ʼaē ʼe tou fakahā ai te loto faka sakilifisio ʼe ko te fai ʼo hatatou ʼu fakatuʼutuʼu takitokotahi. Ko ʼihi neʼe nātou liliu ko te kau pionie katoa, he neʼe lelei tanatou ʼu fakatuʼutuʼu, pea mo te fetogi ʼo tanatou polokalama. Ko ʼihi neʼe nātou fai tanatou ʼu fakatuʼutuʼu ke feala hanatou gāue ʼi te Petele peʼe nātou kau ʼi te gāue faka misionea. Ko ʼihi neʼe nātou ʼolo ki te ʼu koga meʼa ʼaē ʼe ʼaoga lahi ai ni ʼu kaugā fai faka mafola ʼo te Puleʼaga.
5 “Ke Muli Tuʼumaʼu Ia Te ʼAu”: Logope la pe neʼe felāveʼi te kau tisipulo ʼa Sesu mo ni ʼu faigataʼaʼia, kae neʼe fakaloto mālohiʼi nātou e tona faiva pea mo tana faʼa kātaki ʼi te minisitelio. (Soa. 4:34) Neʼe nātou logoʼi ʼe fakafoʼou tonatou ʼatamai ʼi tana nofo mo nātou pea mo te logo ʼaē neʼe ina fakahā. Ko te tupuʼaga la ʼaia ʼo te fiafia moʼoni ʼo nātou ʼaē neʼe muli ia te ia. (Mat. 11:29) ʼO toe feiā aipe mo tatou, tou fefakaloto mālohiʼaki ke tou kātaki ʼi te gāue ʼaē ʼe maʼuhiga ʼaupito, ʼaē ko te faka mafola ʼo te Puleʼaga pea mo fai ʼo ni ʼu tisipulo.
6 Tou fakaʼamu ke tou tali lelei fuli ki te fakaafe ʼa Sesu, ʼaē ke tou muli tuʼumaʼu ia te ia, ʼo tou maʼuliʼi te loto faka sakilifisio. ʼI tatatou fai te faʼahi ʼaia, ʼe tou maʼu anai he fiafia lahi ʼi te temi nei, pea ʼe feala ke tou ʼamanaki ki he ʼu tapuakina ʼe lahi age ʼi te temi ka haʼu.