ʼE Kumi—Te ʼu Pionie Vaeluaʼi Temi e 190
ʼE Feala Koa Hakotou Pionie Vaeluaʼi Temi ʼi Malesio, Mo ʼApelili, Pea Mo Maio?
1 “ ʼE Kumi Te ʼu Kaugā Fai Faka Mafola e toko 1 000,” neʼe ko te kupu tāfito ʼaia ʼo te alatike neʼe tā ʼi Te Tule Leʼo ʼo ʼApelili 1881. Neʼe ko he fakaafe ʼaia neʼe fai ki te ʼu tagata pea mo te ʼu fafine fuli ʼaē neʼe kua foaki tonatou maʼuli ki te ʼAtua, “ ʼaē neʼe foaki e te ʼAliki kia nātou te ʼatamai mālama ʼo Tana moʼoni,” ke nātou fakaʼaogaʼi te temi ʼaē ʼe nātou fealagia ai moʼo faka mafola ʼo te moʼoni ʼo te Tohi-Tapu. Ko nātou ʼaē neʼe feala ke nātou foaki te vaelua ʼo tonatou temi peʼe ko he temi ʼe laka age, ʼo nātou foaki ʼāteaina ki te gāue ʼa te ʼAliki, neʼe fakaloto mālohiʼi nātou ke nātou gāue ko te kau fai faka mafola evaselio—ʼaē ʼe higoa ko te kau pionie ia ʼaho nei.
2 Logope la kua fetogi te temi talu mai te ʼu taʼu 1800, ʼe ʼi ai te meʼa ʼe mole heʼeki fetogi—ko te kau kaugana ʼaē kua ʼosi foaki tonatou maʼuli ki te ʼAtua, ʼe nātou fia hoko atu tanatou fakaʼaogaʼi lahi ʼo tonatou temi ʼi te faka mafola ʼo te logo lelei, ʼo mulimuli ki tonatou ʼu fealagia. Ko te gāue pionie vaeluaʼi temi, ʼe faka fealagia ai ki te ʼu kaugā fai faka mafola ʼo te kokelekasio ke nātou hikihiki te lelei ʼo tanatou gāue, ʼo nātou fakaʼaogaʼi he temi lahi ʼi te minisitelio ʼo te Puleʼaga.—Kol. 4:17; 2 Tim. 4:5.
3 Talu mai te kamata fai ʼo te gāue pionie, neʼe fai e te toko lauʼi teau afe tēhina mo tuagaʼane te gāue pionie vaeluaʼi temi. Ko te fakafiafia ʼi te faʼahi ʼaia ʼo te gāue pionie, neʼe tuputupu ʼo maʼu ai te ʼu pionie vaeluaʼi temi e 105 ʼi Niu Kaletonia ʼi ʼApelili 1985! ʼO tuʼa tolu talu mai ai, ko te toko 150 kaugā fai faka mafola neʼe pionie vaeluaʼi temi lolotoga te ʼu māhina ʼo ʼApelili peʼe ko Maio—ʼi te taʼu 1990, 1992 pea mo te taʼu 1993. Moʼo fakaʼosi ʼi Maio ʼo te taʼu 1995, neʼe maʼu te tupu foʼou ko te ʼu pionie vaeluaʼi temi ʼe toko 187. ʼE mahino papau ia, ʼe feala anai ke tou toe faiga feiā ʼi te taʼu 1997. ʼI Uvea mo Futuna, ʼe toe feala foki ke ʼi ai he ʼu pionie vaeluaʼi temi e 2 peʼe 3.
4 ʼE mātou fakaloto mālohiʼi koutou ke koutou fakatuʼutuʼu ke koutou pionie vaeluaʼi temi lolotoga he māhina e tahi peʼe laka age ʼi Malesio, mo ʼApelili, pea mo Maio. He koʼe koa ʼe kau kiai te māhina ʼo Malesio? Koteʼuhi ko te ʼAho Fakamanatu ʼo te mate ʼo Kilisito ʼi te taʼu ʼaenī, ʼe tō ʼi te ʼAhotapu, ʼaho 23 ʼo Malesio. ʼE mole he tahi faʼahiga fai ʼe lelei age ke tou fai ʼi tatatou fakaʼaogaʼi te ʼu vāhaʼa ki muʼa atu ʼo te ʼAho Fakamanatu, ke tou kau mālohi ai ki te fai faka mafola ʼo te Puleʼaga ʼaē neʼe fakatuʼutuʼu e totatou ʼAliki pea mo Fakamaʼuli, ko Sesu Kilisito. ʼAki te fagonogono lahi ʼaē ka fai ʼi Malesio, ʼe feala ke tou fakaafe te tokolahi ʼaē ʼe fia logo ki te moʼoni, ke ʼōmai ʼo fakatahitahi mo tatou ʼi te fakamanatu ʼo te mate ʼo Kilisito. ʼI Malesio ʼe tou fakahā anai te tohi Te ʼAtamai Mālama. Tahi ʼaē meʼa, ko te māhina ʼo Malesio ʼe ko tona ʼu fakaʼosi vāhaʼa e nima, pea ʼe faigamālie ai te gāue mālohi ʼi te fai faka mafola ʼi te fakaʼosi vāhaʼa. ʼE mahino ia, lolotoga te ʼu māhina ʼo ʼApelili pea mo Maio, kapau ʼe tou gāue mālohi, pea ʼe hoko atu anai tatatou ʼaʼahi ia nātou ʼaē neʼe fia logo ki te moʼoni, pea ke tou kamata he ʼu ako Tohi-Tapu ʼaki te kaupepa Koteā ʼAē ʼe Fakamaʼua Mai e Te ʼAtua Kia Tatou? ʼE tou fai katoa anai totatou telituale, tāfito ʼi te ʼu fakaʼosi vāhaʼa, ʼo tou fakahā te ʼu nusipepa foʼou ʼo Te Tule Leʼo pea mo te Réveillez-vous!
5 Ko Ai ʼAē ʼe Feala Ke Pionie Vaeluaʼi Temi?: Ko te tohi Organisés pour bien remplir notre ministère, ʼi te pasina 114, ʼe ina fakamahino fēnei: “ ʼO mulimuli ki tokotou ʼu ʼaluʼaga takitokotahi, kapau kua koutou papitema, mo koutou mulimuli ki te ʼu lekula ʼo ʼuhiga mo te aga ʼaē ʼe tonu ke fai, ʼe feala ke koutou fakatuʼutuʼu ke koutou fakaʼaogaʼi te ʼu hola e 60 ʼi te māhina ʼi te minisitelio, pea ʼe feala hakotou pionie vaeluaʼi temi ʼi he māhina e tahi peʼe laka atu, pea ʼe tali fakafiafia anai e te ʼu tagata ʼāfea ʼo te kokelekasio ke koutou kau ki te pilivilesio ʼaia.” ʼE feala koa hakotou fakatuʼutuʼu ke koutou pionie ʼi te māhina ʼo Malesio, mo ʼApelili, pea mo Maio?
6 Kapau ʼe tokoni lelei te kolesi ʼo te ʼu tagata ʼāfea pea mo lagolago kiai te ʼu kaugā fai faka mafola ʼaki tonatou loto katoa, ʼe feala anai ke maʼu te ʼu pionie vaeluaʼi temi e 190. (Hep. 13:7) ʼE fakaloto mālohiʼi te ʼu pule famili fuli ke nātou vakaʼi, peʼe feafeaʼi he kau ʼa niʼihi ʼi tonatou ʼu famili ki te gāue pionie vaeluaʼi temi ʼi he māhina e tahi peʼe hoko atu ʼi te ʼu māhina ka hoa mai.—Pes. 148:12, 13; vakaʼi ia Gāue 21:8, 9.
7 ʼAua naʼa koutou foimo ʼui ʼe mole feala anai hakotou pionie vaeluaʼi temi, koteʼuhi ʼe koutou gāue ʼaho katoa, peʼe ʼuhi ko takotou ako, peʼe ko te ʼu maʼua faka famili, peʼe ko he tahi age ʼu maʼua faka Tohi-Tapu. ʼI te manatu ʼa ʼihi ʼu kaugā fai faka mafola, ʼe mole faigafua anai hanatou kau kiai; kae, ʼaki he fakatuʼutuʼu lelei pea ʼaki te tapuakina ʼa Sehova, ʼe feala ke nātou kau kiai. (Pes. 37:5; Taag. 16:3) Koutou faka fealagia ki takotou fia kau ki te selevisi pionie ke ina puleʼi tokotou ʼu ʼaluʼaga; kae ʼaua naʼa koutou faka fealagia ki tokotou ʼu ʼaluʼaga ke nātou puleʼi takotou holi ʼaē ke koutou kau ki te selevisi ʼaia. (Taag. 13:19a) Koia, ʼaki he ʼofa mālohi kia Sehova pea mo totatou ʼu kāiga, ʼe feala anai ki te tokolahi ke nātou fetogi tanatou polokalama ʼo te vāhaʼa, ke feala ai hanatou fakalahi tonatou minisitelio ʼi te māhina. (Luka 10:27, 28) ʼE lahi te ʼu tapuakina ʼaē ka maʼu anai e nātou ʼaē ʼe nātou gāue mālohi ki te Puleʼaga.—1 Tim. 4:10.
8 Te Meʼa ʼAē ʼe Fakahoko e Te Selevisi Pionie Vaeluaʼi Temi: Ko te toko lauʼi afe kaugā fai faka mafola ʼaē ʼe nātou faiga ʼaki tonatou nefesi katoa ʼi te selevisi, ʼe iku ai ki tanatou fakavikiviki lahi kia Sehova. Ko te ʼu kaugā fai faka mafola ʼaia ʼo te Puleʼaga, ʼe nātou faiga mālohi ke nātou faka mafola te logo lelei ki te tokolahi ʼaupito, ʼe toe ʼāsili age tanatou ʼu felogoi mo Sehova, koteʼuhi ʼe nātou ʼiloʼi ʼe tonu ke nātou fakalogo kia te ia ke feala hana foaki age tona laumālie pea mo tana tapuakina.
9 Ko te ʼu pionie vaeluaʼi temi, te ʼu pionie katoa, pea mo te ʼu pionie makehe ʼaē ʼe gāue mo tatou, ʼe nātou fakatupu he lotomālohi ʼi te kokelekasio. Ko tanatou fiafia pea mo tanatou fakamatala tonatou maʼuli pionie ʼe feala ke ina uga ai ʼihi ke nātou fia toʼo te selevisi ʼaia. Ko te faʼahi ʼaia ʼe ina uga ai ʼihi ke nātou toe vakavakaʼi te ʼu meʼa ʼaē ʼe nātou fakamuʼamuʼa, pea mo vakaʼi tanatou fealagia ʼaē ke nātou fakalahi tanatou kau ki te gāue maʼuhiga ʼaia. Ko he tuagaʼane neʼe papitema ʼi tona taʼu 70, ʼosi pe ʼaia pea kamata atu aipe tana tana pionie vaeluaʼi temi ʼo fai hoholo. Hili kiai ni ʼu taʼu, pea neʼe fehuʼi age ki ai pe koʼe ʼi tona taʼu 70, neʼe kei faiga mālohi aipe ʼi te minisitelio, ʼo pionie vaeluaʼi temi ʼi te ʼu māhina fuli, pea neʼe ina ʼui neʼe ina maumauʼi noa tona ʼu taʼu e 70 ʼaē kua ʼosi, koia ʼe mole ina toe fia maumauʼi noa tona ʼu taʼu ʼaē ʼe kei toe!
10 Ko nātou fuli ʼaē ʼe pionie vaeluaʼi temi ʼe nātou fakatuputupu ai tonatou popoto ʼi te minisitelio. Ko te Fakamoʼoni kei tūpulaga neʼe ina ʼui fēnei: ‘ ʼI taku kei veliveli, neʼe ʼau kaugā ʼolo mo taku ʼu mātuʼa ʼi tanā ʼolo ʼo fai faka mafola. Neʼe ko he meʼa fakafiafia te fai faka mafola. Kae ʼaki te temi, neʼe mahino ai kia ʼau ʼe ʼau kehekehe mo ʼihi ʼu tamaliki ako. Pea neʼe ʼau tuʼania ʼi te palalau ki toku ʼu kaugā ako ʼo ʼuhiga mo te moʼoni. ʼI taku ʼalu ʼo fai faka mafola ʼi te ʼu ʼapi, neʼe ʼau tuʼania naʼa ʼau felāveʼi mo he tahi neʼe ʼau ʼiloʼi ʼi te faleako. Ko toku fihifihia neʼe ko taku mataku ki te tagata. [Taag. 29:25] ʼI taku ʼosi maʼu toku ʼu pepa ʼi te faleako, neʼe ʼau fakatuʼutuʼu ke ʼau ʼahiʼahi te gāue pionie vaeluaʼi temi. Ko te meʼa neʼe hoko, neʼe liliu ai te fai faka mafola ko he meʼa ʼe ʼau leleiʼia ʼaupito. Neʼe mahino ai kia ʼau ko te gāue ʼaia ʼe mole ko he meʼa fakahuahua, peʼe ko he kavega mamafa. ʼI taku sio ki te tuputupu ʼo taku kau ako Tohi-Tapu ʼi te moʼoni, neʼe ʼau maʼu te loto fakafetaʼi ʼaupito ʼi taku sio ʼaē neʼe lagolago ia Sehova ki taku ʼu faiga.’ Neʼe hoko atu te pionie vaeluaʼi temi ʼa te tūpulaga ʼaia.
11 Ko te puani ʼaē ʼe lelei ke tou tokagaʼi, mokā ʼe tokolahi ia nātou ʼaē ʼe pionie vaeluaʼi temi ʼi te kokelekasio, pea ʼe fai katoa te telituale. Ko te tēhina ʼaē ʼe gāue ki te ʼu telituale, ʼe feala ke ina kole age ki te ʼu pionie vaeluaʼi temi ke nātou fai te ʼu telituale ʼaē ʼe tahitahiga tona fai. ʼE feala anai ke nātou gāueʼi mo te ʼu telituale ʼaē ʼe tuʼu mamaʼo, mo kapau ʼe nātou ʼave hanatou meʼa kai, pea mo fai ʼi te ʼaho katoa.
12 ʼE Tonu Ke Teuteuʼi Fakatomuʼa e Te ʼu Tagata ʼĀfea: ʼI te lolotoga ʼo te ʼu māhina e tolu ʼaē ka hoko mai, ʼe tonu ke fai he ʼu fakatuʼutuʼu ʼo ʼuhiga mo te faʼahiga fai ʼo te fai faka mafola ʼi te ʼu temi kehekehe ʼo te vāhaʼa, ʼo kau ai mo te hili hoʼatā pea mo te afiafi, ke feala ai ki te tokolahi ke nātou kau ki te gāue ʼaia. ʼO hilifaki ki te fai faka mafola ʼi te ʼu ʼapi, ʼe fakakau anai kiai te fagonogono ʼi te ʼu ala, ʼi te telituale ʼaē ʼe tuʼu ai te ʼu fale koloā pea mo te ʼu pilō, pea mo te ʼu ʼapi ʼaē neʼe mole maʼu atu kiai he tahi. Kapau ʼe nātou fai te faʼahi ʼaia, pea ʼe tokoni anai te ʼu tagata ʼāfea kia nātou ʼaē ʼe pionie ke nātou kau ki te gāue ʼo te kokelekasio ʼi te temi ʼaē ka ʼaoga tāfito anai kiai, pea mo faigamālie ai kia nātou. ʼE tonu ke ʼiloʼi lelei e te kokelekasio te ʼu fakatuʼutuʼu ʼo ʼuhiga mo te fai faka mafola. ʼE tonu ke fakatuʼutuʼu fakalelei te ʼu fono ʼo te gāue fai faka mafola. Tahi ʼaē meʼa, ʼe tonu anai ke feʼauga te telituale pea mo foimo vakaʼi peʼe feʼauga anai te ʼu nusipepa pea mo te tahi ʼu tohi ʼaē ka fakaʼaogaʼi ki te fai faka mafola.
13 Koutou Fai Hakotou Polokalama Takitokotahi: Ko te tēhina, neʼe ina tuʼaniaʼi te kamata ʼo te gāue pionie vaeluaʼi temi, neʼe ina ʼui fēnei: “Neʼe ʼau manatu ʼe faigataʼa anai, kae neʼe faigafua pe ia. ʼE tonu pe ke fai he polokalama ʼe lelei.” ʼI te pasina fakaʼosi ʼo te pepa ʼaenī, ʼe koutou leleiʼia koa te polokalama ʼo te selevisi pionie vaeluaʼi temi ʼaē ʼe tuku atu kia koutou? ʼE fakamaʼua te ʼu hola e hogofulu-ma-nima ʼi te vāhaʼa fuli ki te kau pionie vaeluaʼi temi.
14 Ke feala hanatou pionie vaeluaʼi temi, ko te ʼu tuagaʼane ʼaē ʼe mole gāue, pea mo nātou ʼaē ʼe gāue ʼi te afiafi, ʼi te agamāhani ʼe feala ke nātou fakatuʼutuʼu ʼi tanatou polokalama ke nātou fai faka mafola ʼi te uhu. Ko te ʼu tamaliki ako pea mo nātou ʼaē ʼe gāue ʼi te māʼupō ʼo aʼu ki te uhu, ʼi te agamāhani ʼe feala ke nātou fakaʼaogaʼi te ʼu hoʼatā ki te gāue fai faka mafola. Ko nātou ʼaē ʼe gāue ʼaho katoa, ʼe feala ke nātou toʼo he ʼaho e tahi ʼi te lolotoga vāhaʼa peʼe ke nātou fakaʼaogaʼi katoa te ʼu fakaʼosi vāhaʼa ki te minisitelio, ʼo kau kiai mo te fagonogono ʼi te afiafi. Ko te tokolahi ʼo nātou ʼaē ʼe gata pe tanatou fai faka mafola ki te ʼu fakaʼosi vāhaʼa, ʼe nātou fili te ʼu māhina ʼaē ko ʼona fakaʼosi vāhaʼa e nima. ʼI te taʼu ʼaenī, ʼe feiā te māhina ʼo Malesio, mo ʼAukusito pea mo Novepeli. Moʼo tokoni kia koutou, koutou fakaʼaogaʼi te polokalama ʼaē ʼe tuʼu ʼi te pasina 6, ʼo koutou fakakaukauʼi ʼi te faikole pe koteā anai te polokalama ʼaē ka ʼaoga ki tokotou ʼu ʼaluʼaga takitokotahi.
15 Ko te meʼa ʼaē ʼe lelei ai te gāue pionie vaeluaʼi temi, heʼe koutou filifili pe. ʼE feala ke koutou fili te ʼu māhina ʼaē ka koutou pionie ai, pea ʼe ʼa koutou pe tona vakaʼi pe ko māhina e fia ʼaē ka koutou fai ai te selevisi ʼaia. Kapau ʼe koutou loto ke hoholo atu takotou pionie vaeluaʼi temi kae mole feala, neʼe koutou fakakaukauʼi koa peʼe mole feala hakotou kau ʼi he tahi ʼu māhina lolotoga ʼo te taʼu? ʼI te tahi faʼahi, ko ʼihi ʼe feala ke hoholo atu tanatou pionie vaeluaʼi temi ʼo nātou fai ʼi he ʼu temi loaloaga.
16 Ko He Teuteu Ki Te Gāue Pionie Katoa: Tokolahi ia nātou ʼaē ʼe manatu ki te selevisi pionie, ʼe nātou fia pionie katoa, kae ʼe nātou tuʼania peʼe feʼauga anai tonatou temi, mo faka fealagia anai e tonatou ʼu ʼaluʼaga, pea mo feʼauga tonatou mālohi ki te gāue ʼaia. ʼE mahino ia tokolahi ia nātou ʼaē kua pionie katoa ʼi te temi nei, neʼe nātou tautau pionie vaeluaʼi temi ki muʼa atu moʼo teuteuʼi ʼo nātou ki te pionie katoa. Kapau ʼe tou hilifaki ʼi te ʼaho fuli he hola e tahi ki tatatou polokalama pionie vaeluaʼi temi, peʼe ko he ʼaho katoa ʼi te vāhaʼa fuli, pea ʼe feala ai anai ke tou fakahoko te ʼu hola ʼo te pionie katoa. Ke feala hakotou ʼiloʼi peʼe feala takotou fai te faʼahi ʼaia, he koʼe ʼe mole koutou ʼahiʼahi te fai ʼo ni ʼu hola e 90 ʼi te minisitelio lolotoga he māhina e tahi peʼe laka age ʼi te temi ʼaē ʼe koutou pionie vaeluaʼi temi ai? Tahi ʼaē meʼa, ʼe koutou fakatuputupu anai takotou ʼu ʼaʼahi pea mo takotou ʼu ako Tohi-Tapu, ʼo fealagia ai takotou fetogitogi pea mo fakafuafua lelei takotou selevisi pionie.
17 Ko te tuagaʼane neʼe ina fai hoholo tana selevisi pionie vaeluaʼi temi, lolotoga taʼu e ono. ʼI te ʼu temi ʼaia neʼe ina fakatuʼutuʼu ke kau ki te kau pionie katoa. ʼAki te fakatuʼutuʼu ʼaia, neʼe ina ʼahiʼahi te fai ʼo te ʼu gāue kehekehe e fā, ko tana ʼamanaki ʼaē ke ina maʼu he gāue ʼe feala ai anai hana fai te ʼu hola e 90 ʼaē ʼe fakamaʼua ki te kau pionie katoa. ʼI te māhina fuli, neʼe ina fakatuʼutuʼu te polokalama e tahi peʼe lua ke feala ai hana fakafuafua peʼe feala tana pionie peʼe kailoa. Kae ʼi tana sivi te faʼahi ʼaia, neʼe manatu ia ʼe mole feala ke pionie katoa. Kae neʼe ina kole tuʼumaʼu kia Sehova ke ina takitaki ia ia. Pea ʼi te tahi ʼaho, lolotoga tana teuteuʼi te Fono Gāue, neʼe ina lau te alatike ʼi te Te Minisitelio ʼo Te Puleʼaga ʼo Sepetepeli 1991 ʼaē neʼe ʼui fēnei ai: “ ʼAua naʼa tou faka maʼuhigaʼi fau te ʼu hola ʼaē ʼe fakamaʼua mai, kae tou tokagaʼi tāfito te fealagia lahi ʼaē ko te kau ki te gāue ʼaē ko te tānaki ʼo te taʼukai? (Soane 4:35, 36)” ʼE ina ʼui fēnei: “Neʼe tuʼa nima peʼe tuʼa ono taku lau te manatu ʼaenī, pea neʼe ʼau ʼiloʼi papau ai neʼe ko te tali ʼaia ʼa Sehova. ʼI te temi ʼaia neʼe ʼau fakatotonu ai ke ʼau pionie katoa.” Logope la ko te polokalama ʼo tana gāue fakamālama neʼe mole faʼa lelei, ka neʼe ina sinie tana pepa ke pionie katoa. Hili kiai te vāhaʼa katoa, pea fetogi tona polokalama gāue, pea ko te ʼu hola ʼaē neʼe fakatuʼutuʼu ki tana gāue fakamālama, neʼe tau mo feʼauga mo tana selevisi. Neʼe ina ʼui fēnei, “ ʼE mole koa la ko te tokoni ʼaenī ʼa Sehova?” pea neʼe ina toe ʼui fēnei: “Mokā koutou kole kia Sehova ke tokoni atu kia koutou pea ʼe ina foaki atu te meʼa ʼaia, ʼaua naʼa koutou līaki te tokoni ʼaia—kae koutou tali.” Kapau ʼe koutou lotomālohi ke koutou pionie katoa, lagi ʼi te fakaʼosi ʼo te ʼu māhina e tolu ʼo takotou pionie vaeluaʼi temi ʼi Malesio, mo ʼApelili, pea mo Maio, ʼe koutou ʼiloʼi papau anai, ʼe feala foki mo koutou ke koutou pionie katoa.
18 ʼE mātou ʼiloʼi papau ʼe tapuakina anai e Sehova te faiva ʼo tana hahaʼi, pea mo ina lagolago anai ki tanatou ʼu faiga, ʼi tanatou fakahā te logo lelei ʼo te fakamaʼuli, lolotoga te temi makehe ʼo te fasiga taʼu mātala ʼaenī ʼaē ka fai ai te gāue. (Is. 52:7; Loma 10:15) ʼE koutou tali anai koa ki te fakaafe ʼaē ke maʼu he ʼu pionie vaeluaʼi temi e 190 ke nātou kau ki te gāue ʼi Malesio, mo ʼApelili, mo Maio?
[Talanoa ʼo te pasina 3]
Koteā ʼAē ʼe Tonu Ke Koutou Fai Ke Lelei Ai Takotou Pionie Vaeluaʼi Temi
■ Koutou tui papau ʼe lava lelei anai takotou ʼu fakatuʼutuʼu
■ Koutou faikole kia Sehova ke ina tapuakiʼi takotou ʼu faiga
■ Koutou fakaafe he tahi kaugā fai faka mafola ke kaugā pionie mo koutou
■ Koutou fakatuʼutuʼu he polokalama ʼe lelei
■ Koutou fakatuʼutuʼu ke lahi te ʼu nusipepa ʼaē ka koutou tufa
■ Koutou lagolago ki te ʼu fakatuʼutuʼu ʼa te kokelekasio ʼo ʼuhiga mo te fai faka mafola
■ Koutou kumi he ʼu faigamālie moʼo fai ʼo te fagonogono faigamālie