Ko He Fakatuʼutuʼu Maʼuhiga Ki Te Taʼu Gāue Kā Hoko Mai
1. Ko te fakatuʼutuʼu fea lā ʼe feala hatatou fakakaukau kiai ki te taʼu gāue kā hoko mai?
1 Kapau ʼe tou fia tuputupu ʼi te faʼahi fakalaumālie, pea ʼe tonu ke tou fai hatatou ʼu fakatuʼutuʼu. Koteā takotou ʼu fakatuʼutuʼu ki te taʼu gāue kā hoko mai? Ko te fakatuʼutuʼu lelei ʼe ko te toʼo ʼo te selevisi pioniē vaeluaʼi temi ʼi he māhina e tahi peʼe laka atu. Mai tona ʼaluʼaga ʼaē ko te gāue fakafiafia ʼaia ʼe fakamaʼua ʼi te agamāhani ke ʼuluaki fai muʼa he polokalama, ʼe ko te temi ʼaenī ke tou kamata fakakaukau kiai. He koʼē ʼe tonu ke tou fakatuʼutuʼu ke tou pioniē vaeluaʼi temi?
2. He koʼē ʼe tonu ke tou fakatuʼutuʼu ke tou pioniē vaeluaʼi temi?
2 Te ʼu Tupuʼaga Ke Tou Pioniē Vaeluaʼi Temi: Ko te selevisi pioniē vaeluaʼi temi ʼe ina faka fealagia mai kiā tātou ke tou fakafiafia tatatou Tamai ʼaē ʼe ʼi selō “ ʼo laka age,” heʼe lahi age anai te temi ʼaē kā tou kau ai ki te minisitelio. (1 Tes. 4:1) ʼI tatatou vakaʼi te ʼu meʼa fuli ʼaē neʼe fai e Sehova maʼa tātou, ʼe uga tātou e totatou loto ke tou palalau ki te hahaʼi ʼo ʼuhiga mo ia. (Pes. 34:1, 2) ʼE tokagaʼi e Sehova pea mo ina leleiʼia te ʼu sākilifisio ʼaē ʼe tou fai ke lahi age tatatou kau ki te minisitelio. (Hep. 6:10) ʼI tatatou ʼiloʼi ʼaē ʼe fiafia ia Sehova ʼi tatatou gāue kinakina, ʼe tou maʼu ai he toe fiafia lahi.—1 Fkma. 29:9.
3, 4. Ko te ʼu lelei fea ʼaē ʼe tou maʼu mai te selevisi pioniē vaeluaʼi temi?
3 ʼI te agamāhani, kapau ʼe fai liuliuga he gāue, pea ʼe faigafua age kiā koutou tona fai pea mo kotou fiafia ai. Kapau ʼe lahi te temi ʼaē ʼe kotou fakaʼaogaʼi ki te minisitelio, pea ʼe mole kei kotou mātataku anai ʼi te palalau ʼi te ʼu matapā. ʼE kotou liliu anai ʼo popoto ʼi te kamata ʼo he ʼu fai palalau pea mo te fakaʼaogaʼi ʼo te Tohi-Tapu. Kapau ʼe lahi takotou fai palalau ʼo ʼuhiga mo takotou tui, pea ʼe liliu anai ʼo mālohi. Tokolahi ʼaē neʼe mole hanatou ako Tohi-Tapu, neʼe feala hanatou kamata hanatou ako Tohi-Tapu ʼi tanatou toʼo te selevisi pioniē vaeluaʼi temi.
4 Kā tou toʼo te selevisi pioniē vaeluaʼi temi, ʼe ina toe uga ai ia tātou ke tou fetogi tatatou ʼu gāue ʼaē ʼe tou fai māhani ʼi te faʼahi fakalaumālie. Ko te tehina neʼe pioniē kātoa ki muʼa atu, neʼe ina logoʼi kua lahi fau tana fakaʼaogaʼi tona temi ki te gāue faka mālama, pea neʼe ina fakatotonu ai ke ina toʼo te selevisi pioniē vaeluaʼi temi ʼi te māhina e tahi. Neʼe ina ʼui fēnei: “Neʼe au punamaʼuli ki taku liliu ʼo mālohi ʼi te faʼahi fakalaumālie ʼi te māhina ʼaia e tahi! Neʼe au fakatotonu ai ke au fai hoholo taku selevisi pioniē vaeluaʼi temi, ʼo feala ai ki muli age ke au toe pioniē kātoa.”
5. ʼE lava feafeaʼi hatatou tauʼi te manatu ʼaē ʼe mole tou popoto ʼi te fai faka mafola?
5 Tou Tauʼi Te ʼu Faigataʼa: ʼE lotolotolua ʼihi ke natou pioniē vaeluaʼi temi heʼe natou manatu ʼe mole natou popoto ʼi te fai faka mafola. Kapau ʼe ko te faʼahi ʼaia ʼaē ʼe tupu ai hakotou holomuli, ʼe feala ke tokoni atu ia Sehova ohagē ko tana tokoni kiā Selemia. (Sel. 1:6-10) Logolā ko Moisese ‘neʼe mamafa tona gutu pea neʼe mamafa tona ʼalelo,’ kae neʼe fakaʼaogaʼi ia ia e Sehova moʼo fakahoko Tona finegalo. (Eke. 4:10-12) Kapau ʼe kotou manatu ʼe mole kotou popoto ʼi te palalau, kotou kolekole kiā Sehova ke ina foaki atu te lototoʼa.
6. ʼE lava feafeaʼi ke pioniē vaeluaʼi temi he tahi ʼe mahamahaki peʼe maʼumaʼua?
6 ʼE kotou lotolotolua koa ʼuhi heʼe kotou mahamahaki peʼe kotou maʼumaʼua? Kapau ʼe kotou māʼimoa, ʼe feala hakotou pioniē vaeluaʼi temi ʼo kotou mulimuli ki tokotou fealagia. Kapau ʼe kotou maʼumaʼua, ʼe kotou tokagaʼi anai ʼe feala hakotou tuku ʼihi gāue ʼe mole faʼa maʼuhiga ke kotou fai ʼi te tahi māhina. Ko ʼihi ʼaē ʼe gāue faka mālama ʼi te temi kātoa, neʼe feala ke natou pioniē vaeluaʼi temi ʼo natou toʼo he ʼaho mālōlō e tahi peʼe lua.—Kol. 4:5.
7. He koʼē ʼe ko he meʼa lelei hakotou faikole ʼo ʼuhiga mo takotou fia toʼo te selevisi pioniē vaeluaʼi temi?
7 ʼE Feafeaʼi Tona Fakahoko: Kotou faikole ʼo ʼuhiga mo takotou fia toʼo te selevisi pioniē vaeluaʼi temi. Kotou kole kiā Sehova ke ina tapuakina takotou ʼu faiga ke lahi age takotou minisitelio. (Loma 12:11, 12) ʼE feala hana tokoni atu ke kotou fai he ʼu tonu fakapotopoto ʼo ʼuhiga mo te fetogi ʼo takotou polokalama. (Sake 1:5) Kapau ʼe mole hake iā koutou te fia toʼo te selevisi, kotou kole kiā Sehova ke tokoni atu ke kotou maʼu te fiafia ʼi te gāue fai faka mafola.—Luka 10:1, 17.
8. ʼI takotou mulimuli kiā Tāʼaga Lea 15:22, ʼe lava feafeaʼi hakotou pioniē vaeluaʼi temi?
8 Kotou palalau mo takotou fāmili ʼo ʼuhiga mo te fakatuʼutuʼu ʼaē ki te selevisi pioniē vaeluaʼi temi. (Taag. 15:22) ʼE lagi feala ki he tokotahi ʼi te fāmili ke pioniē vaeluaʼi temi ʼaki te tokoni ʼo nātou ʼaē ʼo te loto fale. Kotou fai palalau mo ʼihi ʼi te kōkelekāsio ki takotou fia pioniē, tāfito mo nātou ʼaē ʼe tatau tonatou ʼaluʼaga mo koutou. ʼE feala ai ke lahi age te fiafia ʼi te selevisi pioniē vaeluaʼi temi.
9. Ko te ʼu māhina fea lā ʼaē ʼe feala ai ke kotou filifili ke kotou pioniē vaeluaʼi temi?
9 ʼI takotou vakaʼi takotou polokalama ki te minisitelio ki te taʼu gāue kā hoko mai, ko te māhina fea ʼaē ʼe feala ai hakotou pioniē vaeluaʼi temi? Kapau ʼe kotou gāue temi kātoa peʼe kotou ʼolo ʼo ako, ʼe lagi kotou fia pioniē ʼi te ʼu māhina ʼaē ʼe ʼi ai he ʼu ʼaho mālōlō peʼe ʼaē ʼe ko ʼona Moeaki e nima peʼe ko ʼAhotapu e nima. Ohagē lā, ʼi te ʼu māhina ʼo Sepetepeli, mo Tesepeli, mo Malesio, pea mo ʼAukusitō ʼe ko fakaʼosi vāhaʼa e nima. ʼI te māhina ʼo Maio, ko Moeaki e nima, pea ʼi Sūnio, ko ʼAhotapu e nima. Kapau ʼe kotou mahamahaki, kotou vakaʼi te ʼu māhina ʼaē ʼi te agamāhani, ʼe lāulelei ai te lagi. ʼE lagi kotou toe fia pioniē ʼi te māhina ʼaē ʼe fakatuʼutuʼu ai e te taupau ʼo te silikō ke ina ʼaʼahi takotou kōkelekāsio. ʼI tana ʼaʼahi ʼaia, ʼe kotou maʼu anai te tahi pilivilēsio ʼaē ko te kau ki te ʼuluaki koga ʼo te fono ʼaē ʼe fai maʼa te kau pioniē kātoa. Mai tona ʼaluʼaga ʼaē, ʼi te taʼu kā hoko mai, ʼe fai anai te ʼAho Fakamanatu ʼo te mate ʼa Sesu ʼi te ʼaho 22 ʼo Malesio, ʼe feala ke kotou pioniē vaeluaʼi temi ʼi Malesio, mo ʼApelili pea mo Maio. ʼI takotou ʼosi filifili te māhina peʼe ko te ʼu māhina ʼaē kā kotou pioniē vaeluaʼi temi ai, kotou kamata fai hakotou polokalama ke feala ai hakotou maʼu te ʼu hola.
10. Koteā ʼaē ʼe feala ke kotou fai mo kapau ʼe mole feala hakotou pioniē vaeluaʼi temi?
10 Tatau aipē pe kotou manatu ʼe mole feala anai hakotou pioniē vaeluaʼi temi ʼi te taʼu gāue ʼaenī kā hoko mai, ʼe feala pē ke kotou maʼu te manatu faka pioniē. Kotou haga faiga ʼi te minisitelio, ʼo kotou falala ʼe fiafia ia Sehova ʼi takotou faiga ʼaki tokotou nefesi kātoa ke kotou foaki kiā te ia te meʼa ʼaē ʼe lelei. (Kal. 6:4) Kotou lagolago pea mo fakaloto mālohiʼi ia nātou ʼaē ʼe natou lava pioniē vaeluaʼi temi. ʼE lagi kotou fetogi anai ia takotou polokalama ke feala ai hakotou maʼu he tahi ʼaho ke kotou kau ki te minisitelio mo nātou ʼaē ʼe pioniē.
11. He koʼē ʼe tonu ke maʼuhiga kiā tātou te temi ʼaē ʼe tou māʼuʼuli ai?
11 ʼE ʼiloʼi e te hahaʼi ʼa Sehova te temi maʼuhiga ʼaē ʼe tou māʼuʼuli ai. ʼE ʼi ai te gāue ʼe tonu ke fai—ko te faka mafola ʼo te logo lelei. ʼE tonu ke haofaki te maʼuli ʼo te hahaʼi, pea ko te temi ʼaē ʼe kei toe ʼe nounou. (1 Ko. 7:29-31) Ko te ʼofa ki te ʼAtua pea mo te hahaʼi ʼe ina uga anai tātou ke tou mālohi ʼi te minisitelio. ʼAki tatatou faiga ʼaia pea mo he polokalama lelei, ʼe lagi feala anai hatatou pioniē vaeluaʼi temi ʼi he māhina ʼi te taʼu gāue kā hoko mai—ʼe ko he fakatuʼutuʼu maʼuhiga!