Ko Te ʼu Tali Ki ʼa Kotou ʼu Fehuʼi

◼ E faka ʼuhiga feafeaʼi te gāue pionie vaeluaʼi temi?

ʼE tonu ke faka ʼuhiga te gāue pionie vaeluaʼi temi ohage ko he pilivilesio pea mo he maʼua lahi. ʼI te māhina fuli, ko te ʼu lauʼi afe e hogofulu kau faka mafola ʼe hinoʼi ke pionie vaeluaʼi temi, pea ko ʼihi ʼe nātou fai te gāue ʼaia tuʼumaʼu. ʼE tou fakamālo ki te kau faka mafola faiva ʼaia ʼi tanatou feala maʼu tonatou ʼu hola e 60 ʼi te fai faka mafola ʼi te gāue ʼi te māhina. Ko te ʼu tagata ʼāfea pea mo ʼihi ʼi te kokelekasio ʼe tonu ke nātou fakaloto mālohiʼi te kau faka mafola ʼaē ʼe tohi hanatou pepa ki te faʼahi ʼaia ke nātou fai fakamalotoloto tonatou maʼua kae ʼaua naʼa nātou meʼa noaʼi.

Ohage pe ko te gāue pionie katoa, ko nātou ʼaē ʼe fakatuʼutuʼu ke nātou pionie vaeluaʼi temi ʼi he māhina e tahi peʼe lahi ʼe tonu muʼa ke nātou fakafuafua fakalelei (Luka 14:28). ʼE tonu foki ke nātou fakasiosio, peʼe feala anai hanatou foaki ki te fai faka mafola te ʼu hola ʼaē ʼe tonu ke nātou fai kae mole nātou tuku noaʼi ʼihi ʼonatou maʼua faka kilisitiano. ʼI muʼa ʼo te fai ʼo he tonu ke toʼo te pionie vaeluaʼi temi, ʼe tonu ke fakasiosio to kita ʼaluʼaga takitokotahi ʼi te faikole. ʼE mole tonu ke hoko fai te tonu ʼaia, koteʼuhi neʼe tohi ʼihi ki te gāue ʼaia. ʼE tonu ke fakakaukauʼi, ke ʼalu tahi mo te fakatuʼutuʼu ʼo he polokalama neʼe tohi ki he pepa ʼo kita ʼiloʼi papau ʼe maʼu anai to kita ʼu hola. ʼE maʼuhiga ke lau fakalelei te pepa pea mo fakakaukauʼi peʼe feala ha kita ʼui fakamalotoloto e kita maʼu te ʼu aga tāfito.

E moʼoni, ko te gāue pionie vaeluaʼi temi ʼe fakamaʼua ki ai he ʼu faiga ʼo lahi ake. Ko ʼihi māhina ʼo te taʼu ʼe ʼaoga ke “lahi to kita maʼumaʼua” ʼi te fai faka mafola ʼo te logo lelei (Gāue 18:5). Tou talanoa ki te temi ʼo te ʼaho Fakamanatu, ʼi malesio pea mo ʼapelili, pea mo te ʼu māhina ʼaē ʼe ʼaʼahi ai e te tagata taupau faka silikosikilipisio totatou kokelekasio. Tokolahi te kau faka mafola ʼe nātou fakamaʼuaʼi nātou ke nātou mulimuli ki he polokalama ʼo ʼuhiga mo te kau ki te fai faka mafola lolotoga te ʼu temi gāue makehe ʼaia, ʼi tanatou ʼiloʼi ʼaē ʼe haʼu mai ai he ʼu tapuakina lahi (2 Ko. 9:6). Tokolahi te kau faka mafola e nātou faiga tāfito ke nātou pionie ʼi te ʼu temi mālōlō pea mo te ʼu māhina ʼaē ko tona ʼu fakaʼosi vāhaʼa kotoa e nima. Kae ʼi tanatou tohi ʼo tanatou pepa, ʼe mahino kia nātou ʼe maʼuhiga ke nātou mulimuli ki te talanoa ʼaenī ‘ke faka ʼuhiga lelei takotou Ei ko te Ei’ ʼo fai fakalelei ke feala ai foki tanatou tohi te ʼu hola e 60 ʼi te fai faka mafola ʼi tanatou pepa tānaki ʼi te fakaʼosi ʼo te ʼu māhina fuli. — Mat. 5:37.

Ko te kau faka mafola ʼaē ʼe mole feala hanatou pionie ʼe feala tanatou tokoniʼi ia nātou e pionie ʼo kaugā ʼolo mo nātou ʼo fai faka mafola, ʼo nātou fakatuʼutuʼu mo nātou ki he ʼu ʼaho. ʼE lelei ke kita fai faka mafola mo nātou ʼo loaloaga ʼi tona fai māhani mokā ʼe feala. ʼI te māhani, ʼe leleiʼia e te kau pionie mokā e ʼi ai honatou kaugā fagona ʼi te kamataʼaga ʼo te gāue ʼi te uhu, ʼi te fakaʼosi ʼo te hoʼatā peʼe ko te kamata ʼo te afiafi. ʼE nātou fiafia mokā ʼe tou kaugā ʼolo mo nātou ʼo fai he ʼu ʼaʼahi peʼe ko he kamata ʼo he ʼu ako faka tohi-tapu. Ko nātou ʼaē ʼe feala tanatou lagolago feiā kia nātou e nātou ʼiloʼi moʼoni ai te fiafia ʼaē ʼo te foaki. — Gāue 20:35.

Ko te lototoʼa ʼo te tokolahi ʼi te kau pionie vaeluaʼi temi e tou fiafia lahi ai. Ko nātou ʼaē ʼe feala tanatou kau ki te faʼahi ʼaia ʼe feala hanatou atali ki he ʼu tapuakina lahi (Taag. 10:4). Ko te temi fea koa ʼaē ʼe koutou ʼiloʼi ai anai te ʼu fiafia ʼaē ʼe haʼu mai he gāue lahi ʼaki te gāue pionie vaeluaʼi temi?