ʼE Akoʼi Nātou Ki He Fai Fagonogono Kātoa

“E koutou hoko anai ko oku fakamooni i Selusalemi, mo Sutea katoa, mo Samalia o kaku ki te u tuakoi o te kelekele.”​—Gaue 1:8.

1, 2. Koteā ʼaē neʼe fakatotonu age kiā Petelo, pea ko ai ʼaē neʼe ina fai te fakatotonu ʼaia?

“KO SESU Nasaleti . . . nee ina fakatotonu mai kia matou ke matou fakaha ki te hahai pea mo fakamooni, e ko ia ae kua hinoi e te Atua ko te Tuʼi fakamau o te hahai mauli mo te hahai mate.” (Gaue 10:38, 42) Neʼe ko te fakamahino ʼaia ʼa te ʼapositolo ko Petelo kiā Kolonelio pea mo tona famili ʼo ʼuhiga mo te fakatotonu ʼaē neʼe fai kiā ia, ke liliu ko he tagata faka mafola evaselio.

² Neʼe ko te temi fea ʼaē neʼe fai ai e Sesu te fakatotonu ʼaia? ʼE hā mai, neʼe manatu Petelo ki te ʼu palalau neʼe fai e Sesu ʼi tona ʼosi fakatuʼuake, ʼi muʼa ʼo tana hake ki selo. ʼI te lakaga ʼaia, neʼe ʼui fēnei e Sesu ki tana kau tisipulo agatonu: “E koutou hoko anai ko oku fakamooni i Selusalemi, mo Sutea katoa, mo Samalia o kaku ki te u tuakoi o te kelekele.” (Gaue 1:8) Kae ʼi te temi ʼaē neʼe liliu ai Petelo ko he tisipulo ʼa Sesu, neʼe kua ina ʼiloʼi ia ʼe tonu anai ke palalau ki te hahaʼi ʼo ʼuhiga mo tana tui ʼaē kiā Sesu.

Neʼe Akoʼi Nātou Ia Taʼu e Tolu

3. Koteā te milakulo ʼaē neʼe fakahoko e Sesu, pea koteā te fakaafe neʼe ina fai kiā Petelo pea mo Atelea?

³ Hili te ʼu māhina ʼi te ʼosi papitema ʼa Sesu ʼi te taʼu 29 ʼo totatou temi, neʼe faka mafola ʼi te faʼahi ʼaē neʼe gāue ai ia Petelo pea mo tona tēhina ko Atelea, neʼe ko te ʼu tagata tautai ʼi te Tai ʼo Kalilea. Neʼe nātou gelu ʼi te pō kātoa kae neʼe mole nātou maʼu he meʼa. Pea neʼe ʼui fēnei age e Sesu kiā nātou: “Hoko atu ki te loloto pea koutou ʼaʼau tokotou ʼu kupega moʼo gelu.” Neʼe nātou fakalogo kiā Sesu, pea “neʼe nātou maʼu ai te tuʼula ika e lahi ʼaupito. ʼIo, neʼe mahaehae tanatou ʼu kupega.” ʼI tana sio ki te milakulo ʼaia, neʼe mataku ia Petelo, kae neʼe faka fīmālieʼi ia ia e Sesu, ʼo ʼui maʼana: “ ʼAua naʼa ke toe mataku. Heʼe ko te temi leva ʼaē, ko te ʼu tagata ʼaē ka ke puke maʼuli.”​—Luka 5:4-10, MN.

4. (a) Neʼe teuteuʼi feafeaʼi e Sesu tana ʼu tisipulo ki te fai faka mafola? (b) ʼO fakatatau ki te minisitelio ʼa Sesu, neʼe tonu ke feafeaʼi te minisitelio ʼo tana kau tisipulo?

⁴ ʼI te temi pe ʼaia, ko Petelo pea mo Atelea​—mo Sakopo pea mo Soane, te ʼu foha ʼo Sepeteo​—neʼe nātou tuku tanatou ʼu vaka pea nātou muliʼi Sesu. Lolotoga taʼu e tolu, neʼe nātou kaugā ʼolo mo Sesu ʼi tana fai faka mafola ʼi te ʼu kolo pea neʼe akoʼi nātou ke nātou liliu ko he ʼu tagata faka mafola evaselio. (Mateo 10:7; Maleko 1:16, 18, 20, 38; Luka 4:43; 10:9) ʼI te fakaʼosi ʼo te ʼu taʼu ʼaia, ʼi te ʼaho 14 ʼo Nisani ʼo te taʼu 33 ʼo totatou temi, neʼe ʼui fēnei e Sesu kiā nātou: “Ko ae e tui mai kia te au pea e ina fai anai te u gaue e au fai, pea e ina fai anai he u gaue lalahiʼage.” (Soane 14:12) ʼE fai faka mafola kātoa anai te ʼu tisipulo ʼa Sesu ohage ko tona fai e Sesu, kae ki he ʼu hahaʼi ʼe tokolahi age. Ki muli age, neʼe nātou ʼiloʼi ko nātou pea mo te ʼu hahaʼi ʼaē ka liliu ko he ʼu tisipulo, ʼe nātou faka mafola anai ʼi “te ʼu fenua fuli pe” ʼo aʼu ki “te fakaʼosi ʼo te tuʼu ʼo te ʼu faʼahiga meʼa ʼaenī.”​—Mateo 28:19, 20, MN.

5. ʼE feala ke tou maʼu ʼifea te ako ʼaē neʼe fai e Sesu ki tana ʼu tisipulo?

⁵ ʼE tou māʼuʼuli ʼi “te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 24:3, MN ) ʼO mole hage ko te ʼu ʼuluaki tisipulo, ʼe mole feala ke tou kaugā ʼolo mo Sesu pea mo sio ki tana fai faka mafola ki te hahaʼi. Kae ʼe feala ke tou maʼu te ako ʼaia ʼi tatatou lau ʼi te Tohi-Tapu tana faʼahiga fai faka mafola pea mo te ʼu tokoni ʼaē neʼe ina foaki ki tana kau tisipulo. (Luka 10:1-11) Pea ʼe talanoa anai ʼi te alatike ʼaenī ki he tahi faʼahi ʼe maʼuhiga ʼaupito neʼe fakahā e Sesu ki tana ʼu tisipulo​—ko te maʼu ʼo te manatu ʼaē ʼe lelei ʼo ʼuhiga mo te gāue fai faka mafola.

Neʼe Tokaga Ki Te Hahaʼi

6, 7. Koteā te kalitātē neʼe maʼu e Sesu neʼe tupu ai te fua lelei ʼo tana minisitelio, pea ʼe tou lava faʼifaʼitakiʼi feafeaʼi ia ia?

⁶ He koʼe neʼe fua lelei te fai faka mafola ʼa Sesu? He neʼe tokaga lahi ki te hahaʼi. Neʼe fakakikite e te tagata fai pesalemo, ko Sesu ʼe “fakaʼofaʼofa anai kiā ia ʼaē ʼe veliveli pea mo ʼaē ʼe masiva.” (Pesalemo 72:13) ʼE mahino mai neʼe ina fakahoko ia te lea faka polofeta ʼaia. ʼE ʼui fēnei ʼi te Tohi-Tapu: “I tana mamata ki te hahai, nee fonu ia i te ofa kia natou, koteuhi kua natou fakaofaofa pea mo ogosia o hage he u ovi e mole honatou tauhiovi.” (Mateo 9:36) Māʼiape la mo nātou ʼaē neʼe māʼuʼuli ʼi te agahala, neʼe nātou logoʼi tana fia tokaga ʼaē kiā nātou pea neʼe nātou fakaōvi kiā te ia.​—Mateo 9:9-13; Luka 7:36-38; 19:1-10.

⁷ ʼE fua lelei anai tatatou gāue ia ʼaho nei mo kapau ʼe tou tōkakaga feiā ki te hahaʼi. ʼI muʼa ʼo takotou ʼolo ʼo fai faka mafola, he koʼe koa ʼe mole koutou fakakaukauʼi ki te ʼaoga ʼaupito ki te hahaʼi ia te logo ʼaē ʼe koutou tala? Koutou fakakaukauʼi te ʼu fihifihia ʼaē ʼe nātou felāveʼi mo ia, pea ʼe ko te Puleʼaga tokotahi pe ʼaē ʼe feala anai ke ina fakatokatoka. Tou fakatotonu ke tou maʼu he manatu ʼe lelei ʼo ʼuhiga mo te hahaʼi fuli pe, heʼe mole tou ʼiloʼi peʼe ko ai ʼaē ka ina tali lelei anai te logo. Lagi koutou fakaōvi anai ki he tahi neʼe faikole ke ʼalu age he tahi ohage ko koutou moʼo tokoni kiā ia!

Ke Uga Tatou e Totatou ʼOfa

8. Ohage ko Sesu, koteā ʼaē ʼe ina uga tana kau tisipulo ke nātou faka mafola ia te logo lelei?

⁸ Ko te logo lelei ʼaē neʼe tala e Sesu ʼe pipiki ki te fakahoko ʼo te finegalo ʼo Sehova, mo te tāpuhā ʼo Tona huafa pea mo te fakatonuhia ʼo Tona pule faʼifaʼitaliha​—ko te ʼu faʼahi maʼuhiga ʼaupito ʼaia ʼe tonu ke vakaʼi e te malamanei peʼe nātou lagolago kiai. (Mateo 6:9, 10) Ko tona ʼofa ʼaē ki tana Tāmai ʼaē neʼe ina uga ai Sesu ke ina taupau tana agatonu ʼo aʼu ki te fakaʼosi, pea mo ina fai he fagonogono kātoa ʼo ʼuhiga mo te Puleʼaga, ʼaē ka ina fakatokatoka anai te ʼu faʼahi maʼuhiga ʼaupito ʼaia. (Soane 14:31) Ia ʼaho nei, ʼe toe maʼu e te kau tisipulo ʼa Sesu te ʼofa ʼaia, koia ʼe nātou faʼafai ai ʼi tanatou minisitelio. Neʼe ʼui fēnei e te ʼapositolo ko Soane: “Koʼenī te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu,” ʼo kau kiai te fakatotonu ʼaē ke faka mafola ia te logo lelei pea mo fai ni ʼu tisipulo.​—1 Soane 5:3, MN; Mateo 28:19, 20.

9, 10. ʼO hilifaki ki tatatou ʼofa ki te ʼAtua, koteā te tahi ʼofa ʼe ina uga tatou ke tou fai he fagonogono kātoa?

⁹ Neʼe ʼui fēnei e Sesu ki tana kau tisipulo: “Kapau e koutou ofa ia te au, e koutou taupau anai aku fekau. Ko ae e ina maù aku folafola pea e ina taupau ia, e ko ia alâ e ofa ia te au.” (Soane 14:15, 21) Koia ko te ʼofa ʼo Sesu ʼe tonu ke ina uga tatou ke tou faka mafola ia te moʼoni pea mo mulimuli ki te tahi ʼu meʼa ʼaē neʼe fakatotonu mai e Sesu. ʼI tona ʼosi fakatuʼuake, neʼe hā kiā Petelo pea neʼe ina fakaloto mālohiʼi fēnei: “Fafaga taku faga [ōvi]. . . . Taki ʼo fafaga taku ʼu kiʼi faga ōvi. . . . Fafaga taku ʼu kiʼi faga ōvi.” Koteā ʼaē ʼe tonu ke ina uga ai ia Petelo ke ina fai ia te gāue ʼaia? Neʼe fakahā e Sesu te tali kiai ʼi tana fehuʼi tuʼa tolu fēnei kiā Petelo: “ ʼE ke ʼofa koa kiā te au?” Ei, ʼe ko te ʼofa ʼo Petelo kiā Sesu ʼaē ka ina uga ia ia ke ina fai he fagonogono kātoa, mo ina maʼu te ʼu “kiʼi faga ōvi” ʼa Sesu pea mo liliu ko tanatou tagata tauhi ōvi fakalaumālie.​—Soane 21:15-17, MN.

¹⁰ Ia ʼaho nei, ʼe mole tou felogoi feiā mo Sesu ohage ko Petelo. Kae ʼe tou mahino lelei ki te ʼu meʼa ʼaē neʼe fai e Sesu maʼa tatou. ʼE malave ki totatou loto tona ʼofa lahi ʼo ina “ahiahi te mate o uhiga mo te tagata fuape.” (Hepeleo 2:9; Soane 15:13) ʼE tou hage ko Paulo ʼi tana tohi fēnei: “Ko te ʼofa ʼo Kilisito ʼe ina fakamālohiʼi tatou . . . Neʼe mate maʼa te hahaʼi fuli ke feala kiā nātou ʼaē ʼe māʼuʼuli, ke mole kei nātou māʼuʼuli maʼa nātou totonu, kae ke nātou māʼuʼuli maʼa ia.” (2 Kolonito 5:14, 15, MN ) ʼE tou fakahā ʼe maʼuhiga kiā tatou te ʼofa ʼo Sesu pea mo tou ʼofa kiā te ia ʼaki tatatou fakahoko fakamalotoloto te fakatotonu ʼaē ke tou fai he fagonogono kātoa. (1 Soane 2:3-5) ʼE mole tou fia meʼa noaʼi anai te gāue fai faka mafola, ohage ʼe tou meʼa noaʼi ia te sākilifisio ʼa Sesu.​—Hepeleo 10:29.

Tou Tōkakaga Tāfito Ki Te Meʼa ʼAē ʼe Maʼuhiga

11, 12. Koteā te tupuʼaga ʼo te haʼu ʼa Sesu ki te malamanei, pea neʼe ina fakahā feafeaʼi tana tokaga tāfito ki te faʼahi ʼaia?

¹¹ ʼI te temi ʼaē neʼe tuʼu ai ia Sesu iā muʼa ʼo Posio Pilato, neʼe ina ʼui fēnei: “Neʼe au tupu ʼuhi ko te potu ʼaenī, pea neʼe au haʼu ki te malamanei ʼuhi ko te potu ʼaenī: ko te fakamoʼoni ki te moʼoni.” (Soane 18:37, MN ) Neʼe mole tali e Sesu ke fakahalaʼi ia ia mai tana tala ʼaē te moʼoni. Neʼe ko te finegalo ʼaia ʼo te ʼAtua ʼo ʼuhiga mo ia.

¹² ʼE mahino ia neʼe ʼahiʼahiʼi e Satana ia Sesu ʼi te faʼahi ʼaia. ʼI te ʼosi papitema pe ʼa Sesu, neʼe foaki e Satana kiā ia te fealagia ʼaē ke liliu ko he tahi ʼe maʼuhiga ʼaupito ʼi te malamanei, ʼo ina foaki kiā ia “te atu puleaga o te malama-nei mo onatou kololia.” (Mateo 4:8, 9) Ki muli age, neʼe fia fakanofo hau ia ia e te kau Sutea. (Soane 6:15) Ia ʼaho nei, ʼe fakakaukau e ʼihi te ʼu lelei ʼaē neʼe feala ke fai e Sesu mo kanapaula neʼe ina tali te ʼu meʼa ʼaia, ʼo lagi nātou manatu, ʼaki te tuʼulaga ʼaia neʼe feala kiā Sesu ke ina fai he ʼu tuʼuga gāue lelei maʼa te malamanei. Kae ko Sesu neʼe fakafisi ki te ʼu manatu ʼaia. Neʼe tokaga tāfito ia ke ina faka mafola ia te moʼoni.

13, 14. (a) Koteā ʼaē neʼe mole ina fakahalaʼi ia Sesu mai tana gāue maʼuhiga? (b) Logola te masiva ʼa Sesu, kae koteā te fealagia neʼe ina foaki ki te hahaʼi?

¹³ Pea neʼe mole faiga e Sesu ke maʼu koloā. Koia neʼe mole ko he tagata maʼu meʼa, pea neʼe mole pe la hona ʼapi maʼana. ʼI te tahi lakaga, neʼe ina ʼui fēnei: “ ʼE maʼu te ʼu tafu ʼo te ʼu lenato pea mo te ʼu fataʼi ʼo te ʼu manulele ʼo te lagi, kae mole he potu ʼo te Foha ʼo te tagata ke ʼuluga ai tona ʼulu.” (Mateo 8:20, MN ) ʼI te temi ʼaē neʼe mate ai Sesu, ko te meʼa maʼuhiga pe e tahi ʼaē neʼe ina maʼu neʼe ko te kofu ʼaē neʼe matetea kiai te kau solia Loma. (Soane 19:23, 24) Neʼe fakaʼofaʼofa koa te maʼuli ʼo Sesu? Kailoa ia!

¹⁴ Neʼe maʼuhiga age te meʼa ʼaē neʼe fakahoko e Sesu ʼi te meʼa ʼaē ʼe feala ke fai e he tahi ʼe maʼu paʼaga, ʼe ina foaki he falā moʼo tokoni ki te hahaʼi. Neʼe ʼui fēnei e Paulo: “E koutou iloi te ofa o totatou Aliki ko Sesu Kilisito, iaʼia ae nee fakamasivaʼi o uhiga mo koutou logope tona koloaʼia, ke koutou maukoloa i tona masiva.” (2 Kolonito 8:9; Filipe 2:5-8) Logola tona masiva faka koloā, kae neʼe foaki e Sesu te fealagia ʼaē ki te hahaʼi agavaivai ke nātou maʼu te maʼuli haohaoa pea mo heʼegata. ʼE tou loto fakafetaʼi lahi kiā te ia! Pea ʼe tou fiafia lahi ʼi te fakapale ʼaē neʼe ina maʼu, koteʼuhi neʼe tokaga tāfito ke ina fai te finegalo ʼo te ʼAtua.​—Pesalemo 40:8; Gaue 2:32, 33, 36.

15. Koteā ʼaē ʼe maʼuhiga age ʼi te ʼu koloā?

¹⁵ Ko te kau Kilisitiano ʼaē ʼe nātou faiga ia ʼaho nei ke nātou faʼifaʼitakiʼi ia Sesu, ʼe mole nātou tuku ia te ʼu koloā ke nātou fakahalaʼi nātou. (1 Timoteo 6:9, 10) ʼE nātou ʼiloʼi ʼe feala ke nātou māʼuʼuli fīmālie ʼaki te ʼu koloā, kae ʼe nātou toe ʼiloʼi foki ʼe mole nātou maʼu anai te maʼuli heʼegata ʼaki te ʼu koloā. Ka mate he Kilisitiano, ʼe mole kei maʼuhiga tona ʼu koloā kiā ia ohage pe ko te mole maʼuhiga ʼo te kofu ʼa Sesu kiā ia ʼi tana mate. (Tagata Tānaki 2:10, 11, 17-19; 7:12) Ka mate he Kilisitiano, ko te meʼa pe ʼe tahi ʼaē ʼe maʼuhiga moʼoni ʼe ko tana ʼu felogoi mo Sehova pea mo Sesu Kilisito.​—Mateo 6:19-21; Luka 16:9.

ʼE Mole Nātou Lotovaivai ʼi Te ʼu Fakafeagai

16. Neʼe tali feafeaʼi e Sesu ia te ʼu fakafeagai?

¹⁶ Ko te ʼu fakafeagai neʼe mole ina tāʼofi ia Sesu ke ina faka mafola te moʼoni. Māʼiape la tana ʼiloʼi ʼaē ʼe fakaʼosi anai tana minisitelio ʼi te kele ʼaki tana mate faka sākilifisio, kae neʼe mole lotovaivai ai. Neʼe ʼui fēnei e Paulo ʼo ʼuhiga mo Sesu: “ ʼUhi ko te fiafia ʼaē neʼe fakapapau age kiā te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hepeleo 12:2, MN ) Koutou fakatokagaʼi neʼe “meʼa noaʼi [e Sesu] te ufiufi.” Neʼe mole ina tokagaʼi te manatu ʼo tona ʼu fili ʼo ʼuhiga mo ia, kae neʼe tokaga tāfito ke ina fai te finegalo ʼo te ʼAtua.

17. Koteā ʼaē ʼe feala ke tou ako mai te faʼa kātaki ʼa Sesu?

¹⁷ ʼI tana fakahā te ako mai te faʼa kātaki ʼa Sesu, neʼe fakaloto mālohiʼi fēnei e Paulo te kau Kilisitiano: “Koutou tokagaʼi fakalelei, ia ia ʼaē neʼe ina kātakiʼi te ʼu palalau fakafeagai ʼaia mai te kau agahala, ʼaē neʼe fua kovi kiā nātou, ke mole koutou fiu pea mo lotovaivai ʼi tokotou ʼu nefesi.” (Hepeleo 12:3, MN ) ʼE moʼoni, ʼe feala ke tou lotovaivai ʼi tatatou felāveʼi ʼi te ʼaho fuli pe mo te ʼu fakafeagai peʼe ko te manukinuki. ʼE feala ke tou gaʼegagaʼe ʼi te tauʼi tuʼumaʼu ia te ʼu fakahala ʼo te malamanei, ʼo lagi manukiʼi tatou e totatou ʼu kāiga ʼaē ʼe nātou fakaloto mālohiʼi tatou ke tou liliu ko he tahi ʼe logona. Kae ohage ko Sesu ʼe tou kumi te tokoni ʼa Sehova, ʼi tatatou fakatotonu ʼaē ke tou fakamuʼamuʼa te Puleʼaga ʼi totatou maʼuli.​—Mateo 6:33; Loma 15:13; 1 Kolonito 2:4.

18. Koteā te ako lelei ʼe feala ke tou tāʼofi mai te ʼu palalau ʼa Sesu kiā Petelo?

¹⁸ Neʼe hā te mole loto ʼaē ʼa Sesu ke fakahalaʼi ia ia, ʼi te temi ʼaē neʼe kamata palalau ai ki tana kau tisipulo ʼo ʼuhiga mo tana mate. Neʼe fakaloto mālohi e Petelo ia Sesu ke “agalelei” kiā ia totonu, ʼo ina ʼui fakahagatonu age “kailoa, ʼe mole hoko anai kiā te koe he [meʼa] feiā.” Neʼe mole fia fakalogo Sesu ki he meʼa ʼe ina fakavaivaiʼi anai tona loto mālohi ʼaē ke ina fai ia te finegalo ʼo Sehova. Neʼe lītuʼa ia kiā Petelo pea neʼe ʼui maʼana: “Haʼu ʼi ʼoku tuʼa, Satana! ʼE ko koe ko te maka fakatupu tūkia kiā te au, heʼe mole ke manatu ʼaki te ʼu manatu ʼa te ʼAtua, kae ʼaki te ʼu manatu ʼa te tagata.” (Mateo 16:21-23, MN ) ʼOfa pe ke tou fakatotonu ke mole tou fakalogo ki te ʼu manatu ʼa te ʼu tagata. Kae ke takitaki tuʼumaʼu tatou e te ʼu manatu ʼa te ʼAtua.

ʼE Tou Maʼu He ʼu Tapuakina Moʼoni

19. Logola neʼe ina fakahoko he ʼu milakulo, kae koteā te faʼahi ʼaē neʼe maʼuhiga age ʼi te minisitelio ʼa Sesu?

¹⁹ Neʼe fakahoko e Sesu he ʼu tuʼuga milakulo moʼo fakamoʼoni ai ko ia te Mesia. Neʼe ina fakatuʼuake mo te kau mate. Neʼe kaugamālie ia nātou ʼaē neʼe fia logo ʼuhi ko tanatou sisio ki te ʼu gāue ʼaia, kae neʼe mole haʼu pe Sesu ki te kele moʼo fakahoko te ʼu gāue ʼaia. Neʼe haʼu ʼo fakamoʼoni ki te moʼoni. Neʼe ina ʼiloʼi neʼe faka temi pe te ʼu lelei fakasino ʼaē neʼe ina fakahoko. Māʼiape la mo te hahaʼi ʼaē neʼe ina fakatuʼuake, neʼe nātou mamate ki muli age. Neʼe gata pe ki tana faka mafola te moʼoni neʼe lava tokoni ai ki ʼihi ke nātou maʼu te maʼuli heʼegata.​—Luka 18:28-30.

20, 21. ʼE hā feafeaʼi te fakapotopoto ʼa te kau Kilisitiano ʼo ʼuhiga mo te ʼu gāue lelei?

²⁰ Ia ʼaho nei, ʼe faiga e ʼihi hahaʼi ke nātou faʼifaʼitakiʼi te ʼu gāue lelei ʼaē neʼe fai e Sesu, ʼo nātou laga he ʼu fale mahaki peʼe nātou tokoni ki te hahaʼi māsisiva ʼi te malamanei. ʼI ʼihi temi ʼe nātou foaki he ʼu paʼaga lahi ki te ʼu faʼahi ʼaia, pea ʼe vikiʼi tanatou fakamalotoloto; kae ko te faka fīmālie ʼaē ʼe nātou foaki ʼe faka temi pe ia. ʼE ko te Puleʼaga tokotahi pe ʼaē ka ina ʼaumai anai te fīmālie heʼegata. Koia ohage ko Sesu, ʼe tōkakaga tāfito te kau Fakamoʼoni ʼa Sehova ke nātou faka mafola ia te moʼoni ʼo ʼuhiga mo te Puleʼaga.

²¹ ʼE moʼoni ʼe fai e te kau Kilisitiano moʼoni he ʼu gāue ʼe lelei. Neʼe tohi fēnei e Paulo: “ ʼI te temi fuli pe ʼaē ʼe tou maʼu ai hotatou temi faigamālie, tou fai te meʼa ʼaē ʼe lelei ki te hahaʼi fuli pe, kae tāfito foki kiā nātou ʼaē ko ʼotatou kāiga ʼi te tui.” (Kalate 6:10, MN ) Ka hoko he tuʼutāmaki peʼe ka nofo he tahi ʼi te faigataʼaʼia, pea ʼe tou “fai ia te lelei” ki totatou tatau peʼe ki totatou ʼu tēhina Kilisitiano. Kae ʼe tou tōkakaga tāfito pe anai ke tou faka mafola ia te moʼoni.

Tou Ako Mai Te Faʼifaʼitaki ʼa Sesu

22. He koʼe ʼe fai faka mafola ia te kau Kilisitiano ki tonatou ʼu tatau?

²² Neʼe tohi fēnei e Paulo: “Ei, malaʼia kiā te au mo kapau ʼe mole au tala te logo lelei!” (1 Kolonito 9:16, MN ) Neʼe mole ina meʼa noaʼi ia te logo lelei, koteʼuhi ʼi tana faka mafola ia te logo lelei ʼaia neʼe ina hāofaki ai ia ia totonu pea mo nātou ʼaē neʼe fakalogo kiā ia. (1 Timoteo 4:16) ʼE tou toe manatu feiā ʼo ʼuhiga mo tatatou minisitelio. ʼE tou fia tokoni ki totatou ʼu tatau. ʼE tou fia fakahā totatou ʼofa kiā Sehova. ʼE tou fia fakahā totatou ʼofa kiā Sesu pea mo tatatou loto fakafetaʼi ʼaupito ʼuhi ko tona ʼofa lahi kiā tatou. Koia, ʼe tou faka mafola ai te logo lelei pea ʼe mole tou toe māʼuʼuli “maʼa te ʼu holi ʼo te tagata, kae maʼa te finegalo ʼo te ʼAtua.”​—1 Petelo 4:1, 2, MN.

23, 24. (a) Koteā te ako ʼe tou tāʼofi mai te gelu faka milakulo? (b) Ko ai ia ʼaho nei ʼe nātou fai he fagonogono kātoa?

²³ Ohage ko Sesu, ʼe mole tou tuku tatatou gāue maʼuhiga ʼaia mokā manukiʼi tatou peʼe ka fakafisi fakaʼitaʼita mai iā te hahaʼi. ʼE tou tāʼofi te ako mai te milakulo ʼaē neʼe fai e Sesu, ʼi te temi ʼaē neʼe ina pāui ai ia Petelo pea mo Atelea ke nā mulimuli ia te ia. ʼE tou mahino ai, kapau ʼe tou fakalogo kiā Sesu pea mo tou ʼolo ʼo lī totatou ʼu kupega ʼi he koga tai ʼe hage ʼe mole ʼikaʼia, ʼe mahino ia ʼe fua manuʼia anai tatatou gelu ʼaia. Tokolahi te kau Kilisitiano neʼe fua lelei tanatou fai faka mafola, ʼi tanatou ʼosi gāue lolotoga ni ʼu taʼu ʼi he telituale neʼe hage neʼe mole maʼu ai hona ʼu fua. Ko ʼihi neʼe feala ke nātou ʼolo ki he ʼu telituale ʼe lahi ai te fia logo ʼa te hahaʼi pea neʼe nātou maʼu ai he ʼu fua lelei. Tatau aipe peʼe feafeaʼi tatatou faʼahiga fai faka mafola, kae ʼe tou haga lī anai totatou kupega, ʼaē ko te faka mafola ʼo te moʼoni. ʼE tou ʼiloʼi neʼe mole heʼeki ʼui e Sesu kua ʼosi kātoa te gāue fai faka mafola ʼi he potu ʼo te kele.​—Mateo 24:14.

²⁴ Ko te toko ono miliona tupu kau Fakamoʼoni ʼa Sehova ʼe nātou maʼumaʼua ʼi temi nei ia fenua e 230 tupu. ʼI Te Tule Leʼo ʼo te ʼaho 1 ʼo Fepualio 2005, ʼe tohi ai anai te tānaki ʼo tanatou gāue ʼi te malamanei kātoa lolotoga te taʼu gāue 2004. ʼE fakahā anai e te tānaki gāue ʼaia te tapuakina lahi ʼa Sehova ia te gāue fai faka mafola. ʼI te temi ʼaē kei toe ki te tuʼu ʼaenī, ʼofa pe ke maʼuhiga tuʼumaʼu kiā tatou te ʼu palalau fakaloto mālohi ʼaenī ʼa Paulo: “Faka mafola te folafola, ʼaua naʼa tou fakatotoho.” (2 Timoteo 4:2, MN ) ʼOfa pe ke tou haga fai he fagonogono kātoa ʼo aʼu ki te temi ʼaē ka ʼui ai e Sehova ʼe kua kātoa ia te gāue.

ʼO kamata ʼi te taʼu ʼaenī, ko te Tānaki ʼo Te Taʼu Gāue ʼa te kau Fakamoʼoni ʼa Sehova ʼi te Malamanei Kātoa, ʼe mole tuʼu anai ʼi Te Tule Leʼo ʼo te ʼaho 1 ʼo Sanualio. ʼE tuʼu anai ʼi Te Tule Leʼo ʼo te ʼaho 1 ʼo Fepualio.

ʼE Feala Koa Hakotou Tali?

• Koteā tona ʼaoga kiā tatou ia te ako ʼaē neʼe foaki e Sesu ki tana kau tisipulo?

• Neʼe feafeaʼi te aga ʼa Sesu ki te hahaʼi ʼaē neʼe fai faka mafola ki ai?

• Koteā ʼaē ʼe ina uga tatou ke tou fai he fagonogono kātoa?

• Ko te ʼu ʼaluʼaga fea ʼaē ʼe feala ke tou tōkakaga tāfito ʼo fai ai ia te finegalo ʼo te ʼAtua, ohage ko Sesu?

[Paki ʼo te pasina 15]

ʼE fua lelei anai tatatou minisitelio mo kapau ʼe tou tōkakaga ki te hahaʼi ohage ko Sesu

[Paki ʼo te pasina 16]

Neʼe haʼu tāfito Sesu ki te kele moʼo faka mafola ia te moʼoni

[Paki ʼo te pasina 17]

ʼE tōkakaga tāfito te kau Fakamoʼoni ʼa Sehova ke nātou fai he fagonogono kātoa